Marcos 5:24-34; Mateo 9:20–22

Pagdawat sa Gahom ni Jesukristo

Giayo ni Jesus ang usa ka babaye nga adunay problema sa dugo diha sa Iyang pagpadulong sa anak nga babaye ni Jairo aron ayohon siya. Ang katuyoan niini nga leksiyon mao ang pagtabang kanimo nga masabtan kon unsaon pagdawat ang gahom sa Manluluwas sa imong kinabuhi pinaagi sa pagbaton og pagtuo diha Kaniya.

Espirituhanong paningkamot

Pagtagana og usa ka minuto aron motindog ug mobuhat og ehersisyo sa pag-inat. Kung mahuman na ka, tubaga kining mga pangutana diha sa imong huna-huna:

• Aduna ka bay gibati nga bisan unsang kalainan sa imong lawas?

• Sa unsang paagi kaha makahatag og benepisyo kanimo ang regular nga pisikal nga pag-inat?

Adunay lain-laing mga benepisyo sa pag-inat. Kung mag-inat ang mga atleta, mas maayo silang molihok ug lagmit dili makasinati og kadaot. Sa samang paagi, kon maningkamot ang mga estudyante sa ilang mga hunahuna ug buhaton ang labaw pa sa ilang mga regular nga naandan sa pagtuon, madugangan ang ilang makat-onan.

• Para kanimo unsa man ang kahulogan sa espirituhanong paningkamot?

Pareho sa mga benepisyo sa pisikal nga pag-inat, madugangan ang atong pagka-espirituhanon kon magbaton kita og pagtuo sa Manluluwas ug madawat ang Iyang gahom. Sa leksiyon karon, makakat-on ka mahitungod sa usa ka babaye nga adunay labihan nga pagtuo kang Jesukristo ug giduol ang iyang kamot ngadto sa Manluluwas ug gidawat ang Iyang gahom aron mamaayo.Samtang nagpadulong aron ayohon ang anak nga babaye sa lalaki nga gihinganlan og Jairo, gisundan si Jesukristo sa usa ka panon sa katawhan (tan-awa sa Marcos 5:22–24). Taliwala sa panon sa katawhan mao ang usa ka masakitong babaye.

Basaha ang Marcos 5:25–26, ug pangitaa ang kondisyon sa babaye ug ang iyang mga panginahanglan.

Wala gituki sa mga kasulatan ang kahimtang sa babaye nga “nag-antos tungod sa pagsigig dugo” (Marcos 5:25). Nakahibalo kita nga nakabalda kini sa iyang kinabuhi sa daghang mga paagi. “Tanan niyang katigayonan nahurot na niyag gasto” sa pagpangita og tambal gikan sa mga doktor (Marcos 5:26). Sa ilawom sa balaod ni Moises, ang tawo nga adunay problema sa dugo gikonsiderar nga hugaw sa ritwal nga paagi (tan-awa sa Levitico 15:19–33). Kini lagmit nga nagpasabot nga gisalikway ang babaye sa katilingban sa pipila ka paagi sa panahon sa 12 ka tuig sa iyang sakit.

• Unsa ang imong gibati nga nanginahanglan ka og tabang sa Manluluwas sa imong kinabuhi?

Basaha ang Macos 5:27–29, ug pangitaa kung unsay gibuhat niining babaye aron makadawat og tabang sa Manluluwas (tan-awa usab ang Mateo 9:20–22). Ang hugpong sa pulong nga “miduol siya sa iyang luyo” nagpasabot sa iyang pagpaningkamot nga makasuot ngadto sa panon sa katawhan aron siya makahikap sa sinina ni Jesus (Marcos 5:27).

Jesus Heals a Woman of Faith

Jesus heals a woman's illness when she, in faith, touches His clothing.

• Unsa ang nakadani kanimo mahitungod sa gibuhat niini nga babaye aron madawat ang gahom sa Manluluwas?

• Niini nga asoy, aktuwal nga giinat sa babaye ang iyang bukton aron hikapon ang Manluluwas. Unsa ang pipila ka paagi nga “maningkamot” ka sa imong kaugalingon ug modangop sa Manluluwas?

• Nagtuo ka ba nga maayo ka sa Manluluwas, bisan pa kon dili ka pisikal nga makahikap Niya? Ngano man?

Basaha ang Marcos 5:30–34, pangitaa ang tubag sa Manluluwas ngadto sa buhat sa hugot nga pagtuo niini nga babaye. Ang pulong nga hiyas sa bersikulo 30 nagpasabot nga “gah[o]m” o “kusog” (Marcos 5:30, footnote a).

• Unsay imong namatikdan mahitungod sa Manluluwas niini nga mga bersikulo?

Bisan pa sa diha-diha nga panginahanglan ni Jairo nga madala si Jesus sa iyang balay aron ayohon ang iyang anak nga babaye, mihunong si Jesus ug gitabangan kini nga babaye.

• Unsa ang gitudlo niini kanimo mahitungod sa Manluluwas?

• Sa unsa nga mga paagi nga nakaimpluwensya kini sa imong kagustuhan nga moduol Kaniya aron mangayo og tabang sa imong mga panginahanglan?

Gigamit ni Presidente Russell M. Nelson kini nga asoy sa atong mga kaugalingong kinabuhi. Mahimo nimong tan-awon ang video nga “Pagdawat sa Gah[o]m ni Jesukristo diha sa Atong Kinabuhi,” gikan sa code sa oras nga 11:30 hangtod sa 13:20, o basaha ang teksto sa ubos. Samtang gibuhat nimo kini, pangitaa ang mga baroganan nga gitudlo ni Presidente Nelson mahitungod sa pagdawat sa gahom sa Manluluwas.

Pagdawat sa Gahum ni Jesukristo diha sa Atong Kinabuhi

Si Elder Nelson nagtudlo nga madawat nato ang gahum ni Jesukristo sa atong kinabuhi samtang magkat-on kita Kaniya, magbaton og pagtuo Kaniya, modangup Kaniya, ug motuman sa atong mga pakigsaad.

Nakahinumdom ba mo sa istorya sa babaye diha sa biblia kinsa nag-antos sulod sa 12 ka tuig sa usa ka makaluya nga problema? [tan-awa ang Lucas 8:43–44]. Mipakita siya og dakong pagtuo sa Manluluwas, nga nag-ingon, “Bisan og mahikapan ko lamang ang iyang bisti, mamaayo gayod ako” [Marcos 5:28].

Kining matinud-anon, nakatutok nga babaye kinahanglang maningkamot og maayo aron [makapahimulos] sa Iyang gah[o]m. Ang iyang pisikal nga paningkamot nagsimbolo sa iyang espirituhanong paningkamot. …

Kon mokab-ot kamo alang sa gah[o]m sa Ginoo diha sa inyong kinabuhi uban sa samang paningkamot sa tawo nga hapit na malumos nga naningkamot nga makaginhawa, ang gah[o]m gikan ni Jesukristo inyong maangkon. Kon ang Manluluwas masay[o]d nga gusto gayod ninyong modang[o]p Kaniya—kon Iyang mabati nga ang inyong labing dakong tinguha mao ang pagdawat sa Iyang gahom nganha sa inyong kinabuhi—magiyahan kamo sa Espiritu Santo aron masayod kon unsa gayod ang kinahanglan ninyong buhaton [tan-awa sa Doktrina ug Mga Pakigsaad 88:63].

Kon maningkamot kamo sa espirituhanong paagi nga labaw pa sa inyong nabuhat sukad, nan ang Iyang gah[o]m modagayday nganha kaninyo.

(Russell M. Nelson, “Pagdawat sa Gah[o]m ni Jesukristo diha sa Atong Mga Kinabuhi,” Liahona, Mayo 2017, 41–42)

• Unsa ang pipila ka baroganan nga nailhan nimo gikan sa pamahayag ni Presidente Nelson?

• Sa imong huna-huna, sa unsa nga mga paagi makatabang kanimo kini nga mga baroganan sa espirituhanong paningkamot nga madawat ang gahom sa Manluluwas?

• Kanus-a nimo nasinati ang usa niini nga mga baroganan sa imong kaugalingong kinabuhi?

1. Pamalandongi ang imong personal nga mga panginahanglan, ug tubagi og dili mominos sa tulo sa mosunod nga mga pangutana diha sa imong journal sa pagtuon.

• Unsa ang imong mabuhat aron ipakita nga ang pagdawat sa tabang sa Manluluwas mao ang imong pinakadakong tinguha?

• Unsa kaha ang kalainan sa imong kinabuhi kon mas sagunson nimong madawat ang gahom ni Jesukristo?

• Unsa nga mga babag ang lagmit nga kinahanglan nimong mabuntog samtang magtinguha ka nga modangop sa Manluluwas nga adunay hugot nga pagtuo?

• Unsa ang imong mabuhat aron mailhan ang panudlo gikan sa Espiritu Santo aron modangop sa Manluluwas?

Opsiyonal: Gustong Makahibalo og Dugang?

Mateo 9:20. Unsa ang kahulogan sa babaye nga mihikap sa sidsid sa sinina sa Manluluwas?

“Ang sidsid sa iyang sinina” nagtuki sa “importanteng bahin sa sinina sa Israelihanon.” Ang sidsid mao ang “borlas sa kada ‘pako’ o suok sa tallith o kupo (Mateo 14:36)” (Diksyunaryo sa Biblia, “Sidsid sa sinina”). Ang mga borlas gitahi gamit ang asul nga tanod, nga nagsimbolo sa langit (tan-awa sa Numeros 15:38–40). Ang borlas nga nagbitay sa abaga sa likod mao ang gihikap sa babaye. Ang iyang paningkamot nga mahikap ang borlas nagrepresenta og pagdangop sa langitnong gahom sa Manluluwas. Gitag-an ni propeta Malachi nga ang Manluluwas “mag-ayo sa mga balatian” (Malachi 4:2).

Unsaon nako pagdawat ang pag-ayo sa Manluluwas?

Si Presidente Jean B. Bingham, Kinatibuk-ang Presidente sa Relief Society, nag-ingon:

Nga ang Imong Hingpit nga Kalipay Mapuno

Nagtudlo si Sister Bingham nga, bisan sa mga kalisud sa mortal nga kinabuhi, makaduol kita ni Jesukristo isip ang tinubdan sa tanang pagpang-ayo, kalinaw, ug mahangturong pag-uswag.

Samtang kamo magtuon sa kinabuhi ug mga pagtulon-an ni Kristo sa dili maihap nga mga paagi, ang inyong hugot nga pagtuo diha Kaniya motubo. Inyong mahibaloan nga Siya nahigugma kaninyo sa tagsa-tagsa ug hingpit nga nakasabot kaninyo. …

Dili igsapayan unsa ang atong giantos, Siya mao ang tinubdan sa pagpang-ayo. Kadtong kinsa nakasinati sa bisan unsang pang-abuso, makaguol nga pagkawala, naglaygay nga sakit o makaluya nga kasakit, bakak nga mga pasangil, madumtanong pagpanggukod, o espirituhanong kadaot tungod sa sala o mga walay pagsinabtanay mamaayo sa Manunubos sa kalib[o]tan. Hinoon Siya dili moduol kon walay pagdapit. Kita kinahanglan gayod nga moduol ngadto Kaniya ug motugot Kaniya sa pagbuhat sa Iyang mga milagro.

(Jean B. Bingham, “Nga ang Imong Hingpit nga Kalipay Mapuno,” Liahona, Nob. 2017, 86)

Si Sister Reyna I. Aburto, Ikaduhang Magtatambag sa Kinatibuk-ang Kapangulohan sa Relief Society, nagtudlo:

Sa Dag-um ug Kahayag, Ginoo, Ubani Ako!

Si Sister Aburto mipamatuod nga ang Manluluwas makatabang sa tanan nga anak sa Dios nga makalahutay sa mental ug pisikal nga mga kasakit.

Atol sa Iyang mortal nga pangalagad, gipang-ayo ni Jesukristo ang mga masakiton ug ang may mga balatian, apan ang matag tawo kinahanglan nga mopakita og hugot nga pagtuo Kaniya ug molihok aron makadawat sa Iyang pag-alim. Ang pipila naglakaw og layo nga mga distansya, ang uban mikawhat sa ilang mga kamot aron makahikap sa Iyang bisti, ug ang uban kinahanglan yayungan ngadto Kaniya aron mamaayo. Kon kabahin sa pagkaalim, dili ba nanginahanglan kitang tanan Kaniya?

(Reyna I. Aburto, “Sa Dag-um ug Kahayag, Ginoo, Ubani Ako!,” Liahona, Nob. 2019, 58)