Lucas 3:7–14

Ang Kalipay sa Paghinulsol

Ang usa ka paagi nga nakatabang si Juan nga Magbubunyag sa mga tawo sa pag-andam sa ilang mga kaugalingon sa pagdawat kang Jesukristo mao ang pag-awhag kanila nga maghinulsol. Tinguha niini nga leksiyon nga tabangan kang mas makasabot sa paghinulsol ug sa kalipay nga mahatag sa regular nga paghinulsol.

Unsay makahatag kanimo og kalipay?

Pamalandongi kon unsa ang makahatag kanimo og kalipay. Ikonsiderar ang paglista og daghang mga pananglitan sigon sa imong makaya sulod sa 30 ka segundo.

Gitudlo ni Presidente Russell M. Nelson ang mosunod mahitungod sa kon sa unsang paagi nga kita makadawat og kalipay sa atong mga kinabuhi:

Kon kita mopili nga maghinulsol, kita mopili nga mag-usab! Atong gitugutan ang Manluluwas nga mousab kanato ngadto sa labing maayo nga bersyon sa atong mga kaugalingon. Kita mopili nga molambo sa espirituhanon nga paagi ug makadawat sa hingpit nga kalipay––ang hingpit nga kalipay sa katubsanan diha Kaniya.

(Russell M. Nelson, “Kita Makabuhat og Mas Maayo pa ug Mahimong Mas Maayo,” Liahona, Mayo 2019, 67)

Ang paghinulsol mao ang pagbag-o pinaagi sa pagtalikod sa sala ug pagduol ngadto sa Dios pinaagi sa Pag-ula ni Jesukristo (tan-awa sa Giya ngadto sa mga Kasulatan, “Maghinulsol, Paghinulsol,” scriptures.ChurchofJesusChrist.org).

Gibutang ba nimo ang paghinulsol sa imong listahan sa mga butang nga makahatag kanimo og kalipay? Ngano o nganong wala man?

Kon wala ka maghunahuna sa paghinulsol isip butang nga makahatag kanimo og kalipay, unsa nga mga pagbati o mga emosyon ang maangkon kon maghunahuna ka og paghinulsol? Ngano man?
Ngano kaha nga ang usa ka tawo dili kanunay mobati dayon og kalipay samtang naghinulsol?

Pamalandongi ang bisan unsang mga pangutana nga lagmit nga aduna ka mahitungod sa paghinulsol. Sa ulahing bahin sa leksiyon, makabaton ka og oportunidad nga mangita og mga tubag niini nga mga pangutana.

“Paghinulsol kamo. … Andama ninyo ang dalan alang sa Ginoo”

Aron makatabang sa mga tawo sa pagdawat kang Jesukristo, giawhag sila ni Juan nga Magbubunyag nga maghinulsol (tan-awa sa Mateo 3:1–3).

Sa miaging leksiyon, gitun-an nimo kon unsa ang gisulat ni Marcos ug Mateo mahitungod kang Juan nga Magbubunyag. Naglakip si Lucas og dugang pang mga detalye mahitungod kang Juan. Basaha ang Lucas 3:10–14, nga mangita kon giunsa pagtabang ni Juan ang mga tawo nga maghinulsol.

Unsang mga kausaban ang giawhag ni Juan nga buhaton sa mga tawo?
Sa unsang paagi kaha nakatabang kini nga mga kausaban sa mga tawo sa pagtalikod gikan sa sala ug pag-andam aron dawaton ug sundon si Jesukristo?

Tun-i ang mosunod nga pamahayag ni Presidente Russell M. Nelson. Samtang gibuhat nimo kini, paghatag og pagtagad kon unsa ang gitudlo sa Espiritu Santo mahitungod sa paghinulsol ug sa Manluluwas nga si Jesukristo.

Kita Makabuhat og Mas Maayo pa ug Mahimong mas Maayo
Si Presidente Nelson nagtudlo bahin sa paghinulsol ug nagdapit sa mga naghupot sa pagkapari sa paghinusol aron sila mas hingpit nga makagamit sa gahum sa pagkapari.

Daghan ra kaayo ang nagkonsiderar sa paghinulsol isip silot––usa ka butang nga likayan gawas lang sa labing seryoso nga mga sirkumstansya. Apan kining pagbati nga gisilutan hinimo-himo ni Satanas. Siya mosulay sa pagpugong kanato sa paghunahuna kang Jesukristo, kinsa nagbarog nga andam mogakos, malaumon ug andam nga moalim, mopasaylo, mohugas, mopalig-on, molimpyo, ug mobalaan kanato.

Ang pulong nga paghinulsol sa Griyego nga Bag-ong Tugon mao ang metanoeo. Ang prefix nga meta- nagpasabot og “kausaban.” Ang suffix nga -noeo adunay kalabotan sa Griyego nga mga pulong nga nagpasabot nga “hunahuna,” “kahibalo,” “espiritu,” ug “gininhawa.”

Sa ingon, kon si Jesus moingon kaninyo ug kanako sa “paghinulsol,” [Lucas 13:3, 5], Siya nagdapit kanato sa pag-usab sa atong hunahuna, sa atong kahibalo, sa atong espiritu––bisan sa paagi sa atong pagginhawa. Siya nagsugo kanato sa pag-usab sa atong pamaagi sa paghigugma, paghunahuna, pagserbisyo, paggahin sa atong oras, pagtagad sa atong asawa, pagtudlo sa atong mga anak, ug gani sa pag-atiman sa atong mga lawas.

Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, matag adlaw nga paghatag og gibug-aton sa paghinulsol. Ang paghinulsol dili usa ka panghitabo; usa kini ka proseso. Mao kini ang yawe ngadto sa kalipay ug kalinaw sa hunahuna. Kon inubanan sa hugot nga pagtuo, ang paghinulsol moabli sa atong agianan ngadto sa gahom sa Pag-ula ni Jesukristo.

Makugihon man kamong misubay sa dalan sa pakigsaad, mitipas o mipalayo gikan sa dalan sa pakigsaad, o gani dili makakita sa dalan gikan sa inyong nahimutangan karon, ako mohangyo kaninyo sa paghinulsol. Sinatia ang makapalig-on nga gahom sa matag adlaw nga paghinulsol––sa pagbuhat ug mahimong mas maayo matag adlaw.

(Russell M. Nelson, “Kita Makabuhat og Mas Maayo pa ug Mahimong Mas Maayo,” Liahona, Mayo 2019, 67)

Unsa ang labing mahinungdanon kaninyo gikan sa mga pagtulon-an ni Presidente Nelson mahitungod sa paghinulsol ug kang Jesukristo?

Kanus-a nimo nasaksihan ang mga panalangin sa paghinulsol sa imong kaugalingon o sa ubang tawo?
Ngano kaha nga malaomon man ang Manluluwas nga maghinulsol kita ug andam kaayo nga pasayloon kita?

Para sa sunod nga pipila ka minuto, magpili ka ug magtuon og partikular nga aspeto sa paghinulsol nga makatabang kanimo sa pagduol ug mahimong mas sama kang Jesukristo, makabaton og mas dugang nga paggamit sa Iyang gahom ug kalinaw, ug mobati og dugang nga kalipay. Ang mosunod mao ang partikular nga mga aspeto sa paghinulsol nga mahimo nimong tun-an. Pagpili og usa niini aron tun-an, o pagtuon sa usa sa imong mga kaugalingong pangutana mahitungod sa hilisgotan sa paghinulsol.

Unsaon nako paghinulsol?
Unsaon nako pagkaplag og kalipay diha sa paghinulsol?
Unsaon man nako pagbuntog ang kahadlok sa paghinulsol?
Unsa ang lagmit nga kalambigitan sa regular, inadlaw nga pagpokus sa paghinulsol, o unsa kaha kini sa akong kinabuhi?

Ang mosunod mao ang pipila ka partikular nga kapanguhaan nga makatabang kanimo sa pagpalawom sa imong pagsabot sa paghinulsol. Anaa kini sa ChurchofJesusChrist.org ug sa Gospel Library nga app. Magamit kini ug ang uban pang kapanguhaan aron giyahan ang imong pagtuon sa aspeto sa paghinulsol nga imong gipili. Ikonsiderar ang pagsulat ug pag-highlight sa mga detalye nga pinakaimportante para kanimo.

Alang sa Kalig-on sa mga Kabatan-onan [booklet, 2011], “Paghinulsol,” 28–29
Giya ngadto sa mga Kasulatan, “Maghinulsol , Paghinul sol,” scriptures.ChurchofJesusChrist.org
Mga pakigpulong sa kinatibuk-ang komperensiya sama sa Russell M. Nelson, “Kita Makabuhat og Mas Maayo pa ug Mahimong Mas Maayo,” Liahona, Mayo 2019, 67–69
Dale G. Renlund, “Paghinulsol: Usa ka Mahimayaon nga Pagpili,” Liahona, Nob. 2016, 121–24

Unsay imong nakat-onan gikan sa imong pagtuon?
Unsa nga tambag ang imong ihatag sa usa ka tawo nga naglisod sa pagsabot kon nganong kinahanglan silang maghinulsol? Unsay gusto nimo nga ilang mahibaloan ug masabtan mahitungod kang Jesukristo?
Unsa ang nakatabang kanimo sa pagpalambo o paglig-on sa imong pagpamatuod bahin sa kalipay sa paghinulsol pinaagi kang Jesukristo?

Opsiyonal: Gustong Makahibalo pa og Dugang?

Lucas 3:7. Nganong gitawag man ni Juan ang mga tawo nga “mga anak sa mga bitin”?

Ang Palistinian nga bitin mao ang pinakasagad nga makahilo nga bitin sa Israel. Ang mga bitin aktibo sa gabii ug kasagarang mangita og pagkaon pinaagi sa pag-ukoy ug dayon pagtukob sa ilang biktima. Kon bation niini nga nameligro, ang mga bitin molikos sa lawas niini, mohishis, ug moatake sa mga kaaway niini. Sama niini, ang mga Pariseo ug mga Saduceo nahulga ni Juan tungod kay nakadani siya og daghang mga tawo gikan sa sayop nilang mga pagtulon-an.

Lucas 3:8. Unsa ang “mga bunga nga mahiangay sa paghinulsol”?

Sa mga kasulatan, ang mga matang sa mga tawo usahay gisimbolo pinaagi sa mga kahoy nga namunga og maayong bunga o bati nga bunga. Ang “[pag]pamunga … og mga bunga nga mahiangay sa paghinulsol” nagpasabot sa pag-usab sa atong mga kagustohan ug mga binuhatan aron mosunod sa mga pagtulon-an sa Dios.

Lucas 3:12. Unsa ang mga kobrador og buhis?

Sa karaang Roma, ang mga kobrador og buhis mao ang mga tigkolekta og buhis para sa gobyerno sa Roma. Ang mga kobrador og buhis gikasilagan sa mga Judeo, tungod kay mga traydor sa ilang kaugalingong nasod ang tan-aw kanila sa mga tawo ug tungod kay ang mga kobrador og buhis kasagarang manukot og mas daghang kuwarta para sa mga buhis kay sa gikinahanglan (tan-awa sa Hubad ni Joseph Smith, Lucas 3:19–20 [sa appendix sa Biblia]; Lucas 3:12–13). Andam nga gidawat sa pipila ka kobrador og buhis ang ebanghelyo (tan-awa sa Mateo 9:9–10; Lucas 19:1–10; Giya ngadto sa mga Kasulatan, “Publican,” scriptures.ChurchofJesusChrist.org).

Makaluwas ba kanato ang paghinulsol?

Dili ang paghinulsol ang makaluwas kanato. Ang dugo ni Jesukristo mao ang makaluwas kanato. Dili pinaagi sa atong sinsero ug matinud-anong pagbag-o sa pamatasan lamang ang makaluwas kanato, pero “pinaagi sa grasya kita maluwas, human sa tanan nga atong mabuhat” (2 Nephi 25:23). Pero, ang tinuod nga paghinulsol mao ang kondisyon nga gikinahanglan aron moabot sa atong mga kinabuhi ang kapasayloan sa Dios. Ang tinuod nga paghinulsol makapahimo og “masidlakong adlaw gikan sa pinakangitngit nga gabii” (Spencer W. Kimball, The Miracle of Forgiveness [1969], 362).

(Dieter F. Uchtdorf, “Punto sa Luwas nga Pagbalik,” Liahona, Mayo 2007, 100)