Galuega 22–26
O le Molimau a Paulo
I le feagai ai ma tuuaiga sese ma le agaleagaina faaletino, sa lei faafiti ai Paulo. Pe noatia i filifili pe aumaia i luma o taitai ma tupu, sa faasoa atu ma le faamaoni e Paulo lana molimau mamana ia Iesu Keriso ma Lana talalelei. O lenei lesona ua faamoemoe e fesoasoani ia te oe e atiina ae ai se naunautaiga sili atu e mulimuli i le faataitaiga a Paulo i le molimau atu ia Iesu Keriso ma Lana talalelei i lou olaga i aso taitasi.
Faasoaina o molimau
I se faauigaga faalelotu po o le faaleagaga, o le molimau atu po o le tuuina atu o le molimau e masani lava ona faasino i le faasoa atu o talitonuga patino o le malamalama faaleagaga e pei ona tuuina mai e le Agaga Paia (tagai i le Taiala i Tusitusiga Paia, “ Molimau atu ” ma le “ Molimau ”).
-
O anafea na e lagonaina ai le mana o le faasoaina atu o lau lava molimau po o le faalogo i se isi tagata o faasoa mai a latou molimau? Na faapefea ona aafia ai oe e lenei mea?
-
O le a lou naunau e faasoa atu lau molimau i isi? Aisea e ono faalotolotolua ai se tagata e faasoa a latou molimau?
-
O a ni fesili ma ni atugaluga o ia te oe e uiga i le molimau atu i isi e uiga i ou talitonuga?
I le lesona lenei, o le a e suesue ai i le molimau a Paulo e uiga i le Faaola ma le ala na faia ai e le Faaola se aafiaga i le olaga o Paulo. O le a e aoao ai foi pe na faapefea ona tali atu isi i le molimau a Paulo. A o e suesue, mafaufau pe mafai faapefea e le Faaola ona faamanuia lou olaga a o e naunau e faasoa atu lau molimau e uiga ia te Ia ma Lana talalelei, e tusa lava po o le a le malosi e te manatu o i ai lau molimau.
O le molimau a le Aposetolo o Paulo
E ui i le sasaina, fetogiina, ma le faafalepuipuiina sese, ae sa faasoa atu pea lava pea e Paulo lana molimau ia Iesu Keriso ma Lana talalelei. A o e faitau i le tala a Paulo, faataitai ona vaai faalemafaufau i le mea o loo tupu i le tala.
Aoao e vaai faalemafaufau. O le vaai faalemafaufau o se tomai taua mo le suesueina o tusitusiga paia lea e mafai ona fesoasoani ia te oe e lagona atili ai le fesootaiga ma mea o loo tutupu i le tala faatusi paia. Ina ia vaai faalemafaufau, mafaufau e faapea sa e i ai i le taimi o le tala. A o e faitau, pu’e [i lou mafaufau] vaaiga, leo, ma lagona atonu e oo ia te oe.
O fuaitau nei o loo i ai ni vaega o le molimau a Paulo ma tali a i latou o e na faalogo ia te ia. Filifili se tasi o fuaitau e faitau, ma mafaufau pe mata e faapefea ona aafia ai oe i lana molimau pe ana faapea sa e i ai iina.
|
O le molimau a Paulo |
O le tali atu i ai a tagata |
|---|---|
O le molimau a Paulo Sa noatia Paulo i filifili ina ua pue faapagotaina o ia i Ierusalema. Sa faatagaina o ia e lauga atu i tagata a o tu i fafo atu o le Olo o Anetonia. Faitau le Galuega 22:6–16. | O le tali atu i ai a tagata |
O le molimau a Paulo Sa pue faapagotaina Paulo i fafo o le malumalu i Ierusalema ona aumaia lea i luma o taitai Iutaia. Sa fesiligia o ia e nei taitai Iutaia ma tuuina atu i le falepuipui. O le kapeteni Roma o le sa pue faapagotaina Paulo na iloa se taupulepulega faalilolilo e se vaega o tagata Iutaia e fasioti ia Paulo, o lea na ia auina atu ai loa Paulo i Kaisareia. I Kaisareia, sa faatagaina ai Paulo e molimau e tusa ma ona moliaga i luma o le kovana Roma o Filiki. Faitau le Galuega 24:10–16. | O le tali atu i ai a tagata |
O le molimau a Paulo Ina ua mavae le lua tausaga i le falepuipui, sa avane Paulo i luma o le kovana fou ma tauanau malosi atu mo se avanoa e molimau atu ai i luma o Kaisara. Sa fuafua le Tupu o Akeripa e faalogo i le molimau a Paulo a o lei malaga atu o ia i Roma. Faitau le Galuega 26:1–3, 13–23. | O le tali atu i ai a tagata |
1. Faauma mea nei:
I lau api faamaumau mo suesuega, tusi ai mea sa e aoaoina. Ia mautinoa o aofia ai faamatalaga nei:
-
O a ni mea patino na tulaga ese ia te oe e uiga i le molimau a Paulo ia Iesu Keriso ma Lana talalelei?
-
O le a se mea na faagaeetia ai oe e uiga ia Paulo i nei fuaiupu?
-
Aisea e te talitonu na maua ai e Paulo le lototele ma le malosi e molimau atu ai ia Keriso i ia tulaga faigata?
-
Aisea e te manatu e taua ai le faasoa atu o le molimau e tusa lava pe ono teena e isi?
Faitau le faamatalaga lenei, ma mafaufau loloto pe mafai faapefea ona fesoasoani ia te oe ia maua le lototele e molimau atu ai e pei ona sa faia e Paulo.
E ui o le faamamafaina o le faasoaina atu o a tatou molimau i isi e le manaomia ona atoatoa ma e alu se taimi e faataitai ai, ae na faasoa mai e Elder Dieter F. Uchtdorf o le Korama a Aposetolo e Toasefululua mea nei.
Po o a lava auala e foliga mai e tupu fua ma masani ai ia te oe, faasoa atu i tagata pe aisea e taua ai Iesu Keriso ma Lana Ekalesia ia te oe. …
Ia e malamalama e le o sau galuega le liuaina o tagata. O le matafaioi lena a le Agaga Paia. O lau matafaioi o le faasoa atu o mea o loo i totonu o lou loto ma ola e tusa ai ma ou talitonuga.
(Dieter F. Uchtdorf, “Galuega Faafaifeautalai: Faasoaina atu o Mea o Loo i Totonu o Lou Loto,” Liahona, Ape 2019, 17.)
2. Faauma le gaoioiga lenei, ma tali fesili o loo i lalo i lau api faamaumau mo suesuega:
Fai ni koluma se lua i lau api faamaumau mo suesuega. I le tasi koluma, mafaufau ma tusifaamaumau ai lau molimau patino, e aofia ai aafiaga patino na faamalosia ma tapue ai lau molimau i le Tama Faalelagi, Iesu Keriso, ma le Laua talalelei. I le isi koluma, tusi ai soo se manatu ma lagona e uiga i le ala e mafai ai ona e faasoa atu lenei molimau i isi i lou olaga i aso taitasi, e pei ona sa faia e Paulo.
-
O a ni auala na avea ai le Faaola ma se faataitaiga o le faasoa atu o le molimau e tusa lava po o le a le tali atu a isi? (tagai i le Mataupu Faavae ma Feagaiga 138:25–26).
-
Atonu e te lagona le faalotolotolua po o le popole e uiga i le molimau atu i le Faaola. E mafai faapefea ona fesoasoani ia te oe le mafaufau i lagona o le Faaola e uiga i au taumafaiga e molimau atu mo Ia?
Tuu i le Faitalia: O e Manao e Aoao Atili?
O fea e mafai ona ou aoao atili ai e uiga i le po o le a le molimau ma pe faapefea ona faamalosia la’u lava molimau?
Mo se fesoasoani ia malamalama po o le a le molimau ma pe faapefea ona faamalosia lau lava molimau, faitau le tusiga i Autu o le Talalelei “Molimau” (topics.ChurchofJesusChrist.org).
Mo ni faataitaiga i le ala na faamalosia ai e isi a latou molimau, mafaufau e matamata le vitio “Increase Your Testimony” (4:59), o loo maua i le ChurchofJesusChrist.org.
Increase Your Testimony
Strengthen your testimony of God and His teachings by recognizing the feelings of the Holy Spirit.
Aisea e taua ai ona ou lototoa i la’u molimau?
Na aoao mai Elder Quentin L. Cook o le Korama a Aposetolo e Toasefululua:
O le “lototoa i le molimau ia Iesu” [ Mataupu Faavae ma Feagaiga 76:79 ] o le suega faigofie ma taua lea i le va o i latou o e o le a mauaina faamanuiaga o le malo selesitila ma i latou e i le malo maualalo ifo o le terasitila. …
O le lototoa i a tatou molimau ia Iesu o se maa-laalaa lea agai atu i le agavaa mo le alofa tunoa o le Faaola ma le malo selesitila.
(Quentin L. Cook, “Totoa i le Molimau ia Iesu,” Liahona, Nov. 2016, 43)
E mafai faapefea ona ou faasoa atu la’u molimau i auala masani ma faanatura?
Mo ni faataitaiga i le auala e faasoa atu ai lau molimau i auala masani ma faanatura, mafaufau e matamata le vitio “Sharing Your Beliefs” (2:02), o loo maua i le ChurchofJesusChrist.org. E mafai foi ona e mafaufau e saili i le itulau i upega tafailagi “Faasoa Atu le Talalelei: Faasoa Atu i Luga o Upega Tafailagi,” o loo maua i le ChurchofJesusChrist.org, po o le faitau i le tusiga “Mataupu Faavae o le Auaunaga: E Faapefea Ona Faasoa Atu Molimau i se Auala Masani” (Ensign, Mat. 2019, 8–11).
Faasoa Atu Ou Talitonuga
Faaaoga faamaumauga i le uepi [blog], tesi, ma isi ituaiga o fesootaiga e faasoa atu ai lau molimau o le talalelei i le lalolagi atoa.