Efeso 2–5

Mauaina o Upumoni Faavavau

O le a lou mautinoa i lou gafatia e maua ai le upumoni i tusitusiga paia? E aoao mai e perofeta upumoni mai le Tama Faalelagi mo lo tatou lelei. Mo se faataitaiga, na aoao atu e Paulo le Au Paia i Efeso i upumoni e uiga i le faatoilaloina o le lalolagi ma avea ai atili e faapei o Iesu Keriso. O lenei lesona ua faamoemoe e fesoasoani ia te oe e aoao ai pe faapefea ona maua upumoni mai tusitusiga paia o le a fesoasoani ia te oe i lou olaga ma aumaia oe ia latalata atili atu i le Faaola.

Sailia o le taua

O le vitio “Flecks of Gold” (3:15) e faatatau i ni alii se toalua sa sailia ni auro. Faitau le tala pe matamata i le vitio, o loo maua i le ChurchofJesusChrist.org, mai le faailo taimi 0:00 i le 2:26. Mafaufau i soo se lesona faaleagaga e te aoaoina mai ai.

Flecks of Gold

This compelling story of an 1850s gold prospector illustrates how giving service to others blesses our lives.

O le tele o taimi e faapei ai i tatou o le alii faipisinisi talavou mai Boston, i le 1849, e pei ona ta’u mai i le tala, na aafia i le faananauga o le mauaina o le auro i Kalefonia. Sa ia faatau ese atu ana mea uma ina ia saili lona manuia i vaitafe o Kalefonia, lea na ta’u mai ia te ia na faatumulia i fasi auro matua lapopoa e tau le mafai e se tasi ona tauave.

I lea aso ma lea aso, sa lolō ai e lea alii talavou lana apa i totonu o le vaitafe ae leai lava se mea na maua. Na pau lona taui o se faaputuga maa ua faatupulaia. I lona le fiafia ma le mativa, na ia sauni ai e toe foi pe a na le fai atu ia te ia i se tasi aso se tagata atamai i le sailiga o le auro, “Atalii, matuā telē tele lena faaputuga maa.”

Na tali mai le alii talavou, “E leai se auro iinei. O le a ou toe foi i lo’u aiga.”

Na savali atu le tagata atamai lea i le faaputuga maa ma fai atu, “Oi, o loo i ai le auro. Pau lava le mea o lou iloa o le mea e maua ai.” Na ia uuina mai i luga ni maa se lua ma faafetoai faatasi. Na ta’e le tasi o maa ma iloa atu ai ni togitogi auro ninii se tele ua feilafi i le la.

I le iloaina atu o se tamai taga e fai i pa’u manu ua tumu o loo fusi i le puimanava o lea tagata, na fai atu ai le alii talavou, “O loo ou sailia ni fasi auro e pei o auro na e i lau taga, ae le na o ni nai fuifui auro.”

Na faaali atu e le tagata atamai ua loa i le sailiga o le auro lana taga i le alii talavou, lea na tilotilo i ai i totonu ma le faamoemoe o le a ia iloa atu ni fasi auro lapopoa se tele. Sa ofo o ia i lona vaai atu e faatumulia le taga i le faitau afe ma afe o fuifui auro.

Sa fai atu le tagata poto, “Atalii, e foliga mai ua e pisi tele e saili ni fasi auro lapopoa ua e misia ai le faatumuina o lau taga i nei fuifui auro taua. O le faaputuputuina ma le onosai o nei fuifui auro ua ou mauoa ai.”

(M. Russell Ballard, “Mauaina o le Olioli e Ala i Auaunaga Alofa,” Liahona, Me 2011, 46)

• E mafai faapefea ona fesootai lenei tala i le mauaina o upumoni i tusitusiga paia?

Faitau faamatalaga nei, ma faatulaga mai le tasi i le lima le moni o nei mea mo oe (tasi = e le moni mo au i soo se taimi; lima = e moni pea mo au i taimi uma)

• Ou te talitonu i lo’u gafatia ona maua upumoni e faavavau i tusitusiga paia faatasi ai ma le fesoasoani a le Agaga Paia.

• O le mauaina o upumoni i tusitusiga paia o se faamanuiaga lea i lo’u olaga ma fesoasoani ou te lagona ai le latalata atili atu i le Tama Faalelagi ma Iesu Keriso.

Sueina o upumoni i tusitusiga paia

O nisi upumoni i tusitusiga paia e sili atu ona faigata ona maua nai lo isi. Saili le fesoasoani a le Tama Faalelagi e ala i le Agaga Paia e fesoasoani ia te oe e faailoa upumoni i le savali a Paulo i le Au Paia i Efeso. O le a fesoasoani le Agaga Paia ia te oe e ala i le molimau atu ia te oe i nei upumoni (tagai i le Moronae 10:5; Ioane 16:13).

A o avea Paulo ma se pagota i le fale na pue faapagotaina ai o ia i Roma, sa ia tusi atu i tagata Efeso e faamalosiau ma fautuaina i latou i le auala e faaauau ai ona faalatalata atili atu ia Iesu Keriso ma le ala e faatoilalo ai osofaiga faaleagaga a le tiapolo. Faataitai ona faailoa mai upumoni mai mea na faasoa atu e Paulo i nei Au Paia.

O se tasi lenei o auala e mafai ona e vaavaai ai mo upumoni e faavavau a o e suesue i tusitusiga paia. Faitau le Efeso 2:4–10, ma fai laasaga nei:

1. Vaavaai mo upu, fasifuaitau, po o fuaiupu e foliga mai e sili ona taua. Mafaufau e faailoga na mea i totonu o au tusitusiga paia.

2. Aotele le manatu autu o nei upu, fasifuaitau, po o fuaiupu. (Mo se faataitaiga, e mafai ona e aoteleina le tala a Paulo e uiga i le alofa tunoa i le fuaiupu 8?)

3. Faatulaga mea na e aoaoina i se faamatalaga o le upumoni e mafai ona e faaaogaina i lou olaga.

1. Tali fesili nei i totonu o lau api talaaga mo suesuega:

• O le a se upumoni se tasi na e mauaina? Na faapefea ona e faailoaina lena upumoni?

• E mafai faapefea e lenei upumoni ona fesoasoani ia te oe e lagona ai le alofa o le Tama Faalelagi ma Iesu Keriso mo oe pe fesoasoani ia te oe ia avea atili e faapei o i Laua?

• Na faapefea ona e faaaogaina pe mafai faapefea ona e faaaogaina lenei upumoni i lou olaga?

Faataitai le faailoaina o upumoni

Faaaoga laasaga na lisiina atu muamua. Filifili se seti se tasi pe lua o fuaiupu nei, ma saili mo upumoni e faavavau o loo i ai.

• Efeso 3:13–19

• O leEfeso 4:20–32, e aofia ai le Faaliliuga a Iosefa Samita i le vaefaamatalaga 26a (Atonu e fesoasoani le iloa o le “tagata tuai” i nei fuaiupu e faatusa i auala agasala muamua ma o le “tagata fou” e faatusa i le ola ai i se olaga amiotonu e ala ia Iesu Keriso.)

• Efeso 5:17–21

Filifili se tasi o upumoni na e maua, ma mafaufau loloto pe mafai faapefea ona fesoasoani ia te oe e lagona ai le alofa o le Tama Faalelagi ma Iesu Keriso mo oe pe fesoasoani ia te oe ia avea atili ai e faapei o i Laua.

2. Faamaea mea nei i totonu o lau api talaaga mo suesuega:

I le faaaogaina ai o punaoa o loo avanoa mo oe (pepa, penivali, meafaigaluega faatekinolosi, ma isi), fatu se pepa faalauiloa o i ai se savali e mafai ona faaopoopo i le mekasini o le Mo Le Malosi o le Autalavou . Ia aofia mea nei i lau pepa faalauiloa o i ai se savali:

• O le mataupu faavae na e faailoaina ma le fuaiupu po o fuaiupu o le mau na e maua ai

• O se ata faigofie po o se ata tusi e fesoasoani i le aufaitau ia malamalama ai i le upumoni pe faapupula mai ai le ala e mafai ai e se tasi ona faaaoga lenei upumoni i o latou olaga

Faasoa atu lau pepa faalauiloa o i ai se savali i lou aiga po o se uo. Fesili atu ia i latou po o a mea ua latou aoaoina mai le pepa faalauiloa o i ai se savali, ma faasoa ou manatu ma lagona e uiga i le upumoni o loo aumaia ai.

Tomanatu i le sailia o upumoni

3. Tali fesili nei i totonu o lau api talaaga mo suesuega:

Mafaufau i lou aafiaga i le sailia o upumoni e faavavau i tusitusiga paia.

• O a ni auala na e lagonaina na faamanuiaina ai oe?

• O le a se mea na faigata?

• Na faapefea e le saili mo upumoni ona fesoasoani ia te oe e iloa ai le alofa o le Tama Faalelagi mo oe?

• E mafai faapefea ona e faaaogaina mea ua e aoaoina i le aso i au suesuega patino pe faaleaiga o tusitusiga paia?

Tuu i le Faitalia: O e Manao e Aoao Atili?

Efeso 2:4–9. O le a le alofa tunoa ae o le a lana mea e fai mo au?

A o auauna ai o se tasi o le Au Peresitene Sili, na faamalamalama mai ai e Peresitne Dieter F. Uchtdorf le alofa tunoa o le Atua “o le fesoasoani faalelagi ma le faaeega paia o le malosi lea tatou te tuputupu ae ai mai tagata sese ma le le atoatoa o loo tatou i ai nei seia oo atu o ni tagata faaeaina o le ‘upumoni ma le malamalama, seia oo ina faamamaluina [i tatou] i le upumoni ma [iloa] mea uma’ [Mataupu Faavae ma Feagaiga 93:28]” (“O Le Meaalofa o le Alofa tunoa,” Liahona, Me 2015, 107). Mo nisi faamatalaga e uiga i le alofa tunoa, mafaufau e faitau le lauga atoa, o loo maua i le ChurchofJesusChrist.org.

Mo nisi malamalamaga i le alofa tunoa o le Faaola, faitau le Mosaea 2:20–24 ma le Filipi 2:12–13.

Efeso 4:22. O le a le uiga o le “tuu ese le tagata tuai”?

Na aoao mai Paulo pe a tatou filifili e talia le sauniga o le papatisoga, ua tatou osigafeagaiga e faamuta o tatou ala tuai (pe “tuu ese le tagata tuai” [Efeso 4:22]) ma amata ai se olaga fou o ni soo o Iesu Keriso (tagai i le Roma 6:1–6; Mataupu Faavae ma Feagaiga 20:37). E aofia ai i lenei mea le tuua o a tatou agasala ma soo se mea o le a taotaomia ai i tatou mai le latalata atili atu i le Tama Faalelagi. E le mafai ona tatou faatupua lenei faagasologa na o i tatou lava. E tupu ona o Iesu Keriso ma Lana Togiola ma le faatosinaga faapaiaina a le Agaga Paia.