Mataio 26:1–25

“Le Alii e, O Au Ea?”

A o le i oo i le tausamaaga o le Paseka, sa uuina e Maria le Faaola i se suauu manogi taugata, ma sa taupulepule Iuta ma faitaulaga sili ma le au tusiupu e fasioti ia Iesu. I le taimi o le tausamiga o le Paseka, sa fofoga atu ai e Iesu o le a faalataina o Ia. Sa tuufesili Aposetolo po o ai o le a faalataina le Faaola i le fesili ane ai faapea, “Le Alii e, o au ea?” O lenei lesona e mafai ona fesoasoani ia te oe e faaaoga ai upu a le Faaola i tusitusiga paia e suesue ai lou olaga ma iloa ai vaega e manaomia ona e faaleleia.

Auala tatou te taulima ai mea tatou te faatauaina

Mafaufau i se tagata e taua tele ia te oe.

• Aisea e matua taua ai lenei tagata ia te oe?

• E faapefea ona faaalia e au faatinoga le taua o lenei tagata ia te oe?

I le vaega lenei o le lesona, o le a e suesue ai i le ala na faaalia ai e nisi o tagata i a latou faatinoga le tele o lo latou alolofa ma talisapaiaina le Faaola. A o e suesue, mafaufau i le taua, e oo lava i le taua naua, o le Faaola ia te oe ma mea e mafai ona e faia e faaalia ai lou alofa mo Ia.I ni nai aso a o lei faapotopotoina e Iesu Ona Aposetolo mo Lana tausamiga faaiu o le Paseka, sa alu atu o Ia i Petania e faatasi ma nisi o Ona soo (tagai Mataio 26:6; Ioane 12:1).

Faitau le Ioane 12:3–8 e iloa ai le mea na faia e Maria mo le Faaola a o i ai o Ia i Petania.

• O a mea na ta‘u mai i aga a Maria e uiga i lona alofa ma le talisapaiaina o le Faaola?

• O a ni mea e mafai ona e aoaoina e uiga i le Faaola mai lenei tala?

• O a ni ou mafaufauga po o ni lagona i le uma ai ona e tomanatu i nei upumoni e uiga i le Faaola?

I le Mataio 26:3–5, ua tatou iloa ai na taupulepule faitaulaga sili e uiga i se ala latou te fasioti ai ia Iesu. Faitau le Mataio 26:14–16, ma vaavaai mo le mea na tupu ina ua uma ona faauuina e Maria Iesu i Petania.

Atonu e lelei le iloa o le faalataina e Iuta o Iesu mo le tolusefulu tupe siliva ua faataunuuina ai se valoaga a le perofeta o le Feagaiga Tuai o Sakaria (tagai Sakaria 11:12). E le gata i lea, e tusa ai ma le tulafono a Mose, o tupe siliva e tolusefulu o le tau lea sa faaaoga e tauia ai le matai mo le maliu o se pologa (tagai Esoto 21:32).

• O le a se mea ua e aoaoina mai le faatusatusaina o gaoioiga a Maria i gaoioiga a Iuta?

Faaalu sina minute e toe iloilo ai lou vaiaso.

• O a ni avanoa na e maua e faaali atu ai lou alofa mo le Faaola?

• Pe o i ai ni taimi na e moomoo ai maimau pe ana e faia se mea e sili atu?

• O le a se mea e mafai ona ese lou faia i le lumanai ina ia faaalia atoatoa ai lou alofa mo Ia?

Mafaufau pe faapefea ona faatatau upuaIesu ia i tatou

Sa auai Iesu i le tausamiga o le Paseka, ua lauiloa foi o le Talisuaga Mulimuli, faatasi ai ma Ona Aposetolo i ni nai aso ina ua uma ona uuina o Ia e Maria. Faitau le Mataio 26:20–21, ma vaavaai mo le faasilasilaga na faia e le Faaola i le taimi o lenei talisuaga.

• Pe a na fai o oe o se tasi o le au Aposetolo, mata o le a se mea na e mafaufau i ai i lea taimi?

Faitau le Mataio 26:22 e iloa ai pe na faapefea ona tali atu Aposetolo.

Sa faasoa mai e Peresitene Dieter F. Uchtdorf, a o avea ma se tasi o le Au Peresitene Sili, se tasi o lesona e mafai ona tatou aoao mai le tali a le au Aposetolo. Atonu e te manao e matamata le vitio “Lord Is it I?” o loo maua i le ChurchofJesusChrist.org, mai le taimi 1:09 i le 2:30 pe faitau anotala o loo i lalo.

"Le Alii e, O Au Ea?"

O le lauga a Peresitene Dieter F. Uchtdorf i le Konafesi Aoao o Oketopa 2014.

“Sa lei fesiligia e le au soo le moni o le mea na fetalai atu ai [Iesu]. Pe sa latou fetilofai solo foi, ma tusitusilima i se tasi, ma fesili, “O ia ea?”

Ae, “sa latou matua tiga ai, ua latou taitasi ma fai mai ia te ia, Le Alii e, o a’u ea?” [Mataio 26:22; ua faaopoopo le faamamafa].

Ou te le iloa po o le a le mea o le a tofu faia e i tatou. … Pe o le a tatou autilotilo solo ma faapea ifo i o tatou loto, “Atonu o loo fetalai o Ia e uiga ia Uso Ioanesi. Sa ou masalomia lava o ia,” po o le “Ua ou fiafia lava o loo faatasi mai Uso Brown. E tatau lava ona ia faalogo i le savali lenei”? Pe o le a tatou pei ea o na soo anamua, o le a tatou mafaufau ifo ia i tatou lava ma fesili i lena fesili matuitui: “O au ea?”

“I nei upu faigofie, “Le Alii e, o au ea?” o loo taoto ai le amataga o le poto ma le ala i le liuaina faaletagata lava ia ma le suiga tumau.

(Dieter F. Uchtdorf, “Le Alii e, O A‘u Ea?,” Ensign po o le Liahona, Nov. 2014, 56)

O se upumoni e tasi e mafai ona tatou aoao mai i lenei saunoaga ma le faataitaiga a Aposetolo o le aoao e suesue o tatou lava olaga e tusa ai ma afioga a le Faaola e fesoasoani ia i tatou i luga o le ala i le liua faaletagata lava ia ma le suiga tumau.

• Aisea e taua ai le fesili ifo mo i tatou lava pe faapefea ona faatatau afioga a le Alii ia i tatou nai lo le manatu i Ana afioga e mo se isi tagata?

• O a nisi o tulaga i lou olaga e mafai ona e fesili ai, “Le Alii e, o au ea?”

• O le a se mea ua e iloa e uiga ia Iesu Keriso e mafai ona faamalosiauina ai oe e fesili, “Le Alii e, o au ea?”

Na faasoa mai e Peresitene Uchtdorf ni faataitaiga se lua o punavai e mafai ona tatou faaaogaina e fesoasoani ia i tatou e suesue ai i tatou lava faaleagaga:

E mafai ona ou fautua atu, o tusitusiga paia ma lauga e tuuina atu i le konafesi aoao o se faaata aoga lea e mafai ona tatou tilotilo i ai mo le suesueina o i tatou lava.

A e faalogo pe faitau foi i upu a perofeta anamua ma aso nei, ia aua ne’i e mafaufau faapea o upu ia o loo faatatau i se isi tagata ae fai le fesili faigofie: “Le Alii e, o au ea?”

(Dieter F. Uchtdorf, “Le Alii e, O A‘u Ea?,” Ensign po o le Liahona, Nov. 2014, 58)

Faaalu sina taimi e mafaufau ai pe faafia ona e taumafai e faaaoga tusitusiga paia po o aoaoga mai le konafesi aoao i lou olaga. Mafaufau i faamanuiaga ua e oo i ai mo au taumafaiga e tuufaatasi afioga a le Alii i lou olaga.

Faataitai ona faaaoga afioga a le Alii i lou olaga

Suesue ia le itiiti ifo ma le tolu o fuaitau nei o le atamai i aoaoga faavae. A o e suesue, saili le taitaiga a le Agaga Paia e iloa ai pe faapefea ona faatatau afioga a le Alii i nei fuaitau ia te oe. Atonu foi e te manao e suesue se lauga o le konafesi aoao talu ai nei e avea ma vaega o lenei gaoioiga.

• Mataio 5:14–16

• 1 Korinito 6:19–20

• Iakopo 1:5–6

• 1 Nifae 3:7

• Mosaea 2:41

1. Tali fesili nei i totonu o lau api faamaumau suesuega:

• O a aoaoga na e maua e mafai ona faatatau i tulaga o lou olaga o i ai nei?

• O a faamanuiaga e te manatu e mafai ona e maua e ala i le faaaogaina o nei aoaoga i lou olaga?

Faitalia pe Fai: O e Manao e Suesue Atili?

Aisea na uuina ai e Maria Iesu?

Elder James E. Talamage (1862–1933) o le Korama o Aposetolo e Toasefululua:

“O le uuina o le ulu o se malo i le suauu masani o le faatinoga lea ua ia te ia se faamamaluga; o le uuina foi o ona vae o le faaali atu lea o se faailoga o se alofa e le masani ai [tulaga ese]; ae o le uuina o le ulu ma vae i le uunato, ma i se tele naua, o se galuega o se tali faaaloalo maualuga e seasea ona faia e oo lava i tupu. O le mea na fai e Maria o se faailoga faamamaluina; o se manogi sasala mai se loto ua faatumulia i le agaga tapuai ma le alofa pulunaunau.

(James E. Talmage, Jesus the Christ[1916], 512)

E mafai faapefea ona tatou aloese mai le soona faitio ia te oe lava a o faailoa atu pea le manaomia o le faaleleia o le tagata lava ia?

Na faasoa mai e Sister Michelle D. Craig, Fesoasoani Muamua i le Au Peresitene Aoao o Tamaitai Talavou, le malamalamaaga lenei:

E tatau ona tatou taliaina ni lagona o le lē faamalieina faaleagaga ia e valaau mai ia i tatou i se auala maualuga atu, ae ia iloa ma aloese mai mea taufaasese a Satani—e faavaivailoto. O se avanoa taua lenei e oso mai ai Satani e matua faavaivaia o tatou loto. E mafai ona tatou filifili e savavali i ala maualuluga atu ia e taitai atu ai i tatou e saili mo le Atua ma Lona filemu ma le alofa tunoa, ia po o lo tatou faalogo atu ia Satani, o lē e osofaia i tatou i savali e faapea, o le a lē taitai ona lava lo tatou lelei: le lava le tamaoaiga, le lava le atamai, le lava le matagofie, le lava i soo se mea. O lo tatou lē faamalieina e mafai ona faaleagaga—pe faataumaoi.

(Michelle D. Craig, “Lē Faamalieina Faaleagaga,” Ensign po o le Liahona, Nov. 2018, 53)