Galuega 27–28

Mulimuli i le Perofeta

Ina ua uma ona faasalaina, sauaina, ma faafalepuipui sese i Ierusalema ma Kaisareia, sa talosaga le Aposetolo o Paulo e apili lona faamasinoga i luma o Kaisara i Roma. A o agai atu o ia i Roma, sa fetaiai Paulo ma i latou sa latou faatasi ma ni afā matautia, malepelepe le vaa, ma isi faigata. I nei tulaga, sa tuuina atu ai e Paulo ni fautuaga musuia ma ni lapataiga ina ia saogalemu ai tagata uma. O lenei lesona ua faamoemoe e fesoasoani ia te oe e lagona ai le taua o le mulimuli i fautuaga a le perofeta.

Mulimuli i le perofeta

Faitau faamatalaga nei o fautuaga po o lapataiga faaperofeta e maua mai le tamaitusi Mo Le Malosi o le Autalavou 2011).

“Faaali atu le alofa mo tagata o lou aiga i aso taitasi” (itulau 14).

“O aoaoga o se vaega taua o le fuafuaga a le Tama Faalelagi e fesoasoani ia te oe ia avea atili e faapei o Ia. … O aoaoga e te maua o le a aoga ia te oe i le taimi o le olaga faitino ma le olaga a sau” (itulau 9).

“Aua nei auai, matamata, pe aafia i soo se mea e leaga, e le mama, e faatautala, pe faaponokalafi i soo se itu” (itulau 11).

“Afai e uunaia oe e au uo e faia mea e sese, ia avea oe ma tagata e tu atu mo le mea moni, e tusa lava pe e te tu na o oe” (itulau 16).

• O a ni uiga eseese ua e vaaia o faaalia e tagata e uiga i le mulimuli ai i fautuaga a perofeta?

• Aisea e ono filifili ai nisi o talavou e le gauai i fautuaga a perofeta?

• O a nisi o mea e ono tutupu ona o le le mulimuli i fautuaga a perofeta?

Mafaufau loloto pe faapefea ona e tali patino atu i le fautuaga ma le taitaiga a le perofeta. A o e suesue i le Galuega 27, saili musumusuga mai le Tama Faalelagi e ala i le Agaga Paia e maua ai uunaiga o le a fesoasoani e faamalosia ai lau tautinoga e mulimuli i fautuaga a le perofeta a le Alii.

O le fautuaga faaperofeta a Paulo

A o agai atu o ia i Roma e apili lana mataupu i luma o Kaisara, sa tuuina atu ai e Paulo ni fautuaga ma lapataiga ina ia saogalemu le au malaga i la latou faigamalaga.

1. Fai mea nei i totonu o lau api faamaumau mo suesuega:

Faamae’a le gaoioiga lenei e ala i le faitauina muamua o faamatalaga i le pito i luga o sikuea taitasi. Ona faitau lea o fuaiupu o loo avatu faatasi ai i le Galuega 27. Aotele le tala i le ogatotonu o pusa taitasi e ala i le tusia o se ata faigofie po o le tusia o se aotelega o upu ma faatinoga a Paulo. Ia mautinoa foi e faaaofia ai le tali atu o tagata i fautuaga a Paulo.

O le malaga a Paulo i Roma

Sa aumai e fitafita Roma ia Paulo ma isi pagota toeitiiti 300 tagata i luga o se vaa. Sa faagesegese, faigata, ma matautia le latou faigamalaga ona sa alu [le malaga] a ua leva ona amata le tau toulu, i le taimi e agi soo ai afa malolosi. Faitau le Galuega 27:9–13.	I le taimi o se afa matautia, sa faia ni taumafaiga e lipea le vaa ma faamama le uta. Faitau le Galuega 27:20–26.
Ina ua mavae aso e 14 o le afa matautia, sa latou taumafai ai se faiga matua faigata lava e tulaueleele ai. Sa lafo e seila le taula ma sa mananao e lafoai le vaa ona sa latou manatu o le a fatia i luga o maa. Faitau le Galuega 27:30–36.	Ina ua mavae le faamāmāina atili o le vaa, sa latou taumafai loa e tuta le vaa. Faitau le Galuega 27:41–44.

• O le a sou manatu e faapefea ona e tali atu i aoaoga a Paulo pe ana faapea sa e i ai i luga o le vaa? Aisea?

• O a upumoni na e aoaoina mai mea ua e suesueina?

• O le a se mea ua e iloa e uiga i perofeta e tuuina atu ia te oe le talitonuga mautinoa i a latou fautuaga ma aoaoga?

Ua aoao mai le Alii e faapea, e ala mai i le perofeta o le a tatou faalogo ai i Lona siufofoga (tagai i le Mataupu Faavae ma Feagaiga 1:37–38) ma o Ana lapataiga o le a tele ina oo mai e ala mai i Ana perofeta filifilia (tagai i le Mataupu Faavae ma Feagaiga 1:1–4). I o tatou aso, tatou te lagolagoina uma uso o le Au Peresitene Sili ma le Korama a Aposetolo e Toasefululua i le avea ai o ni perofeta, tagatavaai, ma talifaaaliga. Faaaoga sina taimi e mafaufau loloto ai pe aisea e aapa mai ai le Alii ia i tatou e ala mai i perofeta ma le mea ua faaalia e lenei mea e uiga i Ona lagona ia i tatou.

• O le a se mea ua e aoaoina e uiga i le Alii mai fautuaga ma lapataiga o loo Ia tuuina mai e ala mai i Ana perofeta?

• O a ni aafiaga ua e iloa po o isi foi e te iloa i le filifili e mulimuli pe le amanaia fautuaga mai le perofeta?

Faaaoga ni nai minute e saili ai ma suesue i fautuaga po o lapataiga lata mai nei ua tuuina mai e le Alii ia i tatou e ala mai i Ana perofeta. O nisi nofoaga e saili iai e aofia ai savali lata mai lauga o konefesi aoao, o le mekasini o le Mo le Malosi o le Autalavou, po o le tamaitusi o le Mo le Malosi o le Autalavou. E mafai ona e faaaofia ai saunoaga mai perofeta na tuuina atu i le amataga o le lesona.

2. Tusi se aotelega puupuu o mea na e maua, ma tali fesili nei:

• E faapefea ona avea lenei fautuaga mai le perofeta a le Alii ma faamaoniga o le tausiga, atugaluga, ma le alofa mutimutivale o le Alii ia te oe?

• Afai ua e mulimuli i lenei fautuaga i lou olaga, ua faapefea ona faamanuiaina oe e le Tama Faalelagi ona o lou usiusitai?

• Afai e i ai ni auala ua e le amanaiaina ai pe le usitaia ai lenei fautuaga, aisea e ono valaaulia ai oe e se Faaola alofa e amata ona mulimuli i lenei fautuaga? E mafai faapefea ona faaleleia ai lou olaga?

O le mulimuli ai i fautuaga faaperofeta i lou olaga

• O a nisi o mafuaaga e te faafetai ai mo fautuaga ma lapataiga faaperofeta i lou olaga?

Saili musumusuga mai le Tama Faalelagi e ala i le Agaga Paia e fesoasoani ia te oe ia iloa auala e faaali atu ai e le Alii e fiafia o Ia i lou usiusitai i Ana perofeta, faapea foi ma auala e mafai ona Ia uunaia ai oe ia faaleleia atili oe lava. Tusi i lalo mafaufauga ma uunaiga e oo mai i lou mafaufau, ma tautino atu e mulimuli i ai. Atonu e aoga le faasoa atu o ou lagona i se tagata o le aiga o mafana le lua mafutaga po o se taitai faatuatuaina o le Ekalesia ma valaaulia i latou e fesoasoani ia te oe e mulimuli i na uunaiga.

Tuu i le faitalia: O e Manao e Aoao Atili?

E faapefea e le mulimuli i fautuaga a perofeta ona aafia ai au?

Na aoao mai e Peresitene Henry B. Eyring o le Au Peresitene Sili mea nei:

O le filifiliga e aua nei taliaina fautuaga faaperofeta e suia ai lava le faavae o loo tatou tutu ai i luga. O le a matuai sili lava ona matautia. O le le mafai ona taliaina o fautuaga faaperofeta e faaitiitia ai lo tatou malosiaga e taliaina ai fautuaga musuia i le lumanai. O le taimi sili lava sa ao ona faia ai le faaiuga e fesoasoani ia Noa e fau le vaa o le taimi muamua lava na ia fai atu ai. O taimi uma sa ia fai atu ai i le mavae ai o lena taimi muamua, o taimi taitasi foi e le tali atu ai, e faaitiitia ai le lagonagofie o le Agaga. Ma o taimi uma lava sa foliga mai o lana talosaga sa sili atu ona faavalevalea, ina seia oo i le taimi ua sau ai le timu. Ae oo atu i lena taimi ua tuai.

O taimi uma i lo’u olaga na ou filifili ai e faatuai ona mulimuli i se fautuaga musuia pe filifili faapea e le aofia ai au, sa oo ina ou iloa ai sa ou tuuina au lava i se ala e pagatia ai. O taimi uma lava na ou faalogo ai i fautuaga a perofeta, ma lagonaina le faamautu mai i le tatalo, ma mulimuli i ai, na ou iloa ai lo’u agai atu i le saogalemu.

(Henry B. Eyring, “Finding Safety in Counsel,” Ensign, Me 1997, 25)

Ona e agalelei tele le Alii, ua Ia valaauina ai Ana auauna e lapataia tagata e uiga i tulaga matautia. O lena valaau e lapatai atu ua atili faigata ma sili atu ona taua ona o le mea moni e faapea, o lapataiga e aupito sili ona aoga ua faatatau lea i mea matautia ia e le i mafaufau i ai tagata o ni mea ua moni.

(Henry B. Eyring, “A Voice of Warning,” Ensign, Nov. 1998, 32)

Galuega 27:9. O le a le uiga o le “o lea ua mavae atu le anapogi”?

“O le anapogi” atonu sa faasino i le aso paia o Iutaia e ta’ua o le Aso o le Togiola, lea e faailoga ai le amataga o le vaitau lea e masani ona faapea e le saogalemu ai ona malaga i le Sami Metitirani ona o afa fulifao. O le Aso o le Togiola, e masani ona faia i le faaiuga o Setema po o le amataga o Oketopa.

Galuega 27:28. O le a le umi o le “gafa”?

O le gafa o le mamao mai le tamatamailima aupito umi o le tasi lima i le tamatamailima aupito umi o le isi lima pe a faaloaloa lima. O le gafa e tutusa ma le fa kupita.