Fakahā 2–3, Konga 2

“Ko Ia Ia Te Ne Ikuná”

Painting of Jesus Christ by Mike Malm. Christ appears to be walking on the water with his arms outstretched to receive those who come, unto Him. There are clouds in the background with sunlight reflecting off the clouds. Light also emanates from around his head.

Kuó ke fifili nai pe te ke lava fēfē ʻo fehangahangai mo e ngaahi faingataʻa ʻo e moʻui fakamatelié? Naʻe akoʻi ʻe he Fakamoʻuí ʻa e Kāingalotú mei he ngaahi siasi ʻe fitu ʻi ʻĒsiá ʻi he founga ke ikunaʻi ai ʻa e fakatangá, angahalá, mo e ngaahi faingataʻa kehé kae lava ke maʻu ʻEne ngaahi tāpuaki kuo talaʻofa maí. ʻE lava ke tokoniʻi koe ʻe he lēsoni ko ʻení ke ke ongoʻi ha holi lahi ange ke ikunaʻi e ngaahi faingataʻá mo maʻu e ngaahi tāpuaki ʻoku talaʻofa ʻe he Fakamoʻuí ke ʻomí.

‘Iloʻi ʻa e ngataʻangá mei he kamataʻangá

Fakakaukauloto ʻokú ke ʻi he tūkunga ko ʻeni naʻe fakamatalaʻi ʻe Misa ʻĀmati S. Kopiti ʻo e Kau Palesitenisī Lahi ʻo e Kau Talavoú. Mamataʻi ʻa e “Te Ke Lava ke Tānaki ʻa ʻIsileli!,” ʻa ia ʻe lava ke maʻu ʻi he ChurchofJesusChrist,org, mei he taimi 4:49 ki he 5:22, pe lau ʻa e fakamatala ko ʻení.

Te ke Lava ke Tānaki ʻa ʻIsileli!
ʻOku akoʻi mai ʻe Misa Kōpiti ʻe lava ke tokoni ʻa e toʻu tupu ʻo e Siasí ki hono tānaki ʻo ʻIsilelí ʻi heʻenau ʻiloʻi honau tuʻunga totonú mo honau mālohi makehé.

Ko hono ikunaʻi ʻo e māmaní

Naʻe vahevahe ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻa ni fekauʻaki mo e ikuná:

ʻOku malava nai ke ikunaʻi ʻa māmani pea maʻu e ngaahi tāpuaki ko ʻení? ʻIo, ko ia.

ʻOku fakatupulaki ʻe kinautolu ʻoku nau ikunaʻi ʻa e māmaní ha ʻofa kāfakafa ki hotau ʻEiki mo e Fakamoʻui ko Sīsū Kalaisí. …

Ko e ikunaʻi ʻo māmaní ʻoku ʻikai ko ha momeniti tā-tuʻo-taha pē ia ʻi he moʻuí, ka ko ha ngaahi taimi kehekehe ʻi he moʻuí ʻokú ne fakamatalaʻi ʻa e taʻengatá.

(Neil L. Andersen, “Ko Hono Ikunaʻi ‘o e Māmaní,” Ensign pe Liahona, Mē 2017, 59)

Ko e hā naʻá ke ako meia ʻEletā ʻEnitaseni fekauʻaki mo e ikuná?

Koeʻuhí ʻoku ʻofa mo tokangaʻi kitautolu ʻe he Tamai Hēvaní mo Sīsū Kalaisi, ʻokú Na finangalo ke tokoniʻi kitautolu ke tau ikunaʻi ʻa e meʻa kotoa pē ʻoku fiemaʻu ke tau taau ai mo e hakeakiʻí.

2. Fakakakato e ngaahi meʻá ni.

Fili ha ʻekitivitī ʻe taha pe lahi ange mei he ngaahi ʻekitivitī ko ʻení (pe ko ha ʻekitivitī kehe te ke fili) ke tokoniʻi koe ke ke ʻiloʻi ʻa e meʻa te ke lava ʻo fai ke ikunaʻi ʻa e ngaahi faingataʻá pea maʻu ʻa e ngaahi tāpuaki kuo talaʻofa mai ʻe he Fakamoʻuí. Lekooti hoʻo ngaahi fakakaukaú.

Lau ʻa e lea ʻi he konifelenisi lahi ʻo ʻEpeleli 2017 naʻe ui ko e “Ko Hono Ikunaʻi ʻo e Māmaní” naʻe fai ʻe ʻEletā Neil L. Andersen ʻo e Kōlomu ʻo e Kau ʻAposetolo ʻe Toko Hongofulu Mā Uá. Kumi ha ngaahi fakakaukau ki he meʻa te ke lava ʻo fai ke ikuná.
Lau ʻa e Sione 16:33 , pea ako ki he founga naʻe ikunaʻi ai ʻe he Fakamoʻuí ʻa e ngaahi ʻahiʻahi ʻa Sētané ʻi he Mātiu 4:1–11 . Kumi e founga te ke lava ai ʻo muimui ki he faleʻi mo e sīpinga ʻa e Fakamoʻuí ʻi hoʻo feinga ke ikunaʻi ʻa e ngaahi faingataʻá mo e ngaahi angahalá.
Fekumi ki he foʻi lea “ikunaʻi” ʻi he Gospel Library app pe ʻi he ChurchofJesusChrist.org. Ako e ngaahi kupuʻi lea pe potufolofola ʻokú ke maʻú ke ʻiloʻi e founga te ke lava ai ʻo ikuná.

Fakakaukau ki ha meʻa ʻe taha te ke lava ʻo fai ke tokoniʻi koe ke ke ikunaʻi ʻa e faingataʻa pe angahala naʻá ke fakakaukau ki ai ʻi he konga kimuʻa ʻo e lēsoní. Hiki ʻi hoʻo tohinoa fakatāutahá ʻa e meʻa te ke faí pea tukupā ke fai ia. Fakakaukau ke vahevahe hoʻo ngaahi ongó mo hoʻo mātuʻa pe ko ha taki falalaʻanga ʻo e Siasí.

3. Tali e ongo fehuʻi ko ʻení ʻi hoʻo tohinoa akó:

Ko e hā te ke lava ʻo ako fekauʻaki mo e Tamai Hēvaní mo Sīsū Kalaisi mei he lesoni ko ʻení?
Ko e hā kuó ke ʻosi ʻilo fekauʻaki mo Sīsū Kalaisi mo ʻEne Fakaleleí ʻokú ne ʻoatu ha loto-falala te Ne lava ʻo tokoniʻi koe ke ke ikunaʻi e meʻa kotoa pē pea maʻu ʻEne ngaahi tāpuaki kuo talaʻofa maí?

Fili Pē: Fie Ako Lahi Ange?

Fakahā 2:25 ; 3:5 . ʻOku ʻuhinga ki he hā ke “kuku maʻú”?

Naʻe faʻa lava ʻe he kau Kalisitiane ne tauteaʻi ʻe he kau taki Lomá ke ngāue pōpula pe maté, ʻo fakahaofi kinautolu he taimi ʻe niʻihi ʻaki ʻenau lea kovi kia Kalaisi kae lotu ki he ʻemipolá. Naʻe lekooti ʻe Sione e fakamālōʻia ʻe he ʻEikí ʻa e Kāingalotu ʻi Peakamosí ʻi heʻenau “puke maʻu” Hono huafá, ʻo aʻu ki he fakamanamana ke tāmateʻí ( Fakahā 2:13 ; vakai foki ki he Fakahā 2:25 ; 3:3, 11). Ko ha kupuʻi lea ʻoku toutou hā ʻi he Fakahā 2–3 ko e naʻinaʻi ko ia ke “puke maʻu” pe “kuku maʻu” ‘a e moʻoní (vakai ki he Fakahā 2:13, 25 ; 3:3, 11). Naʻe fakamatalaʻi ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻoku ʻuhinga e “puke maʻu” ‘a e moʻoní, ʻoku maʻu ʻi he folofola ʻa e ʻOtuá, ke “fakafanongo ki ai, muimui ki he ngaahi tefitoʻi moʻoni ʻoku akoʻi aí, pea pikitai ki he ngaahi tefitoʻi moʻoni ko iá ʻo hangē ʻoku makatuʻunga ai ʻetau moʻuí—ʻa ia kapau ʻoku tau lau ki he moʻui fakalaumālié, ʻoku matuʻaki moʻoni ia” (“Be Strong in the Lord,” Ensign, July 2004, 10).

Ko e hā hono ʻuhinga ke maʻu ʻa e hakeakiʻi?

Naʻe fakamatala ʻe Palesiteni Lāsolo M. Nalesoni ʻo pehē:

Neongo ko e meʻa fakafoʻituitui pē ʻa e fakamoʻuí, ka ko e hākeakiʻí ko ha meʻa fakafāmili ia. Ko kinautolu pē ʻoku mali ʻi he temipalé pea silaʻi kinautolu ʻe he Laumālie Māʻoniʻoni ʻo e Talaʻofá, ʻe kei hokohoko atu ʻena nofo malí hili ʻa e maté pea maʻu mo e tuʻunga māʻolunga taha ʻo e nāunau fakasilesitialé pe hākeakiʻí.

(Russell M. Nelson, “Ko e Mali Fakasilesitialé,” Ensign pe Liahona, Nōvema 2008, 92)

Naʻe akonaki ‘a Brother Palaieni K. ʻEsitoni, ʻa ia naʻe hoko kimuʻa ko e Kau Palesitenisī Lahi ʻo e Lautohi Faka-Sāpaté ʻo pehē:

Ko e Tamaí
Ko e akoʻi ʻe Misa ʻEsitoni ha ngaahi fakakaukau fakatokāteline mahuʻinga fekauʻaki mo e Tamai Hēvaní ke tokoni ke mahino lelei ange kiate kitautolu ʻa Hono ʻulungaanga moʻoní mo fakaʻaongaʻi e tuí kiate Ia mo Hono ʻAló.

Ne fokotuʻu ʻe he Tamaí ha palani te tau lava ai ʻi ha ngaahi tuʻunga pau, ke maʻu ha sino fakamatelie ʻe hoko ʻo taʻe-faʻa-mate mo nāunauʻia ʻi he Toetuʻú; mali mo faʻu ha ngaahi fāmili ʻi he moʻui fakamatelié pe, ʻi he hili ʻo e moʻui fakamatelié, ko e kau angatonu naʻe ʻikai ke nau maʻu e faingamālié; ʻo fakalakalaka ki he haohaoá; pea fakaiku ʻo foki ki heʻetau Ongomātuʻa Fakalangí pea nofo mo Kinaua pea mo hotau fāmilí ʻi ha tuʻunga ʻo e hakeakiʻi mo e fiefia taʻengata.

(Brian K. Ashton, “Ko e Tamaí,” Ensign pe Liahona, Nōvema 2018, 94)