Rebyo 21 sa Doktrinal nga Kahanas

Gamita ang mga Tudling sa Doktrinal nga Kahanas

Ang usa ka katuyoan sa doktrinal nga kahanas mao ang pagtabang kanimo nga mas makasabot sa mga pagtulun-an sa Manluluwas, makapasabot niini sa imong kaugalingong mga pulong, ug makagamit niini sa imong kinabuhi. Kini nga leksiyon maghatag kanimo og kahigayonan sa pagbansay sa paggamit sa mga tudling sa doktrinal nga kahanas sa Bag-ong Tugon ngadto sa nagkalainlain nga mga kahimtang.

Pagrebyo sa mga tudling sa doktrinal nga kahanas

Irebyo ang mga pakisayran sa kasulatan ug ang mahinungdanong hugpong sa mga pulong sa kasulatan alang sa mosunod nga mga tudling sa doktrinal nga kahanas. Paghunahuna kon sa unsang paagi ang doktrina sa matag tudling mahimong magamit sa imong kinabuhi.

Itukma ang pakisayran sa doktrinal nga kahanas ngadto sa eksakto nga mahinungdanong hugpong sa pulong sa kasulatan. Ang eksaktong mga tubag anaa sa kataposan sa leksiyon.

1. Mga Hebreohanon 12:9 

2. Santiago 1:5–6

3. Santiago 2:17–18

4. 1 Pedro 4:6

5. Pinadayag 20:12

1. “Ang [hugot nga pagtuo] patay kon kini walay binuhatan.”

2. Ang Langitnong Amahan mao “ang Amahan sa mga espiritu.”

3. “Ug ang mga patay gipanaghukman … sumala sa ilang mga binuhatan.”

4. “Kon aduna man kaninyoy nakulangan og kaalam, papangayoa siya sa Dios.”

5. “Ang maayong balita [gi]wali hangtod ngadto sa mga patay.”

Gamita ang doktrina nga gitudlo sa mga tudling sa doktrinal nga kahanas

Ang booklet nga Alang sa Kalig-on sa mga Kabatan-onan naghatag sa mosunod nga tambag: “Tun-i ang mga kasulatan matag adlaw ug gamita ang inyong nabasa nganha sa inyong kinabuhi. Ang mga kasulatan gamhanan nga tinubdan sa personal nga pagpadayag ug paggiya ug usa ka makanunayon nga kusog sa imong pagpamatuod” ([2011], 42).

• Unsa nga mga matang sa mga butang ang imong gibuhat nga nagtabang kanimo sa paggamit sa unsay imong nakat-onan diha sa mga kasulatan ngadto sa imong kinabuhi?

• Unsa ang tudling sa doktrinal nga kahanas nga nakatabang nimo sa imong kinabuhi? Giunsa niini pagtabang kanimo?

Ang mosunod nga pagbansay makatabang kanimo nga mabansay ang paggamit og piho nga mga tudling sa doktrinal nga kahanas diha sa imong kaugalingong kinabuhi. Diha sa imong pagkompleto sa pagbansay, pag-andam sa pagdawat sa personal nga pagpadayag. Ang Espiritu Santo mahimong magdasig kanimo og mga panghunahuna o mga ideya kung unsaon nimo paggamit ang mga kasulatan sa imong kaugalingong kinabuhi. Mahimong andam sa pagsulat og bisan unsang mga pangaghat nga imong madawat.

1. Kompletoha ang mosunod diha sa imong journal sa pagtuon:

1. Ihulagway ang usa ka tinud-anay nga senaryo o pangutana og may kalabotan sa usa o daghan pa sa mga tudling sa kasulatan sa doktrinal nga kahanas niini nga leksiyon ( Mga Hebreohanon 12:9; Santiago 1:5–6; Santiago 2:17–18; 1 Pedro 4:6; Gipadayag 20:12).

2. Pagpakigbahin og usa ka kasinatian nga may kalabotan sa doktrina nga gitudlo sa tudling. Kini mahimong usa ka personal nga kasinatian, usa ka kasinatian sa usa ka tawo nga imong kaila, o usa ka kasinatian nga narekord sa mga kasulatan.

3. Ipakigbahin kon sa unsang paagi nimo magamit ang doktrina sa imong kaugalingong kinabuhi o unsay natabang niini kanimo nga makasabot mahitungod sa Langitnong Amahan o ni Jesukristo.

2. Tubaga ang mosunod nga mga pangutana diha sa imong journal sa pagtuon:

• Unsa ang imong mabuhat karong semanaha nga magtabang kanimo nga magamit ang mga kasulatan sa imong kinabuhi?

• Sa unsang paagi nga ang pagbuhat niini makatabang kanimo nga mas mahiduol ngadto sa Manluluwas?

Mga tubag sa pasulit: 1-b, 2-d, 3-a, 4-e, 5-c