Atamai i Aoaoga Faavae: 2 Timoteo 3:15–17

“[O] Tusi Paia, e Mafaia ona Faapoto ai Ia Te Oe e Iu ai i le Ola i le Faatuatua”

O le suesue e le aunoa i tusitusiga paia e mafai ona faamanuiaina ai lou olaga i le tele o auala, e aofia ai le fesoasoani ia te oe e faatonufolau i le tele o luitau o aso e gata ai. O lenei lesona o le a fesoasoani ia te oe e tauloto ai mau faasino o aoaoga faavae ma le fasifuaitau autu o le mau mo le 2 Timoteo 3:15–17, faamalamalama le aoaoga faavae, ma faaaoga mataupu faavae o le mauaina o le malamalama faaleagaga i se tulaga moni o le olaga.

Tauloto ma faamatala

Tusi se ata o se tusitusiga paia o loo matala e faaaoga uma ai po o le tele o le avanoa o le pepa. I le pito i luga o lau ata, tusi ai le 2 Timoteo 3:15–17. I totonu o lau atatusi, tusi ai le fasifuaitau autu o le mau [O] tusi paia e mafaia ona faapoto ai ia te oe e iu ai i le ola i le faatuatua. Ufiufi le fasifuaitau i se mea ma toe tusi mai i lou mafaufau. Siaki pe o sa’o lelei ma toe fai le gaoioiga mo ni nai taimi seia oo ina e faatumuina lau ata.

I le lesona talu ai na e aoaoina ai e faapea, a o tatou suesue i tusitusiga paia, e mafai ona tatou maua le poto lea o le a taitai atu ai i tatou i le faaolataga e ala i le faatuatua ia Iesu Keriso. Toe faitau le 2 Timoteo 3:15–17 ma vaavaai mo faamaoniga o lenei mataupu faavae, faapea foi ma isi faamanuiaga e mafai ona tatou maua mai i le suesueina o tusitusiga paia.

Manatu faapea o oe o se faifeautalai o loo aoaoina se tamaitai talavou e igoa ia Suravi. Sa talia e Suravi le savali o le Toefuataiga ae sa musu e faitau i fuaitau o mau na oulua fautuaina atu ma lau soa. I le taimi o se asiasiga, ua e fesili atu ia Suravi po o le a se mea o taofia ai o ia mai le faitauina o tusitusiga paia. Sa tali mai e le fiafia o ia e faitau tusitusiga paia ma e na te iloaina e faaivā tagata.

1. Faamaea le mea lenei i lau api talaaga mo suesuega: 

I le faaaogaina o le 2 Timoteo 3:15–17, tusi se tali e faamalamalama ai faamanuiaga ma aoga o le suesue i tusitusiga paia i se auala e ono faaosofia ai Suravi. Afai e mafai, mafaufau e faaopoopo ni aafiaga ma molimau patino e fai ma se vaega o lau tali.

Faataitai le faaaogaina

• Afai e te aoteleina mataupu faavae e tolu o le mauaina o le malamalama faaleagaga i se fuaiupu se tasi mo i latou taitasi, o le a sau tala e fai atu?

Afai e manaomia, faaalu ni nai minute e toe faamanatu ai parakalafa 5–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022).

E tusa lava pe tatou te iloa ma malamalama i faamanuiaga o le suesueina o tusitusiga paia, o nisi taimi e mafai ona faigata ona faatino e le aunoa ma lelei.

• O a nisi o luitau e mafai ona faigata ai ona suesue e le aunoa ma lelei ia tusitusiga paia?

Saili le taitaiga a le Agaga Paia e fesoasoani ia te oe e faailoa se faafitauli se tasi pe lua e taofia ai oe mai le suesueina e le aunoa ma lelei ia tusitusiga paia. (Afai e te le fetaiai ma ni faafitauli, mafaufau i ni faafitauli o ono feagai ma se uo po o se tagata o le aiga.)

2. Faamaea mea nei i totonu o lau api talaaga mo suesuega:

Tusi i lalo ia le itiiti ifo ma le tolu ni auala e mafai ona e faaaoga ai mataupu faavae o le mauaina o le malamalama faaleagaga e fesoasoani ai ia te oe e faatoilalo nei faafitauli. Atonu o le a fesoasoani fesili ma manatu nei.

• E mafai faapefea ona e iloiloina faafitauli i au suesuega o tusitusiga paia ma se vaaiga e faavavau?

• E mafai faapefea e upumoni o loo i le 2 Timoteo 3:15–17 ona fesoasoani ia te oe e maua ai se vaaiga e faavavau pe a e tauivi ma le suesueina o tusitusiga paia?

• E mafai faapefea ona e sailia le malamalama atili e ala i punavai filifilia faalelagi?

O nisi nei o ni nai manatu:

1. Saili fuaitau e uiga i le suesueina o tusitusiga paia i le Taiala i Tusitusiga Paia po o le Taiala o Autu, o loo maua i le ChurchofJesusChrist.org, ma vaavaai mo faamanuiaga ma folafolaga e ono fesoasoani ia te oe i lou faafitauli. O mau e pei o le Iosua 1:8; 2 Nifae 32:3; ma le Mataupu Faavae ma Feagaiga 1:37 atonu e aoga.

2. Fesili atu i se tasi e te faatuatuaina pe aisea latou te suesue ai a latou tusitusiga paia i aso taitasi ma pe faapefea ona latou fautuaina oe e faatoilalo lou faafitauli.

3. Sue faamatalaga mai le Au Pulega Aoao po o tusiga i mekasini a le Ekalesia e mafai ona fesoasoani. Mo se faataitaiga, o le faamatalaga lenei e mafai ona fesoasoani i se tasi o loo tauivi e sue se taimi mo le suesueina o tusitusiga paia.

Na aoao mai Elder Richard G. Scott (1928–2015) o le Korama a Aposetolo e Toasefululua:

O le taumamafa i afioga a le Atua i aso taitasi e sili atu le taua nai lo le moe, a’oga, faigaluega, ata o le tv, taaloga vitio, po o faasalalauga faaagafesootai. Atonu e manaomia ona e toe faatulagaina au mea e faamuamua ia maua ai se taimi mo le suesueina o le afioga a le Atua. Afai o le tulaga lea, ia fai loa!

(Richard G. Scott, “Ia Avea le Faaaogaina o le Faatuatua ma Mea E te Faamuamuaina,” Liahona, Nov. 2014, 93)

Faaalu ni nai minute e amata ai i se tasi o ou manatu.

• E mafai faapefea ona e galue i le faatuatua e faatoilalo ai faafitauli i le suesueina lelei o tusitusiga paia i aso taitasi? Lisi ni nai manatu i lau api talaaga mo suesuega.