Iloilo Lou Aoaoina 7

O tamaitai talavou o loo fiafia i latou lava i Kana.

O lenei lesona ua faamoemoe e fesoasoani ia te oe e iloilo ai sini na e faatuina faatasi ai ma le aoaoina ma le tuputupu ae na e mauaina mai au suesuega o le Feagaiga Fou.

Pe mafai ona suia tagata?

Mafaufau faapea ua ta’u atu e lau uo ia te oe e i ai mea e manao o ia e suia e uiga ia te ia lava, ae na te le manatu e mafai ona ia faia na suiga.

E faapefea ona e tali atu i ai?
E faapefea ona aafia lou olaga i le iloa e mafai ona e sui e ala i le Togiola a Iesu Keriso?

Toe mafaufau i tala mai le tusi o Galuega o loo faapupula mai ai le ala e mafai ai e tagata ona sui mo le lelei sili atu a o latou o mai ia Keriso ma avea ma Ona soo.

Afai e manaomia, mafaufau e toe iloilo se tasi pe sili atu o faataitaiga nei.

Tagata na liliu i le Ekalesia: Galuega 2:14, 36–47
O le eunuka Aitiope: Galuega 8:26–40
Saulo (o lē na avea ma Paulo): Galuega 9:1–22
Konelio: Galuega 10:1–8, 24–25, 44–48
O le leoleo o le falepuipui o loo leoleoina Paulo ma Sila: Galuega 16:25–36

Tusitusi i luga o se fasipepa i se peni po o se penitala.

O lou liua ia Iesu Keriso

Mafaufau loloto i lou lava liua ia Iesu Keriso. Mafaufau i valaaulia e sui pe faaleleia na e lagonaina mai le Alii a o e suesue i le tusi o Galuega. Tali fesili nei i totonu o lau api faamaumau mo suesuega.

O le a se mea ua e iloa e uiga ia Iesu Keriso e faaosofia ai oe ia alofa ma mulimuli atoatoa atili ia te Ia?
I le aluga o le masina ua tuanai, o a ni suiga ua e lagonaina e ala i musumusuga a le Agaga Paia e ao ona e fai? Na faapefea ona e tali atu?
Na faapefea ona faamanuiaina oe e le Tama Faalelagi mo au taumafaiga? O le a se mea na e faia na pito i tele ai le eseesega?
O le a, pe afai e i ai se pogai, ua faafaigata ai ona talia valaaulia e sui ma faaleleia? E mafai faapefea ona e sailia se fesoasoani faaopoopo mai le Tama Faalelagi?

Faaauau ona e saili mo musumusuga mai le Tama Faalelagi e ala mai i le Agaga Paia a o e suesueina lenei lesona. Taumafai e faailoa mea e finagalo o Ia e te faia e suia ma liua atili ai ia Iesu Keriso. Filifili se tasi o gaoioiga nei e faamaea a o e tomanatu i le auala e faalatalata atili atu ai ia Keriso.

Gaoioiga A: O uluai mataupu faavae ma sauniga o le talalelei a Iesu Keriso

I le [tusi o] Galuega, e toatele tagata na maua le fesoasoani faalelagi e suia ma liua atili ai ia Iesu Keriso e ala i le mauaina o uluai mataupu faavae ma sauniga o le talalelei.

O le Taiala i Tusitusiga Paia o loo faamalamalama mai ai le ala e fesoasoani ai nei mataupu faavae ma sauniga ia i tatou ia liua ia Iesu Keriso.

O le salamo, papatisoga mo le faamagaloga o agasala, o le mauaina o le Agaga Paia e ala i le faaee atu o lima, ma le faatuatua faifai pea i le Alii o Iesu Keriso e faaatoatoaina ai le liuaina. O le a suia se tagata natura i se tagata fou faapaiaina ma mama, ua toe fanaufouina ia Keriso Iesu (2 Kor. 5:17; Mosaea 3:19).

(O le Taiala i Tusitusiga Paia, “ Liliuga, Liliu Mai,” scriptures.ChurchofJesusChrist.org)

Toe manatunatu i le tala na e filifilia lea na faapupula mai ai se tasi ua suia e ala i le fesoasoani a le Alii.

Mafaufau i au tali i fesili nei:

O le a le matafaioi a uluai mataupu faavae ma sauniga o le talalelei i lo latou liua?
Na faapefea e uluai mataupu faavae ma sauniga o le talalelei ona fesoasoani ia te oe po o isi ia liua atili ai i le Faaola?

Mafaufau faapea ua fesili atu faifeautalai i le lotoifale mo sau fesoasoani i se tasi o loo latou aoaoina. Latou te mananao ia te oe e faasoa mai pe mafai faapefea e uluai mataupu faavae ma sauniga o le talalelei ona fesoasoani e faamalosia le liua ia Iesu Keriso ma valaaulia Lana fesoasoani e faia suiga manaomia i o tatou olaga. Tusi se faamalamalamaga mo lenei tagata e peiseai o loo e talanoa sa’o ma i latou. Faaaoga se tasi pe sili atu o faataitaiga mai le [tusi o] Galuega ma soo se aafiaga patino e te lagona o le a aoga.

Gaoioiga E: Suesuega o tusitusiga paia ma le liuaina

O se tasi o faatinoga taua e mafai ona tatou faia e faamalosia ai lo tatou liua ia Iesu Keriso o le suesue e le aunoa i tusitusiga paia. Mafaufau pe faapefea e tala nei mai le tusi o Galuega ona faaalia ai le taua o le suesueina o tusitusiga paia i le liuaina.

Filipo ma le tagata Aitiope: Galuega 8:26–40
Paulo ma le Au Paia i Tesalonia ma Perea: Galuega 17:1–14

Mafaufau loloto pe na faapefea ona fesoasoani le suesueina o tusitusiga paia i lou liua i le Faaola.

Manatu faapea na talosagaina oe e lou taitai o Alii Talavou po o Tamaitai Talavou e fesoasoani i le autalavou i lau uarota po o le paranesi e suesue i tusitusiga paia ma faamalosia ai lo latou liua ia Iesu Keriso. O le a se punaoa e mafai ona e fatufatuina e faamalosiau ai i latou? Faaaoga ni nai minute e faatulaga ai lau punaoa i lau api faamaumau mo suesuega. E mafai ona faapea o se vitio, se tala tusia, se lauga, se upega tafailagi, po o se isi punaoa.

O lau punaoa e mafai ona aofia ai soo se tasi o mea nei:

O se faataitaiga mai le [tusi o] Galuega po o se isi tusi o tusitusiga paia o loo faaalia ai le taua o le suesueina o tusitusiga paia.
O se faataitaiga po o se mamanu o tomai tau tusitusiga paia e te faaaogaina e fesoasoani ia te oe, po o se faamatalaga o le auala e te faaaogaina e suesue ai.
O se faamatalaga o se aafiaga na fesoasoani ai le suesueina o tusitusiga paia ia te oe po o se tasi e te iloa e liua atili ai i le Faaola.
O lau molimau patino i le mana o le suesueina o tusitusiga paia.

Saili le fesoasoani a le Tama Faalelagi e ala i le Agaga Paia a o e tusia i lalo soo se faatinoga e te lagona e tatau ona e faia ina ia liua atili ai ia Iesu Keriso. O le a fesoasoani le Faaola ia te oe a o e taumafai e mulimuli i nei uunaiga. Mafaufau e faasoa atu ou uunaiga i se matua po o se taitai faatuatuaina o le Ekalesia. Fai atu ia i latou e fesoasoani mai ia te oe ina ia mulimuli ai i nei uunaiga.