Atamai i Aoaoga Faavae: Luka 24:36-39

“O le Agaga e Leai sona Aano ma ni Ivi, pei o Au Nei ua Outou Vaavaai i ai”

I lau suesuega o le Luka 24:1–9, 36–48, ua e aoao ai e uiga i le Toetu o le Faaola. I le faaaogaina o le fuaitau o le atamai i aoaoga faavae o le Luka 24:36–39, o le a fesoasoani lenei lesona ia te oe e faateleina ai lou tomai o le aoaoga faavae o le toetu e ala i le taulotoina o le mau faasino ma le fasifuaitau autu o le mau, e faamatala ai le aoaoga faavae, ma le faaaogaina o mataupu faavae o le mauaina o le malamalama faaleagaga i se tulaga moni o le olaga.

Tauloto ma faamatala

Manatua ina ua mavae puapuaga o le Faaola i Ketesemane ma le maliu i luga o le satauro, sa tuuina ifo i lalo Lona tino ma lagomau ai i se tuugamau. I le tolu o aso mulimuli ane, na toetu mai ai Iesu Keriso. Faitau le fuaitau o le atamai i aoaoga faavae Luka 24:36–39 ma vase upu taua po o fasifuaitau na aoao atu e le Faaola i Ona soo ina ua mavae Lona Toetu.

Manatu faapea ua talosagaina oe e tali atu i le uunaiga lenei mo le vaega o “Fesili ma Tali” o le mekasini o le Mo le Malosi o le Autalavou . Mafaufau po o le a se mea e mafai ona e faasoa atu i le na o le 2–3 fuaiupu.

• O le a se mea ua faapitoa tele e uiga i le Toetu o Iesu Keriso?

1. Tali fesili nei i totonu o lau api talaaga mo suesuega:

• E mafai faapefea ona e tali atu i lenei uunaiga i ni fuaiupu se lua i le tolu?

• Aisea e taua ai le Toetu o le Faaola ia te oe?

Ina ia faataitai le taulotoina o lenei mau faasino ma le fasifuaitau autu o le mau, vaevae se itulau i lau api talaaga mo suesuega i ni vaega se fa. Tusi le mau faasino ma se tasi o fasifuaitau (e pei ona faaalia i lalo) i vaega taitasi. Mafaufau e tusi se ata po o se aikona faigofie e faatatau i ai lea e faatusa i vaega taitasi e fa o le mau faasino ma le fasifuaitau autu. Faataitai le taulotoina o nei mea taitasi seia oo ina mafai ona e taulotoina atoa e aunoa ma le tilotilo i ai. Luka 24:36–39 Aua o le agaga e leai sona aano ma ni ivi, pei o au nei ua outou vaavaai i ai

Faataitai le faaaogaina

Toeiloilo faapuupuu parakalafa 5–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022). O se tasi o auala e faia ai lenei mea atonu o le vaai pe mafai ona e lisiina uma mataupu faavae e tolu mai le manatuaga. Ona tusi lea i lau api talaaga mo suesuega, pe na faapefea ona e faaaogaina, pe e mafai foi ona faaaoga, nei mataupu faavae i lou olaga.

Faataitai nei ona faaaoga mataupu faavae o le mauaina o le malamalama faaleagaga ma le aoaoga faavae o loo aoao mai i le Luka 24:36–39 e ala i le faitauina o le vaaiga faataitai lenei ma tali fesili o loo mulimuli mai.

O se tasi o au uo mamae, o Jinyoon, ua malie e fai [ana] lesona a faifeautalai i lou fale. Na siitia atu talu ai nei Jinyoon ma lona aiga i le tou pitonuu, ma e lei i ai sona malamalamaaga muamua po o se iloa e uiga ia Iesu Keriso. Ina ua aoao atu i ai le ata o le faaolataga ma le matafaioi a Iesu Keriso, e foliga mai sa le toafimalie Jinyoon ae e leai se tala e fai mai. Mulimuli ane, ina ua tuumuli faifeautalai, sa ia faasoa atu ia te oe e le talitonu o ia i le mataupu o le toetu ma le olaga pe a mavae le oti.

2. Tali fesili nei e tolu i totonu o lau api talaaga mo suesuega. Afai e te manaomia le fesoasoani i le faaaogaina o mataupu faavae taitasi o le mauaina o le malamalama faaleagaga, mafaufau e manatunatu loloto i fesili o loo lisi atu i lalo o ulutala o loo i lalo.

• O le a se mea e te ono faia pe ta’u atu e fesoasoani ai ia Jinyoon ia malamalama i lou naunautaiga e fesoasoani ia te ia?

• O a fesili e ono mafai ona e fai atu ia malamalama atili ai i mea e talitonu i ai Jinyoon po o le uiga foi o ona manatu?

• E mafai faapefea ona e faaaogaina mataupu faavae taitasi e tolu o le mauaina o le malamalama faaleagaga e fesoasoani ai ia Jinyoon?

Faatino i le faatuatua

• E ono mafai faapefea ona e faatino i le faatuatua i lenei tulaga?

• O le a se mea e ono mafai ona e faasoa atu ia Jinyoon e uiga i le faatinoina i le faatuatua? Aisea ua avea ai lenei mea o se laasaga taua i le sailia o tali i ana fesili?

Iloilo mataupu ma fesili faatasi ai ma se vaaiga e faavavau

• O a fesili e ono mafai ona e fesili atu ai po o upumoni e faavavau e ono mafai ona e molimau atu ai ia Jinyoon a o e taumafai e fesoasoani ia te ia ia vaai i lona popolega faatasi ai ma se vaaiga e faavavau?

• E ono mafai faapefea ona fesoasoani lenei mea ia Jinyoon e amata ai ona malamalama i lenei mea mai se vaaiga faavavau?

• O le a se mea na fesoasoani ia te oe e te malamalama ai i le Toetu o le Faaola ma lana matafaioi i le ata o le faaolataga?

Saili le malamalama atili e ala i punavai paia ua atofaina

• O a mau patino mai le Luka 24 e ono mafai ona e faaaogaina pe a tali atu ia Jinyoon? O a nai punaoa faaopoopo e te ono iloiloina ae e te lei tali atu? (O nisi o anomea sa e suesueina i le lesona talu ai i le Luka 24 e mafai ona fesoasoani.)

• O fea se isi mea e te faasino i ai Jinyoon pe afai e manao o ia e suesue atili na o ia lava?