Ngāue 4–5

Talangofua ki he ʻOtuá Kae ʻIkai ko e Tangatá

Naʻe puke pōpula pea tuku pōpula ʻa Pita mo Sione ki heʻena faifakamoʻui mo fakamoʻoni ʻi he huafa ʻo Sīsū Kalaisí. Naʻe tukuange kinaua kimui ange pea fakahinohinoʻi ke ʻoua naʻá na lea pe faiako ʻi Hono huafá. Ka naʻe kei hoko atu pē ʻa e fakamoʻoni ʻa Pita mo Sione kia Sīsū Kalaisí, pea naʻe toe puke pōpula mo tuku pōpula kinaua. Naʻe fakahaofi kinaua ʻe ha ʻāngelo mei he fale fakapōpulá peá ne talaange ke na foki ʻo hoko atu hono malangaʻi ʻo Kalaisí, pea naʻá na fai ia. Naʻe fekau ‘e he kau taki ʻo e kau Siú ke toe puke pōpula kinaua mo taaʻi. Naʻe fekauʻi kinaua ʻe he kau takí ke taʻofi ʻena malanga ʻaki ʻa Kalaisí, ka naʻe tali ange ʻe Pita mo Sione ʻoku totonu ke na talangofua ki he ʻOtuá kae ʻikai ko e kakaí. Naʻe fiefia ʻa Pita mo Sione ‘i he lava ke na kātakiʻi ʻa e fakatangá koeʻuhí ko Sīsū Kalaisi. ʻI hoʻo ako ʻi he ʻaho ní, fakakaukau ki he founga te ke lava ai ʻo fakatupulaki hoʻo holi ke talangofua ki he ʻOtuá ʻi ha toe taha kehe.

Taukaveʻi ‘o e meʻa ʻoku totonú

Ko e hā ha ngaahi tūkunga ʻe ala faingataʻa ai kiate koe pe ko ha niʻihi kehe ke talangofua ki he ʻOtuá koeʻuhí ko e ngaahi fakalotoa mālohi mei he niʻihi kehé?
Ko e hā ʻa e meʻa ʻokú ne ʻai ʻa e ngaahi tūkunga ko ʻení ke faingataʻá?

Naʻe pehē ʻe Palesiteni Tōmasi S. Monisoni (1927–2018):

ʻI heʻetau fakahoko ʻetau ngāue fakaʻahó, ʻoku mahino pē ʻe ʻahiʻahiʻi ʻetau tuí. ʻE ʻi ai ha ngaahi taimi ʻe ʻākilotoa kitautolu ʻe he niʻihi kehé pe tokosiʻi ha niʻihi ʻe kau mo kitautolu pe te tau tuʻu toko taha pē ke fakamahino ʻa e meʻa ʻoku tali leleí mo ʻikai tali leleí. ʻOku tau maʻu nai ha loto-toʻa ke tuʻu taʻeueʻia ʻi hono taukapoʻi ʻetau tuí, neongo te tau tuʻu toko taha pē ʻi hono fai iá?

(Thomas S. Monson, “Pole ke Tuʻu Toko Taha,” Liahona, Nōvema 2011, 60)

Tali ʻa e ngaahi fehuʻi ko ʻení ʻi hoʻo tohinoa akó:

Te ke fakafuofuaʻi fēfē nai hoʻo loto-fiemālie ke talangofua ki he ʻOtuá kae ʻikai tukulolo ki he ngaahi fakalotoa mālohi mei he niʻihi kehé?
Ko e hā ha ngaahi tūkunga ʻi he kahaʻú ʻe lava ke ke fili ai ke talangofua ki he ʻOtuá kae ʻikai ko ha niʻihi kehe?

ʻI hoʻo ako ʻa e lēsoni ko ʻení, kumi ʻa e ngaahi moʻoni mo e ngaahi sīpinga ʻe lava ʻo tokoni atu ke ke ongoʻi ha holi lahi ange ke talangofua ki he ʻOtuá ʻi ha toe taha kehe.

Naʻe puke pōpula ʻa Pita mo Sione ʻi heʻena malanga mo faifakamoʻui ʻi he huafa ʻo Sīsū Kalaisí

Naʻe fehangahangai ʻa Pita mo Sione mo ha ngaahi tūkunga naʻe pau ai ke na fili ʻi he talangofua ki he ʻOtuá pe tukulolo ki he fakalotoa mālohi mei he niʻihi kehé. Hili hono fakamoʻui ‘e Pita mo Sione ha tangata pipiki ʻi he temipalé mo malanga ʻi he huafa ʻo Sīsū Kalaisí, naʻe puke pōpula, tuku pōpula mo fakafehuʻi kinaua ʻe he kau taki ʻo e kakai Siú (vakai, Ngāue 3:1–11; 4:1–7).

Lau ʻa e Ngāue 4:8–21, ʻo fekumi ki he meʻa naʻe fai ʻe Pita mo Sione ʻi he tūkunga ko ʻení. Fakakaukau ke fakaʻilongaʻi ʻa e ngaahi foʻi lea pe ngaahi kupuʻi lea ʻi he ngaahi veesi ko ʻení ʻokú ke ongoʻi ʻoku mahuʻinga pe ʻoku nau ueʻi koe ke ke fili ke talangofua ki he ʻOtuá ʻo mahulu hake ʻi ha toe meʻa. Mahalo te ke fie mamata ‘i he “Peter and John Are Judged (ʻOku Fakamaauʻi ʻa Pita mo Sione)” (2:51), ‘oku maʻu ʻi he ChurchofJesusChrist.org, lolotonga hoʻo muimui ki ai ʻi hoʻo folofolá.

Peter and John Are Judged
Peter and John preach in the name of Jesus Christ and are brought before the leaders of the Jews for questioning. Acts 4:5–21

Ko e hā ha ngaahi foʻi lea pe ngaahi kupuʻi lea naʻe hā makehe kiate koe mei he ngaahi veesi ko ʻení? Ko e hā hono ʻuhingá?

Lau ʻa e Ngāue 5:12–32 pea hoko atu hoʻo ako ki he fakamatala ko ʻení. Mahalo te ke fie fakakaukau ke fakaʻilongaʻi ha faʻahinga tokāteline, tefitoʻi moʻoni, pe kupuʻi lea ʻoku ongo mahuʻinga kiate koe. Pe te ke lava ʻo mamata ʻi he “Peter and John Continue Preaching the Gospel (Ko e Hoko Atu Hono Malangaʻi ʻe Pita mo Sione ʻa e Ongoongoleleí)” kae ʻoua kuo aʻu ki he taimi 3:51.

Peter and John Continue Preaching the Gospel
Peter and John continue preaching and healing in the name of Jesus Christ, despite the attempts of the authorities to stop them. Acts 5:12–42

Ko e hā naʻá ke maʻú?
Ko e hā ha ngaahi moʻoni naʻá ke ako mei he fakamatala ko ʻení?

Ko e taha ʻo e ngaahi moʻoni te tau lava ʻo ako mei he fakamatala ko ʻení kapau te tau fili ke talangofua ki he ʻOtuá kae ʻikai ke manavahē ki he niʻihi kehé, te Ne ʻiate kitautolu leva.

Fakakaukau ki he ngaahi tūkunga naʻá ke fakaʻilongaʻi ʻi he kamataʻanga ʻo e lēsoní ʻa ia ʻe ala faingataʻa ai ke talangofua ki he ʻOtuá koeʻuhí ko e fakalotoa mālohi mei he niʻihi kehé.

Tohi ʻi ha laʻipepa ʻaki ha peni pe penivahevahe.

Ko ha sīpinga fakaonopooni

Naʻe vahevahe ʻe ʻEletā Fili K. Mutomi ʻo e Kau Fitungofulú ha sīpinga ʻo ha fāmili naʻa nau fili ke talangofua ki he ʻOtuá kae ʻikai ko e kakaí. Ke fanongo ki he fakamatala ko ʻení, mamataʻi ʻa e “Te Mou Tauʻatāiná,” ʻoku maʻu ʻi he ChurchofJesusChrist.org, mei he taimi 6:43 ki he 8:51.

Ye Shall Be Free
Elder Mutombo teaches that Jesus Christ is the Light of the World and that He can guide us in dark and troubling times.

Ko e hā ʻa e meʻa naʻá ke mahuʻingaʻia taha ai ʻi he anga hono tali ʻe he fāmili ko ʻení honau ngaahi faingataʻaʻiá?
ʻOkú ke pehē ko e hā naʻe fuʻu mahuʻinga ai ʻa e tui ʻa e fāmilí kia Sīsū Kalaisí ʻi he tūkunga ko ʻení?

Tukuange ʻa Pita mo Sione

Naʻe aleaʻi ʻe he kau taki ʻo e kau Siú ʻa e meʻa ke fai kia Pita mo Sioné. Naʻe fakalotolahiʻi kinautolu ʻe ha taki Siu naʻe fakaʻapaʻapaʻi lahi ko Kāmalieli ke tukuange ʻa Pita mo Sione koeʻuhí naʻá ne ʻiloʻi kapau naʻe fakahoko moʻoni ʻe Pita mo Sione ʻa e ngāue ʻa e ʻOtuá, he ʻikai lava ʻe he kau taki ʻo e kau Siú ʻo taʻofi ia (vakai, Ngāue 5:29–39).

Lau ʻa e Ngāue 5:40–42pea fakakaukau ke fakaʻilongaʻi ʻa e ngaahi foʻi lea pe ngaahi kupuʻi lea ʻoku nau fakamatalaʻi ʻa e ongo naʻe maʻu ʻe Pita mo Sione hili ʻena aʻusia ʻa e meʻa naʻá na fakahokó.

Fili Pē: Fie Ako Lahi Ange?

Fēfē kapau ʻoku ʻikai ke u kau he laú koeʻuhí ko ʻeku fili ke talangofua ki he Tamai Hēvaní?

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻE ʻi ai ʻa e ngaahi taimi te ke ongoʻi tuenoa mo maʻuhala ai—kuó u maʻu ia—koeʻuhí ʻoku ʻikai ke ke kau mo e kakaí. Houngaʻia ʻi hono fakafōtunga koe ʻe hoʻo moʻui māʻoniʻoní koeʻuhí ke ʻoua naʻá ke feʻunga mo e feituʻu ʻoku ʻikai ke ke kau ki aí. Ko ha vahaʻataimi fakataimi ʻeni ʻo e siviʻi mo e tupulaki fakatāutahá. ʻE fakafetongi ʻaki ia ‘i ha taimi mo e ngaahi kaungāmeʻa moʻoní pea mo ha fiefia lahi ange.

(Richard G. Scott, “The Power of Righteousness,” Ensign, Nov 1998, 68)

ʻE founga fēfē nai haʻaku taukapoʻi ʻeku tuí?

Naʻe fakamatala ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻAi ke mou toʻa. Moʻui faivelenga ʻaki ʻa e ongoongoleleí neongo ʻoku ʻikai pehē ʻa e niʻihi ʻoku mou feohí. Taukaveʻi hoʻomou tuí ʻaki ʻa e fakaʻapaʻapa mo e angaʻofa, ka ke mou taukaveʻi kinautolu.

(Jeffrey R. Holland, “Ko e Mahuʻinga—mo e Tāpuaki—ʻo e Tuʻunga Faka-ākongá,” Liahona, Mē 2014, 9)

Naʻe fakahaaʻi fēfē nai ʻe he Fakamoʻuí ʻEne talangofua ki he Tamai Hēvaní kae ʻikai ki he kakaí?

ʻOku fakatātaaʻi ʻe he ngaahi vitiō ko ʻeni ʻo e Tohi Tapú ʻa e holi ʻa e Fakamoʻuí ke ngāue maʻá e ʻOtuá kae ʻikai muimui ki he ngaahi fakakaukau ʻa e kakaí.

Mamataʻi ʻa e “Ko e Fakamolemoleʻi ʻe Sīsū e Ngaahi Angahalá mo Fakamoʻui ha Tangata ne Mahakitete” (2:57) ke ke ʻilo ʻa e founga naʻe fakahaaʻi ʻaki ʻe he Fakamoʻuí Hono mālohí mo ʻEne finangalo lelei ke fakamolemoleʻi ʻa e angahalá ʻi he taimi naʻe fakafehuʻia ai ia ʻe he niʻihi kehé.

Ko e Fakamolemoleʻi ʻe Sīsū e Ngaahi Angahalá mo Fakamoʻui ha tangata ne Mahakitete
Jesus shows that He has power to both forgive sins and heal physical infirmities. Mark 2:1–12

Mamataʻi ʻa e “Jesus Heals A Lame Man on the Sabbath (Fakamoʻui ʻe Sīsū ha Tangata Pipiki ʻi he Sāpaté)” (2:23) ke ke ʻilo ʻa e founga naʻe fakamoʻui ai ʻe he Fakamoʻuí ha tangata neongo naʻe pehē ʻe he kau taki ʻo e kau Siú ko e tōʻonga taʻe-feʻunga ia ki he Sāpaté.

Jesus Heals a Lame Man on the Sabbath
Jesus performs a miracle by healing an invalid on the Sabbath day. John 5:2–12

Mamataʻi ʻa e “Go and Sin No More (ʻAlu pea ʻOua ʻe Toe Faiangahala)” (3:21) ke ke ʻilo ki he founga naʻe ʻikai fakamalaʻiaʻi ai ʻe he Fakamoʻuí ha taha kehe neongo naʻe fakalotoa mālohi Ia ʻe he niʻihi kehé ke fai pehē.