‘Efesō 5:21–33; 6:1–4

Ngaahi Vā Fetuʻutaki Faka-Kalaisí

Ko ha fāmili ʻoku feohi fakataha ʻi he ngaahi feituʻu ʻi muʻa he Temipale Oakland.

Ko e ngaahi vā fetuʻutaki fakafāmilí ko ha niʻihi ia ʻo e ngaahi meʻa fakafiefia taha ʻe lava ke tau aʻusia ʻi he moʻui fakamatelié. ʻE lava ke ʻomi ʻe he vā fetuʻutaki mo e mātuʻá, ngaahi tokouá, pea mo e hoa malí ha fiefia lahi ka ʻe lava foki ke ne ʻomi ha ngaahi pole. Naʻe akoʻi ʻe Paula te tau lava ʻo hanga kia Sīsū Kalaisi ko e sīpinga ki he ngaahi vā fetuʻutaki lelei mo fiefia mo e kau mēmipa ʻo e fāmilí. ʻE lava ke tokoniʻi koe ʻe he lēsoni ko ʻení ke ke muimui ʻi he sīpinga ʻa e Fakamoʻuí ke fakaleleiʻi ho ngaahi vā fetuʻutaki mo e niʻihi kehé.

Ko ho fāmilí

Hiki e ngaahi hingoa ʻo e kau mēmipa ho fāmili tonú pea mo ha meʻa ʻe taha ʻokú ke ʻofa ai ʻiate kinautolu takitaha.

Fakakaukau ki he fakamatala ko ʻení ki he mēmipa takitaha ʻo e fāmilí: “ʻOku ou fai ki he mēmipa ko ʻeni ʻo e fāmilí ʻa e meʻa ʻoku ou ongoʻi ʻoku finangalo ʻa e Fakamoʻuí ke u fai kiate iá.” Fakafuofuaʻi leva e anga hoʻo fakafeangai ki he mēmipa takitaha ʻo e fāmilí ʻo fakaʻaongaʻi e meʻafua ko ʻení.

Tohi Lēsoni ʻo e Fuakava Foʻoú maʻá e Faiako Seminelí- (2023)

ʻI hoʻo ako he ʻaho ní, fakakaukau ki he ngaahi vā fetuʻutaki ʻokú ke maʻu mo e kau mēmipa ho fāmilí pea mo e founga te ke lava ai ʻo muimui ki he sīpinga ʻa e Fakamoʻuí ke ʻofa mo e tokoni kiate kinautolú.

Naʻe ʻomi ʻe Paula ha faleʻi fekauʻaki mo e ngaahi vā fetuʻutaki fakafāmilí

ʻOku mahuʻinga ke fakatokangaʻi naʻe hiki e ngaahi lea ʻa Paula ʻi he ʻEfesō 5:22–24 ʻi he puipuituʻa ʻo e ngaahi ʻulungaanga fakasōsiale ʻo hono kuongá. ʻOku akoʻi ʻe he kau palōfita mo e kau ʻaposetolo ʻo e kuonga ní ʻoku ʻikai ke māʻolunga ange ʻa e tangatá ʻi he fefiné pea ʻoku totonu ke hoko ʻa e ngaahi hoa malí ko ha “kaungā-ngāue tuʻunga tatau” (“Ko e Fāmilí: Ko ha Fanongonongo ki Māmani,” ChurchofJesusChrist.org). Neongo naʻe kehekehe e ngaahi anga fakafonua ʻo e kuonga ʻo Paulá, ka te ke kei lava pē ʻo maʻu ha faleʻi mahuʻinga ʻi he ngaahi akonaki ʻa Paulá. Ko ha moʻoni ʻe taha naʻe fakamamafaʻi ʻe Paula te tau lava ʻo muimui ki he sīpinga ʻa e Fakamoʻuí ʻi he founga ʻoku tau feohi ai mo e kau mēmipa hotau fāmilí.

Lau ʻa e ʻEfesō 5:21–27, 6:1–4, ʻo kumi e ngaahi fakamoʻoni ki he moʻoni ko ʻení. ʻI hoʻo akó ʻe ala tokoni ke ke ʻiloʻi ʻoku ʻuhinga ʻa e “fefakavaivaiʻaki ʻa kimoutolú” (ʻEfesō 5:21) ki he loto-fiemālie ke ngāue fakataha mo feʻofaʻaki mo fetauhiʻakí, pea ʻoku ʻuhinga ʻa e “manavahē ki he ʻOtuá” (ʻEfesō 5:21) ki he ʻofa mo e fakaʻapaʻapa ki he ʻOtuá.

Tohi ʻi ha laʻipepa ʻaki ha peni pe penivahevahe.

Sio ki he ʻū fakatātā ko ʻení pea fakatauhoa kinautolu ki he ngaahi fakamatala fakafolofola ko ʻení: Luke 2:51–52, Sione 2:1–11, mo e Luke 22:39–42. Fakakaukau ki he founga naʻe hoko ai ʻa e Fakamoʻuí ko ha sīpinga ʻo e ʻofa, talangofua, mo e fakaʻapaʻapa ki Heʻene ongomātuʻa ʻi he māmaní mo langí.

Naʻe pehē ʻe Sīsū ki Heʻene faʻē ko Melé, “ʻIkai te mo ʻilo ʻoku ʻaʻaku ke fai ʻa e ngāue ʻa ʻeku Tamaí?”

Ko e folofola ʻa Sīsū kia Mele ʻi he kātoanga taʻane.

ko e tūʻulutui ʻa Kalaisi ʻi Ketisemaní ʻOku kau ʻi he fakatātaá ʻa e tuʻa ʻo e fakamoʻuí ʻoku tūʻulutui ʻi he musie māʻolungá, ko ha ʻata ofi ange ʻo hono fofongá ʻoku manavahē, mei he mamaʻó ʻoku ʻasi ha tautaʻa toto ʻi hono fofongá mo hono ongo nimá ʻi ha veʻe vaitafe, ko ha ʻāngelo ʻokú ne fakafiemālieʻi ia, laʻitā puipuituʻa, mo ha ʻāngelo maamangia ʻoku haʻu kia Kalaisi ʻa ia ʻoku punou ki he kelekelé.

Ko e hā ha ngaahi founga naʻe ʻofa, talangofua, mo fakaʻapaʻapaʻi ai ʻe he Fakamoʻuí ʻEne ongomātuʻá? ʻOkú ke pehē naʻe liliu fēfē ʻe Heʻene ngaahi tōʻongá ʻa Hono vā mo ʻEne ongomātuʻá?
Ko e hā ha ngaahi founga ʻokú ke fakaʻapaʻapaʻi mo talangofua ai ki hoʻo mātuʻá?
Kuo hoko fēfē ʻa hoʻo muimui ki he sīpinga ʻa e Fakamoʻuí ke faitāpuekina mo tokoniʻi koe ke fakamālohia e ngaahi vā fetuʻutaki fakafāmilí, pe ko e hā e founga ʻokú ke pehē ʻe lava aí?

Akoako ke hangē ko e Fakamoʻuí

Muimui ‘i he sīpinga ʻa e Fakamoʻuí

Fakakaukauloto ki hoʻo ngaahi vā fetuʻutaki mo e kau mēmipa ho fāmilí. Fakakaukau ki ha ngaahi taimi naʻá ke muimui ai ʻi he sīpinga ʻa e Fakamoʻuí pea fakafeangai ki he niʻihi kehé ʻi ha ngaahi founga faka-Kalaisi. Fakaʻatā foki e Laumālie Māʻoniʻoní ke Ne tokoniʻi koe ke ke ʻiloʻi e meʻa te ke lava ʻo fai ke muimui ai ki he sīpinga ʻa e Fakamoʻuí ke ʻofa ki he niʻihi kehé.

Hiki e meʻa ʻokú ke ongoʻi te ke lava ʻo fai ke faʻifaʻitaki ai ki he Fakamoʻuí ʻi hoʻo ngaahi fetuʻutaki fakafāmilí. Fakakaukau ke vahevahe ʻa e meʻa naʻá ke tohí mo hoʻo faiakó pe mātuʻá ke tokoniʻi koe ke ke muimui ki he meʻa ʻokú ke ongoʻi ʻoku ueʻi koe ke ke faí.

Fili Pē: Fie Ako Lahi Ange?

ʻEfesō 5:22–24. Ko e hā ʻoku totonu ke mahino kiate kitautolu fekauʻaki mo e ngaahi akonaki ʻa Paula ʻi he ngaahi veesi ko ʻení?

Naʻe akonaki ʻa Paula ʻoku totonu ke fefakavaivaiʻaki e kau mēmipa kotoa pē ʻo e Siasí, pe ʻi hono fakalea ʻe tahá, ke fakamuʻomuʻa e niʻihi kehé ʻiate kinautolu (vakai, ʻEfesō 5:21). Naʻá ne fakamatalaʻi leva e founga naʻe fakaʻaongaʻi ai e tefitoʻi moʻoni ʻo hono fakavaivaiʻi kitá ʻi he ngaahi vā fetuʻutaki fakafāmilí mo e vā fakaʻapi. ʻE faingofua pē ke maʻuhala pea fakaʻaongaʻi hala ʻa e veesi 22–24 ʻi hotau kuongá. Kuo akoʻi mahino mai ʻe he kau palōfita ʻo e ngaahi ʻaho kimui ní ʻoku totonu ke fakahoko ʻe he husepānití mo e uaifí, faʻeé mo e tamaí hona fatongia toputapu ko ha “kaungā-ngāue tuʻunga tatau” (“Ko e Fāmilí:Ko ha Fanongonongo ki Māmani,” ChurchofJesusChrist.org). Kapau ʻoku faaitaha moʻoni e ngaahi hoa malí, ʻoku ʻomi leva ʻe ha faʻahinga feilaulau pē ʻoku fai ʻe ha taha maʻa hono hoa malí, ha ngaahi tāpuaki ki he tokotaha ko iá; ko ia ai “ko ia ʻoku ʻofa ki hono ʻunohó, ʻoku ʻofa ia kiate ia” (ʻEfesō 5:28).

Ko e hā e founga ʻoku totonu ke feohi ai ha husepāniti pe uaifi mo hono hoa malí ʻo hangē ko ia naʻe mei fai ʻe he Fakamoʻuí?

Naʻe pehē ʻe Palesiteni Kōtoni B. Hingikelī (1910–2008):

Ko e nofomali fiefiá ʻoku ʻikai ko ha meʻa pē ia ʻoku fekauʻaki mo e femanakoʻakí ka ko ha tokanga mo ha hohaʻa ki he fiemālie mo e lelei ʻa e hoa ʻo ha tokotaha. ʻIlonga ha tangata te ne fakamuʻomuʻa ʻa e fiemālie ʻa hono uaifí ke mahuʻinga tahá, ʻe ʻofa ʻa e tangata ko iá ʻi hono uaifí ʻi he toenga ʻo ʻena moʻuí pea aʻu pē ki he taʻengatá. (Anchorage, Alaska, regional conference, June 18, 1995)

(“Speaking Today: Excerpts from Recent Addresses of President Gordon B. Hinckley,” Ensign, Apr. 1996, 72)

Naʻe pehē ‘e ʻEletā L. Uitenī Keleitoni ʻo e Kōlomu ʻo e Kau Fitungofulú:

Kuó u mātā ʻi he ngaahi nofo-mali fakafiefia tahá hono fakatou lau ʻe he husepānití mo e uaifí fakatouʻosi ko ʻena feohí ko ha mataʻitofe ʻoku mahulu atu hono mahuʻingá, ko ha mataʻikoloa ʻoku taʻengata hono mahuʻingá. ʻOkú na fakatou tukuange ʻena tamaí mo e faʻeé pea ngāue fakataha ke langa ha nofomali ʻe tupulaki ki ʻitāniti. ʻOkú na maʻu e mahino ʻokú na foua ha hala kuo kotofa fakalangi. ʻOkú na ʻiloʻi ʻoku ʻikai ha toe faʻahinga feohi ia te ne lava ʻo ʻomai ha fiefia lahi ange, fakatupu ha lelei pe lelei fakatāutaha ʻoku lahi ange aí. Sio pea ako: ʻoku tala ʻe he ongo meʻa mali lelei tahá ʻoku ʻikai hano tatau e mahuʻinga ʻo ʻena nofomalí.

(L. Whitney Clayton, “Nofomalí: Sio pea Ako,” Liahona, Mē 2013, 83)

Ko e hā te u lava ʻo fai ke fakamālohia hoku vā fakafāmilí?

“Fakaʻapaʻapa ki hoʻo mātuʻá ʻaki hono fakahaaʻi hoʻo ʻofá mo tokaʻi kinaua. Talangofua kiate kinaua ʻi heʻena tataki koe ʻi he māʻoniʻoní. Loto fiemālie ke tokoni ʻi ʻapi. Kau ‘i he ngaahi ʻekitivitī mo e ngaahi tukufakaholo fakafāmili ʻoku fakatupulakí. Kau fakataha mo ho fāmilí ʻi he lotu fakafāmilí, ako folofola fakafāmilí, mo e ngaahi efiafi fakafāmili ʻi ʻapí. ʻOku hanga ʻe hono tauhi ʻo e ngaahi fekaú ni ʻo fakamālohia mo ʻai ke faaitaha e ngaahi fāmilí” (Ki Hono Fakamālohia ʻo e Toʻu Tupú [kiʻi tohi, 2011], 14–15).

Te ke lava ʻo lau ʻa e fakamatala ko ʻení, ʻa ia ʻokú ne fokotuʻu mai ha ngaahi founga ke langaki mo fakamālohia ai ʻa e ngaahi vā fetuʻutakí: “Tefitoʻi Moʻoni ʻo e Ngāue Fakaetauhí: Ko Hono Fakatupulaki ʻo Ha Vā Fetuʻutaki ʻOku Mahuʻingamālié,” Liahona, ʻAokosi. 2018, 6–9.

Fakakaukau ke mamataʻi ha taha pe lahi ange ʻo e ngaahi vitiō ko ʻení, ʻoku maʻu kotoa ʻi he ChurchofJesusChrist.org, ʻa ia ʻokú ne fakahaaʻi ha ngaahi sīpinga ʻo ha kakai ʻoku nau feinga ke muimui ki he sīpinga ʻa e Fakamoʻuí ʻi he founga ʻoku nau feohi ai mo e niʻihi kehé.

ʻI he vitiō “Ko Hoku Ongo Nimá Kimoutolu” (mei he taimi 10:26 ki he 12:39), ne lea ai ʻa Palesiteni Tieta F. ʻUkitofa, naʻe ʻi he Kau Palesitenisī ʻUluaki ʻo e taimi ko iá, ki he founga te tau lava ai ʻo hoko ko e ongo toʻukupu ʻo e Fakamoʻuí.

“You Are My Hands”
As disciples of Jesus Christ, our Master, we are called to support and heal rather than condemn.

Enduring Love
Watch how this couple demonstrates pure love and service in their marriage—even though they have to endure debilitating physical adversity.

ʻI he “ʻApí mo e Fāmilí—ʻI he Fanga Kiʻi Meʻa Īkí” (3:33), ʻoku fakatukupaaʻi ai ʻe ha pīsope ha toʻu tupu ʻe toko tolu ke nau ako e meʻa ʻoku fiemaʻu ke ngaohi ai honau ʻapí ke hoko ko ha potu māʻoniʻoní.

‘Apí mo e Fāmilí - ʻI he Fanga Kiʻi Meʻa Iikí
Naʻe ako ʻe ha toʻu tupu ʻe tolu ʻi hano fakatukupaaʻi ʻe heʻenau pīsopé, e meʻa ke fai ke ngaohi honau ʻapí ko ha feituʻu māʻoniʻoni.

‘I he “Ngaahi Faʻē mo e Ngaahi ‘Ofefiné” (5:06), ‘oku talanoa ‘a e kau finemui ʻi ʻAlapeta, Kānatá fekau‘aki mo e ʻuhinga ‘oku hoko ai ʻenau ngaahi faʻeé ko ha sīpinga lelei kiate kinautolú.

Ngaahi Faʻē mo e Ngaahi ʻOfefiné
Ko e talanoa ʻa e kau finemui ʻi ʻAlapetā Kānatá fekau‘aki mo e ʻuhinga ‘oku hoko ai ʻenau ngaahi faʻeé ko ha sīpinga lelei kiate kinautolú. Ko e akoʻi ‘e ʻEletā M. Lāsolo Pālati kau ki he ngaahi tāpuaki mo e mahuʻinga ‘o e vā fetuʻutaki makehe ‘o

ʻOku vahevahe ʻe ha talavou ʻi he “Ngaahi Tamaí mo e Fohá” (6:02), ʻa e founga naʻá ne ngāue ai ke fakaleleiʻi hono vā fetuʻutaki mo ʻene tamaí.