Mateo 21:12–16
Gihinloan ni Jesus ang Templo
Samtang didto sa Jerusalem panahon sa kataposang semana sa Iyang kinabuhi, gihinloan ni Jesus ang templo sa ikaduhang higayon ug giayo kadtong mga miduol Kaniya. Kini nga leksiyon makatabang ninyo nga mobati og dugang nga tinguha sa pagtagad sa templo isip balaan nga dapit diin mabatyagan ninyo ang gugma sa Manluluwas ug malig-on ang inyong hugot nga pagtuo Kaniya.
Gihinloan ni Jesus ang templo
Unsang mga pagbati ang anaa kaninyo diha sa inyong pagtan-aw sa mga hulagway sa lainlaing mga luna sa templo? Mahimo ninyong irekord ang inyong mga impresyon diha sa inyong journal sa pagtuon.
Miadto si Jesus sa Jerusalem aron sa pagsaulog sa Pagsaylo ug pagbisita sa templo. Ang mga tigsimba nga nangadto sa Jerusalem kinahanglan nga magpailis sa ilang salapi ngadto sa kwarta nga magamit sa templo aron ipalit og mga hayop nga ighahalad nga buhaton alang kanila pinaagi sa mga pari. Bisan tuod og kini nga negosyo gikinahanglan ug naghatag og maayong katuyoan, ang pagbuhat niini diha sa templo usa ka walay pagrespeto ug walay balaang pagtahod. Si Jesus misanong sa unsay Iyang naobserbahan didto sa templo sa duha ka nagkalahi nga okasyon: kausa duol sa sinugdanan sa Iyang pagpangalagad (tan-awa sa Juan 2:13–16) ug kausa panahon sa kataposang semana sa Iyang kinabuhi (tan-awa sa Mateo 21:12–13).
Basaha ang usa o ang duha sa mosunod nga mga tudling sa kasulatan, nga mangita kon giunsa sa Manluluwas sa pagsanong ang unsay Iyang nakita sa templo.
Jesus Cleanses the Temple
Jesus clears worldly merchandise from the temple courts in order to keep the temple a holy place.
-
Unsa ang inyong nakat-onan gikan sa pagbasa niining duha ka asoy mahitungod sa unsay gibati sa Manluluwas mahitungod sa templo?
-
Ngano kaha nga ang Manluluwas misanong man og sama niadto nga Iyang gihimo bahin sa unsay nanghitabo didto sa templo?
-
Unsa nga mga kamatuoran ang inyong nakat-onan gikan sa mga pulong sa Manluluwas ug mga gipangbuhat didto sa templo?
Si Presidente Russell M. Nelson mitudlo mahitungod sa sagrado nga matang sa balay sa Ginoo:
Ang templo mao ang balay sa Ginoo. Ang basehan sa matag ordinansa ug pakigsaad sa templo—ang sentro sa plano sa kaluwasan—mao ang Pag-ula ni Jesukristo. Matag kalihokan, matag leksiyon, tanan nga atong gibuhat sa Simbahan, nagpunting sa Ginoo ug sa Iyang balaang balay. …
… Ang atong Manluluwas nagkinahanglan nga ang Iyang mga templo mapanalipdan gikan sa pagpasipala. Walay mahugaw nga butang ang mahimong mosulod sa Iyang gibalaan nga balay. Apan ang tanan nga nangandam og maayo pasudlon.
(Russell M. Nelson, “Personal Preparation for Temple Blessings,” Ensign, Mayo 2001, 32–33)
-
Sa unsang paagi ang pamahayag ni Presidente Nelson nagtabang nato nga mas makasabot sa kinaiya sa Manluluwas bahin sa templo?
-
Ngano kaha nga ang Ginoo nagkinahanglan nga kita takos nga mosulod sa templo?
Hunahunaa ang mosunod nga pamahayag ni Elder David A. Bednar sa Korum sa Napulog Duha ka Apostoles, ug pamalandongi unsa ang ipabuhat kaninyo sa Ginoo.
Bililhon ug Dagko Uyamot nga mga Saad
Si Elder Bednar nagtudlo mahitungod sa pagtutok ngadto sa mga saad sa ebanghelyo ug sa unsang paagi nga ang adlaw nga Igpapahulay, ang templo, ug ang atong mga panimalay makatabang kanato sa paghinumdom niini nga mga saad.
Ang mga templo mao ang pinakabalaan sa tanang dapit sa pagsimba. Ang templo literal nga balay sa Ginoo, usa ka sagrado nga luna nga piho nga gilahi alang sa pagsimba sa Dios ug sa pagdawat ug paghinumdom sa Iyang dagko ug bililhong mga saad.
… Ang labing mahinungdanong tumong sa pagsimba sa templo mao ang pag-apil sa mga ordinansa ug pagkat-on, pagdawat, ug paghinumdom sa mga pakigsaad. Lahi ang atong panghunahuna, linih[o]kan, ug sininaan diha sa templo kay sa ubang dapit nga kanunay natong adtoan.
Usa ka mahinungdanong katuyoan sa templo mao ang pag-isa sa atong panan-aw gikan sa mga butang sa kalib[o]tan ngadto sa mga panalangin sa kahangt[o]ran.
(David A. Bednar, “Bililhon ug Dako Uyamot nga mga Saad,” Liahona, Nob. 2017, 92)
-
Unsa ang inyong gibati nga gusto sa Ginoo nga inyong mahibaloan, bation o buhaton tungod sa unsay inyong nakat-onan niini nga leksiyon mahitungod sa sagrado nga matang sa templo?
Giayo ni Jesus ang buta ug ang bakol
Basaha ang Mateo 21:14, nga mangita sa unsay gibuhat sa Manluluwas diha sa templo human kini hinloi sa ikaduhang higayon. Ang mga pulong nga “ang bakol” nagpasabot og mga indibidwal nga nabakol o adunay pipila ka matang sa pagkabaldado.
Hibaloi kon giunsa sa Manluluwas sa pag-ayo sa pisikal nga paagi ang pipila sa Iyang mga matinud-anong mga sumusunod sa duol sa templo.
-
Unsa pay laing mga matang sa pagpang-ayo ang atong masinati pinaagi sa atong paggamit og hugot nga pagtuo Kaniya ug sa atong pagbuhat sa buhat sa templo?
Si Elder Dale G. Renlund sa Korum sa Napulog Duha ka Apostoles mipasabot sa pagkaayo nga atong madawat kon kita moapil sa buhat sa templo ug family history.
Buhat sa Family History ug sa Templo: Pagsilyo ug Pagkaayo
Gitudlo ni Elder Renlund nga kon atong buhaton ang atong family history ug buhat sa templo alang sa atong mga katigulangan, itugyan sa Dios ang mga panalangin sa mga buhi ug patay na.
Apan, kon moapil kita karon sa buhat sa family history ug sa templo, kita sarang usab nga makaangkon sa “makaayo” nga mga panalangin nga gisaad sa mga propeta ug mga apostoles. Makatingala usab kaayo kini nga mga panalangin tungod sa gilapdon, pagkapiho, ug sa sangp[o]tanan sa mortalidad.
(Dale G. Renlund, “Buhat sa Family History ug sa Templo: Pagsilyo ug Pagkaayo,” Liahona, Mayo 2018, 47)
-
Sa unsang paagi kaha ang pagsimba sa templo makatabang kanato nga mamaayo gikan sa atong espirituhanon ug emosyonal nga mga samad?
1. Isulat sa inyong journal sa pagtuon ang mahitungod sa inyong nakat-onan karon. Lakipi ang inyong mga tubag ngadto sa labing menos duha sa mga mosunod nga mga pangutana.
-
Unsa ang mga hunahuna ug mga pagbati ang anaa ninyo human makat-on mahitungod sa Manluluwas ug sa Iyang mga templo?
-
Unsaon sa inyong nakat-onan ug sa gibati karon pag-impluwensiya kon unsaon ninyo sa pagsimba ang Manluluwas didto sa templo?
-
Unsa nga pagkaayo ang inyong gipangita gikan sa Ginoo samtang misalmot kamo sa buhat sa family history ug sa templo?
Opsiyonal: Gustong Makahibalo pa og Dugang?
Mateo 21:13. Nganong miingon man si Jesus nga ang katawhan mihimo sa templo nga “tagoanan sa mga tulisan”?
Ang hugpong sa pulong “tagoanan sa mga tulisan” nagsugyot nga ang mga tigkambyo og kwarta ug ang mga namaligya mas interesado nga makaganansiya kay sa pagsimba sa Dios ug sa pagtabang sa uban aron makasimba.
Nasuko ba si Jesus diha nga Iyang gihinloan ang templo?
Si Presidente Gordon B. Hinckley (1910–2008) mitudlo mahitungod sa paghinlo sa Manluluwas sa templo.
Slow to Anger
May the Lord bless you and inspire you to walk without anger.
Ang kasuko mahimong mapangatar[o]ngan sa ubang mga sitwasyon. Ang mga kasulatan nagsulti kanato nga si Jesus mipapahawa sa mga tigpang-ilis og kwarta gikan sa templo nga nag-ingon, “Ang akong balay pagatawagon nga balay alampoanan; apan gihimo ninyo kini nga langub sa mga tulisan” (Mateo 21:13). Apan bisan kini mas giingon nga pagbadlong kaysa usa ka pagbuto sa usa ka wala mapugngi nga kasuko.
(Gordon B. Hinckley, “Hinay nga Masuko,” Liahona, Nob. 2007, 66)