Lluka 10:25–37

Samaritani i Mirë

Kur një doktor ligji e pyeti Jezusin: “Kush është i afërm im?” (Lluka 10:29), Shpëtimtari u përgjigj duke dhënë shëmbëlltyrën e Samaritanit të mirë. Ky mësim mund të të ndihmojë të ndjekësh shembullin e Jezusit për të dashur të afërmin tënd.

Vënia e shenjave dhe e shënimeve në shkrimet e shenjta. Plaku Riçard G. Skot, i Kuorumit të Dymbëdhjetë Apostujve (1928–2015), e ftoi rininë: “Shënoni shkrime të shenjta … dhe kthehuni shpesh tek ato” (“Për Paqe në Shtëpi”, Ensign ose Liahona, maj 2013, f. 30). Kërkoni mundësi për t’i ftuar studentët që të vënë shenja dhe shënime në shkrimet e tyre të shenjta. Nxitini ata ta bëjnë këtë në një mënyrë që ka kuptim për ta, në vend që t’i udhëzoni ta bëjnë në mënyra specifike.

Përgatitja e nxënësve: Ftojini nxënësit të lexojnë te Lluka 10:30–35 , duke kërkuar vendin ku e shohin ata Jezu Krishtin në këtë shëmbëlltyrë. Bëjini të kërkojnë gjithashtu se ku e shohin veten në shëmbëlltyrë.

Veprimtari të Mundshme të të Mësuarit

Nxënësit mund të përfitojnë nga zhvillimi i më shumë se një seance mësimore për ta studiuar shëmbëlltyrën e Samaritanit të mirë.

Veprimtari shtesë të të mësuarit janë në dispozicion në pjesën e mësimit “Veprimtari Plotësuese të të Mësuarit”.

Për veprimtarinë e mëposhtme, ftojini nxënësit t’i mbajnë shënim në ditarët e tyre të studimit përgjigjet e veta për pyetjet në vijim. Merrni parasysh të jepni një përvojë personale dhe të ftoni disa vullnetarë që të japin përvoja gjithashtu.

Ndihma ndaj atyre që janë në nevojë

Mendo për një rast kur dikush të ndihmoi kur kishe nevojë për ndihmë.

• Përse mendon se të ndihmoi ky person?

• Si u ndjeve për shkak të asaj që bëri ky person?

Medito se sa gjasë ka që të mund ta ndihmosh dikë në nevojë dhe pse mund ta ndihmosh ose mund të mos ta ndihmosh atë. Teksa studion, kërko të vërteta që mëson rreth Jezu Krishtit, të cilat mund të ta shtojnë dëshirën për t’i ndihmuar ata që janë në nevojë.

Një shëmbëlltyrë

Një ditë, ndërkohë që Jezu Krishti po jepte mësim, një doktor ligji e pyeti se çfarë duhej të bënte për të marrë jetën e përjetshme. Shpëtimtari dha mësim se në mënyrë që të trashëgojmë jetën e përjetshme, ne duhet ta duam Perëndinë me gjithë zemër dhe ta duam të afërmin tonë porsi vetveten (shih Lluka 10:27). Doktori i ligjit më pas bëri një pyetje tjetër.

Lexo te Lluka 10:29 dhe merr parasysh ta shenjosh pyetjen që doktori i ligjit i bëri Jezusit.

• Si do t’i përgjigjeshe pyetjes së doktorit të ligjit?

Jezusi iu përgjigj pyetjes së doktorit të ligjit duke i treguar një shëmbëlltyrë të njohur si shëmbëlltyra e Samaritanit të mirë. Ndërsa e studion këtë shëmbëlltyrë, mbaj në mendje se samaritanët dhe judenjtë përgjithësisht e përbuznin njëri-tjetrin dhe shpesh e shmangnin ndërveprimin me njëri-tjetrin. Një arsye pse judenjtë i konsideronin samaritanët të papranueshëm, ishte sepse samaritanët ishin pjesërisht judenj dhe pjesërisht johebrenj dhe i përzienin bindjet fetare të të dyja palëve.

Ta shohësh Shpëtimtarin në shëmbëlltyrë

Lexoje shëmbëlltyrën e Samaritanit të mirë te Lluka 10:30–35 . Nëse dëshiron mund të shikosh edhe materialin filmik “Parable of the Good Samaritan ” [“Shëmbëlltyra e Samaritanit të Mirë”] (5:11) teksa e ndjek në shkrimet e tua të shenjta. Ky material filmik është në dispozicion në ChurchofJesusChrist.org.

Ndërsa e studion këtë shëmbëlltyrë, mendo rreth mënyrës se si Samaritani është simbolikë për Jezu Krishtin.

Merrni parasysh të paraqitni një figurë të Jezu Krishtit përpara se të bëni pyetjen vijuese:

• Çfarë mund të mësojmë për Jezu Krishtin nga kjo shëmbëlltyrë? (Merr parasysh t’i renditësh përgjigjet e tua për këtë pyetje në ditarin tënd të studimit.)

Plaku Nil L. Andersen, i Kuorumit të Dymbëdhjetë Apostujve, dha mësim:

“Shpëtimtari është Samaritani ynë i Mirë, i dërguar për të ‘shëruar ata që e kanë zemrën të thyer’ [ Lluka 4:18 ; shih edhe Isaia 61:1 ]. Ai vjen te ne kur të tjerët na anashkalojnë. Me dhembshuri, na vë balsamin e Tij shërues mbi plagë dhe na i lidh ato. Ai na mban në krahë. Ai kujdeset për ne.”

(Nil L. Andersen, “Të Plagosur”, Ensign ose Liahona, nëntor 2018, f. 85.)

• Cilët janë disa shembuj të Shpëtimtarit në shkrimet e shenjta duke bërë atë që përshkroi Plaku Andersen?

• Kur ka qenë Shpëtimtari si Samaritani i mirë për ty?

Merrni parasysh të jepni një përvojë personale në të cilën e dalluat dhembshurinë dhe gatishmërinë e Shpëtimtarit për t’i ndihmuar të gjithë ata që janë të lënduar shpirtërisht.

Ndjekja e shembullit të Jezu Krishtit

Pasi dha shëmbëlltyrën e Samaritanit të mirë, Jezu Krishti, Mësuesi Mjeshtër, e pyeti doktorin e ligjit se çfarë kishte mësuar dhe e ftoi atë të vepronte. Lexo te Lluka 10:36–37 duke kërkuar ftesën e Shpëtimtarit ndaj doktorit të ligjit.

• Si mund ta zbatosh ftesën e Shpëtimtarit në vetë jetën tënde?

• Çfarë të mëson kjo ftesë rreth ndjenjave të Shpëtimtarit për të gjithë fëmijët e Atit Qiellor?

Kemi mundësi të shumta për ta ndjekur këshillën e Shpëtimtarit: “Shko dhe bëj kështu edhe ti” ( Lluka 10:37) në shumë mjedise të ndryshme ku e gjejmë veten, si në shtëpi, në shkollë, në internet, në lagjen ose degën tonë dhe mes të huajsh.

Merrni parasysh ta ndani klasën në grupe të vogla për të diskutuar për pyetjet në vijim. Caktojini secilit grup një ose më shumë nga mjediset e renditura në paragrafin e mëparshëm ku të përqendrohen teksa u përgjigjen këtyre pyetjeve.

• Cilat janë disa mënyra specifike në të cilat mund ta ndjekësh shembullin e Shpëtimtarit për t’i treguar dashuri të afërmit tënd në këtë mjedis?

• Çfarë mund ta bëjë të vështirë të tregosh dashuri për të afërmin tënd në këtë mjedis?

• Po ta kishte të vështirë një person që të tregojë dashuri për të afërmin në këtë mjedis, çfarë mund t’i mësoje atij/asaj rreth Jezu Krishtit që mund ta ndihmonte?

Pasi nxënësit ta kenë përfunduar diskutimin e tyre, ftojini vullnetarët nga secili grup që të tregojnë disa nga përgjigjet e tyre.

Ftojini nxënësit të mendojnë rreth asaj që kanë mësuar në këtë mësim. Merrni parasysh t’u jepni atyre kohë për t’i shkruar mendimet dhe përshtypjet në ditarët e tyre të studimit. Merrni parasysh edhe t’u jepni nxënësve një mundësi për të treguar atë që kanë ndier shtysë të bëjnë për shkak të asaj që kanë studiuar sot.

• Çfarë është diçka që je nxitur ta bësh si rezultat i asaj që ke studiuar sot?

Komente dhe Informacion për Rrethanat

Si është shëmbëlltyra e Samaritanit të mirë një simbolikë për udhëtimin tonë gjatë jetës?

Plaku Gerit W. Gong, i Kuorumit të Dymbëdhjetë Apostujve, dha mësim:

“Në rrugët tona me pluhur për në Jeriko, ne do të na sulmojnë, do të na bëjnë gjithë plagë dhe do të na lënë në dhembje.

Ndonëse duhet ta ndihmojmë njëri‑tjetrin, shumë shpesh kalojmë në anën tjetër të rrugës, për çfarëdo arsye.

Gjithsesi, me dhembshuri, Samaritani i Mirë ndalet dhe na i lidh plagët duke na i larë me vaj dhe me verë. Simbolet e sakramentit dhe ordinanca të tjera, vera dhe vaji na drejtojnë drejt shërimit shpirtëror në Jezu Krishtin. Samaritani i Mirë na vë mbi gomarin e Tij ose, në disa rrëfime në vitrazh, na mbart mbi supet e Tij. Ai na sjell në hanin që mund të përfaqësojë Kishën e Tij. Te Hani, Samaritani i Mirë thotë: ʻKujdesu për të. … Do të të jap kur të kthehemʼ [ Lluka 10:35 ]. Samaritani i Mirë, një simbol i Shpëtimtarit tonë, premton se do të kthehet, këtë herë me madhështi e lavdi.”

(Gerit W. Gong, “Vend në Han”, Liahona, maj 2021, f. 24–25.)

Pse Shpëtimtari përdori një samaritan dhe jo një judeas si personin që e ndihmoi të plagosurin?

Presidenti M. Rasëll Ballard, i Kuorumit të Dymbëdhjetë Apostujve, shpjegoi:

“Kishte një mospëlqim të madh mes judenjve dhe samaritanëve në kohën e Krishtit. Në rrethana normale, këto dy grupe e shmangnin shoqërimin me njëri-tjetrin. Do të ishte gjithsesi një shëmbëlltyrë e mirë, udhëzuese nëse burri që ra pre e grabitësve, do të shpëtohej nga një vëlla judeas.

Përdorimi me qëllim nga ana e Tij i judenjve dhe samaritanëve na mëson qartësisht se ne jemi të gjithë të afërm dhe se duhet ta duam, vlerësojmë, respektojmë dhe t’i shërbejmë njëri-tjetrit pavarësisht nga mospajtimet tona të mëdha – përfshirë mospajtimet fetare, politike dhe kulturore.”

(M. Russell Ballard, “Doctrine of Inclusion”, Ensign ose Liahona, nëntor 2001, f. 36.)

Çfarë duhet të bëj kur mundësitë për t’i ndihmuar të tjerët vijnë në kohë të pavolitshme?

Presidenti M. Rasëll Ballard, President Veprues i Kuorumit të Dymbëdhjetë Apostujve, dha mësim:

“Mundësitë për t’u shërbyer të tjerëve në mënyra kuptimplota, sikurse kemi besëlidhur të bëjmë, rrallëherë vijnë në kohë të volitshme. Por nuk ka fuqi shpirtërore në të jetuarit sipas volisë. Fuqia vjen ndërsa i mbajmë besëlidhjet tona.”

(M. Russell Ballard, “Like a Flame Unquenchable”, Ensign, maj 1999, f. 86.)

Presidenti Tomas S. Monson (1927–2018) na kujtoi:

“Mos lejoni kurrë, që zgjidhja e një problemi, të bëhet më e rëndësishme se një person që ka nevojë ta duash.”

(Tomas S. Monson, “Të Gjejmë Gëzim në Udhëtim”, Ensign ose Liahona, nëntor 2008, f. 86.)

Veprimtari Plotësuese të të Mësuarit

Ngjashmëritë mes shëmbëlltyrës së Samaritanit të mirë dhe planit të shpëtimit

Ftojini nxënësit të lexojnë te Lluka 10:30–35 , duke kërkuar mënyrën se si shëmbëlltyra e Samaritanit të mirë mund të jetë simbolikë për planin e shpëtimit. Disa simbole përfshijnë të mëposhtmet:

Zbritja nga Jerusalemi: largimi nga ekzistenca paratokësore dhe ardhja në tokë

Një burrë: ne

Samaritani: Jezu Krishti

Udhëtimi në udhën drejt Jerikos: ky udhëtim në vdekshmëri

Ftojini nxënësit të diskutojnë se çfarë mësimesh na mëson shëmbëlltyra rreth vdekshmërisë dhe kthimit tek Ati. Bëni pyetje për ndjekjen e ecurisë të tilla si: Cilat janë disa nga mënyrat se si plagosemi shpirtërisht gjatë kohës sonë në tokë? Si e keni përjetuar [përvojën] që Shpëtimtari ju ka lidhur plagët?

Studimi i shëmbëlltyrës nga këndvështrimi i priftit dhe levitit

Merrni parasysh t’i ftoni nxënësit ta studiojnë shëmbëlltyrën nga këndvështrimi i priftit dhe levitit. Ftojini ata të mendojnë rreth disa nga arsyeve të mundshme pse prifti dhe leviti nuk ndaluan për ta ndihmuar burrin në nevojë.

Kërkojuni nxënësve t’i krahasojnë këto arsye të mundshme me përgjigjet e veta ndaj mundësive për të shërbyer. Ftojini nxënësit të meditojnë se si mund t’i mposhtin pengesat e veta ndaj dashurisë dhe shërbimit për të afërmit të tyre.

Të mësojmë ndërsa vijmë në hanin e Zotit (Kishën)

Plaku Gerit W. Gong, i Kuorumit të Dymbëdhjetë Apostujve, e krahasoi hanin nga shëmbëlltyra e Samaritanit të mirë me Kishën e Zotit (shih “Vend në Han”, Liahona, maj 2021, f. 24–25). Ai sugjeroi që ne mund të marrim mësime të rëndësishme për veten dhe Jezu Krishtin ndërsa vijmë në hanin e Tij. Merrni parasysh të përzgjidhni dhe ftoni nxënës që të studiojnë pjesë të kësaj bisede për të mësuar më shumë rreth mënyrës se si mund t’i ndihmojnë të tjerët që ta përjetojnë shërimin që ofron Shpëtimtari duke i ftuar ata në Kishën e Tij.