Iakopo 2

“O Le Faatuatua, Pe Afai E Le I Ai Galuega, E Mate Lava Ia”

Autalavou o loo faia se galuega fesoasoani i Ausetalia

E mafai ona i ai se eseesega i le va o se tagata e fai mai latou te talitonu ia Iesu Keriso ma se tagata e faatinoina le faatuatua ia Iesu Keriso? Na ofoina mai e Iakopo se eseesega taua e faapea, o le faatuatua moni ia Iesu Keriso e le atagia mai i na o mafaufauga po o tala a se tagata, ae faapea foi i mea latou te faia. O lenei lesona o le a mafai ai ona e iloiloina pe mafai faapefea ona e faatinoina atoatoa le faatuatua ia Iesu Keriso e ala i faatinoga amiotonu.

O le mauaina o faamanuiaga—e pei o le tutuina o se afi

O e sailia se faamanuiaga po o se tali i tatalo mai le Tama Faalelagi? E ono fesoasoani le faatusatusa o le faagasologa o le sailia o nei faamanuiaga i le faamumuina o se afi ina ia maua mai ai le malamalama ma le vevela.

O a laasaga o le a e faia e faamumu ai se afi?
O le a le taua o le faatinoga o le tutuina o le afitusi?

Faitau le saunoaga lenei a Elder Dale G. Renlund o le Korama a Aposetolo e Toasefululua e aoao ai pe faapefea ona pei le mauaina o faamanuiaga o le tutuina o se afi. E mafai foi ona e matamata i le “E Tele Mea e Manuia ai,” o loo maua i le ChurchofJesusChrist.org, mai le faailo taimi 1:02 i le 3:27.

E Tele Mea e Manuia ai
Ua aoao mai Elder Renlund ua finagalo le Tama Faalelagi ma Iesu Keriso e faamanuia i tatou ae e tatau ona tatou faatuatua ia Keriso ma faia faatinoga e usiusitai ai i tulafono ia e faalagolago i ai faamanuiaga.

Ia tatou faatatauina faamanuiaga faalelagi i se faaputuga tele o fafie. … O loo i ai se aofaiga tele o le meatafuafi e mafai ai ona maua ai le malamalama ma le vevela mo le tele o aso. …

Ina ia matala mai le malosiaga o i le faaputuga fafie, e manaomia ona tosiina le afitusi ma tutu ai alala ninii. O le a vave lava ona ‘apo e alala ninii le afi ma mafua ai loa ona mu fafie lapopoa. …

O le tosiina o le afitusi ma le tutuina o alala ninii o ni faatinoga iti e mafai ai ona matala mai le malosiaga ua faamoemoeina mai fafie. Seiloga lava la e tosi le afitusi, e leai a se mea e tupu, e tusa lava po o le a le telē o le faaputuga fafie. …

I se ala talitutusa, o le tele o faamanuiaga a le Atua e finagalo e foai mai ia i tatou e manaomia ai le faatinoga o la tatou vaega—o faatinoga e fua i lo tatou faatuatua ia Iesu Keriso. … E ui i lea, o le faatinoga manaomia e laitiiti lava pe a faatusa i faamanuiaga tatou te maua mulimuli ane.

(Dale G. Renlund, “E tele Mea e Manuia ai,” Ensign po o le Liahona, Me 2019, 70)

O a ni malamalamaaga ua e maua mai i le talafaatusa a Elder Renlund?
O le a sou manatu i le uiga o le faatino “e faavae i lo tatou faatuatua ia Iesu Keriso”?

Mafaufau loloto i fesili nei:

O a ni auala o e faatuatua ai ia Iesu Keriso? O a ni faatinoga e te faia ona o lenei faatuatua?
O a tali ma isi faamanuiaga ua e maua mai le Atua a o e faatinoina le faatuatua ia Iesu Keriso? Pe o i ai ni auala faaopoopo e te lagona e finagalo le Alii e te faatino ai i le faatuatua? Aisea?

Tatalo mo le Tama Faalelagi e taiala oe a o e sailia tali i nei fesili i le taimi o au suesuega.

O le faatuatua ia Iesu Keriso

Sa faaaoga e Iakopo se isi talafaatusa e aoao ai i tatou i le taua o le faatino ma le faatuatua ia Iesu Keriso.

Faitau le Iakopo 2:14–16, ma taumafai e vaai faalemafaufau po o le a sou manatu pe afai e te molimauina lenei tulaga. (O upu “le ofu” i le fuaiupu 15 o lona uiga e le o lelei ona faaofuina.)

O le a se mea ua e aoaoina mai le talafaatusa a Iakopo?

Faitau le Iakopo 2:17–18, 26 (tagai foi i le Iakopo 1:22) ma vaavaai mo se upumoni na faapupula mai e Iakopo e ala i lenei talafaatusa.

O leIakopo 2:17–18 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala tulaga ese ina ia mafai ai ona e maua gofie.

O le a faapefea ona e aoteleina mea na aoao mai e Iakopo?

O se tasi o auala e tau atu ai le upumoni na aoao mai e Iakopo e faapea, o le faatuatua moni ia Iesu Keriso e manaomia ai faatinoga amiotonu.

Tusitusi i luga o se fasipepa i se peni po o se penitala.

O faataitaiga o le faatinoina i le faatuatua

E mafai ona musuia le mafaufau ai i faataitaiga a i latou o e faatino lo latou faatuatua ia Iesu Keriso. Faitau le Iakopo 2:21–25, ma faailoa mai faataitaiga o i latou i le Feagaiga Tuai o e sa faatino i le faatuatua.

O le tatalaina o faamanuiaga e ala i faatinoga e musuia e le faatuatua

Na tuuina mai e Peresitene Russell M. Nelson le lu’i lenei e faatatau i lo tatou faatuatua ma a tatou faatinoga:

Ina ia faia soo se mea ia lelei, e manaomia ai taumafaiga. O le avea ai ma se soo moni o Iesu Keriso, e leai se tuusaunoaga. O le faateleina o lou faatuatua ma le faalagolago ia te Ia e manaomia ai se taumafaiga. …

…O le a se mea e te faia pe afai ua ia te oe se faatuatua sili atu? Mafaufau i ai. Tusitusi e uiga i ai. Ona maua tele ai lea o le faatuatua e ala i le faia o se mea e manaomia tele ai le faatuatua.

(Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, 2021, 103)

Mafaufau loloto i fesili nei:

O le a se mea e te faia pe afai ua ia te oe se faatuatua tele atu?
O a ni laasaga e mafai ona e faia e faatino ai ou uunaiga?

Faaalu se minute e amata ai ona faatino ou uunaiga. Mo se faataitaiga, e faalagolago i mea e te lagona e tatau ona e faia, atonu e te auina atu se tesi, faia se tatalo, tuu se faamanatu i lau kalena, pe fuafua le mea o le a sosoo ona e faia.

Tuu i le faitalia: O e Manao e Aoao Atili?

Pe na tetee aoaoga a Iakopo e uiga i le faatuatua ma galuega i aoaoga a Paulo?

I le faatatauga o le Iakopo 2:14, na ese ai le faaaogaina e Iakopo o le upu galuega mai le auala na faaaogaina ai e le Aposetolo o Paulo. Ina ua faaaoga e Paulo le upu galuega, sa ia faasino muamua lava i galuega o le tulafono a Mose (tagai i le Roma 3:27–31 ma le Kalatia 2:15–16). Ina ua faaaoga e Iakopo le upu galuega, sa ia faatatau i faatinoga o le tuuto po o galuega o le amiotonu.

E mate lava le faatuatua pe a leai ni galuega, ae faapefea galuega e aunoa ma le faatuatua?

Na aoao mai Elder David A. Bednar o le Korama o Aposetolo e Toasefululua:

O le faatuatua moni e taulai atu i le Alii o Iesu Keriso ma e tau atu e le aunoa i faatinoga amiotonu. … O le na o le faatino lava ia, e le o se faatuatua lena i le Faaola, peitai o le faatino e tusa ai ma mataupu faavae tonu, o se vaega tutotonu lea o le faatuatua.

(David A. Bednar, “Ole Atu i le Faatuatua,” Liahona, Me 2008, 95)