Joseph Smith—Mateo 1:21–37; Lucas 21:25–36

Kamo Dili Masamok

Si Jesukristo misugo sa Iyang mga tinun-an nga “kamo dili masamok” (Joseph Smith—Mateo 1:23) bisan sa kalamidad, kagul-anan, ug kalaglagan nga mag-una sa Ikaduhang Pag-anhi. Kini nga leksiyon makatabang ninyo nga makalikay sa pagpanglingla ug pagbuntog sa kahadlok mahitungod sa mga panghitabo sa kataposang mga adlaw.

Pagbuntog sa panglimbong

Unsa ang duha o tulo ka sayop nga mga ideya nga komon sa kalibotan karon?

Samtang nakigsulti sa Iyang mga Apostoles, ang Manluluwas mitagna nga adunay mga mopakuyanap og sayop nga mga ideya sa dili pa ang Iyang Ikaduhang Pag-anhi. Basaha ang Joseph Smith—Mateo 1:22, nga mangita sa unsay gitagna sa Manluluwas.

Nganong importante man nga mahibalo nga bisan ang “labing pinili” mahimong malingla?

Si Presidente Ezra Taft Benson (1899–1994) nagtudlo nga ang mini nga mga Kristo ug mga propeta wala mag-limit ngadto sa mga tawo apan mahimo usab nga moabot pinaagi sa porma sa bakak nga mga ideya ug pagtulon-an (tan-awa sa Mga Pagtulon-an sa mga Presidente sa Simbahan: Ezra Taft Benson [2014], 158). Samtang magtuon kamo niini nga leksiyon, tinguhaa ang giya sa Espiritu samtang nangita kamo og mga paagi nga kamo makasalig sa Ginoo ug makabuntog sa bisan unsang sayop nga mga ideya o panglingla.

Human matudlo ang mahitungod sa lain pang mga panglimbong ug mahitungod sa mga timailhan sa Iyang Pag-anhi (tan-awa ang Joseph Smith—Mateo 1:23–36), ang Manluluwas mitudlo og usa ka paagi sa pagbuntog sa panglingla. Basaha ang Joseph Smith—Mateo 1:37.

Sa inyong journal sa pagtuon, pagdrowing og usa ka piraso sa bahandi o usa ka kaban sa bahandi. Ang pagbahandi og usa ka butang nagpasabot nga inyong ampingan, panggaon, o dayegon kini sa hilabihan. Kon kita “mobahandi” sa pulong sa Ginoo, gikonsiderar nato kini nga balaan ug panalipdan kini (tan-awa sa Doktrina ug mga Pakigsaad 43:34). Sa palibot o sa sulod sa kaban, isulat ang mga paagi nga atong mabahandi ang pulong sa Ginoo.

Si Presidente M. Russell Ballard, Akting nga Presidente sa Korum sa Napulog Duha ka Apostoles, misugilon sa sugilanon bahin sa panagtagbo uban sa usa ka nauli na nga misyonaryo kinsa nakabasa og impormasyon nga pagpanaway sa Simbahan. Ang batan-ong lalaki adunay daghang pangutana nga dili niya mapangitaan og tubag, ug sa pamati niya nagkawala ang iyang pagpamatuod. Si Presidente Ballard miuyon nga moandam og mga tubag alang sa batan-ong lalaki apan midapit usab sa batan-ong lalaki nga mopasalig sa pagbasa sa Basahon ni Mormon sulod sa usa ka oras sa matag adlaw sulod sa 10 ka adlaw. Si Presidente Ballard misaysay:

Human sa napulo ka adlaw mibalik siya sa akong opisina, ug ako andam na. Gikuha nako ang mga papel aron sa pagsugod og tubag sa iyang mga pangutana, apan gipahunong ko niya.

“President,” miingon siya, “wala na kana kinahanglana.” Dayon mipasabot siya: “Nasayod ko nga ang Basahon ni Mormon tinuod. Nasayod ko nga si Propeta Joseph Smith usa ka propeta sa Dios.”

(M. Russell Ballard, “When Shall These Things Be?,” Ensign, Dis. 1996, 60)

Ngano kaha sa inyong tan-aw nga ang pagtuon sa Basahon ni Mormon matag adlaw misulbad sa daghang kabalaka niini nga batan-on nga lalaki?
Ngano kaha nga ang mga pulong sa Manluluwas ngari kanato diha sa mga kasulatan adunay gahom sa atong kinabuhi?

Paggahin og higayon sa pagpamalandong giunsa sa mga pulong sa Ginoo pagpanalangin kaninyo sa personal. Giunsa man pag impluwensiya sa Iyang mga pulong sa inyong mga pagbati ngadto Kaniya? Sa unsang paagi ang pagbahandi sa mga pulong sa Manluluwas nakatabang ninyo nga malikay sa pagkalingla?

Si Presidente Ballard mitambag usab:

Pagtukod og panahon ug lugar diin matun-an ang mga kasulatan matag adlaw, bisan kon kini sulod lamang sa pipila ka minuto sa matag higayon. … Sa talagsaon nga laraw sa mga butang, kini nga mga butang naggahin lang og gamay kaayo nga panahon. Apan ang taas og tagal nga mga benepisyo niini kanato ug sa atong mga pamilya walay kinutoban ug walay kataposan, ug kini makabuhat og daghan aron kita maandam … alang sa padayon nga nagkadugang nga mga hagit sa umaabot.

(M. Russell Ballard, “When Shall These Things Be?,” Ensign, Dis. 1996, 60–61)

Susiha ang inyong paningkamot sa pagtuon ug pagbahandi sa mga pulong ni Jesukristo. Unsay inyong gibati sa inyong gibuhat? Tan-awa usab unsa ang mga babag sa inyong kinabuhi ug sa unsang paagi ang pagbahandi sa mga pulong ni Kristo makatabang ninyo aron mabuntog kini.

Sa inyong journal sa pagtuon, tapad sa inyong hulagway sa kaban sa bahandi, ikonsiderar nga isulat ang inyong tumong unsay gusto ninyong paagi sa pagbahandi sa mga pulong sa Manluluwas.

Pagbuntog sa mga balda ug mga kahadlok

Si Lucas mirekord og dugang nga tambag ug mga pasidaan nga gipaambit sa Manluluwas mahitungod sa Iyang Ikaduhang Pag-anhi. Basaha ang mosunod nga mga bersikulo, ug itugma kini ngadto sa eksakto nila nga mga pagpamubo [summary].

a. Ang sala ug ang mga kabalaka niining kinabuhia makabalda kanato sa pagkahimong andam alang sa pagbalik sa Manluluwas.b. Sa kataposang mga adlaw, daghang mga tawo ang mobati nga nabuntog sa kahadlok.c. Samtang kita makugihong nagbantay sa mga timailhan sa Ikaduhang Pag-anhi sa Manluluwas, nag-ampo, ug naningkamot nga mahimong takos, mamahimo tang andam sa pagbalik sa Ginoo.

(Pahinumdom: Ang Hubad ni Joseph Smith alang sa Lucas 21:36 , , nagdugang sa hugpong sa pulong nga “ug tumana ang akong mga sugo.”)

Unsa ang makahuloganon diha ninyo samtang inyong gibasa ang nga kasulatan mahitungod sa Ikaduhang Pag-anhi?

Unsa ang pipila sa hinungdan nga ang mga kasingkasing sa katawhan mopakyas kanila tungod sa kahadlok karon?
Sa unsang paagi kaha ang sala ug mga kabalaka niini nga kinabuhi mobalda kanato gikan sa pagkaandam alang sa pag-anhi sa Ginoo? Nganong makadaot man ang ingon niini nga pagkabalda?
Sa unsang paagi ang pag-ampo ug pagpaningkamot nga mahimong takos makatabang nato aron maandam sa pakighimamat sa Ginoo?

Men's Hearts Shall Fail Them
Elder Russell M. Nelson shares a personal story to give encouragement for when we feel "weak in the heart."

Sa unsang paagi ang pagdangop ngadto sa Ginoo makatabang kanato nga mabuntog ang atong mga pagduhaduha ug mga kahadlok niining kataposan nga mga adlaw?

Paggamit sa inyong nakat-onan

Hunahunaa nga human sa leksiyon mahitungod sa Ikaduhang Pag-anhi, ang duha ka higala misulti sa mosunod:

Higala #1: “Wala gyod ko maghunahuna nga ang Ikaduhang Pag-anhi usa ka dakong butang. Sa pagkatinuod, ang akong papa wala gani maghunahuna nga kini mahitabo. Dili ko gusto nga mabalaka bahin sa usa ka butang nga ingon niana.”

Higala #2: “Dili ko ganahan maghunahuna mahitungod sa Ikaduhang Pag-anhi. Nahadlok ko ug nabalaka mahitungod sa inadlaw-adlaw nga mga butang sama sa pag-eskwela ug mga problema sa mga higala, apan ang Ikaduhang Pag-anhi mas labaw kaayo. Ang tanan nga timailhan sa gubat ug mga linog ug panglingla—ingon og makalilisang.”

1. Kompletoha ang mosunod nga kalihokan diha sa inyong journal sa pagtuon:

Pagpili og usa sa mosunod nga mga senaryo. Gamit ang inyong nakat-onan niini nga leksiyon, tinguhaa ang giya sa Espiritu samtang magsulat kamo sa unsay inyong isulti o buhaton aron matabangan ang inyong higala. Pangita og mga paagi sa pagdasig kaniya sa pagbahandi sa mga pulong sa Ginoo ug mosalig Kaniya.

Opsiyonal: Gustong Makahibalo pa og Dugang?

Mateo 24:24. Unsa ang pipila ka sanglitanan sa mga pagkasayop ug mga pagpanglingla sa kataposang mga adlaw?

Si Elder Gary E. Stevenson sa Korum sa Napulog Duha ka Apostoles mihulagway og pipila ka paagi sa paningkamot ni Satanas aron molingla sa kalibotan karon.

Pananglitan, iyang himoon nga dili makadaot ang mga sangp[o]tanan sa gidili nga drugas o pag-inom ug gani mosugyot nga kini makahatag og kalipay. Pasanapan niya kita og daghang negatibo nga mga elemento nga anaa sa social media, lakip sa makadaot nga mga pagtandi ug ideyalismo nga reyalidad. Agig dugang, ipabantang ta niya ngadto sa ubang makadaot nga talan-awon nga makita sa online, sama sa pornograpiya, klaro nga pag-ataki sa uban pinaagi sa cyberbullying, ug paghatag og sayop nga impormasyon aron makaingon sa pagduha-duha ug kahadlok sa atong mga kasingkasing ug mga hunahuna.

(Gary E. Stevenson, “Ayaw Paglingla Kanako,” Liahona, Nob. 2019, 95)

Lucas 21:26. Unsaon nako nga mabatokan ang pagkamahadlokon ug apan hinoon gakson ang umaabot uban sa hugot nga pagtuo?

Si Presidente Russell M. Nelson mitudlo mahitungod sa kaimportante sa pagpabiling konektado ngadto sa Langitnong Amahan ug ni Jesukristo sa mga panahon sa walay kasigurohan:

Dayag lang, ang atong labing maayong seguridad magagikan sa atong pagyukbo sa atong kaugalingon ngadto sa Langitnong Amahan ug ni Jesukristo! Ang kinabuhi nga walay Dios usa ka kinabuhi nga puno sa kahadlok. Ang kinabuhi uban sa Dios usa ka kinabuhi nga puno sa kalinaw.

(Russell M. Nelson, “Hangupon ang Umaabot uban sa Hugot nga Pagtuo,” Liahona, Nob. 2020, 75)