Siviʻi Hono 8 Hoʻo Akó

Loma 1–16; 1 Kolinitō 1–7

ʻOku fakataumuʻa ʻa e lēsoni ko ʻení ke tokoniʻi koe ke ke vakaiʻi ʻa e ngaahi taumuʻa kuó ke fokotuʻú pea mo e ako mo e tupulaki fakataautaha kuó ke aʻusia lolotonga hoʻo ako ʻa e Fuakava Foʻoú.

Hoko ko ha ākonga ʻa Sīsū Kalaisi

• Kapau te ke lava ʻo folau ki ha feituʻu foʻou, te ke fie folau nai ki fē?

• Lolotonga hoʻo folaú, ko e hā ka mahuʻinga ai ke vakaiʻi pe ‘okú ke kei ʻi ho halanga folaú pē? Ko e hā ka ala hoko kapau naʻe ʻikai ke ke ʻi ho halanga folaú?

ʻOku mahuʻinga foki ke tau vakavakaiʻi ʻetau fononga fakalaumālié. Naʻe akoʻi ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e mahuʻinga ʻo e ngāue ki hoʻo ngaahi taumuʻa fakalaumālié peá ne tānaki mai:

‘Oku ou ʻiloʻi ko e nofo taha ʻa e tokangá … , ‘e fiemaʻu ke u toutou ʻeke kiate au, “ʻOku fēfē ʻeku ngāué?”

ʻOku hangē ia haʻo ʻinitaviu fakataautaha, pē koé. …

ʻI he ngaahi uike ka hokó, tuku ha taimi ke toe vakaiʻi ai hoʻo taumuʻá mo e palani ki he moʻuí, ke fakapapauʻi ʻoku fakatatau ia ki he palani lahi ʻo ʻetau Tamai Hēvaní ki he fiefiá. Kapau ʻe fiemaʻu ke ke fakatomala mo liliu, pea fakakaukau ke fai leva ia. …

ʻOku ou fakamoʻoni ʻoku ʻikai ha taumuʻa ʻe mahuʻinga ange ʻi he moʻui fakamatelié ka ko e moʻui taʻengata mo ʻetau Mātuʻa Fakalangí mo hotau Fakamoʻui ʻofá, ʻa e ʻEiki ko Sīsū Kalaisí. Ka ʻoku mahulu atu ʻi haʻane hoko pē ko haʻatau taumuʻá—ʻoku toe hoko pē ia ko ʻEnau taumuʻá. ʻOku Nau maʻu ha ʻofa haohaoa maʻatautolu, ʻo mālohi ange ia ʻi he meʻa ʻoku mahino kiate kitautolú. ʻOku Nau faaitaha kakato, kotoa, pea taʻengata mo kitautolu. Ko ʻEnau ngāué kitautolu. Ko hotau nāunaú ʻa Honau nāunaú. ʻOku ʻikai ha meʻa te Nau toe fiemaʻu lahi ange, ka ko ʻetau foki ki ʻapí,

(M. Russell Ballard, “Foki ʻo Maʻu,” Liahona, Mē 2017, 64–65)

Fakaʻaongaʻi ha ngaahi miniti siʻi ke ke fehuʻi pē kiate koe ʻa e ngaahi fehuʻi ko ʻení, ʻo hangē pē haʻo ʻinitaviu fakataautaha pē koé. Fakakaukau ke hiki hoʻo ngaahi talí ʻi hoʻo tohinoa akó.

• Ko e hā kuó u fai kimuí ni ke maʻu ha fakamoʻoni ki ha ngaahi moʻoni pau ʻo fakafou ʻi he Laumālie Māʻoniʻoní? Ko e hā ha meʻa kuó u ako fekauʻaki mo e maʻu fakahā ʻo fakafou ʻi he Laumālie Māʻoniʻoní? (Mahalo naʻá ke mei tuku ha taimi ke fakakaukau ai ki heni ʻi hoʻo ako ʻa e 1 Kolinitō 2.)

• Ko e hā ha ngaahi taumuʻa kuó u fokotuʻu ke u ofi ange ai ki he Fakamoʻuí pea hoko ko ʻEne ākonga? Ko e hā ha ngaahi lavameʻa ʻoku ou aʻusia? Ko e hā ha ngaahi faingataʻa ʻoku ou fehangahangai mo ia? Ko e hā ha meʻa ʻoku fiemaʻu ke u fai ke fekumi ki he tokoni ʻa e ʻEikí mo hokohoko atu ‘a e fakalakalaka ʻeku fononga fakalaumālié?

Fakamatalaʻi ʻa e ʻaloʻofa ʻa Sīsū Kalaisí

Fai ʻa e ʻekitivitī ko ʻení ke tokoni atu ʻi hono fakafuofuaʻi ʻa e mahino ʻokú ke maʻu ki ha moʻoni mahuʻinga ʻo e ongoongoleleí kuó ke ako kimui ní:

Fakakaukauloto kuo fetuʻutaki atu ʻa e kau faifekaú kiate koe. ʻOku nau akoʻi ha taha ʻi ho toʻú ʻoku faingataʻa ke mahino kiate ia ʻa e ʻaloʻofa ʻa Sīsū Kalaisí. Kuo kole atu ʻa e kau faifekaú ke ke ʻalu mo kinautolu ʻi heʻenau taimi ako hokó ke ke lava ʻo vahevahe ʻa e meʻa ʻokú ke ʻilo fekauʻaki mo e ʻaloʻofa ʻa e Fakamoʻuí pea mo e founga kuo faitāpuekina ai hoʻo moʻuí ʻi he muimui kia Sīsū Kalaisí.

Tuku ha kiʻi taimi ke ke fekumi ai ʻi he folofolá ke ʻiloʻi ʻa e ngaahi veesi mo e ngaahi moʻoni ʻe ala tokoní. ʻE ala ʻaonga hano lau ha niʻihi ʻo e ngaahi veesi ko ení:

• Loma 3:10–12, 20–28

• Loma 4:16 (kau ai ʻa e Liliu ʻe Siosefa Sāmita ʻi he Loma 4:16)

• Loma 5:1–2, 21

1. Fakakakato ʻa e ʻekitivitī ko ení ʻi hoʻo tohinoa akó:

1. Hiki ʻa e founga te ke fakamatalaʻi ʻaki ʻa e ʻaloʻofa ʻa e Fakamoʻuí ʻi he lea pē ʻaʻau.

2. ʻI hono fakaʻaongaʻi ha potufolofola mei he tohi ʻa Lomá, vahevahe ha moʻoni ʻe taha fekauʻaki mo e ʻaloʻofa ʻa e Fakamoʻuí pea mo e founga ʻe lava ke tau maʻu ai ia ʻi heʻetau moʻuí. Fakakaukau ke fakakau ʻa e founga kuo ʻomi ai koe ʻi hono ʻiloʻi ʻo e ngaahi moʻoni ko ʻení ke ke ofi ange ai ki he Fakamoʻuí.

Fakatupulaki hoʻo holi ke faaitaha ʻia Kalaisí

Ko e uouangatahá ko ha fakakaukau mahuʻinga ia ʻe taha ʻi he ngaahi tohi ʻa Paula ki he kakai Lomá mo e kakai Kolinitoó.

2. Fakakakato ʻeni ʻi hoʻo tohinoa akó:

1. Kumi ha veesi naʻá ke ako ʻi he Loma pe 1 Kolinitoó kuó ne akoʻi atu ha foʻi moʻoni ʻuhingamālie fekauʻaki mo e faaitaha mo e niʻihi kehé ʻia Kalaisí. ʻE lava ke maʻu ha ngaahi sīpinga ʻi he Loma 12:10–21; 14:10–13, 19; 15:1–7 pea ʻi he 1 Kolinitō 1:10–13; 3:3–9. Ko e hā e moʻoni ʻoku akoʻi ʻe he veesi naʻá ke filí?

2. Fakakaukau ki ha taimi naʻá ke aʻusia ai ʻa e meʻa ʻoku akoʻi ʻe Paula ʻi he veesi naʻá ke filí. ʻOkú ke pehē ko e hā naʻe tokoni lahi taha ki hoʻo ngaahi feinga ke faaitaha ʻia Kalaisí?

3. Tali ha fehuʻi ʻe ua mei he ngaahi fehuʻi ko ʻení:

   • Ko e hā ʻa e faikehekehe ʻo e ngāue lelei fakatahá mo e uouangataha ʻo fakafou ʻia Sīsū Kalaisi mo ʻEne ongoongoleleí?

   • Ko e hā ʻoku mahuʻingamālie ai kiate koe ʻa e moʻoni naʻá ke fili ‘i he a?

   • ʻI he māhina kuo ʻosí, ko e hā ha founga naʻá ke ngāue ʻaki ke fakatupulaki hoʻo mahino ki he uouangatahá mo hoʻo holi ke faaitaha mo e niʻihi kehé?

   • Ko e hā ha meʻa kuó ke fai ke ke toe faaitaha ange ai mo e niʻihi kehé ‘ia Kalaisí?

   • Ko e hā ha ngaahi pole ʻokú ke fehangahangai mo ia ʻi hoʻo ngāue ke hoko ʻo faaitaha ange mo e niʻihi kehé?

Fekumi ki he fakahinohino ʻa e Laumālie Māʻoniʻoní ke tokoni atu ke ke ʻiloʻi ʻa e ngaahi founga ʻe fiemaʻu ʻe he ʻEikí ke ke uouangataha ange ai mo e niʻihi kehé ʻia Kalaisí. Fekumi foki ki ha fakahā ki he founga ke ikunaʻi ai ha faʻahinga faingataʻa pē te ke fehangahangai mo ia.

Hokohoko atu hoʻo laka ki muʻa ʻi hoʻo fononga fakalaumālié, ʻo ofi ange ki he Tamai Hēvaní mo Sīsū Kalaisi. ʻIloʻi ʻokú Na ʻofa ʻiate koe pea ʻokú Na mateuteu ke tokoniʻi koe ʻi hoʻo ngaahi feingá.