Atamai i Aoaoga Faavae: Efeso 1:10
O Le Toefuataiga o Mea Uma
I lau suesuega o le Efeso 1, sa e aoao ai e uiga i le aoaoga faavae o le Toefuataiga. O le lesona lenei e te maua ai le avanoa e faateleina ai lou atamai i aoaoga i le Efeso 1:10 e ala lea i le taulotoina o mau faasino ma fasifuaitau autu o le mau, faamatala le aoaoga faavae, ma le faaaogaina o mataupu faavae o le mauaina o le malamalama faaleagaga i tulaga masani o le olaga.
Faamatala ma tauloto
Vaai faalemafaufau e faapea, e toatele tagata o le vasega sa lei i ai i le aso na suesue ai e lau vasega seminare le aoaoga faavae o le Toefuataiga i le Efeso 1. Ua fai atu lou faiaoga seminare ia te oe e faaaoga ni nai minute e aotele ai aoaoga e sili ona taua e te lagona e manaomia e tagata aoga uma ona iloa ma manatua e uiga i le aoaoga faavae o le Toefuataiga ma aoaoga mai le Efeso 1:10.
1. Tali fesili nei i totonu o lau api talaaga mo suesuega:
-
O le fea upumoni taua e uiga i le Toefuataiga o le talalelei o le a e faasoa atu? Aisea?
-
E faapefea ona e faamatalaina aoaoga o loo maua i le Efeso 1:10 i au lava upu?
-
E mafai faapefea e le malamalama i le Toefuataiga ona tosina ai le malamalama ma lagona o se tasi agai i le Tama Faalelagi ma Iesu Keriso?
I lau api talaaga mo suesuega po o luga o lau masini faatekinolosi, tusifaamaumau ai le fasifuaitau autu o le mau ma le tusi mo le fuaitau o le atamai i aoaoga faavae Efeso 1:10 e ala i le vaevaeina i ni vaega se fa e pei ona faaalia i lalo:
-
I le tisipenisione o le atoaga o taimi
-
Atonu Na te faapotopoto faatasi ia tasi
-
Mea uma ia Keriso
Ufiufi laina 2–4, ma toe fai le laina 1 i lou mafaufau seia oo ina e taulotoina. Me’i i le laina lona lua, ma toe fai le faagasologa. Fai le mea lava lea e tasi mo laina 3 ma le 4. A e lagona le mautinoa ua e taulotoina uma laina e fa, tusi uma i lau api talaaga mo suesuega e aunoa ma le tilotilo i ai. Toe fai le faagasologa pe a manaomia seia oo ina mafai ona e tusia le fasifuaitau autu o le mau atoa ma le tusi mai lou manatuaga.
Faataitai le faaaogaina
Mafaufau e toe faamanatu ia parakalafa 5–12 i le Pepa Autu o le Atamai i Aoaoga Faavae (2022). Filifili se tasi o mataupu faavae e tolu o le mauaina o le malamalama faaleagaga, ma fatu se aikona po o se ata faatusa faigofie e faamanatu atu ai ia te oe lenei mataupu faavae ma lona manatu autu. Mo se faataitaiga, mo le mataupu faavae “iloilo manatu ma fesili faatasi ma se vaaiga e faavavau,” atonu e te mafaufau e fai se ata e pei o lenei:
Faitau le ata faataitai lenei e fesoasoani ia te oe e faataitai ai le faaaogaina o mataupu faavae o le mauaina o le malamalama faaleagaga ma le aoaoga faavae o loo aoao mai i le Efeso 1:10 e faapea i le taimi o le tisipenisione o le atoaga o taimi, o le a faapotopotoina faatasi mea uma ia Keriso. Ona faaaoga lea o le ata faataitai lenei, pe fatu ai sa oe lava ata faataitai, e tali ai fesili o loo mulimuli mai.
Sa papatisoina sau uo ma lona aiga ma lagona le mautinoa i lena taimi o loo ia mulimuli i le faataitaiga a Iesu Keriso e ala i le auai i Lana Ekalesia. Ae i le tausaga ua tuanai talu mai lona papatisoga, sa tele ina faaosoosoina o ia e isi uo e solia poloaiga. Ua amata ona ia taumate pe o le Ekalesia moni lava lenei a Keriso ma pe aoga le tumau faamaoni i le talalelei.
E ui o loo tele ni upumoni e mafai ona fesoasoani i lau uo, mafaufau pe mafai faapefea e aoaoga faavae o le Toefuataiga ma le tisipenisione o le atoaga o taimi ona faamalosia ma faamalosiauina o ia.
2. I lau api talaaga mo suesuega, tali fesili i lalo o mataupu faavae taitasi nei e tolu:
Faatino i le faatuatua
-
O a laasaga atonu e te uunaia lau uo e fai ina ia faatino ai i le faatuatua?
-
E mafai faapefea e le faatino i le faatuatua ona fesoasoani i lau uo i ana fesili ma atugaluga?
Iloilo manatu faavae ma fesili faatasi ma se vaaiga e faavavau
-
O le a se mea ua e iloa e faatatau i aoaoga a le Faaola e uiga i le Toefuataiga?
-
E mafai faapefea e le faatumauina o se vaaiga e faavavau ona fesoasoani ia te oe ma lau uo i lenei tulaga?
Saili le malamalama atili e ala i punaoa faalelagi ua filifilia
-
E mafai faapefea e upumoni o loo maua i le Efeso 1:10 ona fesoasoani i lenei tulaga?
-
Afai e i ai sou taimi faaopoopo ae e te lei tali atu i lau uo, o le a se mea e te ono toe faamanatu pe suesue i ai? O a ni punaoa e mafai ona e valaaulia lau uo e suesue i ai na o ia? Aisea?