Doktrinal nga Kahanas: Juan 3:5

Matawo pinaagi sa Tubig ug sa Espiritu aron Makasulod sa Gingharian sa Dios

Sa miaging leksiyon, gitun-an nimo ang mga pulong sa Manluluwas ngadto kang Nicodemo mahitungod sa espirituhanong pagpakatawo pag-usab pinaagi sa mga ordinansa sa bunyag ug pagpakompirma. Niini nga leksiyon mapraktis nimo ang paggamit sa mga baroganan sa pag-angkon og espirituhanong kahibalo gamit ang doktrina nga kinahanglan kitang matawo pag-usab pinaagi sa tubig ug sa Espiritu aron makasulod sa gingharian sa Dios.

Isag-ulo ug ipasabot

Hunahunaa nga gihangyo ka nga tudloan ang usa ka klase sa Primary mahitungod niini nga kamatuoran nga gitudlo diha sa Juan 3:5: kinahanglan kitang matawo pag-usab pinaagi sa tubig ug sa Espiritu aron makasulod sa gingharian sa Dios.

Ang mosunod nga pagpraktis makatabang kanimo sa paghinumdom sa tudling sa doktrinal nga kahanas ug pagmemorya sa mahinungdanong hugpong sa mga pulong sa kasulatan niini. Mahimo nimong kompletohon ang susamang kalihokan sa Doctrinal Mastery nga app kon ikaw adunay access niini. Gamit ang lapis, isulat diha sa imong journal sa pagtuon, “ Juan 3:5: Walay makasulod sa Gingharian sa Dios gawas kon matawo siya pinaagi sa tubig ug sa Espiritu.” Balika og kusog ang hugpong sa mga pulong o diha sa imong hunahuna sulod sa pipila ka higayon. Pagpili og tulo o upat ka pulong ug papasa ang tanan gawas sa unang letra sa kada usa niini nga mga pulong. Balika pag-usab ang hugpong sa mga pulong sa pipila ka higayon. Sublia kini nga pagbansay hangtod ang unang mga letra sa matag pulong nalang ang magpabilin, sama sa gipakita dinhi: “J____ 3:_ W____ m________ s_ G_________ s_ D___ g____ k__ m_____ s___ p______ s_ t____ u_ s_ E_______.” Sublia ang hugpong sa mga pulong sa pipila ka higayon gamit ang una nga mga letra, ug dayon sulayi ang pag-recite niini nga dili motan-aw.

Pagbansay sa paggamit

Hunahunaa nga ikaw adunay higala nga ginganlan og Meghan nga usa ka miyembro sa Simbahan, pero ang iyang inahan dili. Mituo ang iyang inahan kang Jesukristo ug sa Biblia pero dili siya sakop sa bisan unsang partikular nga simbahan. Gipangutana ka ni Meghan, “Dili ba makaadto sa langit ang akong inahan nga wala mabunyagi kon nagbinuotan siya sa kinabuhi?”

Unsa man ang pipila ka rason nga nangutana man si Meghan niini?
Nganong importante man nga masabtan ang iyang mga rason sa pagpangutana niini sa dili pa mosulay sa pagtabang kaniya sa pagpangita og mga tubag?

Aron tabangan si Meghan sa pagpangita og tubag sa iyang pangutana mahitungod sa importansiya sa bunyag, mahimo nimong gamiton ang mga baroganan sa pag-angkon og espirituhanong kahibalo.

Lihok inubanan sa hugot nga pagtuo

Basaha ang mga parapo 5–7 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2022). Ikonsiderar ang paglinya sa mga pulong o hugpong sa mga pulong nga makatabang nga magamit niini nga sitwasyon.

Unsa nga mga pulong o hugpong sa mga pulong ang imong gilinyahan? Sa unsang paagi nga magamit nimo kini niini nga sitwasyon?

Susiha ang mga konsepto ug mga pangutana nga adunay mahangtorong panglantaw

Basaha ang mga parapo 8–10 sa parehong seksiyon sa Mahinungdanon nga Dokumento sa Doktrinal nga Kahanas. Ikonsiderar ang paglinya sa mga pulong o hugpong sa mga pulong nga makatabang nga magamit niini nga sitwasyon.

Unsa nga mga pulong o hugpong sa mga pulong ang imong gilinyahan? Sa unsang paagi nga magamit nimo kini niini nga sitwasyon?

Pagtinguha pa og dugang nga panabot pinaagi sa balaanong gitudlo nga mga tinubdan

Basaha ang mga parapo 11–12 sa parehong seksiyon sa Mahinungdanon nga Dokumento sa Doktrinal nga Kahanas. Ikonsiderar ang paglinya sa mga pulong o hugpong sa mga pulong nga makatabang nga magamit niini nga sitwasyon.

Unsa nga mga pulong o hugpong sa mga pulong ang imong gilinyahan? Sa unsang paagi nga magamit nimo kini niini nga sitwasyon?