Toe Vakaiʻi Hono 16 ʻo e Fakataukei Fakatokāteliné

Ako Maʻuloto ʻa e Ngaahi Potufolofola mo e Ngaahi Kupuʻi Lea Mahuʻinga ʻi he Folofolá

ʻOku tangutu fakataha ha faʻē mo ha finemui ʻi Nuʻu Sila ʻo lau folofola. Mo e ngaahi tā foki ʻo ha fefine ʻi heʻene fakalaulaulotó.

ʻE lava ke tokoniʻi koe ʻi ha ngaahi founga lahi ʻi hono manatua ʻo e ngaahi potufolofolá mo e ngaahi meʻa ʻoku nau akoʻí. ʻOku fakataumuʻa ʻa e lēsoni ko ʻení ke tokoni atu ke ke ako maʻuloto ha niʻihi ʻo e ngaahi potufolofola fakataukei fakatokāteline ʻo e Fuakava Foʻoú mo e ngaahi kupuʻi lea mahuʻinga ʻi he folofolá.

Ko e hā nai ʻa e ʻuhinga ka ke ka ako maʻuloto ai ha niʻihi ʻo e ngaahi meʻá ni: fakalea ʻo e hivá, taimi-tēpilé, pe ngaahi moʻoniʻi meʻa fekauʻaki mo e kau vaʻinga sipotí pe kau faivá?
Ko e hā ha ngaahi sīpinga kehe ʻo e ngaahi meʻa ʻokú ke ako maʻulotó? Ko e hā ʻa e ʻuhinga ʻokú ke ako maʻuloto ai kinautolú?

Ko e hā ha ngaahi ʻuhinga ke ako maʻuloto ai ʻa e folofolá?

Lau ʻa e fakamatala ko ʻeni meia ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá pe mamataʻi ʻa e vitiō “He Lives (ʻOkú Ne Moʻui),” ʻoku lava ke maʻu ʻi he ChurchofJesusChrist.org, mei he taimi 5:27 ki he 6:05. Kumi ha tāpuaki ʻe tolu pe lahi ange ʻe lava ke tau maʻu mei hono ako maʻuloto ʻo e ngaahi veesi folofolá.

He Lives
He [Jesus Christ] has given His life that even in our weakness, we may overcome our mistakes through repentance and obedience to His gospel.

ʻOku ou fokotuʻu atu ke mou ako maʻuloto ʻa e potufolofola ʻoku ongo ki homou lotó mo fakafonu homou laumālié ʻaki ʻa e mahinó. ʻI he taimi ʻoku fakaʻaongaʻi ai ʻa e folofolá ʻo fakatatau mo e ʻuhinga kuo fekau ʻe he ʻEikí ke hiki ai kinautolú, ʻoku ʻi ai honau mālohi ʻoku ʻikai lava ʻo fakahoko ʻo kapau ʻe toe liliu hono fakaleá. Ko e taimi ʻe niʻihi ko e taimi ʻoku ʻi ai ai ha fiemaʻu mahuʻinga ʻi heʻeku moʻuí, ʻoku ou toe fakamanatu ʻa e ngaahi potufolofolá ʻi hoku ʻatamaí ʻa ia kuo naufakamālohia aú. ʻOku ʻi ai ha fakafiemālie, fakahinohino, mo ha mālohi lahi ʻoku maʻu mei he folofolá, tautautefito ki he folofola ʻa e ʻEikí.

(Richard G. Scott, “He Lives,” Ensign, Nov. 1999, 87–88)

Ko e hā ha ngaahi tāpuaki kuó ke aʻusia mei hono ako maʻuloto ʻo e folofolá pe ngaahi kupuʻi lea mahuʻinga mei he folofolá?
Kuo tokoniʻi fēfē nai koe ʻe hono ako maʻuloto ʻa e ngaahi folofola ʻa e ʻEikí ʻoku lekooti ʻi he folofolá ke ke ongoʻi ofi ange ai ki he Tamai Hēvaní mo Sīsū Kalaisi?

ʻŪ kaati fakaʻaliʻalí

Ko e founga ʻe taha ke ako maʻuloto ai ʼa e ngaahi fakamoʻoni fakafolofolá mo e ngaahi kupuʻi lea mahuʻingá ko hono fakaʻaongaʻi ʻa e fanga kiʻi kaati fakaʻaliʻalí. Ke faʻu ha fanga kiʻi kaati fakaʻaliʻali, pelu ua ha laʻipepa teʻeki tohitohiʻi pea toe vaeua ke faʻu ha konga ʻe fā. Fakaava ʻa e laʻipepá, pea kosi ʻi he laine kuo pelupelú ke faʻu ha kaati ʻe fā.

Hiki ʻa e ngaahi fakamoʻoni fakafolofola takitaha ko ʻení ʻi he tafaʻaki ʻe taha ʻo e kaati takitaha. ʻI he tafaʻaki ʻe tahá, tohiʻi ai ʻa e kupuʻi lea mahuʻinga ʻo e potufolofolá.

Fakamoʻoni	Kupuʻi Lea Mahuʻinga mei he Folofolá
Fakamoʻoni ʻEfesō 1:10	Kupuʻi Lea Mahuʻinga mei he Folofolá “ʻI he kakato ʻo e ngaahi kuongá naʻá ne tuʻutuʻuni ke ne fakakātoa fakataha ʻa e meʻa kotoa pē ʻia Kalaisi.”
Fakamoʻoni ʻEfesō 2:19–20	Kupuʻi Lea Mahuʻinga mei he Folofolá ʻOku fokotuʻu ʻa e Siasí “ki he tuʻunga ʻa e kau ʻaposetolo mo e kau palōfita, ko hono fuʻu maka tulikí ʻa Sīsū Kalaisi pē.”
Fakamoʻoni 2 Tesalonika 2:1–3	Kupuʻi Lea Mahuʻinga mei he Folofolá “ʻA e ʻaho ʻo Kalaisí … ʻe ʻikai hoko ʻa e ʻaho ko iá, ʻo kapau ʻe ʻikai tomuʻa hoko ʻa e liliu koví.”
Fakamoʻoni 2 Tīmote 3:15–17	Kupuʻi Lea Mahuʻinga mei he Folofolá “[Ko] e ngaahi tohi māʻoniʻoní … ʻoku faʻa fakapoto koe ki he fakamoʻuí.”

ʻAi ke ke mohu founga ke tokoni atu ke ke ako maʻuloto. Fili ha taha ʻo e ngaahi fakakaukau ko ʻení pe faʻu haʻo fakakaukau pē ʻaʻau.

Siviʻi koe: Puke ʻa e fanga kiʻi kaati fakaʻaliʻalí ke ke lava ʻo sio pē ki he fakamoʻoni fakafolofolá pe kupuʻi lea mahuʻingá. Feinga ke ke lea ʻaki ʻa e kupuʻi lea pe fakamoʻoni fakafolofola mahuʻinga ʻoku fekauʻaki mo iá. Toutou fai ʻeni ʻaki ʻa e fakamoʻoni fakafolofola takitaha pea mo e kupuʻi lea ʻoku fekauʻaki mo iá.
Text e toe vakaiʻí: Text ha potufolofola ki ho ngaahi kaungāmeʻa ʻi he kalasi seminelí pea sio pe ko hai ʻe text fakafoki atu mo e kupuʻi lea mahuʻinga ʻoku tonú.
ʻEkitivitī fakatauhoá: Ngāue fakataha mo ha kaungāako ʻe toko taha pe ha mēmipa ʻo e fāmilí. ʻAi ha taha ke ne fola ke hanga ki ʻolunga ʻena ʻū kātí mo e fakamoʻoni fakafolofolá pea ʻai ʻe he tokotaha ʻe tahá ʻena kātí mo e kupuʻi lea mahuʻingá ke hanga hake ki ʻolunga. Fakatauhoa ʻa e kupuʻi lea mahuʻinga ʻi he potufolofolá ki he fakamoʻoni fakafolofola ʻoku fekauʻaki mo iá ʻaki hano fakahoa hifo ʻa e kaati mo e kupuʻi lea mahuʻingá ʻi ʻolunga ʻi he kaati fakamoʻoni fakafolofola ʻokú na fekauʻakí.
Fakaʻaongaʻi ʻa e polokalamá: Fakaʻaongaʻi ʻa e polokalama Fakataukei Fakatokāteliné ke tokoni atu ke ke ako maʻuloto.