Efeso 5:21–33; 6:1–4

Sootaga FaaKeriso

O sootaga faaleaiga o nisi ia o mea e sili ona tauia e mafai ona tatou oo i ai i le olaga nei. O sootaga ma matua, uso ma tuafafine/tuagane, ma taitoalua e mafai ona aumaia ai le olioli tele ae e mafai foi ona oo mai ai luitau. Na aoao mai Paulo e mafai ona tatou vaai atu ia Iesu Keriso o se faataitaiga mo sootaga maloloina ma fiafia faatasi ma tagata o le aiga. O lenei lesona e mafai ona fesoasoani ia te oe e mulimuli ai i le faataitaiga a le Faaola e faaleleia ai au sootaga ma isi.

Lou aiga

Tusi i lalo igoa o tagata o lou aiga vavalalata ma se mea se tasi o mea e te fiafia ai e uiga ia i latou taitoatasi.

Mafaufau i le faamatalaga lenei mo tagata taitoatasi o le aiga: “Ou te taulimaina lenei tagata o le aiga i le ala ou te lagona e finagalo le Faaola ou te taulimaina ai i latou.” Ona fua lea o le auala e te taulimaina ai tagata taitoatasi o le aiga e faaaoga ai le fuafaatatau lenei.

A o e suesue i le asō, mafaufau e uiga i sootaga o loo ia te oe ma tagata o lou aiga ma pe mafai faapefea ona e mulimuli i le faataitaiga a le Faaola o le alofa ma fesoasoani ia i latou.

Na tuuina mai e Paulo fautuaga i sootaga faaleaiga

E taua le maitauina o upu a Paulo i le Efeso 5:22–24 sa tusia i le faatatauga o aganuu faaleagafesootai o lona vaitaimi. Ua aoao mai perofeta ma aposetolo i aso nei, e le sili ae alii i tamaitai, ma o ulugalii e tatau ona avea ma ni “paaga tutusa” (“O Le Aiga: O Se Folafolaga i le Lalolagi,” ChurchofJesusChrist.org). E ui ina eseese tu ma aga o le taimi o Paulo, ae e mafai lava ona e maua fautuaga talafeagai i aoaoga a Paulo. O se tasi o upumoni na faamamafa mai e Paulo o le, e mafai ona tatou mulimuli i le faataitaiga a le Faaola i le ala tatou te taulimaina ai tagata o o tatou aiga.

Faitau le Efeso 5:21–27; 6:1–4, ma vaavaai mo faamaoniga o lenei upumoni. A o e suesue i ai atonu e fesoasoani le iloaina o le “gauai atu o le tasi i le isi” (Efeso 5:21) e faasino i se naunautaiga e galulue faatasi ma alofa ma tausi e le tasi le isi, ma le “mata‘u i le Atua” (Efeso 5:21) o lona uiga o le alofa ma le faaaloalo mo le Atua.

1. Tali fesili nei e lua i lau api talaaga mo suesuega:

• O a nisi o auala na faaalia ai e le Faaola Lona alofa mo le Ekalesia ma tuuina mai ai o Ia lava mo lena mea?

• E faapefea e le iloaina o le ala na tuuina mai ai e Keriso o Ia lava mo le Ekalesia ona e lagona ai e uiga ia te Ia?

• E tatau faapefea ona manatu se tane agai i lana ava pe afai na te mulimuli i le faataitaiga i le ala e manatu ai le Faaola i Lana Ekalesia?

• O le a le fautuaga na tuuina mai e Paulo e mafai ona faatatau tutusa i tane ma ava? isi tagata o le aiga?

• O le a se mea e mafai ona e faia i le taimi nei e te saunia ai e taulima lou toalua i se aso i le ala o le a taulima ai i latou e le Faaola?

• E mafai faapefea e le usiusitai ma le ava i ou matua ona fesoasoani ia te oe e avea atili ai e faapei o Iesu Keriso?

Vaai i ata nei ma faafetaui i tala nei i tusitusiga paia: Luka 2:51–52, Ioane 2:1–11, ma Luka 22:39–42. Mafaufau pe na faapefea ona avea le Faaola ma se faataitaiga o le alofa, usiusitai, ma le faamamaluina o Ona matua faalelalolagi ma faalelagi.

• O a ni auala na faaali ai e le Faaola le alofa, usitai, ma le ava i Ona matua? O le a sou manatu na faapefea ona aafia Lona sootaga ma Ona matua i Ana amioga?

• O a nisi o auala e te ava ai ma usitai i ou matua?

• Na faapefea e le mulimuli i le faataitaiga a le Faaola ona faamanuiaina oe ma fesoasoani ia te oe e faamalosia sootaga faaleaiga, pe e te manatu e mafai faapefea?

Faataitai ona faapei o le Faaola

2. Faamaea mea nei i lau api talaaga mo suesuega.

Tusi se fegalegaleaiga masani i le va o se talavou ma se tagata o le aiga lea e ono faigata ona taulimaina le isi tagata o le aiga e pei ona ono taulima ai i latou e le Faaola. A uma loa ona e fatuina se fegalegaleaiga, tusi le auala e te manatu e ono tali atu ai le Faaola ma pe aisea foi. Manatua lagona ma faatinoga a le Faaola agai i isi.

O faataitaiga e mafai ona aofia ai:

• O se matua e faitio i le auala e faaalu ai e se tamaitiiti o latou taimi avanoa.

• Ua ave e se tei se meatotino a se isi ona tei e aunoa ma le fesili ma pepelo e uiga i ai.

Mulimuli i le faataitaiga a le Faaola

Manatunatu i au sootaga ma tagata o lou aiga. Mafaufau i taimi na e mulimuli ai i le faataitaiga a le Faaola ma taulimaina isi i auala faaKeriso. Ma le isi, faataga le Agaga Paia e fesoasoani ia e iloa mea e mafai ona e faia e mulimuli ai i le faataitaiga a le Faaola o le alofa atu i isi.

Tusi i lalo mea e te lagona e mafai ona e faia e faataitai ai i le Faaola i au sootaga faaleaiga. Mafaufau e faasoa atu mea na e tusia ma lou faiaoga po o se matua e fesoasoani ia te oe e tulitatao ai mea ua uunaia oe e fai.

Tuu i le faitalia: O e Manao e Aoao Atili?

Efeso 5:22–24. O le a se mea e tatau ona tatou malamalama i ai e uiga i aoaoga a Paulo i nei fuaiupu?

Na aoao mai Paulo e tatau i tagata uma o le Ekalesia ona gauai atu i le tasi ma le isi, pe i se isi faaupuga, tuu atu le faamuamua i isi nai lo i latou lava (tagai i le Efeso 5:21). Ona ia faamatala mai lea o le ala e faatatau ai le mataupu faavae o le gauai atu o le tagata lava ia, i sootaga faaleaiga ma auaiga. O fuaiupu 22–24 e mafai ona faigofie ona malamalama sese i ai ma sese ai le faaaogaina i o tatou aso. Ua aoao manino mai e perofeta o aso e gata ai e faapea, o tane ma ava ma tina ma tama e tatau ona faataunuu o latou tiute paia o ni “paaga tutusa” (“O Le Aiga: O Se Folafolaga i le Lalolagi,” ChurchofJesusChrist.org). Afai e lotogatasi moni ia ulugalii, o lona uiga o soo se taulaga e osi mo se toalua e mautinoa lava le aumaia ai o faamanuiga i lena tagata; o lea, “o le e alofa i lana lava ava, o loo alofa o ia ia te ia lava” (Efeso 5:28).

E mafai faapefea e se tane po o se ava ona taulima o latou taitoalua e faapei ona faia e le Faaola?

Na taua e Peresitene Gordon B. Hinckley (1910–2008):

O le fiafia i totonu o se faaipoipoga e le o se mataupu e ao ona lilifa i le alofa faaleuo ae e tatau ona mafuli atu i le popolega naunautai mo le lagona mafanafana ma le soifua manuia o le soa. Soo se tane o le a ia tuu atu le faamuamua i lagona logolelei o lona toalua o le a tumau i le alofa faatasi ma ia i o laua olaga atoa ma le faavavau pe a oo mai. (Anchorage, Alaska, konafesi faarisone, 18 Iuni, 1995)

(“Speaking Today: Excerpts from Recent Addresses of President Gordon B. Hinckley,” Ensign, Ape. 1996, 72)

Na taua e Elder L. Whitney Clayton o le Korama a le Au Fitugafulu:

Sa ou maitauina i faaipoipoga e aupito sili ona fiafia e mafaufau le tane ma le ava i lo laua sootaga, o se penina e silisili lona tau, o se oa e le muta lona taua. La te taufai tuua o la tama ma tina, ae sagai atu faatasi e fausia se faaipoipoga o le a manuia mo le faavavau. Ua laua malamalama e la te savavali i se ala ua faauuina mai le lagi. Ua laua iloa e leai lava se isi sootaga o soo se ituaiga e mafai ona maua ai se fiafiaga tele faapea, e faatupuina se lelei tele faapea, pe foaiina se faaleleia tele patino faapea. Matau ma aoao: o paaga faaipoipo aupito lelei e mafaufau i a latou faaipoipoga o ni faatasiga e leai ni tau.

(L. Whitney Clayton, “Faaipoipoga: Matau ma Aoao,” Liahona, Me 2013, 83)

O a ni mea e mafai ona ou faia e faamalosia ai sootaga a lo’u aiga?

“Ava i ou matua e ala i le faaalia o le alofa ma le faaaloalo mo i laua. Usitai ia i laua a o la taitai oe i le amiotonu. Fesoasoani ma le naunautai i totonu o lou aiga. Auai i gaoioiga lelei ma faiga masani faaleaiga. Auai faatasi ma lou aiga i tatalo faaleaiga, suesuega o tusitusiga paia, ma afiafi faaleaiga. O le tausiga o nei poloaiga e faamalosia ma tuufaatasia ai aiga” (Mo le Malosi o le Autalavou [tamaitusi, 2011], 14–15).

Atonu e te faitau i le tusiga lenei, lea e fautuaina mai ai ni auala e fausia ma faamalosia ai sootaga: “Mataupu Faavae mo le Auaunaga: Atinaeina o Fegalegaleaiga Aoga,” Ensign, Aok. 2018, 6–9.

Mafaufau e matamata se tasi pe sili atu o vitio nei, o loo maua uma i le ChurchofJesusChrist.org, lea o loo faaalia ai ni faataitaiga o tagata o loo taumafai malosi e mulimuli i le faataitaiga a le Faaola o le ala latou te taulima ai isi.

I le vitio “You Are My Hands” (mai le faailo taimi 10:26 i le 12:39), na saunoa ai Peresitene Dieter F. Uchtdorf, a o i ai i le Au Peresitene Sili, e uiga i le ala e mafai ai ona avea i tatou ma aao o le Faaola.

I le “Enduring Love” (4:16), e alofa ma auauna atu se ulugalii i le tasi ma le isi e ui lava e tatau ona la onosaia puapuaga o faigata faaletino.

Enduring Love

Watch how this couple demonstrates pure love and service in their marriage—even though they have to endure debilitating physical adversity.

I le “Home and Family—Through Small Things” (3:33), ua luiina e se epikopo ni talavou se toatolu e aoao po o le a le mea e fai ina ia avea ai lo latou fale o se nofoaga paia.

Aiga ma le Auaiga - E Ala i Mea Iti

O le luiina ai e lo latou epikopo, na iloa ai e ni talavou se toatolu le mea e manaomia ina ia faia ai o latou fale o se nofoaga paia.

I le “Mothers and Daughters” (5:06), o loo talanoa mai tamaitai talavou i Alberta, Kanata, i le pogai ua avea ai o latou tina ma ni faataitaiga lelei ia i latou.

Tina ma Fanau Teine

Ua talanoa mai tamaitai talavou i Alberta, Kanata, i le pogai ua avea ai o latou tina ma ni faataitaiga lelei ia i latou. Ua aoao mai Elder M. Russell Ballard e uiga i faamanuiaga ma le taua o sootaga faapitoa i le va o tina ma alo tamaitai.

I le “Fathers and Sons” (6:02), ua faasoa mai ai e se alii talavou le ala na ia galue ai e faaleleia lona sootaga ma lona tama.

Tamā ma Atalii

Na faaaoga e se alii talavou i Nevada le fautuaga na tuuina atu e Elder M. Russell Ballard o le Korama a Aposetolo e Toasefululua ma suia ai e faavavau le la sootaga ma lona tama.