Jesus Christ’s triumphal entry into Jerusalem. altered version
Ang Manluluwas mihimo sa Iyang madaugong pagsulod ngadto sa Jerusalem, diin ang katawhan midayeg ug misimba Kaniya uban sa mga singgit sa “Hosanna” (tan-awa sa Mateo 21:9). Si Jesus mitudlo sa katawhan mahitungod sa Iyang misyon sa pagluwas kanila. Kini nga leksiyon naglakip og kinatibuk-ang pagpasabot bahin sa kataposang semana ni Jesukristo dinhi sa mortalidad, nga makatabang nimo nga mobati og mas dako nga respeto ug balaang pagtahod kang Jesukristo ug sa Iyang tahas sa pagluwas kanato.
Usa ka panginahanglan alang sa pagluwas
Paghunahuna og panahon dihang naa ka sa lisod nga sitwasyon ug nanginahanglan ug tabang sa uban o moluwas kanimo.
Nganong gikinahanglan man nimo ang tabang o pagluwas?
Unsa kaha ang nahitabo kon wala ka makadawat og tabang?
Sa unsang paagi ang kasinatian nakaimpluwensya sa imong pagbati ngadto sa tawo nga mitabang o miluwas kanimo?
Kitang tanan nagkinahanglan sa makaluwas nga gahom ni Jesukristo. Kitang tanan masayop nga dili nato masulbad, makasinati og mga kapildihan nga dili na nato mabawi, ug magsagobang og mga kasakit, pagpanglutos, mga trahedya, mga palas-anon, ug mga kasagmuyo nga dili nato masagobang nga mag-inusara.Pamalandongi ang imong pagpanginahanglan kang Jesukristo. Sa imong journal sa pagtuon, isulat kon unsa nga tabang gikan sa makaluwas nga gahom ni Jesukristo ang imong gikinahanglan.
Dinhi niini nga leksiyon, tinguhaa ang inspirasyon sa Espiritu Santo aron makakat-on pa og dugang mahitungod sa kon nganong ang Manluluwas nga si Jesukristo makaluwas kanato gikan sa tanan natong mga kasaypanan, kapildihan, mga kasakit, ug sa mga sitwasyon nga dili nato masulbad.
Ang madaugong pagsulod ni Jesukristo
Sa wala pa mosulod sa Jerusalem sa kataposang higayon, mihangyo si Jesus sa Iyang mga disipulo sa pagdala ngadto Kaniya og nati nga asno, giila usab nga asno. Gihapinan sa mga disipulo ang asno ug ang nati gamit ang ilang mga sapot, ug gipahimutang ang Manluluwas ngadto sa nating asno (tan-awa sa Mateo 21:1–7; Juan 12:14–15).
Basaha ang Mateo 21:8–11 ug Juan 12:12–13, nga mangita kon giunsa sa pagsanong sa katawhan si Jesukristo samtang misulod Siya sa Jerusalem. Sa imong pagbasa, ihanduraw ang imong kaugalingon nga tua ka didto.
Daghang katawhan ang mitanyag og mga singgit nga “Hosanna,” nga usa ka Hebrohanong pulong “nga nagpasab[o[t og ‘palih[o]g, luwasa kami’ ug gigamit sa pagdayeg ug pagpangaliyupo” (Giya ngadto sa mga Kasulatan, “Hosanna,” scriptures. ChurchofJesusChrist.org).
Si Elder Bruce R. McConkie (1915–85) sa Korum sa Napulog Duha ka Apostoles mipasabot sa kahulogan sa reaksiyon sa katawhan sa pagsulod sa Manluluwas ngadto sa Jerusalem:
Imahe
Head and shoulders portrait of Elder Bruce R. McConkie.
Mga Hari ug mga mananaog lamang ang makadawat og ingon ka dili kasarangan nga timaan sa pagtahod nga sama niini. … Taliwala sa mga singgit sa pagdayeg ug mga pangamuyo alang sa kaluwasan ug kagawasan, atong nakita nga ang mga disipulo mihapnig og mga palwa sa palmera sa agianan sa atong Ginoo isip timaan sa kada[o]gan ug kalamp[o]san. Kining kinatibuk-ang mahinuklugon nga eksena makapalantaw sa umaab[o]t nga panagtigom kon ang “dakong panon sa katawhan,” … nanagtindog “atubangan sa trono ug sa atubangan sa kordero nga nanagsul-ob ug maputi ug tag-as nga mga bisti, ug nanagdalag mga palwa sa palmera,” nga magsinggit sa makusog nga tingog, “Ang kaluwasan gikan sa atong Dios nga nagalingkod sa trono, ug usab sa Kordero.” (Pin. 7:9–10.)
(Doktrinal nga Komentaryo sa Bag-ong Tugon [1965], 1:578)
1. Tubaga ang mosunod nga mga pangutana diha sa imong journal sa pagtuon:
Unsa kaha ang imong ikasulti, mabuhat, ug bation kon didto ka panahon sa madaugong pagsulod sa Manluluwas didto sa Jerusalem? Ngano man?
Kanus-a ka mibati nga ingon og nagsinggit og “Hosanna” (sa paghalad og matinuoron nga pagdayeg ug pagpasalamat) kang Jesukristo?
Ngano man kaha nga mosinggit ka man og “Hosanna” alang sa Manluluwas karon? Alang sa umaabot?
Sa dihang si Jesus misakay sa nating asno ngadto sa Jerusalem, daghang tawo ang miila niini isip publikong pagpamahayag nga Siya dili lamang ang gisaad nga Mesiyas apan ang gisaad usab nga Hari sa Israel. Daghan ang nakakita niini isip katumanan sa mga propesiya sa kasulatan sama sa narekord sa Zacarias 9:9.
Daghan ang nagtuo nga ang Mesiyas usa ka bantogang lider sa militar nga maoy moluwas kanila gikan sa Romanhong pangdaogdaog. Nasayop sila sa pagsabot sa makaluwas nga misyon sa Manluluwas.
Gipadala sa Langitnong Amahan si Jesukristo aron sa pagluwas kanato gikan sa unsa?
Ang tumong ug misyon sa Manluluwas
Human sa madaugong pagsulod sa Manluluwas, “pipila ka mga Grego” kinsa miadto sa Jerusalem aron maniid sa Kasaulogan sa Pagsaylo mihangyo nga mobisita Kaniya (tan-awa sa Juan 12:20–21). Sa dihang si Jesus nahibalo sa ilang hangyo, Siya mitudlo mahitungod sa Iyang nagsingabot nga pag-antos, kamatayon, ug Pagkabanhaw. Iyang gipasabot nga kining mga kataposang hitabo sa Jerusalem, lakip na Iyang nagsingabot nga Pagkalansang sa Krus, mao ang kinatibuk-ang tumong sa Iyang pag-anhi sa yuta (tan-awa sa Juan 12:23–33).
Basaha ang Juan 12:27–28, 32–33, ug pangitaa unsa ang giingon ni Jesus nga maoy Iyang tumong ug tahas. (Timan-i nga ang tingog nga namulong gikan sa langit mao ang tingog sa Langitnong Amahan nga nagpahayag sa Iyang pagsalig nga si Jesukristo mohuman sa Iyang Pag-ula.)
Unsa ang gitudlo ni Jesus mahitungod sa Iyang tumong ug tahas?
Sa unsang paagi ang pagsalig sa Langitnong Amahan diha ni Jesukristo makapalambo sa imong pagsalig sa abilidad ug kaandam sa Manluluwas sa pagluwas kanimo?
Usa ka paagi sa pagsumarize sa gitudlo sa Manluluwas diha sa Juan 12:27–28, 32–33 mao nga gituman ni Jesukristo ang Iyang Pag-ula aron kitang tanan Iyang madala ngadto Kaniya.
Ang Manluluwas nagpamatuod niining sama nga kamatuoran sa 3Nephi 27:13–15. Basaha kini nga tudling, nga mangita kon unsay ikadugang niini nga mga bersikulo diha sa imong panabot bahin niini nga kamatuoran. Basin ganahan ka nga mo-cross reference o mo-link niini nga tudling ngadto sa Juan 12:32.
Usa ka kinatibuk-ang pagpasabot sa mga hitabo sa kataposang semana sa Manluluwas
Daghang hitabo sa kataposang semana sa mortal nga kinabuhi sa Manluluwas nga mahinungdanon sa Iyang misyon ug tumong sa pagluwas kanato pinaagi sa pagdala kanato ngadto Kaniya.
Ang mosunod nga tsart [infographic] mahimong makatabang nimo nga mas makasabot sa maong mga hitabo.
Imahe
New Testament Seminary Teacher Manaul - 2023
Tan-awa ang tsart. Basaha ang pipila sa mga tudling sa kasulatan aron mapamilyar sa mga hitabo nga gihulagway. Hunahunaa kon sa unsang paagi nakatampo ang mga hitabo sa makaluwas nga misyon ni Jesukristo, ug pamalandongi kon sa unsang paagi Siya makatabang ug makaluwas kanimo tungod sa unsay Iyang gitudlo ug gibuhat atol niini nga semana.
Diha sa imong journal sa pagtuon, isulat ang anaa kanimong mga pangutana mahitungod niining mga hitabo ug ilista kon asa niini nga mga hitabo nga ikaw gusto nga makakat-on pa og dugang ug kon ngano.
2. Tubaga ang mosunod nga mga pangutana diha sa imong journal sa pagtuon:
Unsay anaa nimong mga pangutana mahitungod niini nga mga bersikulo?
Asa niini ang gusto nimong makat-onan pa og dugang? Ngano man?
Sa imong hunahuna ngano kaha nga ang pagkat-on og dugang mahitungod niini nga mga hitabo makatabang aron mas masabtan nimo ang abilidad ug tinguha ni Jesukristo sa pagluwas kanato?
Opsiyonal: Gustong Makakat-on pa og Dugang?
Unsa ang kahulogan sa madaugong pagsulod alang sa mga Judeo, ug unsa ang kahulogan niini alang kanato?
Ang madaugong pagsulod sa Manluluwas ngadto sa Jerusalem, panahon sa Kasaulogan sa Pagsaylo [Feast of the Passover], direktang nakatuman sa panagna nga narekord sa Zacarias 9:9–10 ug mideklarar sa publiko nga si Jesus mao ang Mesiyas. Sa karaang panahon, ang asno o kabayo, usa ka simbolo sa Judeo nga kahalangdon. Sa panahon sa monarkiya sa karaang Israel, human mapahimutang sa trono si Haring Saulo, ang mga Judeo naghimo og tinuig nga mga ritwal sa pagpahimutang og hari nga naghulagway sa usa ka hari nga nagsakay sa usa ka asno padulong sa Jerusalem. Ang magsakay moadto sa Jerusalem gikan sa sidlakan sa dakbayan ug moadto sa templo. Kini nga mga ritwal naghulagway sa panahon nga ang Mesiyas moadto sa Iyang katawhan sa samang paagi. Sa ingon, sa panahon dihang ang Jerusalem gidagsaan sa mga Judeo, nga nagsaulog sa Pagsaylo [Passover], si Jesus misulod sa Jerusalem sa paagi nga nagpakita nga Siya mao ang Mesiyas, ang Hari sa Israel. Ang pagsakay og usa ka asno nagpakita usab nga si Jesus miabot isip malinawon ug “mapaubsanon” nga Manluluwas, dili sama sa usa ka tigbuntog nga nagsakay og kabayong iggugubat (tan-awa sa Zacarias 9:9–10).
Sa Ikaduhang Pag-anhi, si Jesus mobalik sa yuta sa dakong gahom ug himaya. Isip simbolo sa Iyang himaya, Siya moanhi sakay sa usa ka “puti nga kabayo,” kay sa asno nga Iyang gisakyan padulong sa Jerusalem (tan-awa sa Gipadayag 19:11–16j). Siya moanhi usab aron maghari ingon nga “Hari sa mga hari, ug Ginoo sa mga ginoo” (Gipadayag 17:14; tan-awa usab sa Gipadayag 19:16).
Unsa ang atong makat-onan bahin sa paggamit og mga lukay diha sa madaugong pagsulod?
Si Elder Gerrit W. Gong sa Korum sa Napulog Duha ka Apostoles:
Imahe
Official Portrait of Gerrit W. Gong. Photographed in 2018.
Sa naandan, ang mga lukay mao ang sagradong simbolo sa pagpahayag og kalipay diha sa atong Ginoo, sama sa Madaugon nga Pagsulod ni Kristo ngadto sa Jerusalem, diin “panon sa mga tawo … nanguha silag mga palwa sa palmera, nanggula aron sa aron sa pagsugat kaniya.” [Juan 12:12–13; tan-awa usab sa Mateo 21:8–9; Marcos 11:8–10]. … Sa basahon sa Gipadayag, kadtong nagadayeg sa Dios ug sa Kordero “nagbisti silag puti ug nagbitbit ug mga palwa”.[Pinadayag 7:9]. Sinul-oban sa “mga kupo sa pagkamatar[o]ng” ug “mga korona sa himaya,” ang mga lukay gilakip sa pagpahinungod nga pag-ampo sa Templo sa Kirtland.[tan-awa sa Doktrina ug mga Pakigsaad 109:76]. …
(Gerrit W. Gong, “Hosanna ug Aleyuya—Ang Buhi Nga si Jesukristo: Ang Pinakaimportanting Bahin sa Pagpahiuli ug sa Pasko sa Pagkabanhaw,” Liahona, Mayo 2020, 53)