Doktrinal nga Kahanas: Santiago 1:5–6

“Papangayoa sa Dios”

Si Propeta Joseph Smith, Jr. diha sa Sagrado nga Kakahoyan (sa Manchester, New York) sa dihang iyang nadawat ang Unang Panan-awon. Si Joseph Smith gipakita nga nagluhod atobangan sa Dios nga Amahan ug ni Jesukristo. Ang Dios nga Amahan ug si Jesukristo gipakita nga nagsul-ob og puti nga mga sapot. Ang Amahan mipresentar ni Kristo ngadto ni Joseph. Adunay mga kahoy sa luyo. (Joseph Smith- Kasaysayan 1:15-20)

Sa miagi nga leksiyon sa, “Santiago 1,” imong nakat-onan nga ang Dios nagpanalangin kanato og kaalam kon kita mangayo Kaniya diha sa hugot nga pagtuo. Kini nga leksiyon makatabang kanimo sa pagmemorya sa pakisayran sa doktrinal nga kahanas ug sa mahinungdanon nga hugpong sa pulong sa kasulatan alang sa Santiago 1:5–6, pagpasabot sa doktrina, ug paggamit sa mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

Imemorya ug ipasabot

Handurawa nga usa ka higala ang nanglimbasog sa paghimo og usa ka importante nga desisyon sa iyang kinabuhi. Nasayod ka nga kining maong higala wala nagdako sa pagtuo nga kita makahimo pagpamulong direkta sa Dios pinaagi sa pag-ampo.

Hinumdomi nga sa miaging leksiyon, imong natun-an ang mosunod nga kamatuoran gikan sa Santiago 1:5–6: Ang Dios mopanalangin kanato og kaalam kon kita mangayo Kaniya diha sa hugot nga pagtuo.

1. Tubaga ang mosunod nga pangutana diha sa imong journal sa pagtuon:

• Sa unsang paagi nimo magamit ang Santiago 1:5–6 aron ipasabot ang relasyon nga gidapit sa Langitnong Amahan kanato uban Kaniya? (Kini mahimong makatabang ang paglakip sa mga pananglit sa mga pangutana nga lagmit ipangutana sa usa ka tawo o kaalam nga lagmit iyang gitinguha gikan sa Dios diha sa pag-ampo, ingon man ang personal nga mga kasinatian o mga ehemplo sa kasulatan.)

Ang pagkahibalo sa pagpangita ug pagpasabot niini nga tudling sa doktrinal nga kahanas mahimong makatabang kanimo diha sa imong pagpakigbahin sa ebanghelyo sa tibuok nimong kinabuhi. Aron matabangan ka nga mapasulod kini nga tudling ngadto sa panumdoman, tan-awa ang hulagway sa Unang Panan-awon ni Joseph Smith nga anaa sa sinugdanan sa leksiyon samtang balik-balikon pagsulti ang mosunod nga mahinungdanong hugpong sa pulong ug pakisayran sa kasulatan sa makadaghan nga higayon kutob sa mahimo sulod sa usa ka minuto: “Kon aduna man kaninyoy nakulangan og kaalam, papangayoa siya sa Dios” (Santiago 1:5–6).

Bansaya ang paggamit

Batan-ong Joseph Smith nga naglingkod sa lingkoranan nga nagbasa sa biblia.

Si Joseph Smith mao ang usa sa daghang mga ehemplo diha sa kasulatan sa mga tawo kinsa gipanalanginan pinaagi sa pagsunod sa mga baroganan sa pag-angkon og espirituhanong kahibalo. Alang sa mosunod nga pagbansay sa paggamit, imong matun-an ang usa ka ehemplo kon giunsa niya paggamit kini nga mga baroganan sa iyang kinabuhi. Sa dili pa ka magsugod, pagtagana og pipila ka minuto aron rebyohon ang mga baroganan diha sa mga parapo 5–12 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2022).

• Paghunahuna kon unsa ang imong nasayran na mahitungod sa kasinatian ni Joseph Smith. Unsa ang mga pangutana ni Joseph? (Tan-awa sa Joseph Smith—Kasaysayan 1:8–10.)

• Nganong importante man alang kanato ang pagpangita og mga tubag gikan sa Dios sa atong kaugalingong mga pangutana sama sa gibuhat ni Joseph Smith?

Paghunahuna og bisan unsang mga pangutana nga anaa nimo o kaalam nga imong gitinguha. Diha sa imong pagkompeto sa mosunod nga kalihokan, paghunahuna mahitungod sa unsang paagi nga ang ehemplo ni Joseph sa paggamit sa mga baroganan sa pag-angkon og espirituhanong kahibalo makatabang kanimo sa mga sitwasyon nga nagkinahanglan og kaalam gikan sa Dios.

Tun-i ang Joseph Smith—Kasaysayan 1:8, 11–17, ug mahimong markahan ang matag hugpong sa pulong nga nagpakita giunsa ni Joseph pagsunod ang mga baroganan sa pag-angkon og espirituhanong kahibalo isip usa ka tinedyer. Bisan tuod og ikaw pamilyar na niini nga sugilanon, pangita og mga detalye niini nga mga bersikulo nga nagpakita sa mga tinguha, mga kinaiya, ug pagtuo ni Joseph lapas sa unsa ang imong namatikdan kaniadto.

• Unsa nga mga ehemplo ang imong nakit-an diin si Joseph naglihok diha sa hugot nga pagtuo, nagpadayon sa usa ka mahangtorong panglantaw, ug naggamit sa balaanong gitudlo nga mga tinubdan?

2. Tubaga ang labing minos upat sa mosunod nga mga pangutana diha sa imong journal sa pagtuon:

Tinguhaa ang dugang nga panabot pinaagi sa balaanong gitudlo nga mga tinubdan

• Nganong sa imong hunahuna importante man kang Joseph ang makakita og mga tubag sa iyang mga pangutana direkta gikan sa Dios?

• Unsa ang gituohan ni Joseph nga mahitabo kon siya wala miduol sa Dios aron makakita og mga tubag? (Tan-awa ang Joseph Smith—Kasaysayan 1:13.)

• Agig dugang sa pag-ampo, sa unsang paagi pa man ka makapangita og mga tubag gikan sa Dios?

Susiha ang mga konsepto ug mga pangutana inubanan sa mahangtorong panglantaw

• Unsa sa imong hunahuna ang nasayran ni Joseph mahitungod sa Dios nga naghatag kaniya og pagsalig aron mangutana Kaniya direkta alang sa mga tubag?

• Kon ang mga tubag sa imong mga pangutana dili moabot dayon, giunsa niini pagtabang sa pagsabot kon giunsa sa Langitnong Amahan pagpadayag sa kamatuoran ngadto sa Iyang mga anak?

• Nganong gusto man ni Satanas nga pugngan si Joseph—ug ikaw—sa pag-ampo ngadto sa Dios alang sa mga tubag?

Lihok diha sa hugot nga pagtuo

• Sa unsang paagi gipakita ni Joseph Smith ang “[pagpangayo] sa hugot nga pagtuo, sa walay pagduhaduha” (Santiago 1:6), bisan kon si Satanas gisulayan siya pagpugong sa pag-ampo? (Tan-awa sa Joseph Smith—Kasaysayan 1:15–16.)

• Sa unsang paagi nga ang ehemplo ni Joseph makatabang kanimo sa imong kaugalingong mga pangutana ug mga kabalaka? Mahimong magbuhat og usa ka pihong plano kon unsaon nimo paglihok diha sa hugot nga pagtuo.