Pinadayag 2–3, Bahin 2

“[Kaniya Nga] Magmadaugon”

Nakahunahuna ka na ba kon unsaon nimo pag-atubang ang mga hagit sa mortalidad nga magmalamposon? Ang Manluluwas mitudlo sa mga Santos gikan sa pito ka simbahan sa Asya unsaon pagbuntog sa mga pagpanggukod, mga sala, ug ubang mga hagit aron makadawat sa Iyang gisaad nga mga panalangin. Kini nga leksiyon makatabang kanimo nga makabati og dugang nga tinguha nga mabuntog ang mga hagit ug madawat ang mga panalangin nga gisaad nga ihatag sa Manluluwas.

Pagkakita sa kataposan gikan sa sinugdanan

Handurawa ang imong kaugalingon sa mosunod nga sitwasyon nga gihulagway ni Brother Ahmad S. Corbitt sa Kinatibuk-ang Kapangulohan sa Young Men. Tan-awa ang “Makahimo Kamo sa Pagpundok sa Israel!,” nga makita sa ChurchofJesusChrist.org, gikan sa time code 4:49 hangtod sa 5:22, o basaha ang mosunod nga pamahayag.

Makahimo Kamo sa Pagpundok sa Israel!

Si Brother Corbitt nagtudlo nga ang kabatan-onan sa Simbahan makatabang sa pagpundok sa Israel kon makasabot sila sa ilang tinuod nga pagkatawo ug talagsaong gahom.

Pagbuntog sa kalibotan

Si Elder Neil L. Andersen sa Korum sa Napulog Duha ka Apostoles mipaambit sa mosunod mahitungod sa pagbuntog:

Posible ba nga makabuntog sa kalibotan ug makadawat niini nga mga panalangin? Oo, posible.

Kadtong makabuntog sa kalibotan makapalambo og malukpanong gugma alang sa atong Ginoo ug Manluluwas, si Jesukristo. …

Ang pagbuntog sa kalibotan dili mahitabo sa usa lamang ka makahuluganong hitabo sa kinabuhi, apan sa tibuok kinabuhi nga makahuluganong mga higayon nga modeterminar sa mahangturon nimong padulngan.

(Neil L. Andersen, “Pagbuntog sa Kalibotan,” Ensign o Liahona, Mayo 2017, 59)

• Unsa ang imong nakat-onan gikan ni Elder Andersen mahitungod sa pagbuntog?

Tungod kay ang Langitnong Amahan ug si Jesukristo nahigugma ug nagpakabana kanato, gusto Sila nga motabang kanato nga mabuntog ang tanan nga gikinahanglan aron makadawat og kahimayaan.

2. Kompletoha ang mosunod.

Pagpili og usa o daghan pa sa mosunod nga mga kalihokan (o lain nga imong pilion) aron sa pagtabang kanimo sa pag-ila kon unsay imong mahimo sa pagbuntog sa mga hagit ug sa pagdawat sa gisaad nga mga panalangin sa Manluluwas. Irekord ang imong mga panabot.

1. Basaha ang Abril 2017 nga pakigpulong sa kinatibuk-ang komperensiya nga may ulohan nga “Pagbuntog sa Kalibotan” ni Elder Neil L. Andersen sa Korum sa Napulog Duha ka Apostoles. Pangita og mga panabot kon unsa ang imong mabuhat aron makabuntog.

2. Basaha ang Juan 16:33 , ug dayon tun-i giunsa sa Manluluwas pagbuntog sa tintasyon ni Satanas diha sa Mateo 4:1–11 . Pangitaa kon unsaon nimo pagsunod ang tambag ug ehemplo sa Manluluwas diha sa imong paningkamot sa pagbuntog sa mga hagit ug sa mga sala.

3. Pangitaa ang pulong nga “pagbuntog” diha sa Gospel Library nga app o sa ChurchofJesusChrist.org. Tun-i ang mga kinutlo o mga kasulatan nga imong makit-an aron mahibaloan kon unsaon usab nimo sa pagbuntog.

Paghunahuna og bisan usa lamang ka butang nga mahimo nimong buhaton aron matabangan ka nga mabuntog ang hagit o sala nga imong nahunahunaan sa sayong bahin niini nga leksiyon. Sa imong personal nga journal, pagsulat kon unsa ang imong buhaton ug ipasalig nga buhaton kini. Ikonsiderar ang pagpaambit sa imong plano ngadto sa imong mga ginikanan o sa gisaligan nga lider sa Simbahan.

3. Tubaga ang mosunod nga mga pangutana diha sa imong journal sa pagtuon:

• Unsa ang imong nakat-onan mahitungod sa Langitnong Amahan ug ni Jesukristo gikan niini nga leksiyon?

• Unsa ang imong nahibaloan na mahitungod kang Jesukristo ug sa Iyang Pag-ula nga naghatag kanimo og pagsalig nga Siya makatabang kanimo nga mabuntog ang tanang mga butang ug madawat ang Iyang gisaad nga mga panalangin?

Opsiyonal: Gustong Makakat-on pa og Dugang?

Pinadayag 2:25 ; 3:5 . Unsay buot ipasabot sa “kuptan … pag-ayo”?

Ang mga Kristiyanos kinsa gihukman sa mga opisyales nga Romano nga mabilanggo o mamatay usahay makaluwas sa ilang mga kaugalingon pinaagi sa pagpanimpalas ni Kristo ug sa pagsimba hinoon sa emperador. Gi-rekord ni Juan ang pagdayeg sa Ginoo alang sa mga Santos didto sa Pergamo tungod sa “[pagkupot] pag-ayo” sa Iyang ngalan, bisan ubos sa hulga sa kamatayon ( Pinadayag 2:13 ; tan-awa usab Pinadayag 2:25 ; 3:3, 11). Usa ka nagbalik-balik nga hugpong sa mga pulong diha sa Pinadayag 2–3 mao ang tambag sa “[pagkupot] pag-ayo” ngadto sa kamatuoran (tan-awa sa Pinadayag 2:13, 25 ; 3:3, 11). Si Presidente M. Russell Ballard sa Korum sa Napulog Duha ka Apostoles mipasabot nga ang “pagkupot pag-ayo” ngadto sa kamatuoran, nga makaplagan diha sa pulong sa Dios, nagpasabot sa “pagpatalinghog ngadto niini, pagsunod sa mga baroganan nga gitudlo diha niini, ug sa paghupot niadto nga mga baroganan ingon og ang ato gayod nga mga kinabuhi nag-agad niini—diin, kon naghisgot kita og espiritwal nga kinabuhi, literal kini nga tinuod gayod” (Be Strong in the Lord,” Ensign, Hulyo 2004, 10).

Unsa ang gipasabot sa pagdawat sa kahimayaan?

Si Presidente Russell M. Nelson mipasabot:

Samtang ang kaluwasan maoy usa ka indibidwal nga butang, ang kahimayaan mao ang usa ka butang sa pamilya. Kadto lamang kinsa naminyo didto sa templo ug kansang kaminyoon gibugkos pinaagi sa Balaan nga Espiritu sa Saad magpadayon isip mga kapikas human sa kamatayon ug makadawat sa labing taas nga ang-ang sa celestial nga himaya o kahimayaan.

(Russell M. Nelson, “Celestial nga Kaminyoon,” Liahona, Nob. 2008, 92)

Si Brother Brian K. Ashton, kanhi sa Kinatibuk-ang Kapangulohan sa Sunday School, mitudlo:

Ang Amahan

Si Brother Ashton nagtudlo og mahinungdanong mga punto sa doktrina mahitungod sa Langitnong Amahan aron makatabang nato nga mas masabtan ang Iyang tinuod nga kinaiya ug mopakita og hugot nga pagtuo diha Kaniya ug sa Iyang Anak.

Ang Amahan naghimo og plano nga magtugot kanato, kon makab-ot ang pipila ka kondisyon,aron makabaton og pisikal nga mga lawas nga mahimong imortal ug mahimaya sa Pagkabanhaw; magminyo ug maghimo og mga pamilya dinhi sa mortalidad o, alang sa matinud-anon kinsa walay oportunidad, human sa mortalidad; mouswag ngadto sa pagkahingpit; ug sa kataposan mobalik sa atong Langitnong mga Ginikanan ug magpuyo uban Kanila ug sa atong mga pamilya sa usa ka kahimtang sa kahimayaan ug mahangtorong kalipay.

(Brian K. Ashton, “Ang Amahan,” Liahona, Nob. 2018, 94)