Pagkakaplag og Kalipay ug Kalinaw diha ni Jesukristo
Imahe
Batan-ong babaye nga namalandong.
Unsay nagdala kanimo og kalinaw ug kahupay sa mga panahon sa kaugtas [stress] ug pagsulay? Sa iyang sulat ngadto sa Mga Taga-Filipos, kanunay gipamulong ni Pablo ang kalipay ug kalinaw. Sa pagtapos niining sulat, si Pablo mitudlo nga si Jesukristo mao ang tinubdan sa kalinaw ug pagmaya ug mipasabot pag-ayo kon unsay buhaton sa mga Santos aron mobati og kalipay ug “kalinaw sa Dios” (Mga Taga-Filipos 4:7). Sa imong pagtuon, tinguhaa nga maila ang mga paagi nga ikaw makadawat og dugang nga kalipay ug kalinaw pinaagi ni Jesukristo sa imong kaugalingong kinabuhi.
Mga hagit ni Pablo
Susiha ang mosunod nga hulagway nga nagrepresentar ni Apostol Pablo ug sa pipila sa iyang mga hagit ug posibleng mga kabalaka. Hinumdomi nga kini agig dugang ngadto sa pagkabilanggo ni Pablo sa balay samtang nagsulat sa iyang sulat ngadto sa mga Santos sa Filipos. Ikonsiderar giunsa niining mga hagit pagkahimong mga babag sa mga pagbati ni Pablo og kalinaw ug kalipay.
Sa imong journal sa pagtuon, pagmugna og usa ka lingin nga adunay tukog nga porma [stick figure] o linya nga drowing nga nagrepresentar kanimo, sama sa kang Pablo. Sa gawas sa lingin, paglista og pipila sa imong kaugalingong mga kaguol ug mga kabalaka nga usahay makahimong lisod alang kanimo nga mobati og kalinaw ug kalipay.
Asa man mangita ang mga tawo aron makakaplag og mas dakong kalinaw ug kalipay niini nga kinabuhia? Asa man ka mangita og kalinaw ug kalipay? Nagmalamposon ka ba sa imong mga paningkamot?
Usa ka mensahe sa kalipay ug kalinaw
Bisan pa sa pagkabilanggo sa balay ug nag-atubang og uban pang mga hagit, si Pablo kanunayng naghisgot bahin sa kalipay ug kalinaw diha sa iyang sulat ngadto sa mga taga-Filipos. Samtang gisultihan ni Pablo ang mga taga-Filipos nga nakakaplag siya ug dakong kalipay sa ilang kaayo ug pagpakabana kaniya (tan-awa ang Mga Taga-Filipos 4:1, 10, 14–16), kanunay niyang gipahinumdoman sila sa kinalabwang tinubdan sa iyang kalipay.
Basaha ang Mga Taga-Filipos 4:4, 10, 13, ug ikonsiderar ang pagmarka kang kinsa gipasidungog ni Pablo ang iyang kalipay ug kusog.
Ngano sa imong hunahuna nga si Pablo kanunay nga naghisgot ni Jesukristo isip ang tinubdan sa iyang kusog, kalipay, ug kalinaw?
Si Presidente Russell M. Nelson mitudlo nganong si Jesukristo mao ang tinubdan sa kalinaw ug kalipay.
Imahe
Opisyal nga hulagway ni Presidente Russell M. Nelson nga gilitratohan niadtong Enero 2018
Minahal nga mga kaigsoonan, ang kalipay nga atong gibati dili kaayo konektado sa mga sirkumstansya sa atong kinabuhi apan konektado kaayo sa gitutokan sa atong kinabuhi.
Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi. Ang kalipay moabot gikan ug tungod Kaniya. Siya ang tinubdan sa tanang kalipay. …
Sama nga ang Manluluwas mitanyag og kalinaw nga “lapaw sa tanang pagpanabot,” [Mga Taga-Filipos 4:7], Siya usab mitanyag og gikusgon, giladmon, ug gilapdon sa kalipay nga lapas sa tawhanong pangatarongan o mortal nga panabot. Sama pananglit, daw dili posible nga mobati og kalipay kon nag-antos ang inyong anak og walay kaayohan nga sakit o kon nawagtangan kamo sa inyong trabaho o kon giluiban kamo sa inyong kapikas. Apan mao gayod kana ang kalipay nga gitanyag sa Manluluwas. Ang Iyang kalipay makanunayon, nagsiguro kanato nga ang atong “mga kasakitan sulod lamang sa mubo nga higayon” [ Doktrina ug mga Pakigsaad 121:7] ug ipahinungod ngadto sa atong kaayohan [tan-awa ang 2 Nephi 2:2].
Unsa ang gitudlo ni Presidente Nelson nga labing mahinungdanon kanimo? Ngano man?
Sa imong hunahuna sa unsang paagi nga ang tinuod nga pagsabot ug paggamit sa pagtulun-an ni Presidente Nelson makaapekto sa imong kinabuhi?
Sa unsang paagi si Jesukristo midala kanimo og kalinaw ug kalipay sa imong kinabuhi?
Pagkuha sa kalipay nga gitanyag ni Jesukristo
Si Presidente Nelson ug si Apostol Pablo parehas nga naghatag og pihong tambag mahitungod kon unsa ang atong mabuhat aron makuha ang kalinaw ug kalipay nga gihimong posible pinaagi kang Jesukristo.
Basaha ang Mga Taga-Filipos 4:6–9, 11 ug ang mosunod nga pamahayag ni Presidente Nelson, mangita kon unsaon nato pagkakaplag ang kalinaw ug kalipay diha kang Jesukristo. Mahimo nimong markahan sa imong mga kasulatan o ilista sa imong journal sa pagtuon unsa ang imong nakaplagan. Timan-i nga si Joseph Smith migamit isip tinubdan sa Mga Taga-Filipos 4:8 nga “ang tambag ni Pablo” ug gilakip kini isip bahin sa ikanapulog tulo nga artikulo sa hugot nga pagtuo.
Imahe
Opisyal nga hulagway ni Presidente Russell M. Nelson nga gilitratohan niadtong Enero 2018
Nan, sa unsang paagi kita makaangkon niana nga kalipay? Makasugod kita pinaagi sa “[pag]tutok kang Jesus nga mao ang mag-uugmad ug maghihingpit sa atong pagtuo” [Mga Hebreohanon 12:2] “sa matag hunahuna” [Doktrina ug mga Pakigsaad 6:36]. Makapasalamat kita Kaniya diha sa atong mga pag-ampo ug pinaagi sa pagsunod sa mga pakigsaad nga atong gihimo uban Kaniya ug sa atong Langitnong Amahan. Samtang ang Manluluwas nag-anam sa pagkahimong tinuod ngari kanato ug samtang mangamuyo kita nga ang Iyang kalipay ihatag ngari kanato, modako ang atong kalipay.
1. Kompletoha ang mosunod nga kalihokan diha sa imong journal sa pagtuon:
Susiha ang lista o mga sulat gikan sa imong pagtuon sa Mga Taga-Filipos ug ang mga pulong ni Presidente Nelson, ikonsiderar unsa ang labing mipatigbabaw kanimo ug ngano. Pag-ila og usa ka baroganan ug isulat kini sa imong journal kauban sa pakisayran sa kasulatan nga diin kini naggikan. Ang imong gipabaga nga pagkasuwat sa kamatuoran mahimong magsugod sama niini:
Ako magmalipayon ug makadawat og dugang pa nga kalinaw sa Dios samtang ako …
Pangita og inspirasyon gikan sa Espiritu aron mapalawom ang imong pagsabot sa kamatuoran nga imong napalgan pinaagi sa dugang nga pagtuon. Pipila sa mga paagi nga lagmit nimong mabuhat kini naglakip sa:
Pagpangita og mahinungdanong pulong gikan sa baroganan nga imong nakaplagan diha sa Giya ngadto sa mga Kasulatan, anaa sa ChurchofJesusChrist.org.
Pagpangita og mga cross-reference sa may kalabotan nga mga kasulatan. Kini mahimong ang mga tudling sa doktrinal nga kahanas o mga kasulatan nga anaa makita sa mga footnote. Ikonsiderar ang pagsulat niini nga mga pakisayran sa kasulatan duol sa bersikulo diin imong naila ang maong baroganan.
Pagrebyo sa Alang sa Kalig-on sa mga Kabatan-onan (booklet, 2011), nga magpunting sa “Pasalamat,” “Pagkamatinuoron ug Kaligdong,” o uban pang mga sumbanan nga may kalabotan sa baroganan nga imong naila.
Ipakigbahin unsa ang imong nakat-onan, lakip ang:
Ang baroganan nga imong nakaplagan ug ang pakisayran sa kasulatan nga nagtudlo niini.
Ang unsay imong nakaplagan (mga cross-reference, mga panabang sa pagtuon, ug uban pa) nga mipalawom sa imong pagsabot ug bisan unsa pang dugang nga mga panabot nga anaa kanimo gikan niini nga kapanguhaan.
Sa unsang paagi nga ang paggamit niini nga baroganan makatabang kanimo nga makakita og mas dakong kalipay ug kalinaw sa Dios.
Opsiyonal: Gustong Makakat-on Pa og Dugang?
Unsa ang akong mabuhat kon lisod ang pagkaplag og kalinaw ug paglaom?
Unsaon nako sa pagkakaplag og kalinaw diha kang Jesukristo?
Si Elder Ulisses Soares sa Korum sa Napulog Duha ka Apostoles mitudlo:
Imahe
Elder Ulisses Soares, Korum sa Napulog Duha ka Apostoles opisyal nga hulagway.
Ang pagtinguha kang Kristo sa matag hunahuna ug pagsunod Kaniya sa tibuok natong kasingkasing nagkinahanglan nga kita mopahiangay sa atong pangisip ug mga tinguha sa Iyaha. Ang mga kasulatan nagtudlo niini nga pagpahiangay isip nga “paglig-on diha sa Ginoo” [Mga Taga-Filipos 4:1]. Kini nga binuhatan nagpasabot nga kanunay kitang magpakabuhi subay sa ebanghelyo ni Kristo ug motutok matag adlaw sa tanang butang nga maayo. Diha lamang atong makab-ot “ang kalinaw sa Dios, nga lapaw sa tanang panabot” ug “manalipod sa [atong] kasingkasing ug mga hunahuna diha sa atong pagkahiusa kang Kristo Jesus.” [Mga Taga-Filipos 4:7].
Si Sister Jean B. Bingham, Kinatibuk-ang Presidente sa Relief Society, mitudlo:
Imahe
Opisyal nga Hulagway ni Sister Jean B. Bingham. Gilitratohan niadtong 2017.
Si Jesukristo mao usab ang tinubdan sa kalinaw. Siya nagdapit kanato sa “pagsandig diha sa [Iyang] bukton” [“Lean on My Ample Arm,” Hymns, nu. 120] ug gisaad ang “kalinaw … nga lapaw sa tanang panabot,” [ Mga Taga-Filipos 4:7], usa ka pagbati nga moabot kon ang Iyang Espiritu “nagsulti[g] kalinaw sa atong mga kalag” [ Alma 58:11] walay pagsapayan unsa nga mga hagit ang naglibot kanato. Personal man nga mga paningkamot, kagubot sa pamilya, o krises sa komunidad, ang kalinaw moabot samtang nagsalig kita nga ang Bugtong Anak sa Dios adunay gahom sa paghupay sa atong nagsakit nga mga kalag.
Unsa nga mga panalangin ang moabot samtang ako magtinguha og kalinaw diha kang Jesukristo?
Si Presidente Russell M. Nelson mitudlo:
Imahe
Opisyal nga hulagway ni Presidente Russell M. Nelson nga gilitratohan niadtong Enero 2018
Karon, akong minahal nga mga kaigsoonan, ako mopanalangin kaninyo nga kamo mapuno sa kalinaw ni Ginoong Jesukristo. Ang Iyang kalinaw dili matugkad sa tawo. Ako mopanalangin kaninyo og dugang nga tinguha ug abilidad sa pagsunod sa mga balaod sa Dios. Ako mosaad nga kon buhaton ninyo, kamo mabubu-an og mga panalangin, lakip ang dugang kaisog, dugang nga personal nga pagpadayag, mas nindot nga panag-uyon sa inyong mga panimalay, ug hingpit nga kalipay bisan taliwala sa walay kasiguroan.
