Fakataukei Fakatokāteliné: 1 Kolinitō 6:19–20

“Ko Ho Sinó ko e Temipale ʻo e Laumālie Māʻoniʻoní”

ʻOku lue atu ha ongo toʻu tupu ʻi ha hala fakakavakava. Ko e faʻahitaʻu fakatōlaú. Hangē ʻoku fepōtalanoaʻaki ʻa e ongo tamaiki tangatá. ʻOku ʻalu atu ʻa e hala fakakavakavá ʻi ʻolunga ʻi ha anovai. Te ke lava ʻi he mamaʻó ʻo sio ki he ngaahi malaʻé mo e meʻa vaʻingá.

ʻI hoʻo ako ʻa e 1 Kolinitō 6, naʻá ke ako ai fekauʻaki mo e tuʻunga moʻui ʻa e ʻEikí ki he haohaoafakasekisualé pea mo e mahuʻinga ho sino fakamatelié. ʻE tokoniʻi koe ʻe he lēsoni ko ʻení ke fakatupulaki hoʻo taukei ʻi he ngaahi akonaki ko ʻení ʻaki hono ʻoatu kiate koe ʻa e faingamālie ke ako maʻuloto ʻa e fakamoʻoni fakafolofolá mo e kupuʻi lea fakafolofola mahuʻinga ʻi he 1 Kolinitō 6:19–20, ke fakamatalaʻi ʻa e tokāteliné, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ki ha tūkunga moʻoni ʻo e moʻuí.

Fakamatalaʻi mo ako maʻuloto

Fakakaukauloto ʻokú ke ʻi ha fealēleaʻaki fakakalasi pe fakakōlomu ʻi he taimi ʻoku fehuʻi atu ai ʻe ha kaungāako kei siʻi ange ki he faiakó, “Ko e hā ʻa e fono ʻo e angamaʻá?” ʻOku kole ʻe he faiakó ki he kau ako kehé, kau ai mo koe, ke ʻai ha tali.

ʻI hono fakaʻaongaʻi ʻa e ngaahi moʻoni naʻe akoʻi ʻi he potufolofola fakataukei fakatokāteliné 1 Kolinitō 6:19–20, palani ʻa e meʻa te ke lava ʻo vahevahe mo hoʻo kaungāakó ke tokoni ke mahino kiate kinautolu ʻa e tuʻunga moʻui ʻa e ʻEikí ki he haohaoa fakasekisualé, pe angamaʻá, mo e ʻuhinga ʻoku mahuʻinga aí.

Tohi ʻi ha laʻipepa ʻaki ha peni pe penivahevahe.

Ke tokoni atu ke ke ako maʻuloto ʻa e fakamoʻoni fakafolofola ki he potufolofola fakataukei fakatokāteline 1 Kolinitō 6:19–20 mo hono kupuʻi lea fakafolofola mahuʻingá, “Ko ho sinó ko e temipale ʻo e Laumālie Māʻoniʻoní,” fakakaukau ke faʻu ha fakatātā, kupuʻi lea, pe ko ha ʻū tā ke fakafofongaʻi ʻa e potufolofola ko ʻení mo e tokāteline naʻe akoʻí. ʻOku totonu ke makehe ʻa e fakatātā ʻokú ke faʻú ka ke ʻapasia mo fakaʻapaʻapaʻi ʻa e potufolofola mo e tokāteline ʻokú ne akoʻí. Te ke lava ʻo fakaʻaongaʻi ʻa e fakatātā naʻá ke taá ʻo ha tokotaha ʻoku tuʻu ʻi he tafaʻaki ʻo e temipalé ʻi he ʻekitivitī ki he lēsoni ʻi he 1 Kolinitō 6. Fakapapauʻi ke hiki ʻa e 1 Kolinitō 6:19–20 pea mo e kupuʻi lea fakafolofola mahuʻingá ʻi ha feituʻu ofi ki hoʻo fakatātaá.

Lolotonga hoʻo sio ki he fakatātā kuó ke faʻu pe filí, toe lau ʻa e fakamoʻoni fakafolofolá mo e kupuʻi lea fakafolofola mahuʻingá ʻi ho ʻatamaí kae ʻoua kuó ke ongoʻi kuó ke maʻuloto ia.

Akoako hono fakaʻaongaʻí

Lekooti nounou ʻi hoʻo tohinoa akó ʻa e meʻa ʻokú ke ʻilo mo manatuʻi fekauʻaki mo e ngaahi tefitoʻi moʻoni ʻo hono maʻu ha ʻilo fakalaumālié kae ʻikai toe vakai ki he ngaahi maʻuʻanga tokoni kehé. ʻI hoʻo ʻosí, vakai ki he Fakamatala ki he ʻElito ʻo e Fakataukei Fakatokāteliné (2023) ke vakaiʻi hoʻo ʻiló pea tānaki atu ha faʻahinga fakamatala mahuʻinga naʻe ʻikai ke ke maʻú.

Fakalaulauloto ki he meʻa ko ʻení. Tali leva ʻa e ngaahi fehuʻi ʻoku muimui maí ʻo fakaʻaongaʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié mo e tokāteline ʻoku akoʻi ʻi he 1 Kolinitō 6:19–20 ko hotau sinó ko e temipale ia ʻo e ʻOtuá ʻe lava ke nofoʻia ʻe he Laumālié. Pe, te ke lava foki ʻo faʻu ha tūkunga kehe ʻe mahuʻingamālie ange kiate koe pe ko e toʻu tupu ʻi hoʻomou feituʻú.

Kuo tupu hake ha tokotaha taʻu hongofulu tupu ʻo ʻiloʻi ʻa e ngaahi tuʻunga moʻui ʻa e ʻEikí ki he angamaʻá ka, ʻi he hili haʻane ʻi ha vā fetuʻutaki feohi fakamātoato ʻi ha taimi lahi, ʻokú ne maʻu ha holi ke fakahaaʻi ʻene ngaahi ongó ʻi ha feohi fakasekisuale mo hono kaumeʻa fefiné. ʻOku ʻi ai hono fāmili mo ha ngaahi kaungāmeʻa kuo nau feohi fakasekisuale kimuʻa pea toki malí, pea ʻoku nau ngali fiefia kotoa.

Vakaiʻi mo sivisiviʻi ʻa e ngaahi fakakaukaú mo e ngaahi fehuʻí, ʻaki ha fakakaukau ʻoku taʻengatá

Naʻe fakamamafaʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá “ʻe toki lava pē ke mahino ʻa e mahuʻinga taʻengata ʻo e angamaʻá ʻi loto ʻi he uho ʻo e palani ʻa ʻetau Tamai Hēvaní ki he fiefia ʻEne fānaú” (“ʻOku Mau Tui ki he Angamaʻá,” Liahona, Mē 2013, 41).

Ko e hā ha ngaahi tafaʻaki pau ʻo e palani ʻo e fakamoʻui ʻa e Tamai Hēvaní te ke fiemaʻu ke mahino mo fakakaukau ki ai ha taha ʻi he tūkunga ko ʻení?
ʻOku uesia fēfē nai ʻe he ngaahi moʻoni ʻi he 1 Kolinitō 6:19–20 ʻa e anga hoʻo vakai ki he fono ʻo e angamaʻá pea mo ho vā fetuʻutaki mo e Toluʻi ʻOtuá?

Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.

Fakakaukau ke fili ha taha ʻo e ngaahi maʻuʻanga tokoni fakalangi ko ʻení pe lahi ange ke fekumi ki he ngaahi moʻoni ʻe kaunga mo tokoni ʻi he tūkunga naʻá ke filí.

1 Kolinitō 6:19–20
ʻEkesōtosi 20:14; ʻAlamā 38:12; ʻAlamā 39; 3 Nīfai 12:27–30; Tokāteline mo e Ngaahi Fuakava 42:22–23
Fakahinohino ki he Ngaahi Folofolá, “Angamaʻa,” scriptures.ChurchofJesusChrist.org
David A. Bednar, “ʻOku Mau Tui ki he Angamaʻá,” Liahona, Mē 2013, 41–44

Tali ‘a e fehuʻi ko ‘ení:

Ko e hā ʻa e meʻa naʻá ke maʻu ʻe ala tokoni ʻi he tūkunga ko ʻení?

Ngāue ʻi he tuí

Ko e hā ha ngaahi founga kehekehe ʻe niʻihi ʻe lava ke fili ai ha taha ke ngāue ʻi he tuí ʻi he tūkunga ko ʻení?
Ko e hā ha ngaahi aʻusia kuó ke maʻu mo e Tamai Hēvaní mo Sīsū Kalaisi ʻa ia te ne tokoniʻi koe ke ke falala kiate Kinaua mo muimui ki Heʻena ngaahi akonakí?