Հովհաննես 7

Կատարեք Աստծո կամքը, որպեսզի իմանաք Նրա վարդապետությունը

Տաղավարահարաց տոնի ժամանակ Երուսաղեմ այցելելիս Հիսուսը բացատրեց, թե մարդն ինչպես կարող է ինքնուրույն հասկանալ, որ Իր ուսուցանած վարդապետությունը Երկնային Հորից է: Այս դասը կօգնի ձեզ հասկանալ, թե դուք ինչ կարող եք անել՝ Երկնային Հոր և Հիսուս Քրիստոսի ուսմունքների ճշմարտությունը իմանալու համար:

Տարբեր համոզմունքներ Հիսուս Քրիստոսի մասին

• Ի՞նչ համոզմունքներ ունեն մարդիկ այն մասին, թե ով է Հիսուս Քրիստոսը:

• Ձեզ համար ինչո՞ւ է կարևոր իմանալ ճշմարտությունը Հիսուս Քրիստոսի մասին՝ անկախ նրանից, թե ուրիշներն ինչ են մտածում:

Մի րոպե մտածեք, թե ինչն է ազդել Հիսուս Քրիստոսի մասին ձեր համոզմունքների վրա: Որոշեք, թե ինչ աղբյուրների եք հակված դիմել՝ ճշմարտությունն իմանալու համար, և խորհեք, թե դրանք ինչպես են ազդում ձեր համոզմունքների վրա: Այսօր սովորելիս մտածեք, թե դուք ինչ կարող եք անել՝ Հիսուս Քրիստոսի և Նրա ուսմունքների մասին ճշմարտությունն իմանալու համար:

Քանի որ Երուսաղեմում շատերն էին ցանկանում սպանել Հիսուսին, Նա գաղտնի մասնակցեց տաղավարահարաց տոնին (տես Հովհաննես 7․1, 10): Մինչ հրեաները փնտրում էին Հիսուսին, ինչպես նաև տոնի ողջ ընթացքում մարդիկ տարբեր կարծիքներ էին հայտնում այն մասին, թե ով է Հիսուսը:

Որպեսզի իմանաք, թե մարդիկ ինչ էին ասում Հիսուսի մասին, ընտրեք հետևյալ հղումներից երկուսը կամ երեքը և պատասխանեք հետևյալ հարցերին:

Հովհաննես 7.12, 40-41	Ինչպիսի՞ կարծիքներ ունեին մարդիկ Հիսուսի մասին:
Հովհաննես 7.31	Ինչո՞ւ էին որոշ մարդիկ հավատում Հիսուսին:
Հովհաննես 7․41-42, 52	Ինչո՞ւ էին մարդիկ քննարկում, թե որտեղ է ծնվել Հիսուսը:
Հովհաննես 7.45-46	Ի՞նչն էր ամենից շատ տպավորել Հիսուսին ձերբակալելու նպատակով ուղարկված սպասավորներին:
Հովհաննես 7.47	Ինչպե՞ս էին փարիսեցիները նկարագրում Հիսուսին հավատացող մարդկանց:

• Մարդիկ ի՞նչ պատճառներ էին բերում Հիսուս Քրիստոսին հավատալու կամ չհավատալու համար:

• Ներկայումս մարդիկ ի՞նչ կարծիքներ ունեն Հիսուս Քրիստոսի և Նրա ուսմունքների մասին:

• Մենք ինչպե՞ս կարող ենք իմանալ Հիսուս Քրիստոսի և Նրա ուսմունքների մասին ճշմարտությունը:

Ինչպե՞ս իմանալ ճշմարտությունը Հիսուս Քրիստոսի և Նրա ուսմունքների մասին

Տաղավարահարաց տոնի ժամանակ Հիսուսը գնաց տաճար՝ ուսուցանելու: Նա բացատրեց այնտեղ գտնվող մարդկանց, որ Իր վարդապետությունը և հենց Ինքը Երկնային Հորից են (տես Հովհաննես 7,14, 16–18, 28–29)

Հովհաննես 7:17-ը վարդապետության սերտման հատված է: Կարող եք նշել այն տարբերակիչ ձևով, որպեսզի կարողանաք հեշտությամբ գտնել: Հաջորդ դասին դուք ավելին կսովորեք վարդապետության սերտման այս հատվածի մասին:

Կարդացեք Հովհաննես 7.17-ը՝ ուշադրություն դարձնելով, թե ըստ Հիսուսի, մարդիկ ինչ կարող էին անել, որպեսզի համոզվեին, որ Իր ուսուցանածը ճշմարիտ է, և Ինքն ուղարկված է Երկնային Հոր կողմից:

Այս հատվածից մենք կարող ենք սովորել հետևյալ սկզբունքը. Եթե մենք կատարում ենք Երկնային Հոր կամքը, մենք կարող ենք համոզվել, որ Նրա վարդապետությունը ճշմարիտ է:

Կատարել Երկնային Հոր կամքը՝ նշանակում է ապրել այնպես, ինչպես Նա է ցանկանում, որ մենք ապրենք: Փրկիչ Հիսուս Քրիստոսը միշտ ապրել է Երկնային Հոր կամքի համաձայն և ուսուցանել է այն:

• Ի՞նչ օրինակներ կարող եք բերել, երբ Հիսուսը կատարել է Հոր կամքը:

• Որքանո՞վ է դժվար ապրել մի սկզբունքով, որի ճշմարտացիության մեջ մենք դեռևս համոզված չենք:

Նախագահ Բոննի Լ. Օսկարսոնը՝ Երիտասարդ կանանց նախկին գերագույն նախագահը, հետևյալ խորհուրդն է տվել.

Երբեմն մենք փորձում ենք անել դա հակառակ ուղղությամբ: Օրինակ՝ գուցե մենք կիրառենք այս մոտեցումը՝ Ես երջանիկ կլինեմ ապրել տասանորդի օրենքով, բայց նախ՝ ես պետք է իմանամ, որ այն ճշմարիտ է: Գուցե մենք նույնիսկ աղոթում ենք տասանորդի օրենքի վերաբերյալ վկայություն ձեռք բերելու համար և հույս ունենք, որ Տերը կօրհնի մեզ այդ վկայությամբ՝ նախքան մեր տասանորդի ձևաթուղթը լրացնելը: Դա ուղղակի այդ ձևով չի գործում: Տերն ակնկալում է, որ մենք հավատք գործադրենք: Մենք պետք է հետևողականորեն լրիվ և ազնիվ տասանորդ վճարենք, որպեսզի ձեռք բերենք վկայություն տասանորդի վերաբերյալ: Այս նույն գործելակերպը վերաբերում է ավետարանի բոլոր սկզբունքներին, լինի դա մաքրաբարոյության օրենքը, համեստության սկզբունքը, Իմաստության խոսքը կամ ծոմի օրենքը:

(Բոննի Լ. Օսկարսոն, «Դարձի եկեք», Ensign կամ Լիահոնա, նոյեմբեր 2013, 77)

• Ձեր կարծիքով, Հիսուս Քրիստոսն ինչո՞ւ է ցանկանում, որ մենք համոզվենք, որ Իր վարդապետությունը Երկնային Հորից է, և այն ճշմարիտ է:

• Այդ համոզմունքն ինչպե՞ս կարող է մեզ օգնել ավելի լավ ճանաչել Նրան:

Ընտրեք Տիրոջ այն ուսմունքը, որի մասին վկայությունը կկամենայիք ամրապնդել: Գաղափարների համար կարող եք ուսումնասիրել երիտասարդներին ուղղված զեկույցները վերջին գերագույն համաժողովից: Կարող եք նաև գաղափարներ գտնել Երիտասարդներին զորացնելու համար (2011) գրքույկում կամ Երիտասարդներին զորացնելու համար ամսագրում: Հրավիրեք Սուրբ Հոգուն, որպեսզի օգնի ձեզ ընտրել Տիրոջ այն ուսմունքը, որը ձեզ առավելագույնս կօրհնի ձեր կյանքի այս փուլում:

1. Կատարեք հետևյալ հանձնարարությունը սուրբ գրությունների ուսումնասիրության ձեր օրագրում.

Գրեք ընտրված ուսմունքը ձեր օրագրի դատարկ էջի վերևում կամ դատարկ թերթիկի վրա: Ապա մտածեք մի հասարակ պատկեր կամ առարկա, որը կարող է ներկայացնել այս վարդապետությունը և նկարեք այն թղթի մեջտեղում:

Օրինակ՝ գուցե դուք որոշել եք ամրապնդել ձեր վկայությունը Մորմոնի Գրքի՝ որպես Աստծո խոսքի մասին: Կարող եք նկարել Մորմոնի Գրքի հասարակ մի պատկեր:

Որպեսզի ինքներդ ձեզ օգնեք հասկանալ, թե ինչ է նշանակում ընտրված ուսմունքի մասին վկայություն ստանալ, մտածեք, թե Երկնային Հայրն ինչ կուզեր, որ դուք անեիք՝ այդ ուսմունքը յուրացնելու համար: Նկարված պատկերի շուրջ գրեք առնվազն երեք գործողություն:

Մտածեք, թե այս վարդապետության մասին ավելի ամուր վկայություն ստանալն ինչպես կարող է ազդել Երկնային Հոր և Հիսուս Քրիստոսի հետ ձեր հարաբերությունների վրա:

2. Պատկերի ներքևում պատասխանեք հետևյալ հարցերին.

• Ի՞նչ խոչընդոտներ կարող են ձեզ խանգարել ապրել ըստ այս վարդապետության: Ինչպե՞ս եք պատրաստվում հաղթահարել այդ խոչընդոտները:

• Ի՞նչ է կարևոր իմանալ այն ժամանակի ու ջանքերի մասին, որոնք կպահանջվեն՝ համոզվելու համար, որ այս վարդապետությունն Աստծուց է:

Ձեր ծրագրերով կիսվեք ընտանիքի այն անդամի հետ, ով կարող է ձեզ օգնել ապրել վարդապետության համաձայն և համոզվել, որ այն Աստծուց է:

Ընտրովի. Ցանկանո՞ւմ եք ավելին իմանալ

Հովհաննես 7․2 Ի՞նչ է տաղավարահարաց տոնը

Տաղավարահարաց տոնը (որը նաև կոչվում է տաղավարների օր) սկսում և ավարտվում էր շաբաթ օրը և տևում էր ութ օր: Տոնակատարությունները ներառում էին ժամանակավոր տաղավարների կառուցումը երեք ճյուղերով: Տոնի ընթացքում մարդիկ ապրում էին այդ տաղավարներում, որպեսզի հիշեն, որ Աստված օրհնել է Նրա ժողովրդին 40 տարվա ընթացքում, մինչ նրանք ապրում էր Սինայի անապատում:

Հովհաննես 7.17 Ո՞րն է հնազանդության միջոցով ճշմարտությունը փնտրելու արժեքը

Փրկիչն ասաց Իր աշակերտներին, որ նրանք, ովքեր շարունակում են ապրել Իր ուսմունքների համաձայն, կճանաչեն ճշմարտությունը և դա նրանց ազատություն կպարգևի (տես Հովհաննես 8.31-32):Նախագահ Դիտեր Ֆ. Ուխդորֆը՝ Տասներկու Առաքյալների Քվորումից, բացատրել է, թե մենք ինչու պետք է ցանկանանք ստանալ այդ ճշմարտության անձնական վկայությունը:

Ոմանք կարող են ասել, որ քայլերը շատ բարդ են կամ որ չարժե ջանք թափել դրանց համար: Սակայն ես երաշխավորում եմ, որ այս անձնական վկայությունը ավետարանի և Եկեղեցու մասին ամենակարևոր բանն է, որը դուք կարող եք ձեռք բերել այս կյանքում: Այն ոչ միայն կօրհնի և կառաջնորդի ձեզ այս կյանքում, այլև իր հետևանքները կթողնի ձեր կյանքում՝ ողջ հավերժության մեջ:

Դիտեր Ֆ. Ուխդորֆ, «Ստանալ վկայություն լույսի և ճշմարտության մասին», Ensign կամ Լիահոնա, նոյեմբեր 2014, 22)

Հովհաննես 7.39 : Հովհաննեսն ինչո՞ւ ասաց, որ «դեռ Սուրբ Հոգին տրուած չէր»

Հովհաննեսը նկատի ուներ «միայն Սուրբ Հոգու պարգևը, որը ներկա չէր, քանի որ Սուրբ Հոգու զորությունը գործում էր Հովհաննես Մկրտիչի և Հիսուսի ծառայության ընթացքում, այլապես ոչ ոք վկայություն չէր ստանա այն ճշմարտությունների մասին, որոնք այդ մարդիկ ուսուցանեցին [ Մատթեոս 16.16–17 , տես նաև Ա Կորնթացիս 12.3 ]» (Աստվածաշնչի Բառարան, « Սուրբ Հոգի »):