Susiha ang Imong Nakat-onan 3

Mateo 8–13; Marcos 2–5; Lucas 7–9; 11; 13

Mendoza, Argentina. A group of young men and young women attend an early morning seminary class.

Tinguha niini nga leksiyon nga tabangan ka sa pagsusi sa mga tumong nga imong gitakda ug sa nakat-onan ug personal nga paglambo nga imong nasinati gikan sa pagtuon sa Bag-ong Tugon karong tuiga.

Hunahunaa ang imong bag-ohay nga paglambo

Ang usa sa mga katuyoan sa seminary mao ang pagtabang kanimo nga mahiduol kang Jesukristo ug mahimong Iyang disipulo. Paggahin og panahon sa paghunahuna mahitungod sa imong bag-ohay nga espirituhanong paglambo. Magiyahan ka sa mosunod nga mga pangutana. Ikonsiderar ang pagrekord sa imong mga tubag niini nga mga pangutana diha sa imong journal sa pagtuon.

• Unsa ang usa ka kausaban nga bag-ohay nimong gibuhat sa imong kinabuhi nga mas nakapaduol kanimo kang Jesukristo?

• Unsa ang imong nakat-onan mahitungod sa Manluluwas sa imong bag-ohay nga mga pagtuon nga labing makahuluganon kanimo?

• Sa unsang mga paagi nga gibati nimo nga morag nahimo kang mas mahisama kang Jesukristo?

Susiha ang imong abilidad sa pagsabot sa mga kasulatan

Karong tuiga sa seminary, gitudloan ka og lain-laing mga kahanas nga makatabang kanimo nga mas masabtan ang mga kasulatan. Ang pipila niini nga mga kahanas, sama sa pagtuki sa lisod nga mga pulong, lagmit nga nakatabang nga mas masabtan nimo ang pinulongan nga gigamit sa mga kasulatan. Ang uban pang mga kahanas, sama sa upat ka lakang nga sundanan para sa pagsabot sa mga simbolo nga gigamit sa mga sambingay, lagmit nga nakatabang nga mas masabtan nimo ang mga mensahe sa mga kasulatan.

• Gamit ang sukdanan nga gikan sa 0 hangtod sa 5, unsa kadako ang natabang kanimo sa mosunod nga mga kahanas sa pagtuon aron mas masabtan ang mga kasulatan?

0. Wala nako gigamit kini nga kahanas.

1. Wala

2. Gamay lamang

3. Medyo

4. Igo-igo lamang

5. Hingpit gayod

______ Pagtuki sa mga baroganan

______ Pagsabot sa mga simbolo ug mga pasumbingay (pananglitan, sa mga sambingay sa Manluluwas)

______ Pag-tag (sa Gospel Library), pagmarka, paglinya, ug uban pa

______ Pagrekord sa mga hunahuna ug mga impresyon samtang nagtuon ka

______ Pag-link (sa Gospel Library) o pag-cross reference sa mga bersikulo

______ Pagtuon sa daghang mga perspektibo (pananglitan, pagtuon sa parehong sugilanon gikan sa lainlaing mga panglantaw)

______ Paghanduraw sa mga kasulatan

• Unsa ang uban pang mga kahanas ang idugang nimo niini nga listahan nga gisulayan nimo?

• Sa unsang paagi nga ang pagpatuman sa mga kahanas sa pagtuon sa kasulatan nakatabang kanimo nga mas nailhan si Jesukristo ug nasabtan ang Iyang mga pagtulon-an?

Ipasabot ang importante nga tahas sa mga propeta ug mga apostoles diha sa Simbahan sa Manluluwas

Sa dili pa kaayo dugay, nakakat-on ka mahitungod sa pagtawag sa Manluluwas sa Iyang Napulog Duha ka Apostoles isip bahin sa pagtukod sa Iyang Simbahan (tan-awa ang Mateo 10).

Hunahunaa nga aduna kay higala nga nagtuon mahitungod sa Simbahan ug gusto pang makahibalo mahitungod sa tahas sa mga propeta ug mga apostoles diha sa Simbahan sa Manluluwas karon. Hunahunaa nga gisukna ka sa imong higala sa mosunod nga mga pangutana. Pag-andam og tubag para sa imong higala. Lagmit nga makatabang kon maglakip og mga kamatuoran gikan sa Mateo 10 isip bahin sa imong tubag.

1. Tubagi ang mosunod nga pangutana diha sa imong journal sa pagtuon:

• Nganong mitawag man ang Manluluwas og mga Apostoles?

• Nganong gikinahanglan man nato ang mga buhi nga Apostoles karon?

Susiha kon giunsa nimo paggamit ang pagtuo kang Jesukristo aron maghinulsol sa imong mga sala

Lagmit nga nakita na nimo kini nga diagram sa miaging leksiyon. Pagtagana og panahon aron mamalandong kon asa kaha nimo ibutang ang imong kaugalingon niini nga diagram karon. Hunahunaa kon sa imong pamati unsa ka kaduol sa Ginoo ug sa unsang direksyon ka nagpadulong.

Shows two stick figures, one going toward Christ, the other going away from Christ

Samtang nagtuon ka sa Bag-ong Tugon, lagmit nga gibati nimo nga madasigon nga mas mahiduol kang Jesukristo pinaagi sa paggamit sa hugot pagtuo diha Kaniya ug paghinulsol sa imong mga sala. Bisan pa kon usahay morag mosangpot sa dili maayong mga sangpotanan ang paghinulsol, ang hugot nga pagtuo kang Jesukristo ug ang sinsero nga paghinulsol makatabang kanato nga mabuntog kadto nga mga kahadlok.

Kon misalmot ka sa leksiyon sa Lucas 7:36–50, lagmit nga mahinumdoman nimo nga gihangyo ka sa pagbuhat og plano aron mapalawom ang imong paghigugma para sa Manluluwas pinaagi sa paghinulsol sa imong mga sala. Niana nga leksiyon, gihangyo ka nga tubagan ang mosunod nga pangutana diha sa imong journal sa pagtuon:

• Unsa ang usa ka butang nga kinahanglan nimong undangon sa pagbuhat aron mas mahiduol sa Manluluwas? Unsaon man nimo sa pag-undang?

• Unsa ang usa ka butang nga kinahanglan nimong sugdan sa pagbuhat aron mas mahiduol sa Manluluwas? Unsaon man nimo sa pagsugod?

Kon posible, tan-awa og balik kini nga entry diha sa imong journal sa pagtuon aron susihon kon giunsa nimo pagtubag kining duha ka pangutana. Hunahunaa ang pag-uswag nga imong nabuhat ngadto sa mga tumong nga imong gitakda. Magiyahan ka sa mosunod nga mga pangutana.

• Unsa nga mga babag ang imong giatubang o unsa nga pag-uswag ang imong nabuhat samtang naningkamot nga mag-usab ug mas mahiduol kang Jesukristo?

• Sa unsang paagi ka gitabangan sa Ginoo?

• Base sa imong kasamtangang pag-uswag, unsa kaha ang imong sunod nga lakang?

2. Tubagi ang usa sa mosunod nga mga pangutana diha sa imong journal sa pagtuon:

• Unsa nga mga pangutana ang aduna gihapon ka mahitungod sa paghinulsol?

• Sa unsang paagi nga ang pagpili nga maghinulsol nakatabang kanimo sa paglambo sa espirituhanong paagi ug pagdawat og hingpit nga kalipay?

• Sa unsang paagi nimo nabati ang gugma sa Manluluwas samtang naningkamot ka nga maghinulsol o mag-usab?