Roma 8:1–17

“Suli-Faatasi ma Keriso” 

Ua fusi atu e se alii Hispanic le Faaola, o Iesu Keriso. O Keriso o loo laeiina se ofu talaloa paepae.

I se vaitaimi na leai ai se lotogatasi o tagata o le Ekalesia i Roma ma i ai feeseeseaiga o manatu i ni mataupu eseese taua, na tusi atu ai Paulo ia i latou e uiga i auala e mafai ai ona latou mulimuli i le Agaga e maua ai le Togiola a Iesu Keriso e faatoilaloai o latou natura o le pa’ū. Na folafola atu e Paulo afai latou te faia o lea mea, o le a fai i latou ma suli faatasi ma Iesu Keriso i mea uma ua i ai i le Tama Faalelagi. A o e suesue, saili e faateleina lou naunau e mulimuli i le Agaga ma maua ai mea uma ua i ai j le Tama Faalelagi.

O le a se mea e te manao e te maua [e avea ma ou] tofi?

Afai e mafai ona e filifilia se tasi e te maua mai ai se mea e avea ma ou tofi, o ai o le a e filifilia? Aisea?
O le a se mea o le a e manao e maua mai i lenei tagata?

Na tusi atu le Aposetolo o Paulo i le Au Paia i Roma e uiga i le tofi o loo ofoina mai e le Tama Faalelagi i Ana fanau taitoatasi. Faitau le Roma 8:16–17, 32, ma faailoga mea ua ofoina mai e le Tama Faalelagi ia i tatou. Atonu e fesoasoani le iloaina o se tofi [suli] o “se tasi ua agavaa e fai mona tofi meaalofa faaletino pe faaleagaga” (Taiala i Tusitusiga Paia, “Suli,” scriptures.ChurchofJesusChrist.org).

O a upu po o fasifuaitau na e faailogaina?
O le a sou manatu i le uiga o le avea ma suli-faatasi ma Iesu Keriso?

O se tasi o upumoni o loo fesoasoani mai ai nei fuaiupu ina ia tatou malamalama ai o le E finagalo le Tama Faalelagi e faamanuia mai ia te i tatou i mea uma o ia te Ia (tagai foi i le Mataupu Faavae ma Feagaiga 76:55; 84:38).

E uiga i le tofi ua finagalo le Tama Faalelagi e faamanuia mai ai i tatou, na aoao mai Peresitene Dieter F. Uchtdorf, a o i ai i le Au Peresitene Sili e faapea:

E le oo le malosi o lo’u manatu e vaai faalemafaufau ai i mea uma e aafia i lenei folafolaga. Ae ua ou iloa e mataina, e paia, e faavavau, ma e aoga ai a tatou taumafaiga uma i le olaga.

(Dieter F. Uchtdorf, “O Faalagiga e Fa,” Liahona, Me 2013, 60)

Faaaoga sina taimi e mafaufau ai po o le a le uiga o le mautofi i mea uma ua i le Tama Faalelagi, ma mafaufau po o a ni au fesili e ono i ai e uiga i lenei upumoni. Mafaufau po o a ni amio, uiga, ma ni isi faamanuiaga e te manao e maua e avea ma ou tofi mai le Tama Faalelagi. A o faaauau ona e suesue i le aso, saili mo ni upumoni e mafai ona fesoasoani e te malamalama atili ai i le tofi ua finagalo le Tama Faalelagi e faamanuiaina ai oe ma mea e mafai ona e faia e te agavaa ai.

Aoao atili e uiga i le tofi mai le Tama Faalelagi

Fatu le siata lenei i lau api faamaumau mo suesuega:

O faamanuiaga e finagalo le Tama Faalelagi ina ia fai mo o tatou tofi	O mea e mafai ona tatou faia e agavaa ai mo lenei tofi

I le tatou tisipenisione, ua faaalia mai e le Alii le tele o mea e uiga i le tofi o loo finagalo le Tama Faalelagi e tuuina mai ia te i tatou. O se vaega o se faaaliga na tuuina atu i le Perofeta o Iosefa Samita ma tusifaamaumauina i le tusi ua ta’ua nei o le Mataupu Faavae ma Feagaiga 76, na faamatala mai ai e le Alii i latou o e o le a i ai se aso e mautofi ai i le malo selesitila.

Suesue i le Mataupu Faavae ma Feagaiga 76:50–70 faapea ma isi aoaoga a Paulo i le Roma 8:1, 5–9, 13–14, e aofia ai ma le Faaliliuga a Iosefa Samita mo le Roma 8:8–9, o loo maua i vae faamatalaga. A o e suesue, faaopoopo i lau siata folafolaga e te faitau i ai ma mea o loo ta’ua mai i fuaiupu e mafai ona e faia e te agavaa ai mo na folafolaga. Ia manatua e ui lava ona ta’ua i nei fauiupu faaupuga e pei o “atalii” ma “alii”, o folafolaga a le Atua e faatatau tutusa i fanau uma a le Tama Faalelagi (tagai Mataupu Faavae ma Feagaiga 25:1). Atonu e aoga foi ona iloa o le faaupuga lea o le “loto i le tino,” o loo ta’ua i le Roma 8, e faasino lea i se tasi e taula’i i mea faalelalolagi po o mea faaletino. E mafai foi ona faasino i tu’inanau o le tino (tagai i le Taiala i Tusitusiga Paia, “Faaletino,” scriptures.ChurchofJesusChrist.org).

O a fuaiupu mai au suesuega na aupito sili ona anoa ia te oe? Aisea?
O le a se mea na fesoasoani ai nei fuaiupu e te malamalama lelei ai e uiga i le tofi o loo finagalo le Atua e tuu mai ia te oe? O le a se mea e mafai ona e faia e te agavaa ai mo lena tofi?

I le siata na e faia i lau api faamaumau mo suesuega, toe faamanatu mea na e tusia, e aofia ai ma faamanuiaga ua finagalo le Tama Faalelagi e fai ma ou tofi.

O le a se mea e fesoasoani nei faamanuiaga folafolaina e te malamalama ai e uiga i le Tama Faalelagi ma Iesu Keriso?
O le a le matafaioi e faia e le Faaola e fesoasoani ai ia i tatou ia maua lea tofi? (tagai Mataupu Faavae ma Feagaiga 76:69).

E mafai faapefea ona aafia ai lou olaga?

Mafaufau mo sina taimi pe faapefea ona aafia lou olaga ma au filifiliga e fai i lou malamalama i le tofi ua finagalo le Tama Faalelagi e tuu mai ia te oe.

Mafaufau nei pe mafai faapefea e upumoni na e suesueina i le aso ona aafia ai le tupulaga talavou i ata faataitai nei:

Ua tele faafitauli na feagai ma Estelle i lona olaga ma ua ia lagona le lotovaivai. Ua mafaufau o ia pe aoga le faaauau pea ona alu i le lotu ma tausia poloaiga.
E fiafia tele Calvin i tekonolosi ofoofogia o loo ofo mai e le lalolagi. E tele lona taimi e faaalu e taalo ai i taaloga vitio, faaaoga faasalalauga faaagafesootai, pe matamata vitio.
E masani ona tauivi Liz ma lagona o le maualalo o lona taua faale-tagata ma manatunatu pe alofa moni ea se isi ia te ia.

Tusitusi i luga o se fasipepa i se peni po o se penitala.

Tuu i le faitalia: O e Manao e Aoao Atili?

E mafai faapefea e le manatuaina o lo tatou tofi ona fesoasoani ia i tatou?

Na faasoa mai e Peresitene Elaine S. Dalton, o le sa avea ma Peresitene Aoao o Tamaitai Talavou, se tala i se tupu e faapupula mai ai lenei lesona:

Remember Who You Are!
There is no more beautiful sight than a young woman who glows with the light of the Spirit, who is confident and courageous because she is virtuous.

Sa i ai i [le tupu] se malamalama e le maluelue e uiga i lona faasinomaga. A o talavou o ia, sa ave faamalosia o ia e tagata leaga o ē sa faoa le nofoalii a lona tama, o le tupu. Sa iloa e nei tagata afai e mafai ona latou faaumatiaina lona tulaga mama, o le a le avea o ia ma suli i le nofoalii. E ono masina sa latou taumafai ai e faagaua’i o ia i mea faatiapolo uma o le olaga, ae sa lei gauai ai lava o ia i nei uunaiga. O lenei mea na iso ai i latou na ave faamalosia o ia, ma ina ua uma ona latou faia o mea uma sa mafai ona latou mafaufau i ai, sa latou fesili atu ia te ia pe aisea lava ua i ai ia te ia lea malosiaga amiomama tele. Sa faigofie lana tali. Sa fai atu o ia, “E le mafai ona ou faia mea ua outou fai mai ai, aua na ou fanau mai e avea ma se tupu” [tagai Vaughn J. Featherstone, “The King’s Son,” New Era, Nov. 1975, 35].

E pei o le atalii o le tupu, ua tofu outou ma se tofi tautupu. Ua tofu outou ma se tupuaga paia.

(Elaine S. Dalton, “Manatua Pe O Ai Oe!,” Liahona, Me 2010, 121)

O le a le ituaiga taumafaiga e manaomia ina ia mulimuli ai pea lava pea i le Agaga Paia ma maua mea uma ua i le Tama Faalelagi?

A o avea o ia ma se tasi o Fitugafulu, sa faamatala mai e Elder Bruce C. Hafen:

Afai tatou te mananao i “mea uma ua i ai i [le] Tama” [ Mataupu Faavae ma Feagaiga 84:38 ], ua finagalo mai le Atua i mea uma ua ia i tatou. Ina ia agavaa mo sea ’oa uiga ese, i soo se auala e mafai ona tatou agavaa ai mo sea oa, e tatau ona tatou foai atu i le auala na foai mai ai e Keriso—o mea uma lava sa ia te Ia: “o le ā le malosi e te lē iloa, ioe, o le a le faigata ona onosaia e te lē iloa” [Mataupu Faavae ma Feagaiga 19:15]. Fai mai Paulo, “Afai tatou te tiga faatasi ma ia, o suli faatasi i [tatou] ma Keriso” [Roma 8:17; na faaopoopo le faamamafa]. O Lona finagalo atoa, ma o tatou loto atoa.

(Bruce C. Hafen, “O le Togiola: O Mea Uma mo Tagata Uma,” Liahona, Me 2004, 98)

Aisea na aoao mai ai Paulo e moomia ona avea i tatou ma atalii o le Atua ae o tatou uma o Lana fanau?

E ui lava o tagata uma o fanau moni faaleagaga a matua faalelagi, o aoaoga a Paulo e uiga i “le Agaga e avea ai ma tamafai” ma le avea ai “ma atalii [ma afafine] i latou o le Atua” (tagai Roma 8:14–15) e fesoasoani tatou te malamalama ai e mafai ona tatou toe fanauina faaleagaga, pe fai ma tamafai, o ni atalii ma ni afafine o Keriso i le feagaiga o le talalelei (tagai i le Taiala i Tusitusiga Paia, “ Feagaiga,” scriptures.ChurchofJesusChrist.org).

Na oo tagata o le nuu o le Tupu o Peniamina i lea ituaiga o toe fanauina faaleagaga, na mafua ai ona fai mai Peniamina, “Ma o lenei, ona o le feagaiga ua outou faia, o le a ta’ua ai outou o le fanau a Keriso, o ona atalii, ma ona afafine; ona faauta, o le aso ua fanauina ai e ia outou faaleagaga” (Mosaea 5:7). O le avea ma atalii ma afafine o Iesu Keriso e ala i le toe fanauina faaleagaga e taua mo le agavaa i mea uma o i le Tama Faalelagi (tagai Mosaea 27:25-26).