Pagtinguha pa og Dugang nga Panabot pinaagi sa Balaanong Gitudlo nga mga Tinubdan
Imahe
batan-ong lalaki nga nagtan-aw sa computer
Ang usa sa mga katuyoan sa doktrinal nga kahanas mao ang pagtabang kanimo sa pagkat-on ug paggamit sa mga baroganan sa pag-angkon og espirituhanong kahibalo. Makatabang kini nga leksiyon kanimo sa pagsabot sa importansya sa pagpangita sa kamatuoran pinaagi sa mga tinubdan nga mahigugmaong gihatag sa Langitnong Amahan ug ni Jesukristo.
Asa ka mangita og mga tubag?
Sulod sa usa ka minuto, sulayi sa pagpangita sa mosunod nga impormasyon.
Ang kahimtang sa panahon para sa umaabot nga kataposan sa semana
Ang ngalan sa kapital nga lungsod sa Greenland
Usa ka recipe para sa pasta o rice dish
Ikonsiderar ang mosunod nga mga pangutana.
Unsa nga mga tinubdan ang imong gigamit (o kasagaran nimong gamiton) aron mapangita ang impormasyon?
Nganong mosalig man ka niini nga mga tinubdan para sa impormasyon mahitungod niini nga mga matang sa mga pangutana?
Asa man kita makakita og mga tubag gikan sa Dios?
Asa nimo isugyot nga mangita ang mga tawo og mga tubag para sa importante nga mga pangutana mahitungod sa Dios, sa Simbahan, o sa plano sa kaluwasan?
Paghunahuna og bisan unsang mga pangutana nga aduna ka mahitungod sa Dios, sa Simbahan, o sa plano sa kaluwasan. Mahimong maglakip kini sa impormasyon nga imong nabasa o nadungog nga imong gihunahuna o nakahasol kanimo. Pangayoa ang giya sa Espiritu Santo sa pagkat-on sa mga baroganan niini nga leksiyon nga makatabang kanimo.
Basaha ang mga mosunod nga mga tudling, mangita kon sa unsang paagi nga ang mga tinubdan sa kamatuoran nga gitudlo niini nga mga tudling makapanalangin kanato.
Ang Parapo 11 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2022)
1. Tubaga ang mosunod nga mga pangutana diha sa imong journal sa pagtuon:
Unsa nga mga tinubdan sa kamatuoran ang imong nakita niini nga mga tudling? Nganong hingpit man kitang makasalig niini nga mga tinubdan?
Asa man lagmit nga mangita ang daghang tawo og impormasyon mahitungod sa mga espirituhanong mga pangutana nga kinahanglan nimo sila nga pasidan-an mahitungod niini? Ngano man?
Unsa kaha kon dili ako sigurado kon unsa ka kasaligan ang tinubdan sa impormasyon?
Ang usa sa labing komon nga mga paagi sa pagpangita alang sa impormasyon karon mao ang paggamit sa internet. Pinaagi sa internet, kita maka-access sa daghang maayo nga mga tinubdan sa impormasyon. Sa samang higayon, ang internet naglantad kanato sa daghang dili kasaligan ug dili tinuod nga mga tinubdan sa impormasyon. Si Elder Neil L. Andersen sa Korum sa Napulog Duha ka Apostoles mipasidaan:
Imahe
Elder Neil L. Andersen
Ang impormasyon sa internet walay salaan sa “kamatuoran”. Ang ubang impormasyon, bisan unsa pa ka makakumbinsir, dili gayod tinuod.
(Neil L. Andersen, “Joseph Smith,” Liahona, Nob. 2014, 29)
Basaha ang parapo 12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas. Ikonsiderar ang pagmarka kon nganong delikado nga mangita og mga tubag sa espirituhanong mga pangutana gikan sa wala mailhi o dili kasaligan nga mga tinubdan.
Kon makakita ka og bag-ong impormasyon mahitungod sa Dios, sa Simbahan, o sa plano sa kaluwasan, makatabang kon imong ipangutana ang mosunod sa imong kaugalingon mahitungod sa tinubdan sa impormasyon. Samtang nagbasa ka niini nga mga pangutana, pangitaa ang mga pangutana nga sa imong hunahuna makatabang kaayo kon magdesisyon nga mosalig ba sa usa ka tinubdan o dili. (Mahimo usab nimong tun-an ang matag usa sa mga kauban nga mga pakisayran sa kasulatan.)
Pipila sa mga pangutana alang sa pagsusi sa bag-ong impormasyon
Unsa ang akong gibati gikan sa Espiritu Santo sa dihang nabasa o nadungog nako kini nga impormasyon? (Tan-awa sa Doktrina ug mga Pakigsaad 50:23–24.)
Kini ba nga impormasyon mas makapaduol kanako ngadto ni Jesukristo ug sa Iyang Simbahan? (Tan-awa sa Moroni 7:15–17.)
Nakadasig ba kini nga impormasyon kanako sa pagsunod sa mga sugo sa Dios?
Nagkompirmar ba kini sa unsay akong nabati nga gisulti sa Espiritu Santo kanako nga matuod, o nakadasig ba kini kanako sa pagduhaduha sa mga kamatuoran sa ebanghelyo? (Tan-awa sa Moroni 10:5.)
Naggikan ba ang impormasyon sa tinubdan nga gikonsiderar nga kasaligan sa Manluluwas o sa mga lider sa Iyang Simbahan?
Unsa ang ikasulti sa akong mga ginikanan o sa mga lider sa Simbahan mahitungod niini nga impormasyon? (Kon ako matintal nga itago kini gikan kanila, unsa ang gisulti niana kanako mahitungod sa tinubdan niini?)
Hain niini nga mga pangutana nga sa imong hunahuna mao ang labing makatabang gayod alang kanimo? Ngano man?
Unsa pay laing mga pangutana nga sa imong hunahuna angay nga ipangutana sa usa ka tawo mahitungod sa impormasyon nga ilang nakita?
Pagpili og bahin sa impormasyon nga imong nadungog o usa ka pangutana nga aduna ka mahitungod sa Dios, sa Simbahan, o sa plano sa kaluwasan. Unya pagtagana og pipila ka minuto aron magpraktis sa pagpangita og mga tubag gamit ang balaanong gitudlo nga mga tinubdan. Sa uban pang mga butang, mahimo nimong ikonsiderar ang
pag-ampo;
pagsiksik diha sa mga kasulatan gamit ang Giya ngadto sa mga Kasulatan, o mga tudling sa doktrinal nga kahanas;
pagpangita diha sa mga pakigpulong sa kinatibuk-ang komperensiya, sa Gospel Topics nga pahina sa ChurchofJesusChrist.org, o sa Gospel Library app;
pagkontak sa usa ka tawo nga imong nailhan ug masaligan, sama sa ginikanan, bishop, lider sa kabatan-onan sa imong ward o branch, o magtutudlo sa seminary, aron tabangan ka sa pagpangita og mga tubag.
2. Tubaga ang mosunod nga mga pangutana diha sa imong journal sa pagtuon:
Unsay imong nakat-onan niini nga leksiyon nga makatabang kanimo kon ikaw adunay makitang bag-ong impormasyon mahitungod sa Dios o sa Simbahan?
Sa imong hunahuna ngano kaha nga ang mga tinubdan nga imong dangpan para sa mga tubag ug impormasyon importante man sa Langitnong Amahan ug ni Jesukristo?
Opsiyonal: Gustong Makakat-on pa og Dugang?
Unsay angay nakong buhaton kon dili nako makit-an ang tubag sa usa ka pangutana pinaagi sa balaanong gitudlo nga mga tinubdan?
Si Elder Neil L. Andersen sa Korum sa Napulog Duha ka Apostoles mitudlo:
Imahe
Elder Neil L. Andersen
Dili tanang tubag moabot diha-diha dayon, apan kasagaran sa mga pangutana masulbad pinaagi sa sinsero nga pagtuon ug pagtinguha sa mga tubag gikan sa Dios. …
Ang hugot nga pagtuo dili gayod mangayo og tubag sa matag pangutana apan magtinguha sa kasiguroan ug kaisog sa pagpadayon, usahay sa pag-ila nga, “Wala ko masayod sa tanan, apan nasayod ko og igo aron magpadayon diha sa dalan sa pagkadisipulo.”
Ang pagtugot sa kaugalingon diha sa kanunayng pagduhaduha, nga maoy giawhag gikan sa mga walay pagtuo ug sa mga dili matinud-anon, makapahuyang sa hugot nga pagtuo sa usa ka tawo diha ni Jesukristo ug sa Pagpahiuli.
Nganong kinahanglan ko nga magmatngon sa pagpangita og mga tubag mahitungod sa Simbahan gikan niadtong mibiya niini?
Si Elder Neal A. Maxwell (1926–2004) sa Korum sa Napulog Duha ka Apostoles miingon:
Imahe
Elder Neal A. Maxwell
Ang uban moinsister sa pagtuon mahitungod sa Simbahan pinaagi lamang sa mga tawo nga mibiya niini—sama sa pag-interbyo ni Judas aron makasabot ni Jesus. Ang mga mibiya sa Simbahan kanunay nga mosulti kanato mahitungod sa ilang kaugalingon kaysa nianang ilang gibiyaan.
(Neal A. Maxwell, “All Hell Is Moved” [Brigham Young University devotional, Nob. 8, 1977], 3, speeches.byu.edu)
Sa unsang paagi ang mga tinubdan sa impormasyon nga akong gipili makaapekto kanato sa espirituhanong paagi?
Tan-awa ang bidyo nga “Balaanong Gitudlo nga mga tinubdan” (9:16), nga anaa sa ChurchofJesusChrist.org. Tan-awa kon sa unsang paagi ang kabatan-onan diha sa bidyo naapektohan sa unsay ilang gipili nga paminawon ug diin sila mipili sa pagpangita alang sa mga tubag.
Ang bidyo nga “In Search of Truth” (3:03), nga anaa sa ChurchofJesusChrist.org, mahimong makatabang usab.
