Mateo 13:24–30, 36–43

Ang Sambingay sa Trigo ug mga Sagbot

Migamit ang Manluluwas og sambingay bahin sa umahan sa trigo ug mga sagbot (makahilo nga mga sagbot) aron magtudlo mahitungod sa mga matarong nga pagapundokon ug ang mga daotan pagasunogon sa dili pa Siya mobalik. Ang katuyoan niini nga leksiyon mao ang pagdugang sa imong tinguha nga mosalmot sa pagpundok sa Israel.

Ang sambingay mahitungod sa trigo ug mga sagbot

Pamalandongi ang mosunod nga mga pangutana. Kon adunay ginikanan o uban pang sakop sa pamilya, mahimo nimong hisgotan ang mga pangutana uban kanila.

Kinsa ang unang tawo sa imong pamilya nga mipasakop sa Simbahan?
Kinsa ang mitabang sa pagdapit kanila sa Simbahan?
Sa unsang paagi nakaapekto sa imong kinabuhi ang pagkamiyembro sa Simbahan niini nga sakop sa pamilya?
Sa unsang paagi kaha makaimpluwensya sa ubang tawo ang imong desisyon sa pagtuman sa imong mga pakigsaad sa Dios?

Sa Mateo 13, gigamit sa Ginoo ang sambingay sa trigo ug mga sagbot aron magtudlo mahitungod sa pagpundok sa mga katawhan ngadto sa Iyang Simbahan. Samtang nagtuon ka, paghatag og pagtagad sa mga pag-aghat sa Espiritu aron tabangan ka nga masabtan kon nganong pundokon sa Ginoo ang Iyang mga katawhan ug sa unsang paagi ka makasalmot.

Tun-i ang sambingay sa Mateo 13:24–30. Mahimong makatabang kon mahibaloan nga ang sagbot “usa ka balili o sagbot nga makahilo nga ingon-ingon ang panagway sa usa ka trigo. Kini dili mailhan gikan sa trigo hangtod nga kini mahingpit ang pagtubo” (Giya ngadto sa mga Kasulatan, “Sagbut, Mga,” scriptures.ChurchofJesusChrist.org).

Aron matabangan ka sa pagtuon, gamita kining upat ka lakang nga sundanan:

Pangitaa ang importante nga mga detalye.
Pagbuhat og espirituhanong mga pagkompara.
Pagdiskobre og importante nga mga leksiyon.
Pagtuki og personal nga paggamit.

1. Tubaga ang mosunod nga mga pangutana diha sa imong journal sa pagtuon.

Unsa nga mga detalye niini nga sambingay ang importante para kanimo?
Unsa nga espirituhanong mga pagkompara ang imong gibuhat?
Unsa nga mga importante nga leksiyon ang imong naila?
Unsaon nimo paggamit ang mga leksiyon gikan niini nga sambingay nganha sa imong kinabuhi?

Ang interpretasyon sa Ginoo mahitungod sa sambingay

Basaha ang Mateo 13:36–43, nga mangita kon unsay gitudlo sa Ginoo mahitungod niini nga sambingay.

Unsa ang gikadugang sa pagpasabot sa Manluluwas sa imong pagsabot sa sambingay?

Sa atong dispensasyon, nagpaambit ang Ginoo og usa ka paagi nga matuman kini nga sambingay. Basaha ang Doktrina ug mga Pakigsaad 101:64–65, nga mangita kon unsa ang gisaad sa Ginoo nga buhaton sa dili pa ang Ikaduhang Pag-anhi. Mahimong makatabang nga mahibaloan nga ang kamalig usa ka bodega o balay tipiganan diin itago ang lugas.

Unsay imong nakat-onan mahitungod sa Ginoo gikan niini nga mga bersikulo?

Ang pagpundok sa Israel

Nagtudlo si Presidente Nelson mahitungod sa mga paningkamot sa Ginoo nga pundokon ang Iyang katawhan sa ulahing mga adlaw. Tan-awa ang “Ipatigbabaw ang Dios Labaw sa Tanan” gikan sa code sa oras nga 4:07 hangtod sa 5:48, o basaha ang mosunod nga teksto. Mahimo usab nga mangita ka mismo og mga kasulatan o uban pang mga pamahayag aron molawom ang imong pagsabot bahin sa pagpundok sa Israel.

Ipatigbabaw ang Dios Labaw sa Tanan
President Nelson describes latter-day covenant Israel as those who let God prevail in their lives. He invites us to make God our life’s most important influence.

Ang imong tahas sa pagpundok sa Israel

Basaha ang mosunod nga pamahayag gikan ni Presidente Russell M. Nelson, nga mangita kon unsa ang kalambigitan kanimo sa pagpundok sa Israel:

Gatherers in the Kingdom
Elder Bradley D. Foster explains each of our roles in gathering God's children on both sides of the veil.

Akong minahal nga talagsaong kabatan-onan, gipadala kamo sa yuta niining tukma nga panahon, ang labing importanting panahon sa kasaysayan sa kalibotan, aron motabang sa pagpundok sa Israel. Walay laing panghitabo dinhi sa kalibotan karon nga mas importante kay sa niana. Walay lain nga dunay mas dakong sangputanan. Walay lain gayud.

Kini nga pagpundok kinahanglang importante kaayo kaninyo. Kini mao ang misyon diin gipadala kamo dinhi sa yuta.

Busa ang akong pangutana ninyo mao nga “Andam ba kamong moapil sa grupo sa kabatan-onan sa Ginoo aron motabang sa pagpundok sa Israel?”

(Russell M. Nelson ug Wendy Nelson, “Paglaum sa Israel” [tibuok kalibotan nga debosyonal sa kabatan-onan, Hunyo 3, 2018], dugang ngadto sa New Era ug Ensign,, 12, ChurchofJesusChrist.org)

3. Kompletoha ang mosunod diha sa imong journal sa pagtuon:

Pagsulat og usa ka parapo o mas daghan pa bahin sa imong mga hunahuna ug mga impresyon mahitungod sa pagpundok sa Israel ug sa sambingay mahitungod sa trigo ug mga sagbot. Dapita ang Espiritu Santo aron dasigon ang imong mga hunahuna ug mga pagbati samtang nagsulat ka. Matabangan ka sa mosunod nga mga pangutana sa pagdesisyon kon unsa ang isulat pero giya lamang kini.

Unsa nga mga pangutana ang aduna ka mahitungod sa pagpundok sa Israel nga matubagan na nimo karon?
Unsa ang gitudlo kanimo sa pagpundok sa Israel mahitungod sa pagsalig sa Manluluwas nganha kanimo ug sa Iyang gugma para sa tanang katawhan?
Sa unsang paagi ka makatabang sa imong kaugalingon ug sa ubang tawo sa pagpundok sa katawhan sa Ginoo?

Opsiyonal: Gustong Makahibalo pa og Dugang?

Nganong ang Ginoo gusto man nga mopundok sa Iyang mga katawhan?

Si Elder David A. Bednar sa Korum sa Napulog Duha ka Apostoles mitudlo:

Ang Ginoo nagpundok sa Iyang katawhan sa panahon nga sila modawat Kaniya ug mosunod sa Iyang mga sugo. …

… Ang Ginoo nagpundok sa Iyang mga katawhan aron sa pagsimba, sa pagtukod sa Simbahan, alang sa panalipod, ug sa pagdawat og tambag ug pagtudlo. …

Si Propeta Joseph Smith mipadayag nga sa tanang panahon ang balaan nga katuyoan sa pagpundok mao ang pagtukod og mga templo aron ang mga anak sa Ginoo makadawat sa labing taas nga mga ordinansa ug pinaagi niana makabaton og kinabuhing dayon.

(David A. Bednar, “The Spirit and Purposes of Gathering” [Brigham Young University–Idaho nga debosyonal, Okt. 31, 2006], byui.edu)

Unsa ang mga kamalig diin ang mga matarong pagapundokon para sa kaluwasan?

Si Elder David A. Bednar sa Korum sa Napulog Duha ka Apostoles mitudlo:

[Ang] mahinungdanong kalambigitan tali sa baroganan sa pagpundok ug sa pagtukod og mga templo gipasabut og maayo diha sa Basahon ni Mormon:

“Tan-awa, ang umahan hinog na, ug bulahan kamo, kay kamo miduso sa galab, ug miani uban sa inyong kusog, oo, sa tibuok adlaw kamo naghago; ug tan-awa ang gidaghanon sa inyong mga bugkos! Ug sila pagapundokon ngadto sa mga kamalig, nga sila dili mausik” (Alma 26:5).

Ang mga bugkos dinhi niining pasumbingay nagrepresentar sa bag-ong nabunyagan nga mga miyembro sa Simbahan. Ang mga kamalig mao ang balaang mga templo.

(David A. Bednar, “Madungganon nga Paghupot og usa ka Ngalan ug Katungdanan,” Liahona, Mayo 2009, 97)

Unsa ang tahas sa Basahon ni Mormon sa pagpundok sa Israel?

Si Presidente Russell M. Nelson mitudlo:

Ang Basahon ni Mormon maoy sentro niini nga buhat. Nagpadayag kini sa doktrina sa pagpundok. Nakapahimo kini sa mga tawo nga magkat-on kabahin ni Jesukristo, nga motuo sa Iyang ebanghelyo, ug mopasakop sa Iyang Simbahan. Gani, kon wala ang Basahon ni Mormon, ang gisaad nga pagpundok sa Israel dili mahitabo.

(Russell M. Nelson, “Ang Pagpundok sa Nagkatibulaag nga Israel,” Liahona, Nob. 2006, 80)