Fakataukei Fakatokāteline: ‘Efesō 2:19–20

ʻOku Fokotuʻu ʻa e Siasí ʻia Sīsū Kalaisi mo ʻEne Kau ʻAposetoló mo e Kau Palōfitá

ʻI hoʻo ako ʻa e ʻEfesō 2, naʻá ke ʻilo ai ʻoku langa ʻa e Siasi ʻo Sīsū Kalaisí ʻi ha fakavaʻe ʻo e kau ʻaposetolo mo e kau palōfita pea ko Sīsū Kalaisi ʻa e fungani makatulikí. Ko e taumuʻa ʻo e lēsoni ko ʻení ke tokoniʻi koe ke fakatupulaki hoʻo maʻuloto ʻa e ngaahi akonaki ko ʻení, ʻi hoʻo ako maʻuloto ʻa e fakamoʻoni folofolá mo e kupuʻi lea folofola mahuʻinga ki he ‘Efesō 2:19–20, fakamatalaʻi ʻa e tokāteliné, pea fakaʻaongaʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié ki ha tūkunga moʻoni ʻo e moʻuí.

Ako maʻuloto pea fakamatalaʻi

Ke tokoni atu ke ke ako maʻuloto ʻa e potufolofola fakataukei fakatokāteline ko ʻení mo e kupuʻi lea folofola mahuʻingá, hiki tuʻo tolu ʻeni, pe lahi ange, ʻi hoʻo tohinoa akó: “ʻEfesō 2:19–20. ʻOku fokotuʻu ʻa e Siasí ‘ki he tuʻunga ʻa e kau ʻaposetolo mo e kau palōfita, ko hono fuʻu maka tulikí ʻa Sīsū Kalaisi pē.’”

Te ke lava ʻo hiki ʻa e kupuʻi leá ʻi ha founga ʻokú ne fakatātaaʻi foki ʻa e moʻoni ko ʻení. Hangē ko ʻení, te ke lava ʻo tā ha tapafā lahi ʻi he kupuʻi leá ke fakataipe ha fakavaʻe pea tā ha falelotu ʻi ʻolunga ai. Pe, kapau naʻá ke tā ha sīpinga ʻo e fakavaʻe ko ʻení ki he lēsoni kimuʻá, te ke lava ʻo hiki ʻa e kupuʻi lea mahuʻingá ʻi ʻolunga he fakatātā ko iá pe ofi ki ai.

1. Ke tokoni atu ke ke fakamatalaʻi ʻa e meʻa ʻokú ke ʻilo fekauʻaki mo e kau palōfitá mo e kau ʻaposetoló, fakahoko ʻa e ʻekitivitī ko ʻení ʻi hoʻo tohinoa akó.

1. Lau ʻa e ʻEfesō 2:19–20, pea fakalaulauloto ki he pōpoaki ʻoku ʻi aí.

2. Fakakaukau ki ha fehuʻi ʻe ala maʻu ʻe ha taha fekauʻaki mo e kau palōfitá mo e kau ʻaposetoló ʻe lava ke tokoni ʻa e ʻEfesō 2:19–20 ki hono talí. Ko ha ngaahi sīpinga ʻe niʻihi ko e “Ko e hā ʻoku maʻu ai ʻe homou siasí ha kau palōfita mo ha kau ʻaposetoló?” “Ko e hā ʻoku akoʻi mai ʻe he folofolá fekauʻaki mo e kau palōfitá mo e kau ʻaposetoló?” pe “Ko e hā e fekauʻaki ʻa e Fakamoʻuí mo e kau palōfitá mo e kau ʻaposetoló?” Hiki hoʻo fehuʻí.

3. Fakaʻaongaʻi ʻa e ʻEfesō 2:19–20, hiki e meʻa te ke lea ʻaki ke tali ʻa e fehuʻí.

Akoako fakahoko hono fakaʻaongaʻí

‘E ala tokoni atu ‘a e ‘ekitivití ko ‘ení ki hono toe vakaiʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié. Fakatauhoa e sētesí ki he tefitoʻi moʻoni totonu ki hono maʻu ʻo e ʻilo fakalaumālié. ‘O ka fiemaʻu, fakaʻaongaʻi ʻa e palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2022) ke tokoni kiate koe.  

ʻOku totonu ke tokanga ʻa e kau fekumi fakamātoato ki he moʻoní telia ʻa e ngaahi maʻuʻanga fakamatala taʻefalalaʻangá.	Ngāue ʻi he tuí.
ʻI heʻetau tauhi faivelenga ki he moʻoní mo e maama kuo tau maʻú, te tau maʻu ʻo lahi ange.	Vakavakaiʻi ʻa e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá.
ʻI heʻetau nofo maʻu ʻi heʻetau falala ki heʻetau Tamai Hēvaní mo ʻEne palani ʻo e fakamoʻuí, ʻoku tau lava ʻo vakai lelei ange ki he ngaahi meʻa ʻoku fai ki ai ʻa e hohaʻá.	Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.

Fakakaukauloto ʻoku ongoʻi ʻe hoʻo kaungāmeʻa ofi ko ʻEsitelá ʻoku faingataʻaʻia. ʻOkú ne maʻu ha fakamoʻoni ki he kau palōfitá mo e kau ʻaposetoló, ka ʻokú ne fakafepakiʻi ha akonaki lolotonga ʻa e Siasí. Ko hono moʻoní, ʻokú ne maʻu ha ngaahi ongo mālohi ʻokú ne fakafepakiʻi ia. ʻOkú ne kole tokoni atu ke ne ʻiloʻi e meʻa ke faí. ʻOku ʻikai ke ke ʻilo ʻi he mōmeniti ko iá ʻa e meʻa ke ke lea ʻakí, ka ʻokú ke fili ke muimui ʻi he ngaahi tefitoʻi moʻoni ʻo hono maʻu ʻo e ʻilo fakalaumālie kuó ke fakaʻaongaʻi ʻi he seminelí ke teuteu ai ke tokoni ki ho kaungāmeʻá.

Fakaʻaongaʻi ʻa e saati ko ʻení ke ke fakakaukauloto ai ki hoʻo ngaahi fakakaukau mo e ngaahi ongo fekauʻaki mo e kau palōfitá mo e kau ʻaposetoló pea mo e founga te ke lava ʻo tokoni ai kia ʻEsitelá.

Kuó u ako fēfē ke falala mo muimui ki he kau ʻaposetoló mo e kau palōfitá?	ʻE founga fēfē haʻaku tokoni ki hoku kaungāmeʻá?
Kuó u ako fēfē ke falala mo muimui ki he kau ʻaposetoló mo e kau palōfitá? Ko e hā ha ngaahi aʻusia kuó u maʻu ʻi heʻeku ngāue ʻi he tui kia Sīsū Kalaisí ke muimui ki Heʻene kau ʻaposetoló mo e kau palōfitá? Ko e fē ʻa e aʻusia ʻe ala tokoni ke u vahevahe mo ʻEsitelá?	ʻE founga fēfē haʻaku tokoni ki hoku kaungāmeʻá? Ko e hā ha ngaahi fehuʻi te u lava ʻo ʻeke kia ʻEsitela ke tokoniʻi ia ke ne fakakaukau ki he founga ʻe ala finangalo ai e ʻEikí ke ne ngāue ʻi he tuí?
Kuó u ako fēfē ke falala mo muimui ki he kau ʻaposetoló mo e kau palōfitá? Ko e hā kuó u ʻosi ʻilo fekauʻaki mo e Tamai Hēvaní, ko ʻEne palaní, mo e founga ʻo ʻEne fengāueʻaki mo ʻEne fānaú ʻa ia ʻe ala tokoni kia ʻEsitela ʻi he tūkunga ko ʻení?	ʻE founga fēfē haʻaku tokoni ki hoku kaungāmeʻá? Ko e hā ha ngaahi fehuʻi te u lava ʻo ʻeke kia ‘Esitela ke tokoniʻi ia ke sio ki heʻene loto-hohaʻá ʻaki ha fakakaukau ʻoku taʻengatá?
Kuó u ako fēfē ke falala mo muimui ki he kau ʻaposetoló mo e kau palōfitá? Ko e hā ha ngaahi maʻuʻanga tokoni kuo fokotuʻu fakalangi kuó ne tokoniʻi au ke u falala ki he kau ʻaposetoló mo e kau palōfitá? Kuo nau tokoniʻi fēfē au?	ʻE founga fēfē haʻaku tokoni ki hoku kaungāmeʻá? Ko e hā ha ngaahi maʻuʻanga tokoni kuo fokotuʻu fakalangi te u fokotuʻu atu ke fekumi ki ai ʻa ʻEsitelá?

2. Fai ‘a e ngaahi meʻa ko ‘ení ‘i hoʻo tohinoa akó:

Hiki e founga ʻokú ke pehē ʻe ala fakahoko ʻaki hoʻo talanoa mo ‘Esitelá pe tā fakatātaaʻi ia ko ha fepōtalanoaʻaki faingofua. Fakapapauʻi ʻoku moʻoni ʻa e meʻa te ke lea ʻakí mo e founga ʻokú ke pehē ʻe tali mai ʻaki ʻe ʻEsitelá.