Roma 1

“Ou Te Le Ma i le Talalelei Ia Keriso”

E i ai le taimi po o le a lava, o le a manaomia ai ona tatou tutu uma atu mo mea ua tatou talitonu i ai. I le saunoa atu i le Au Paia sa nonofo i Roma, sa tautino atu ai e Paulo o ia e “le ma i le talalelei ia Keriso” (Roma 1:16). O lona naunau e faasoa atu le savali o le talalelei o se faamaoniga lea o lena mea. O lenei lesona e mafai ona fesoasoani ia oe e aua le ma e faailoa atu o oe o se soo o Iesu Keriso.

O a mea ua e iloa?

Vaai faalemafaufau e faapea ua e ta’u atu i se tasi o au uo mai se isi lotu Kerisiano o loo e aoaoina le Feagaiga Fou i le seminare. Ua ia ta’u atu ia te oe e fiafia tele o ia i le Feagaiga Fou ae o nisi taimi e faigata ona ia malamalama i Tusi. Ua ia fesili atu ia te oe pe o a mea ua e iloa e uiga i ai. Fai le suega puupuu lenei e iloa ai po o le a le lelei o le a mafai ona e tali atu ai ia te ia.

Fai le suega puupuu i totonu o lau api faamaumau mo suesuega. O tali sa’o o loo maua i le faaiuga o le lesona lenei.

1. O a mea e ta’u o Tusi?

   1. Faasilasilaga aloaia a le Ekalesia na faia e le perofeta

   2. O lauga na fofogaina mai e taitai o le Ekalesia sa tuufaatasia i le tele o tausaga

   3. O tusi eseese na tusiina atu e taitai o le Ekalesia i le Au Paia

2. O ai o loo ta’ua mo le tusia o le 14 o tusi e 21 o loo aofia ai i le Feagaiga Fou?

   1. Peteru

   2. Paulo

   3. Luka

3. Na faapefea ona faatulagaina Tusi muamua e 13?

   1. Faasologa o taimi (i le taimi na tusia ai)

   2. E ala i le taua

   3. E ala i le umi

4. O ai nisi o tusitala o Tusi?

   1. Iakopo, Peteru, Ioane, ma Iuta

   2. Iakopo, Peteru, Ioane, ma Setefano

   3. Iakopo, Peteru, Ioane, ma Timoteo

O Le Tusi i le [au paia] i Roma

O le tusi o Roma o se tusi na tusia e Paulo i le Au Paia i Roma i le lata ai i le faaiuga o ana malaga faafaifeautalai. O Roma—le laumua o le Malo o Roma—sa faatumulia i filosofia faalelalolagi ma o se nofoaga e faigata ona talai ma ola ai i le talalelei a Iesu Keriso. Na tusi atu Paulo i le Au Paia i Roma ia faamalosia lo latou faatuatua, e saunia ai i latou mo lona taunuu atu, e faamanino ma finauina ana aoaoga, ma faatupulaia le lotogatasi i le va o tagata Iutaia ma tagata Nuu Ese o le Ekalesia.

A o e suesue i le Roma 1, vaavaai mo upumoni e mafai ona faamalosiauina ai oe a o e taumafai e avea ma se soo o Iesu Keriso.

Ou te le ma

Matamata i le “Preparation of Joseph F. Smith: True Blue, Through and Through” (1:31) o loo maua i le ChurchofJesusChrist.org. E maua foi lenei tala i le Aoaoga a Peresitene o le Ekalesia: Iosefa F. Samita [1998], 104.

Preparation of Joseph F. Smith: True Blue, Through and Through

Joseph F. Smith faces an unruly mob and declares fearlessly his membership in the Church.

Faitau le Roma 1:15–17, vaavaai mo mea na tutusa ai Peresitene Iosefa F. Samita ma Paulo. Mafaufau e faailoga upu po o fasifuaitau i nei fuaiupu ua e iloa e anoa.

Atonu na e faailogaina upu “Ou te le ma i le talalelei ia Keriso” i le Roma 1:16.

• Mai mea sa e aoaoina e uiga ia Paulo i le tusi o Galuega, na faapefea ona ia faaalia e lei ma e faailoa o ia o se Kerisiano?

• O a ni tulaga e ono feagai ma le autalavou i aso nei lea e manaomia ai ona latou tutu atu ma aua nei ma i le talalelei a Keriso?

Sa iloa e Paulo o Roma o se nofoaga faigata ona nofo ai ma talai atu le talalelei. Sa feagai foi o ia ma le tetee mai ia i latou o e sa le malamalama pe sa teena ana aoaoga. Ae ui i lea, sa naunau lava Paulo e alu i Roma ma talai atu iina ina ia aumai isi ia Keriso (tagai i le Roma 1:15).

Mafaufau i aafiaga lea, e pei o Paulo, sa e maua ai se avanoa e tu atu ai mo pe faasoa atu lou faatuatua ia Iesu Keriso. Fai se lisi puupuu i lau api talaaga. Ia aofia ai ou mafaufauga ma lagona i le tele o lou manao e faasoa atu lou faatuatua i na tulaga.

• Aisea e ono lagona ai e se tagata talavou le ma e faailoa atu o ia o se Kerisiano? O a ni mea e mafai ona latou faia pe afai e ia i latou na mafaufauga po o lagona?

Faataitaiga mai tusitusiga paia ma onaponei

Toefaamanatu se lua o nei faataitaiga o tagata o e sa lei lagona le maasiasi e faailoa atu lo latou faatuatua i le Alii. Mafaufau i tulaga sa latou i ai, ma vaavaai mo mea e tutusa ai o latou olaga ma oe.

• Pe a faamasino oe e isi: O le fafine na mulumuluina vae o Iesu i ona loimata (Luka 7:36–50)

• Pe a manaomia ona e tu atu i lau tupulaga: O Apinati ma Alema (Mosaea 13:1–9; 17:1–4; 18:1–3)

  O Apinati o loo Molimau atu ia Iesu Keriso | Mosaea 11–18

  Ua aoao atu le perofeta o Apinati i le Tupu o Noa ma ana faitaulaga Tulafono e Sefulu. Ua ia valoia le toe afio mai o le Alii i le lalolagi e togiola Lona nuu. Ua talitonu Alema, se tasi o faitaulaga a le tupu ia Apinati.

• Pe a e faasoa atu le talalelei: Teren Bingham ma Brandon McEuen (“Same Jersey” [5:01], ChurchofJesusChrist.org)

  O le Ofutaalo [Jersey] Lava e Tasi

  O le po o le Aso Faraile—o le fetauiga i le taaloga tele i le va o au lakapi a aoga maualuluga i Arisona. O alii faatonutonu o pito i tua o le a tauva nanei, ae o taeao o le a papatiso ai e le tasi o i laua ia le isi i le Ekalesia a Iesu Keriso.

• O a ni mea ua faagaeetia ai oe mai nei faataitaiga?

• Na faapefea ona faaalia e nei tagata latou te le maasiasi i le talalelei a Keriso?

• O ai o loo avea ma se faataitaiga i lou olaga o le le maasiasi i le talalelei a Iesu Keriso? Na faapefea ona latou faaalia lo latou faatuatua?

O loo tau mai e le Roma 1:15–17 ia i tatou o le naunautaiga o Paulo mo le talalelei a Keriso na oo mai i se vaega mai lona malamalamaga e faapea “[o le talalelei] o le mana lea o le Atua mo le faaolataga” mo fanau uma a le Atua. I se isi faaupuga, ona sa iloa e Paulo e leai se tasi e mafai ona faasaoina e aunoa ma le talalelei a Iesu Keriso, o lea sa ia manao ai e faasoa atu i tagata uma.

1. Tali se lua pe sili atu o aitema nei i totonu o lau api faamaumau mo suesuega:

• E mafai faapefea e le manatuaina o mea na faia e le Faaola mo oe ona fesoasoani ia aua ai nei e maasiasi ia te Ia ma Lana talalelei?

• E ui atonu e i ai taimi e valaauina ai i tatou e puipuia lo tatou faatuatua i ni auala tetele pe maoae, ae o le tele lava o taimi e sili ona faaalia lo tatou faatuatua i auala itiiti ma faigofie (tagai i le Alema 37:6–7). E faapeī foliga, leo, po o lagona o le “le ma i le talalelei ia Keriso”, i lou olaga i aso taitasi?

• Faauma le fuaiupu lenei: Ou te le ma i le talalelei a Iesu Keriso, aua …

O tali o le suega puupuu (1) i; (2) e; (3) i; (4) a

Tuu i le faitalia: O e Manao e Aoao Atili?

E mafai faapefea ona ou faasoa atu la’u molimau i auala masani?

Na aoao mai Elder Dieter F. Uchtdorf o le Korama a Aposetolo e Toasefululua:

Ou te iloa o nisi o i tatou e sili atu ona fiafia e fegalegaleai nai lo o isi. E le afaina lea. Ua faia e le Alii ia mafai e i tatou taitoatasi, i o tatou lava ala, ona valaaulia isi e o mai e vaai ma o mai e fesoasoani. Ona faia lea e le Atua o Lana galuega laveai, ma o le a latou o mai ma nonofomau.

Sei ou fautuaina atu ni mea se lima e mafai e soo se tasi ona fai e auai ai i le poloaiga sili a le Faaola e fesoasoani e faapotopoto Isaraelu.

1. 1. Faalatalata atu i le Atua. …

2. 2. Faatumu lou loto i le alofa mo isi. …

3. 3. Taumafai e savali i le ala o le avea ma soo. …

4. 4. Faasoa atu mea o loo i lou loto. …

5. Faatuatua o le a faia e le Alii Ana vavega.

(Dieter F. Uchtdorf, “O le Faasoaina atu o le Talalelei i Auala Masani ma Faalenatura,” ChurchofJesusChrist.org)

Ina ia aoao atili i nei fautuaga, faitau le tausiga puupuu lenei a Elder Uchtdorf “O le Faasoaina atu o le Talalelei i Auala Masani ma Faalenatura” i luga o le ChurchofJesusChrist.org.