Ngāue 2

“[Fakafonu] ʻaki … ʻa e Laumālie Māʻoniʻoní”

Ko ha kakai tokolahi ʻoku papitaiso ʻi ha vaitafe ʻi he ʻaho ʻo e Penitekosí.

Kimuʻa pea pekia ʻa Sīsuú, naʻá Ne fakahā ki Heʻene Kau ʻAposetoló hili ʻEne pekiá, ʻe fekauʻi mai ʻe he Tamaí “[ʻa e] Fakafiemālié, ko e Laumālie Māʻoniʻoní” (Sione 14:26). Hangē ko e talaʻofá, naʻe hoko mai ʻa e Laumālie Māʻoniʻoní ki he Kau ʻAposetolo ʻe Toko Hongofulu Mā Uá ʻi ha founga fakaofo ʻi he ʻaho ʻo e Penitekosí. Ko e taumuʻa ʻo e lēsoni ko ʻení ke tokoniʻi koe ke fakaloloto ʻa e mahino ʻokú ke maʻú ki he ngaahi founga ʻe lava ke tāpuekina mo tokoniʻi ai koe ʻe he Laumālie Māʻoniʻoní ke ke ako ʻa e founga ke fakaafeʻi mai ʻa e ngaahi tāpuaki ko iá ki hoʻo moʻuí.

Fakalahi ʻa e ngaahi meʻa te tau malavá

Fakapapauʻi pe ko e hā ʻa e lahi hoʻo tui ki he fakamatala ko ʻení ʻi ha meʻafua mei he taha ki he fitú, pea lekooti hoʻo talí ʻi hoʻo tohinoa akó: ʻOku ou falala ʻe lava ke u ʻiloʻi ʻa e taimi ʻoku ou ongoʻi ai ʻa e Laumālie Māʻoniʻoní ʻi heʻeku moʻuí.

Fakatātā mo e ngaahi foʻi lea Taʻefiemālie ʻAupito mo e Fiemālie ʻAupito.

Ko e hā ha ngaahi fehuʻi ʻokú ke maʻu fekauʻaki mo e Laumālie Māʻoniʻoní?

Hiki ʻi hoʻo tohinoa akó, tohiʻi ʻa e ʻuluʻi tohi “Ngaahi founga ʻe lava ke tokoniʻi ai au ʻe he Laumālie Māʻoniʻoní.” Mateuteu ke tānaki ha ngaahi meʻa ki he lisí lolotonga ʻa e lēsoní.

ʻI hoʻo ako ʻi he ʻaho ní, te ke vakai ai ki ha ngaahi sīpinga ʻo e founga ngāue ʻa e Laumālie Māʻoniʻoní ʻi he moʻui ʻa e kakaí. Fakakaukau ki he meʻa te ke lava ʻo ako mei he ngaahi sīpinga ko ʻení fekauʻaki mo e founga ʻe lava ke ngāue ai ʻa e Laumālie Māʻoniʻoní ʻi hoʻo moʻuí. Ko e moʻoni ʻe taha ʻoku fakamamafaʻi ʻe he ngaahi sīpinga ko ʻení ʻoku tokoniʻi kitautolu ʻe he Tamai Hēvaní ke tau haʻu kia Sīsū Kalaisi, ʻo fakafou ʻi he Laumālie Māʻoniʻoní.

ʻOku lilingi atu ʻa e Laumālie Māʻoniʻoní ʻi he ʻaho ʻo e Penitekosí

Kimuʻa pea pekia ʻa Sīsuú, naʻá Ne akoʻi ki Heʻene kau ākongá ʻe fekauʻi mai kiate kinautolu ʻe he Tamai Hēvaní ʻa e Laumālie Māʻoniʻoní hili ʻa e mavahe ʻa Sīsū mei he māmaní. Naʻá Ne fakamoʻoni ʻe ʻomi ʻe he Laumālie Māʻoniʻoní ha fakafiemālie, tataki, mo fakamoʻoni kiate Ia (vakai, Sione 14:16, 26; 15:26).

Ko e Penitekosí ko ha ʻaho mālōlō faka-Siu ia ʻoku hoko hili ha ʻaho ʻe 50 mei he kātoanga Laka Atú. ʻOku fononga ʻa e kau Siú mei he ngaahi fonua takatakaí ki Selusalema ʻi he ʻaho mālōlō ko ʻení ʻa ia naʻa nau fakafiefiaʻi ʻa e ʻuluaki ututaʻu ʻo e faʻahitaʻú (vakai, Fakahinohino ki he Ngaahi Folofolá, “ Penitekosi,” scriptures.ChurchofJesusChrist.org). Lau ʻa e Ngāue 2:1–8, ʻo kumi ki he founga naʻe fakahoko ai ʻi he ʻaho ko ʻení ʻa e talaʻofa ʻa e Fakamoʻuí fekauʻaki mo hono maʻu ʻe he Kau ʻAposetoló ʻa e Laumālie Māʻoniʻoní. (Fakatokangaʻi ange ʻoku ʻuhinga ʻa e “ngaahi ʻelelo mangamanga ʻo hangē ko e afí” ʻi he veesi 3 ki hano fakahaaʻi mahino mai ʻa e ʻi ai ʻa e Laumālié.)

ʻI he veesi 4–8, naʻe aʻusia ʻe he Kau ʻAposetoló ʻa e meʻa-foaki ʻo e lea ʻi he ngaahi lea kehekehé, “ko ha meʻa-foaki ʻo e Laumālie Māʻoniʻoní ʻa ia ʻokú ne ngaohi ha niʻihi ʻoku ueʻi fakalaumālie, ke nau lea ʻi ha ngaahi lea muli, pe ʻoku mahino kiate kinautolu, pea nau fakatonulea ki ha ngaahi lea ʻoku ʻikai ke nau maheni mo ia” (Fakahinohino ki he Ngaahi Folofolá, “ Lea Kehekehé, Meʻa-foaki ʻo e Ngaahi,” scriptures.ChurchofJesusChrist.org).

Naʻe tāpuekina fēfē nai ʻe he Laumālie Māʻoniʻoní ʻa e kau ākongá mo kinautolu naʻe fanongo kiate kinautolú?
ʻOkú ke pehē naʻe fakalahi fēfē nai ʻe he meʻa-foaki ʻo e lea ʻi he ngaahi lea kehekehé ʻa e malava ke tokoniʻi ʻe he Kau ʻAposetoló ʻa e niʻihi kehé ke nau haʻu kia Kalaisí?
Te tau aʻusia fēfē nai ʻa e meʻa-foaki ko ʻení ʻi he ʻahó ni?

Fakakaukau ke tānaki atu ha ngaahi fakakaukau mei he ngaahi veesi kuó ke akó ki he lisi naʻá ke faʻu ʻi hoʻo tohinoa akó.

Fakamoʻoni ʻa Pita kia Sīsū Kalaisi

Te tau lava ʻo vakai ki ha founga ʻe taha ʻe lava ke tokoniʻi ai kitautolu ʻe he Laumālie Māʻoniʻoní ʻaki ʻetau vakai ki he loto-toʻa naʻe akoʻi mo fakamoʻoni ki ai ʻa Pitá.

Manatuʻi ko e ngaahi meʻa naʻe hoko ʻi he Ngāue 2 naʻe ʻikai fuoloa mei hono tutuki ʻo Sīsuú, lau ʻa e Ngāue 2:22–24, 32–33, 36 pea kumi ki he founga naʻe tokoniʻi ai ʻe he Laumālie Māʻoniʻoní ʻa Pita ʻi he tūkunga ko ʻení ke ne malanga ʻi he loto-toʻa mo e mālohi fekauʻaki mo Sīsū Kalaisí. (Vakai foki, Ngāue 3:12–20.)

Ko e hā naʻá ke vakai ki aí?
Ko e hā ʻokú ke ako mei he fakamatalá ni fekauʻaki mo e founga ʻe lava ke tokoniʻi ai koe ʻe he Laumālie Māʻoniʻoní? (Vakai foki, Ngāue 1:8; 4:31.)

Tānaki atu hoʻo ngaahi fakakaukaú ki hoʻo lisi ʻi hoʻo tohinoa akó.

Ko e ola ʻo e ngaahi akonaki ʻa Pitá ki he niʻihi kehé

Naʻe tākiekina ʻe he Laumālie Māʻoniʻoní ʻa kinautolu ne nau fanongo ki he ngaahi akonaki ʻa Pita fekauʻaki mo Sīsū Kalaisí. Lau ʻa e Ngāue 2:37–38, 41, ʻo kumi ki he founga naʻe tokoniʻi ai ʻe he Laumālie Māʻoniʻoní ʻa e kakai ko ʻení. ʻOku ʻuhinga ʻa e foʻi lea mahuhuhuhu mei he veesi 37 ke fakatupu ha mamahi pe loto-mamahi pea fokotuʻu mai naʻe loto ʻa e kakaí ke nau liliu.

Ko e hā ʻoku makehe kiate koe ʻi he ngaahi veesi ko ʻení?
Naʻe tokoni fēfē nai ʻa e “mahuhuhuhu honau lotó” ki he kakai ko ʻení ke nau haʻu ʻo ofi ange kia Sīsū Kalaisí? (veesi 37).

Fakafehoanaki ʻa e meʻa naʻe hoko ki he kakai naʻe akoʻi ʻe Pitá ki he talaʻofa naʻe fai ʻe he ʻOtuá ki Heʻene kau tamaioʻeikí ʻi he Tokāteline mo e Ngaahi Fuakava 100:5–8.

Ko e hā ha ngaahi sīpinga ʻo e ngaahi liliu ʻe ala ueʻi kitautolu ʻe he Laumālie Māʻoniʻoní ke fakahokó ʻa ia ʻe tokoni ke tau toe ofi ange ai kia Sīsū Kalaisí?

Fakakaukau ke tānaki atu hoʻo ngaahi fakakaukau mei he Ngāue 2:37–38, 41 ki he lisi ʻi hoʻo tohinoa akó.

Fakakaukau ki he meʻa naʻá ke akó

Tohi ʻi ha laʻipepa ʻaki ha peni pe penivahevahe.

Fili Pē: Fie Ako Lahi Ange?

Kuo tokoniʻi fēfē nai kitautolu ʻe he Laumālie Māʻoniʻoní ke tau ofi ange ki he Tamai Hēvaní mo Sīsū Kalaisí?

Naʻe akoʻi ʻe Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

Ko e misiona ʻo e Laumālie Māʻoniʻoní ke fakamoʻoniʻi ʻa e Tamaí mo e ʻAló (vakai, Sione 15:26; 2 Nīfai 31:18; 3 Nīfai 28:11), ke tataki kitautolu ki he moʻoní (vakai, Sione 14:26; 16:13), mo fakahā mai ʻa e ngaahi meʻa kotoa ʻoku tonu ke tau faí (vakai, 2 Nīfai 32:5). ʻOku maʻu mei he founga fetuʻutaki fakataautaha ko ʻeni mo ʻetau Tamai Hēvaní ʻo fakafou ʻi Hono Laumālie Māʻoniʻoní ʻetau fakamoʻoni ki he moʻoní, ʻetau ʻiló, mo hotau fakahinohino fakataautaha mei heʻetau Tamai Hēvani ʻofá. Ko ha konga mahuʻinga ia ʻo ʻEne palani ʻo e ongoongoleleí, ʻa ia ʻe lava ke maʻu ai ʻe Heʻene fānau kotoa pē ha fakamoʻoni fakataautaha ki hono moʻoní.

(Dallin H. Oaks, “Ongo Founga ʻo e Fetuʻutakí,” Liahona, Nōvema 2010, 83)

Naʻe fakamoʻoni ʻa Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e taimi ʻoku ongoʻi ai ʻe he fakafoʻituituí … ʻa e ngāue ʻa e Laumālié ʻiate kinautolú, pe ko e taimi ʻoku nau fakatokangaʻi ai ha fakamoʻoni ʻo e ʻofa mo e ʻaloʻofa ʻa e ʻEikí ʻi heʻenau moʻuí, ʻoku langaki mo fakamālohia fakalaumālie ai kinautolu pea tupulaki mo ʻenau tui kiate Iá.

(M. Russell Ballard, “Now Is the Time,” Ensign, Nov. 2000, 75)

ʻOku ongo fēfē ʻa e Laumālie Māʻoniʻoní, pea te ke fakaafeʻi fēfē nai ia?

ʻOku ʻomi ʻe he foʻi vitiō “Feeling the Holy Ghost (Ongoʻi ‘o e Laumālie Māʻoniʻoni)” (3:17) ha ngaahi sīpinga ʻo e ngaahi founga ʻoku ongoʻi ai ʻe he kakaí ʻa e Laumālie Māʻoniʻoní. ʻOku maʻu ʻa e vitioó ʻi he ChurchofJesusChrist.org.

Feeling the Holy Ghost
Feelings of the Holy Spirit can be likened to hope, joy and peace in your heart and mind.

ʻOku ʻomi ʻe he vitiō “Having the Holy Ghost (Maʻu ʻa e Laumālie Māʻoniʻoní)” (2:56), ʻoku maʻu ʻi he ChurchofJesusChrist.org, ha ngaahi sīpinga ʻo e founga ke fakaafeʻi ai ʻa e Laumālie Māʻoniʻoní.