Siviʻi Hono 7 Hoʻo Akó

ʻOku fakataumuʻa ʻa e lēsoni ko ʻení ke tokoniʻi koe ke ke vakaiʻi ʻa e ngaahi taumuʻa kuó ke fokotuʻú pea mo e ako mo e tupulaki kuó ke aʻusia lolotonga hoʻo ako ʻa e Fuakava Foʻoú.

ʻE lava nai ʻa e kakaí ʻo liliu?

Fakakaukauloto ʻoku tala atu ho kaungāmeʻá ʻoku ʻi ai ha ngaahi meʻa ʻokú ne fie liliu fekauʻaki mo ia, ka ʻoku ʻikai ke ne fakakaukau te ne lava ʻo fai ʻa e ngaahi liliu ko iá.

Ko e hā haʻo tali?
ʻOkú ne tokoniʻi fēfē nai hoʻo moʻuí ke ʻiloʻi te ke lava ʻo liliu ʻo fakafou ʻi he Fakalelei ʻa Sīsū Kalaisí?

Fakakaukau ki he ngaahi talanoa mei he tohi ʻa Ngāué ʻoku nau fakahaaʻi ʻa e founga ʻe lava ke liliu ai ʻa e kakaí ʻo lelei ange ʻi heʻenau haʻu kia Kalaisí pea hoko ko ʻEne kau ākongá.

Kapau ʻe fiemaʻu, fakakaukau ke toe vakaiʻi ha sīpinga ʻe taha pe lahi ange mei he ngaahi sīpinga ko ʻení.

Kakai naʻa nau kau ki he Siasí: Ngāue 2:14, 36–47
Ko e ʻiunoke ʻItiopeá: Ngāue 8:26–40
Saula (ʻa ia naʻe hoko ko Paulá): Ngāue 9:1–22
Koniliusi: Ngāue 10:1–8, 24–25, 44–48
Ko hono leʻohi ʻe he leʻo ʻi he fale fakapōpulá ʻa Paula mo Sailosí: Ngāue 16:25–36

Tohi ʻi ha laʻipepa ʻaki ha peni pe penivahevahe.

Ko hoʻo ului kia Sīsū Kalaisí

Fakalaulauloto ki hoʻo ului kia Sīsū Kalaisí. Fakakaukau ki he ngaahi fakaafe ke liliú pe fakalakalaka kuó ke ongoʻi mei he ʻEikí ʻi hoʻo ako ʻa e tohi ʻa Ngāué. Tali ʻa e ngaahi fehuʻi ko ʻení ʻi hoʻo tohinoa akó.

Ko e hā ʻokú ke ʻilo fekauʻaki mo Sīsū Kalaisí ʻa ia ʻokú ne fakaʻaiʻai koe ke ke ʻofa mo muimui kakato ange kiate Iá?
ʻI he māhina kuo ʻosí pe ngaahi māhina kimuʻá, ko e hā ha ngaahi liliu kuó ke ongoʻi ne ueʻi ʻe he Laumālie Māʻoniʻoní ke ke fakahokó? Naʻá ke tali fēfē nai iá?
Kuo tāpuekina fēfē nai koe ʻe he Tamai Hevaní ʻi hoʻo ngaahi feingá? Ko e hā ʻa e meʻa naʻá ke fai naʻe hoko ai ʻa e liliu lahi tahá?
Ko e hā, kapau ʻoku ʻi ai ha meʻa, kuó ne ʻai ke faingataʻa hono tali ʻa e ngaahi fakaafe ke liliú mo fakalakalaká? Te ke fekumi fēfē nai ki ha toe tokoni mei he Tamai Hēvaní?

Hokohoko atu hoʻo fekumi ki ha ueʻi mei he Tamai Hevaní ʻo fakafou mai ‘i he Laumālie Māʻoniʻoní ʻi hoʻo ako ʻa e lēsoni ko ʻení. Feinga ke ʻiloʻi ʻa e meʻa ʻokú Ne finangalo ke ke fai ke ke liliu ai mo ului lahi ange kia Sīsū Kalaisí. Fili ha taha ʻo e ngaahi ʻekitivitī ko ʻení ke fakakakato ʻi hoʻo fakakaukau ki he founga ke ofi ange ai kia Kalaisí.

ʻEkitivitī A: Ko e ngaahi ʻuluaki tefitoʻi moʻoni mo e ngaahi ouau ʻo e ongoongolelei ʻo Sīsū Kalaisí

ʻI he tohi ʻa Ngāué, naʻe maʻu ʻe ha kakai tokolahi ha tokoni fakalangi ke liliu pea hoko ʻo ului lahi ange kia Sīsū Kalaisi ʻo fakafou ʻi hono maʻu ʻa e ngaahi ʻuluaki tefitoʻi moʻoni mo e ngaahi ouau ʻo e ongoongoleleí.

ʻOku fakamatalaʻi ʻe he Fakahinohino ki he Ngaahi Folofolá ʻa e founga ʻoku tokoniʻi ai kitautolu ʻe he ngaahi tefitoʻi moʻoni mo e ngaahi ouau ko ʻení ke tau ului kia Sīsū Kalaisí.

ʻOku fakakakato ʻa e uluí ʻe he fakatomalá, papitaiso ki he fakamolemoleʻi ʻo e ngaahi angahalá, maʻu ʻo e Laumālie Māʻoniʻoní ʻi he hilifaki ʻo e nimá, mo e hokohoko atu ʻa e tui ki he ʻEiki ko Sīsū Kalaisí. ʻE liliu ʻa e tangata fakakakanó ki ha tangata foʻou kuo fakamāʻoniʻoniʻi mo haohaoa, kuo toe fanauʻi foʻou ʻia Kalaisi Sīsū (2 Kolinitō 5:17; Mōsaia 3:19).

(Fakahinohino ki he Ngaahi Folofolá, “ Uluí, Fakauluí” scriptures.ChurchofJesusChrist.org)

Fakakaukau ki he fakamatala naʻá ke filí ʻa ia naʻá ne fakatātaaʻi ha taha ʻoku liliu ʻi he tokoni ʻa e ʻEikí.

Fakakaukau ki haʻo ngaahi tali ki he ngaahi fehuʻi ko ‘ení:

Ko e hā ʻa e fatongia ʻo e ngaahi ʻuluaki tefitoʻi moʻoní mo e ngaahi ouau ʻo e ongoongoleleí ʻi heʻenau uluí?
Kuo tokoniʻi fēfē nai koe pe ko ha niʻihi kehe ʻe he ngaahi ʻuluaki tefitoʻi moʻoní mo e ngaahi ouau ʻo e ongoongoleleí ke ke ului lahi ange ki he Fakamoʻuí?

Fakakaukauloto ʻoku kole tokoni atu ʻa e kau faifekau fakalotofonuá fekauʻaki mo ha taha ʻoku nau akoʻi. ʻOku nau fiemaʻu ke ke vahevahe ʻa e founga ʻe lava ke tokoni ai ʻa e ngaahi ʻuluaki tefitoʻi moʻoní mo e ngaahi ouau ʻo e ongoongoleleí ke fakamālohia ʻa e ului kia Sīsū Kalaisí mo fakaafeʻi ʻEne tokoní ke fakahoko ʻa e ngaahi liliu ʻoku fiemaʻu ʻi heʻetau moʻuí. Hiki ha fakamatala maʻá e tokotahá ni ʻo hangē pē ʻokú ke lea hangatonu kiate iá. Fakaʻaongaʻi ha sīpinga ʻe taha mei he tohi Ngāué mo ha faʻahinga aʻusia fakataautaha pē ʻokú ke ongoʻi ʻe ʻaonga.

ʻEkitivitī E: Ako folofolá mo e uluí

Ko e taha ʻo e ngaahi ngāue mahuʻinga te tau lava ʻo fai ke fakamālohia ʻetau ului kia Sīsū Kalaisí ko hono ako maʻu pē ʻa e folofolá. Fakakaukau ki he founga ʻoku fakahaaʻi ai ʻe he ngaahi fakamatala ko ʻeni mei he tohi ʻa Ngāué ʻa e mahuʻinga ʻo e ako folofola ʻi he fakauluí.

Filipe mo e tangata ʻItiopeá: Ngāue 8:26–40
Paula mo e Kāingalotu ʻi Tesalonika mo Peleá: Ngāue 17:1–14

Fakalaulauloto ki he founga kuo tokoni ai ʻa e ako folofolá ʻi hoʻo ului ki he Fakamoʻuí.

Fakakaukauloto ʻoku kole atu hoʻo taki ʻi he Kau Talavoú pe Kau Finemuí ke ke tokoniʻi ʻa e toʻu tupu ʻi hoʻo uōtí pe koló ke nau ako ʻa e folofolá mo fakamālohia ʻenau ului kia Sīsū Kalaisí. Ko e hā ha maʻuʻanga tokoni te ke lava ʻo faʻu ke fakaʻaiʻai ʻaki kinautolú? Fakaʻaongaʻi ha ngaahi miniti siʻi ke fokotuʻutuʻu hoʻo maʻuʻanga tokoní ʻi hoʻo tohinoa akó. ʻE lava pē ko ha vitiō, fakamatala, lea, uepisaiti, pe ko ha maʻuʻanga tokoni kehe.

ʻE lava ke kau ʻi hoʻo maʻuʻanga tokoní ha faʻahinga meʻa pē ʻi he ngaahi meʻá ni:

Ko ha sīpinga mei he tohi ʻa Ngāué pe ko ha tohi folofola ʻe taha ʻokú ne fakahaaʻi ʻa e mahuʻinga ʻo e ako folofolá.
Ko ha sīpinga pe founga ʻo ha taukei fakafolofola ʻokú ke fakaʻaongaʻi ʻa ia ʻoku tokoni kiate koe, pe ko ha fakamatala ʻo e founga ʻo hoʻo akó.
Ko ha fakamatala ʻo ha aʻusia naʻe tokoniʻi ai koe pe ko ha taha ʻokú ke ʻilo ʻe he ako folofolá ke ke ului lahi ange ki he Fakamoʻuí.
Ko hoʻo fakamoʻoni fakataautaha ki he mālohi ʻo e ako folofolá.

Fekumi ki he tokoni ʻa e Tamai Hēvaní ʻo fakafou ʻi he Laumālie Māʻoniʻoní ʻi hoʻo hiki ha faʻahinga ngāue pē ʻokú ke ongoʻi ʻoku fiemaʻu ke ke fai ke ke ului lahi ange ai kia Sīsū Kalaisi. ʻE tokoniʻi koe ʻe he Fakamoʻuí ʻi hoʻo feinga ke muimui ki he ngaahi ongo ko ʻení. Fakakaukau ke vahevahe hoʻo ngaahi ongó mo ha mātuʻa pe ko ha taki falalaʻanga ʻo e Siasí. Kole ange ke nau tokoniʻi koe ke ke muimui ki he ngaahi ongo ko ʻení.