Seminare
Atamai i Aoaoga Faavae: Iakopo 1:5–6

Atamai i Aoaoga Faavae: Iakopo 1:5–6

“Ole Atu ia i le Atua”

O le Perofeta o Iosefa Samita, Le Itiiti i le Vao Paia (i Manaseta, Niu Ioka) ina ua ia mauaina le Uluai Faaaliga. O Iosefa o loo faaalia o tootuli i luma o le Atua le Tama ma Iesu Keriso. O loo faaalia uma le Atua le Tama ma Keriso o laeiina ofutalaloa papae. O loo tuuina atu e le Tama ia Keriso ia Iosefa. O loo i ai laau i tua atu. (Iosefa Samita - Talafaasolopito 1:15-20)

I se lesona talu ai, “Iakopo 1,” na e aoaoina ai e faamanuiaina i tatou e le Atua i le poto pe afai tatou te ole atu ia te Ia i le faatuatua. O lenei lesona o le a fesoasoani ia te oe e tauloto ai tusi faasino o le atamai i aoaoga faavae ma le fasifuaitau autu o mau mo le Iakopo 1:5–6, faamatala le aoaoga faavae, ma faaaoga mataupu faavae o le mauaina o le malamalama faaleagaga i se tulaga moni o le olaga.

Tauloto ma faamatala

Vaai faalemafaufau o loo tauivi sau uo e fai se faaiuga taua i lona olaga. Ua e iloa e lei ola ae lenei uo ma le talitonuga e mafai ona tatou talanoa sa’o atu i le Atua i le tatalo.

Manatua i le lesona talu ai, sa e suesueina ai le upumoni lenei mai le Iakopo 1:5–6: O le a faamanuiaina i tatou e le Atua i le poto pe afai tatou te ole atu ia te Ia i le faatuatua.

Tusitusi i luga o se fasipepa i se peni po o se penitala. 1. Tali le fesili lenei i totonu o lau api faamaumau mo suesuega:

  • E mafai faapefea ona e faaaogaina le Iakopo 1:5–6 e faamatala ai le sootaga ua valaaulia i tatou e le Tama Faalelagi ia tatou faia ma Ia? (Atonu e fesoasoani le faaaofia ai o faataitaiga o fesili e ono fesili ai se tasi po o le poto latou te ono sailia mai le Atua i le tatalo, faapea foi aafiaga patino po o faataitaiga mai tusitusiga paia.)

O le mafai ona mauaina ma faamalamalama lenei fuaitau o le atamai i aoaoga faavae e mafai ona fesoasoani ia te oe a o e faasoa atu le talalelei i isi i lou olaga atoa. Ina ia fesoasoani ia te oe e manatua lenei fuaitau, vaai i le ata o le Uluai Faaaliga a Iosefa Samita i le amataga o le lesona a o toe fai atu le fasifuaitau autu lenei o le mau ma le tusi faasino po o le a lava le tele o taimi e te mafaia i le minute e tasi: “A e afai ua leai se poto i so outou, ina ole atu ia i le Atua” (Iakopo 1:5–6).

Faataitai le faaaogaina

O Iosefa Samita talavou o loo nofo i se nofoa ma faitau le tusi paia.

O Iosefa Samita o se tasi o le tele o faataitaiga faaletusi paia o tagata ua faamanuiaina e ala i le mulimuli i mataupu faavae o le mauaina o le malamalama faaleagaga. Mo le faataitaiga o le faaaogaina lenei, o le a e suesue ai i se tasi o faataitaiga o auala na ia faaaogaina ai nei mataupu faavae i lona olaga. A o e lei amata, faaaoga sina taimi e faamanatu puupuu ai mataupu faavae nei i parakalafa e 5—12 i le vaega “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022).

  • Mafaufau i mea ua uma ona e iloa e uiga i le aafiaga o Iosefa Samita. O a ni fesili a Iosefa na i ai? (Tagai i le Iosefa Samita—Talafaasolopito 1:8–10.)

  • Aisea e taua ai mo i tatou le sailia o tali mai le Atua i a tatou lava fesili e pei ona sa faia e Iosefa Samita?

Mafaufau i soo se fesili o ia te oe po o le poto o loo e sailia. A o e faamaeaina le gaoioiga lenei, mafaufau pe mafai faapefea e le faataitaiga a Iosefa o le faaaogaina o mataupu faavae o le mauaina o le malamalama faaleagaga ona fesoasoani ia te oe i tulaga e manaomia ai le poto mai le Atua.

Suesue le Iosefa Samita—Talafaasolopito 1:8, 11–17, ma mafaufau e maka ia fasifuaitau taitasi o loo faaalia ai le ala na mulimuli ai Iosefa i mataupu faavae o le mauaina o le malamalama faaleagaga i lona talavou. E ui atonu ua uma ona e masani i lona talaaga, vaavaai mo faamatalaga auiliili i nei fuaiupu o loo faaalia ai manaoga, uiga faaalia, ma le faatuatua o Iosefa i talaatu o mea atonu na e maitauina muamua.

  • O a ni faataitaiga na e maua e uiga i le faatinoina e Iosefa o le faatuatua, faatumau o se vaaiga e faavavau, ma le faaaogaina o punaoa mamana ua filifilia?

Tusitusi i luga o se fasipepa i se peni po o se penitala. 2. Tali mai se fa pe sili atu o fesili nei i totonu o lau api faamaumau mo suesuega:

Saili le malamalama atili e ala i punaoa mamana ua filifilia

  • Aisea e te manatu ai sa taua ia Iosefa Samita le sailia o tali i ana fesili ia tuusao mai le Atua?

  • O le a le mea na talitonu Iosefa o le a tupu pe afai e na te le alu i le Atua e sue ai tali? (Tagai i le Iosefa Samita—Talafaasolopito 1:13.)

  • E faaopoopo atu i le tatalo, o le a se isi auala e mafai ona e sailia ai tali mai le Atua?

Iloilo mataupu ma fesili ma se vaaiga e faavavau

  • O le a sou manatu o le a se mea na iloa e Iosefa e uiga i le Atua lea na tuuina atu ai ia te ia le loto mautinoa e fesili sa’o atu ai ia te Ia mo ni tali?

  • Pe a le vave ona oo mai tali i au fesili, e faapefea ona fesoasoani le malamalama i le auala e faaali mai ai e le Tama Faalelagi ia upumoni i Ana fanau?

  • Aisea o le a manao ai Satani e taofia Iosefa—ma oe—mai le tatalo i le Atua mo ni tali?

Faatino i le faatuatua

  • Na faapefea ona faatino e Iosefa Samita le “ole atu ma le faatuatua, aua lava ne’i masalosalo” (Iakopo 1:6), e tusa lava pe na taumafai Satani e taofia o ia mai le tatalo? (Tagai i le Iosefa Samita—Talafaasolopito 1:15–16.)

  • E mafai faapefea ona fesoasoani le faataitaiga a Iosefa ia te oe i au lava fesili ma atugaluga? Mafaufau e fai se fuafuaga faapitoa mo le auala o le a e faatino ai i le faatuatua.