Pagsunod sa Ginoo ug Pag-angkon sa Atong Balaanong mga Katuyoan
Imahe
Christ standing on a seashore. He is beckoning to two men who stand near Him. The two men are holding a fishing net over a small fire. Fishing boats and fishermen are visible in the background. The painting depicts Christ calling some of His Apostles or disciples.
Sa dihang si Simon Pedro, Andres, Santiago, ug Juan milagrosong nakakuha og “daghan kaayong isda” pagkahuman sa pagdapit kanila sa Manluluwas nga “itaktak ang [ilang] mga pukot” (Lucas 5:4, 6), nakadawat sila og daklit nga panglantaw unsay ilang mabuhat uban sa tabang sa Manluluwas. Unya gipili niini nga mga mangingisda nga biyaan ang tanan aron mosunod kang Jesukristo. Kini nga leksiyon gitumong aron matabangan ka nga makabaton og tinguha sa pagsunod ni Jesukristo aron matabangan ka Niya nga mas daghan pa ang mabuhat kay sa imong mabuhat kon wala Siya.
Pag-angkon og mas dako nga katuyoan
Pagtagana og usa ka minuto aron hunahunaon ang pipila ka tawo nga nakaangkon og dagkong mga butang tungod kay gitabangan sila sa Dios sa pagsabot sa ilang katuyoan.
1.
Ngano kaha nga importante man para sa usa ka tawo nga makasabot niining pinakadako nga katuyoan?
Unsa nga mga kalainan ang imong namatikdan sa kinabuhi sa mga tawo nga nakasabot sa katuyoan sa Dios para kanila ug niadtong wala makasabot?
Kini nga leksiyon magpokus sa kon giunsa pagtabang ni Jesukristo si Simon Pedro (nailhan usab nga si Pedro) sa pagdiskobre nga aduna Siyay mas dakong katuyoan para kaniya. Samtang nagtuon ka, pangita og ebidensya sa baroganan nga kon pilion nato nga mosunod kang Jesukristo, makatabang Siya kanato sa pagsabot ug pag-angkon og mas dakong katuyoan para sa atong kinabuhi.
Gitawag ni Jesukristo si Simon Pedro aron mosunod Kaniya
Pagkahuman sa pagbuhat sa Manluluwas og pipila ka milagro sa Judea, lakip ang pag-ayo sa ugangan ni Simon Pedro (tan-awa sa Lucas 4:38–39), miadto Siya sa mga baybayon sa Lanaw sa Genesaret (laing ngalan para sa Lanaw sa Galilea). Misakay Siya sa sakayan ni Simon Pedro ug milingkod aron tudloan ang dakong pundok sa mga tawo daplin sa baybayon (tan-awa sa Lucas 5:1–3). Sa dihang nahuman na si Jesus sa pagtudlo, naghatag Siya og imbitasyon kang Simon Pedro.
Basaha ang Lucas 5:4–11. Samtang nagbasa ka, sulayi sa paghunahuna nga ikaw si Simon Pedro, usa ka hanas nga mangingisda. Lagmit nga makatabang kon masabtan ang pulong nga makakuha nga nagpasabot nga kuha o daghang isda (tan-awa sa bersikulo 4, ).
Unsa ang pipila ka detalye nga imong gibati nga importante niini nga asoy? Ngano man?
Unsa kaha sa imong tan-aw ang gihunahuna o gibati ni Pedro?
Pagtagana og panahon aron mangita og bisan unsang ebidensya niini nga asoy ni Jesukristo sa pagtabang kang Pedro nga masabtan nga ang Ginoo adunay mas dakong katuyoan para kaniya.
Unsa kaha ang nakat-onan ni Pedro mahitungod sa iyang kaugalingon gikan niini nga kasinatian kauban ang Manluluwas?
Ngano kaha nga ang Ginoo gustong mopalugway sa atong panglantaw kon kinsa kita ug unsa ang atong mabuhat?
Pagpahisama sa mga kasinatian ni Simon Pedro sa atong mga kasinatian
Mahimo kitang mas makakat-on pa gikan niini nga asoy pinaagi sa pagkompara sa kasinatian ni Simon Pedro sa mga kasinatian nga lagmit nga aduna kita. Kini nga kahanas sa pagtuon sa kasulatan mao ang gipasabot ni Nephi sa Basahon ni Mormon sa dihang miingon siya nga siya “mipahisama sa tanan nga mga kasulatan [ngadto sa iyang kaugalingon]” (1 Nephi 19:23). Ang pagpahisama sa mga kasulatan sa atong personal nga mga sitwasyon makatabang kanato nga mahimong “labaw nga madani … sa pagtuo sa Ginoo nga [atong] Manunubos” ug “alang sa atong kaayohan ug sa atong pagkat-on” (1 Nephi 19:23).Pagtagana og panahon aron ikompara ang imong kasinatian sa kang Pedro pinaagi sa pagbuhat sa mosunod:Bahina sa katunga ang usa ka pahina sa imong journal sa pagtuon aron diha sa usa ka bahin malista nimo ang mga detalye mahitungod sa kasinatian ni Pedro ug sa laing bahin matan-aw nimo ang imong kaugalingong sitwasyon. Kon gikinahanglan, tan-aw sa mga kasulatan ug sa bisan unsang magamit nga mga tool sa kasulatan (pananglitan, tan-awa sa Giya ngadto sa mga Kasulatan, “Pedro,” scriptures.ChurchofJesusChrist.org) aron matabangan ka sa pagtubag sa mosunod nga mga pangutana.
Pagpahisama sa mga Kasinatian ni Pedro sa Atong Kaugalingong Kinabuhi
Unsaon kaha paghulagway ni Pedro ang iyang kaugalingon sa wala pa niya nakaila si Jesus?
Unsaon nako paghulagway ang akong kaugalingon?
Andam si Pedro nga mosunod kang Jesukristo ug isalikway ang iyang kinabuhi nga nagtrabaho isip mangingisda (tan-awa sa Lucas 5:11). Sa imong hunahuna unsa kaha ka lahi ang kinabuhi ni Pedro kon wala pa niya gipili nga mosunod sa Manluluwas?
Unsa kaha ang ihangyo ngari kanako nga akong isalikway aron makasunod kang Jesukristo?
Unsa kaha ang epekto sa akong kinabuhi kon gipili pa nako nga dili mosunod kang Jesukristo?
Giunsa pagtuman ni Pedro ang mas dagkong mga katuyoan sa Ginoo para kaniya sa iyang kinabuhi?
Hunahunaa ang mahitungod sa mga kasulatan, ang plano sa kaluwasan, mga panalangin sa pagkapari, ug, kon angay, ang imong patriyarkal nga panalangin.
Unsay akong nahibaloan mahitungod sa mas dakong mga katuyoan sa Ginoo para kanako?
Unsay akong mga pangutana mahitungod sa akong katuyoan?
2. Sa imong journal sa pagtuon, tubagi ang tulo sa mosunod nga mga pangutana:
Sa unsang paagi nga ang pagpahisama sa mga kasulatan sa imong kaugalingon makatabang kanimo nga makakat-on mahitungod kang Jesukristo o mas motuo kang Jesukristo?
Unsa nga ebidensya ang imong nakita nga makaangkon kita og mas dakong katuyoan para sa atong kinabuhi kon pilion nato nga mosunod kang Jesukristo?
Kanus-a ka nakaobserbar og usa ka tawo nga positibong naimpluwensyahan sa pagsabot sa ilang katuyoan?
Unsa ang imong buhaton tungod sa imong gibati o nakat-onan karong adlawa?
Opsiyonal: Gustong Makahibalo pa og Dugang?
Lucas 5:8. Nganong gitawag man ni Pedro ang iyang kaugalingon nga “makasasala”?
Sa dihang unang nahimamat ni Pedro ang Manluluwas ug nakasaksi sa Iyang milagrosong gahom, giangkon ni Pedro nga siya “makasasala” nga nanginahanglan og dako sa matubsanong gahom sa Manluluwas (Lucas 5:8). Ang mga pulong ni Pedro nagpakita nga samtang nagkaduol kita sa Dios, makabantay kita sa atong pagkamakasasala ug pagkadili takos ug magtinguha sa Iyang tabang nga mahimong mas mahisama Kaniya.
(Manwal sa Estudyante sa Bag-ong Tugon [2018], ChurchofJesusChrist.org)
Unsay mabuhat sa Ginoo para kanato samtang nagsunod kita Kaniya?
Si Presidente Ezra Taft Benson (1899–1994) mitudlo:
Imahe
Photograph of President Ezra Taft Benson. He is seated in a leather chair in front of a fireplace. His hands are clasped in front of him and he is wearing a large turquoise ring on one finger. Official portrait. 1986
[Kadtong] mitugyan sa ilang kinabuhi ngadto sa Dios makakaplag nga Siya makahimo og mas daghan pa sa ilang kinabuhi kay sa ilang mahimo. Iyang paladman ang ilang mga kalipay, lugwayan ang ilang panan-awon, pasabton og dali ang ilang mga hunahuna, palig-onon ang ilang mga kaugatan, bayawon ang ilang mga espiritu, pilo-piloon ang ilang mga panalangin, dugangan ang ilang mga kahigayonan, hupayon ang ilang mga kalag, hatagan og mga higala ug, bu-buan og kalinaw. Si bisan kinsa nga mawad-an sa iyang kinabuhi ngadto sa pagserbisyo sa Dios mahimong makakaplag og kinabuhing dayon.