Kalatia 6

“O Le Mea e Luluina e le Tagata, E Na Te Toe Seleseleina”

Ata

O le tamaitai ma se teineitiiti ua selesele ma fai togalaau i Ekuatoa.

Pe e te taumanatunatu ea po o au taumafaiga e ola i le talalelei a Iesu Keriso o le a taitai atu ai i au sini e faavavau? Sa tusi atu Paulo i le Au Paia i Kalatia e fesoasoani ia latou iloa, o le ala tatou te ola ai i o tatou olaga i aso taitasi e aafia ai pe o le a faamanuiaina i tatou e le Faaola i le “ola e faavavau” (Kalatia 6:8). O lenei lesona e mafai ona fesoasoani e te iloa ai faatinoga e manaomia ona e faia e ausia ai au sini e faavavau.

Sini e faavavau

Sa faasoa mai e Elder Quentin L. Cook o le Korama a Aposetolo e Toasefululua se talanoaga e le mafaagaloina sa ia faia ma se alii talavou.

Matamata le vitio “Choose Wisely,” o loo maua i le ChurchofJesusChrist.org, mai le faailo taimi 3:03 i le 4:52, pe faitau le faamatalaga lenei. Vaavaai po o a sini a lenei alii talavou ma po o a ni le malamalama atonu na i ai ia te ia e uiga i le ausiaina o na sini.

Ata
Atatosi aloaia o Elder Quentin L. Cook. Na valaauina i le Korama a Aposetolo e Toasefululua i le aso 6 Oketopa 2007.

Talu ai nei sa ou feiloai ai i se alii talavou lelei. O ana sini o le alu i se misiona, ia aotauina, faaipoipo i le malumalu, ma ia maua se aiga fiafia ma faamaoni. Sa ou fiafia tele i ana sini. Ae i le faaauauina ai o le talanoaga, sa manino mai ai o ana amio ma filifiliga sa ia faia sa lei ogatusa ma ana sini. Sa ou lagonaina lona manao faamaoni e alu i se misiona ma sa aloese mai agasala matuia ia o le a taofia ai o ia mai se misiona, ae o ana amioga i aso uma sa lei saunia ai o ia mo luitau faaletino, faalelagona, faaleagafesootai, faaleatamai, ma faaleagaga o le a la fetaiai. Sa lei aoao o ia e galue malosi. Sa lei manatu mamafa o ia i le a’oga po o le seminare. Sa ia auai i le lotu, ae sa ia lei faitauina le Tusi a Mamona. Sa ia faaaluina se taimi tele i taaloga vitio ma le initoneti. Sa foliga mai na ia manatu na o le tau lava ina alu i lana misiona ua lava lava lea.

(Quentin L. Cook, “Filifili ma le Atamai,” Liahona, Nov. 2014, 47)

Mata o le a se mea na le malamalama ai lenei alii talavou e uiga i le ausiaina o ana sini?

I lau api talaaga mo suesuega, fai se lisi puupuu o au sini o i ai o le a e mafaufau e taua e faavavau. Mafaufau pe aisea e te manao ai e ausia nei sini. Mafaufau loloto pe faapefea e au amioga mai lea aso i lea aso ona taitaiina atu pe taitaieseina oe mai nei sini taua e faavavau. A o e suesue, vaavaai mo upumoni e mafai ona fesoasoani ia te oe e faaogatusa atili ai au faatinoga i aso taitasi ma taunuuga taua e faavavau e te manao i ai.

O le tulafono o le seleselega

Sa aafia le Au Paia i Kalatia i aoaoga sese ia na mafua ai ona taitaieseina le toatele (tagai i le Kalatia 1:6–9). Sa talitonu nisi ma aoao atu le aoaoga faavae sese e faapea, e tatau ona peritomeina Tagata Nuu Ese liliu mai ina ia faaolaina ai (tagai i le Kalatia 6:12; Galuega 15:1). O isi sa talitonu sese faapea o le alofa tunoa o Keriso na tuuina atu ai ia i latou le saolotoga e fai ai le agasala (tagai i le Kalatia 5:13). Ina ua uma ona tautalagia nei talitonuga sese ma faamalosiau atu i le Au Paia e fesoasoani ia i latou o e sa se ese faaleagaga, sa aoao atu e Paulo se upumoni taua e fesoasoani ai i tagata ia malamalama i le aafiaga o a latou amioga.

Faitau le Kalatia 6:7–8. Vaai mo se upumoni na aoao mai e Paulo e mafai ona tosina i ai a tatou amioga o aso taitasi. Maitau o le luluina e faasino i le totoina ae o le seleseleina e faasino i le seleselega.

E faapefea ona e faamatalaina aoaoga a Paulo i au lava upu?

O se upumoni e tasi e mafai ona tatou aoao mai le Kalatia 6:7 o le po o le a lava le mea e lulu e se tagata o le mea foi lea o le a latou seleseleina. O lenei manatu e ta’ua i nisi taimi o le tulafono o le seleselega.

O a ni faataitaiga ua e vaaia o lenei upumoni i lou olaga po o olaga o isi?
E mafai faapefea e le malamalama i lenei upumoni ona aafia ai faaiuga e te faia i lou olaga?

O aoaoga a Alema i lona atalii o Korianetona i le Tusi a Mamona e mafai ona fesoasoani tatou te malamalama atili ai i aafiaga e faavavau o le tulafono o le seleselega, po o le mea na ta’ua e Alema o le “fuafuaga o le toefuataiga.” Faitau le Alema 41:3–6, 10–15, ma vaavaai mo upumoni e faalautele ai lou malamalama i aoaoga a Paulo.

O a upu po o fasifuaitau na e iloaina e taua mai nei fuaiupu? Aisea?
Ina ua uma ona toe faamanatu mea na aoao atu e Alema ia Korianetona, e faapefea ona faatatau lenei aoaoga i upu a Paulo e faapea “soo se mea e luluina e se tane [po o se fafine], o le a selesele foi [o ia] i ai”? (Kalatia 6:7).
O a ni mea ua fesoasoani ai ia te oe ia aoaoga ua e suesueina i le asō e te malamalama ai e uiga i le Tama Faalelagi ma Iesu Keriso?

O le valaaulia a Paulo i tagata Kalatia

Sa faaiuina e Paulo ana aoaoga e uiga i le tulafono o le seleselega i se valaaulia. Faitau le Kalatia 6:9–10, ma vaavaai mo mea na valaaulia e Paulo le Au Paia e fai.

O le a lou manatu i le uiga o le “aua nei tatou faapalapala i le amio lelei”? (Kalatia 6:9).
E faapefea ona avea Iesu Keriso ma faataitaiga atoatoa o lenei mea?
O le a sou manatu o le a le uiga o le tala a Paulo e faapea, o le a tatou selesele i “ona po e tatau ai” (Kalatia 6:9) a o tatou taumafai e faia mea lelei mo isi? Aisea e taua ai ona malamalama?

Faaaogaina o mea ua e aoaoina

Na fautuaina i tatou e Peresitene Dallin H. Oaks o le Au Peresitene Sili e mafaufau po o fea o le a taitai atu i ai i tatou e a tatou filifiliga taitasi (tagai i le “O Fea O Le A Tau Atu i ai Lenei?,” Liahona, Me 2019, 60–62).

Ina ia faaaoga lenei fautuaga mai ia Peresitene Oaks, fai le gaoioiga lenei.

1. Ina ia faaaoga lenei fautuaga mai ia Peresitene Oaks, fai le gaoioiga lenei i lau api talaaga mo suesuega. Ia aofia ai na o vaega o lau siata e le patino tele e faasoa mai.

Fatu se siata e talitutusa ma lea:

O mea o loo e luluina (faatinoga e masani ona e faia)	O mea o loo e seleseleina pe mafai ona faamoemoe e selesele i le lumanai (lea o le a taitai atu i ai nei faatinoga)

I le itu tauagavale, fai se lisi o nisi o mea e te faaaluina ai le tele o lou taimi e fai pe fia amata ona faia e le aunoa.

I le itu taumatau, tusi i lalo mea e te lagonaina o taunuuga o le faia o na mea i se tulaga faifai pea o le a i ai. Mafaufau e uiga i taunuuga e mafai ona e faamoemoe i ai pe afai e te faia e le aunoa nei faatinoga mo se vaiaso, se masina, se tausaga, lima tausaga, po o aso o totoe o lou olaga.

Mafaufau loloto i soo se uunaiga ua e maua mai le Agaga Paia a o e suesue i le asō. I lalo ifo o lau siata, tusi i lalo soo se fetuunaiga na e lagonaina le uunaiga e fai i lou olaga lea o le a fesoasoani ia te oe e agavaa atili ai e maua faamanuiaga e te manao ai. O le a fesoasoani le Atua ia te oe a o e tuuina atu au taumafaiga pito sili ona lelei (tagai i le Mataupu Faavae ma Feagaiga 123:17).

Tuu i le faitalia: O e Manao e Aoao Atili? 

Kalatia 6:8. O le a le uiga pe afai o se tagata ua “lulu i la le Agaga” pe “lulu i la lona tino”?

Na aoao mai Elder Ulisses Soares o le Korama a Aposetolo e Toasefululua:

Ata
Atatosi aloaia o Elder Ulisses Soares, Korama a Aposetolo e Toasefululua

O le lulu i la le Agaga o lona uiga o o tatou manatu, upu, ma amioga uma e tatau ona siitia atu ai i tatou i le tulaga paia a o tatou mātua faalelagi. Ae peitai, ua faasino tusitusiga paia i la le tino o se tulaga faaletino po o tuinanau o le tagata faalenatura, lea e faatagaina ai tagata ina ia faatosinaina e ala i le lagona malolosi, naunautaiga, manaotele, ma tuinanau o le tino nai lo le saili mo musumusuga mai le Agaga Paia. Afai tatou te le faaeteete, e ono uunaia i tatou e na faatosinaga faatasi ma uunaiga o le amioleaga i le lalolagi ina ia tatou taliaina uiga mataga ma lepopoi e ono avea ma vaega o o tatou uiga masani. Ina ia mafai ona aloese mai na aafiaga leaga, e tatau ona tatou mulimuli i mea na faatonuina ai e le Alii le Perofeta o Iosefa Samita e uiga i le faaauau ai pea ona lulu i la le Agaga: “O le mea lea, aua le faavaivai i le faia o mea lelei, ona o lo o oulua faataatiaina le faavae o se galuega tele. Ma o mea iti e tutupu mai ai mea tetele” (Mataupu Faavae ma Feagaiga 64:33).

(Ulisses Soares, “Nofo i le Itu a le Alii!,” Liahona, Me 2012, 39)

Sa aoao mai Peresitene Dallin H. Oaks o le Au Peresitene Sili:

Ata
Atatosi Aloaia o Peresitene Dallin H. Oaks na pueina ia Mati 2018.

Afai tatou te soona faamalie i tatou i fualaau faasaina po o ponokalafi po o isi mea leaga na ta‘ua e le Aposetolo o [Paulo] o le lulu i la le tino, ua faatonu mai le tulafono faavavau tatou te selesele le leaga nai lo le ola e faavavau. O le faamasinoga tonu lena a le Atua, ma e le mafai e le alofa mutimutivale ona faoa le faamasinoga tonu. Afai ua solia se tulafono e faavavau, o le faasalaga e o faatasi ma lena tulafono e tatau ona mafatia ai. O nisi o nei vaega e mafai ona faamalieina e ala i le togiola a le Faaola, ae o le faamamaina mutimutivale alofa o se tagata agasala ua eleelea e faatoa oo mai pe a mavae le salamo (tagai i le Alema 42:22–25), lea o se faagasologa e faaumiumi ma tiga mo nisi o agasala.

(Dallin H. Oaks, “Aua Ne’i Faaseseina,” Liahona, Nov. 2004, 45)

E mafai faapefea e taumafaiga laiti ona suia lo‘u olaga ma olaga o isi?

Matamata i le “Of Seeds and Soils” mai le faailo taimi 7:06 i le 9:11 e vaai ai i se faataitaiga o ni faatinoga laiti ua suia ai olaga o le faitau selau. O loo maua lenei vitio i le ChurchofJesusChrist.org.