Ղուկաս 7.36–50

«Որովհետև նա շատ սիրեց»

Հիսուսը ճաշեց Սիմոն անունով մի փարիսեցու տանը: Մի կին, ում Սիմոնը «մեղավոր» էր համարում, մտավ և սկսեց «լաց լինել, արցունքներով թրջել [Փրկչի] ոտքերը և գլխի մազերով սրբել: Նա համբուրում էր նրա ոտքերն ու անուշահոտ յուղով օծում» (Ղուկաս 7․37-39). Սիմոնի մտքերին ի պատասխան՝ Փրկիչը կիսվեց ներման և սիրո մասին մի առակով: Այս դասի նպատակն է օգնել ձեզ Հիսուս Քրիստոսի հանդեպ հավատք գործադրել և ապաշխարել ձեր մեղքերի համար:

Խորհել Առաջարկեք ուսանողներին խորհել սովորածի մասին: Խորհել նշանակում է խորը մտածել մի բանի մասին և կարող է ուղեկցվել աղոթքով: Երբ ուսանողները սկսում են խորհել, Սուրբ Հոգին հաճախ նրանց բացահայտում է ճշմարտությունը և ուսուցանում է, թե ինչպես ավելի շատ նմանվել Հիսուս Քրիստոսին:

Ուսանող նախապատրաստում. Առաջարկեք ուսանողներին կարդալ Ղուկաս 7.36-50-ը և պատրաստված գալ, որպեսզի կարողանան պատասխանել Եկ, հետևիր ինձ. Անհատների և ընտանիքների համար.Նոր Կտակարան 2023 ձեռնարկի հետևյալ հարցերին. «Խորհեք, թե որքանով եք նման Ղուկաս 7.36-50-ում նկարագրված կնոջը: Ե՞րբ եք զգացել այնպիսի մեղմություն և ողորմածություն, ինչպիսին Փրկիչը ցուցաբերեց նրա հանդեպ։ Ի՞նչ եք սովորում նրա հավատքի, սիրո և հնազանդության օրինակի մասին»: («Փետրվարի 27-ից մարտի 5-ը: Մատթեոս 8, Մարկոս 2-4, Ղուկաս 7. «Քո հավատը փրկեց քեզ»):

Հնարավոր ուսումնական վարժություններ

Ի՞նչ ուղղությամբ ենք մենք ընթանում

Ցուցադրեք հետևյալ նկարը և կից տրված հարցերը:

• Ի՞նչ եք նկատում այս գծապատկերում ներկայացված մարդկանց մասին:

• Նրանց հեռավորությունը Փրկիչից և նրանց հայացքի ուղղությունը ի՞նչ են հուշում Նրա հետ իրենց հարաբերությունների մասին:

Մի պահ մտածեք, թե որտեղ կտեղադրեիք ձեզ այս գծապատկերում, և որ ուղղությամբ կնայեիք:Երեց Լարի Ռ. Լորենսը, այն ժամանակ Յոթանասունից, ասել է․

Երկնային Հայրը գիտի մեր աստվածային ներուժի մասին: Նա ամեն անգամ ուրախանում է, երբ մենք մի քայլ առաջ ենք շարժվում։ Նրա համար շատ ավելի կարևոր է մեր շարժման ուղղությունը, քան արագությունը։

(Լարի Ռ. Լորենս, «Էլ ի՞նչ բանով եմ պակաս», Ensign կամ Լիահոնա, նոյ. 2015, 35)

• Ինչո՞ւ եք կարծում, որ մեր հոգևոր ուղղվածությունն ավելի կարևոր է, քան մեր արագությունը:

Տերը մեծ ուրախություն է զգում, երբ մենք փորձում ենք ապաշխարել (տես Ղուկաս 15.7, Վարդապետություն և Ուխտեր 18.13): Ապաշխարությունը նկարագրելու եղանակներից մեկը մեղքից հեռանալն է և Աստծուն մոտենալը (տես Սուրբ գրքերի ուղեցույցը, «Ապաշխարել, Ապաշխարություն», scriptures.ChurchofJesusChrist.org): Սովորելիս ուշադրություն դարձրեք Սուրբ Հոգու հուշումներին, որոնք կարող են ձեզ օգնել հեռանալ մեղքից և մոտենալ Փրկչին:

Հիսուսը ճաշում է Սիմոն անունով մի փարիսեցու տանը

Որպես ուսանողի նախապատրաստման վարժության մաս, խնդրեք ուսանողներին դասին նախապատրաստվելիս մտածել առաջադրված հարցերին տված իրենց պատասխանների մասին:

Ղուկաս 7 գլուխը պարունակում է մի պատմություն, թե ինչպես Հիսուսը ճաշեց Սիմոն անունով մի փարիսեցու տանը: Երբ Հիսուսը Սիմոնի տանն էր, մի կին մոտեցավ նրանց, ով մեղավորի համբավ ուներ (տես Ղուկաս 7.37, 39):

Կարդացեք Ղուկաս 7.36-39 հատվածները՝ փնտրելով, թե ինչ պատահեց, երբ այդ կինը մոտեցավ Հիսուսին խնջույքի ժամանակ:

• Ի՞նչ նկատեցիք, որը վերաբերում է Սիմոնին և այդ կնոջը:

Հիսուսը կարդաց Սիմոնի մտքերը և կիսվեց մի առակով: Կարդացեք Ղուկաս 7.40-43 հատվածները՝ փնտրելով, թե Փրկիչն ինչ ուսուցանեց Սիմոնին այդ առակի միջոցով: Օգտակար կլինի իմանալ, որ մի դահեկանն այն գումարն էր, որ աշխատողը սովորաբար վաստակում էր մեկ օրվա ընթացքում (տես հատված 41, ծանոթագրություն ա):

• Այդ առակը Սիմոնին ի՞նչ օգնեց հասկանալ ներման իր սեփական կարիքի մասին:

Փրկիչի ժամանակներում ընդունված էր, որ տանտերը պատվում էր իր ականավոր հյուրերին՝ ծառայություն մատուցելով, ինչպես օրինակ` ողջունելիս նրանց համբուրելով, ոտքերը լվանալու համար ջուր մատուցելով և օծելով նրանց գլուխները յուղով (տես James E. Talmage, Jesus the Christ[1916], 261)։ Ինչպես գրված է Ղուկաս 7.44-46-ում, Փրկիչը նշեց, որ Սիմոնը այդպիսի վերաբերմունք չցուցաբերեց, մինչդեռ կինը ջանք չխնայեց՝ իր սերն ու երախտագիտությունը Նրան ցուցադրելու համար:

• Ձեր կարծիքով, այդ կինն ի՞նչ հասկացավ Հիսուսի մասին, որ Սիմոնը չհասկացավ:

• Ի՞նչն է ապացուցում, որ կինը ապաշխարեց կամ հեռացավ իր մեղքերից և մոտեցավ Փրկիչին:

Կարդացեք Ղուկաս 7.47-50-ը՝ փնտրելով, թե Տերն ինչու ներեց այդ կնոջ մեղքերը:

• Ի՞նչ մտքեր կամ զգացմունքներ ունեցաք Փրկիչի մասին այս պատմությունն ուսումնասիրելիս:

• Ի՞նչ ճշմարտություններ սովորեցիք այս հատվածից:

Այս պատմությունից ուսանողները կարող են բացահայտել մի շարք ճշմարտություններ, այդ թվում. Երբ մեզ ներվում են մեր մեղքերը, մեր սերը Փրկիչի հանդեպ խորանում է: Հիսուս Քրիստոսին հավատալով և մեր մեղքերի համար ապաշխարելով, մենք կստանանք Նրա ներումը:

Երեց Դեյլ Գ․ Ռենլանդը՝ Տասներկու առաքյալների քվորումից, կիսվել է Ղուկաս 7 գլխի պատմությանն առնչվող ուսմունքներով: Դիտեք «Որպեսզի ես կարողանայի բոլոր մարդկանց ձգել դեպի ինձ» (13:39) տեսանյութը, ժամանակային կոդ՝ 4:22-5:03, կամ կարդացեք հետևյալ տեքստը:

//media.ldscdn.org/webvtt/general-conference/april-2016-general-conference/2016-04-1070-dale-g-renlund-eng.vtt

Մտքով և սրտով որքան ավելի շատ ենք մոտենում Հիսուս Քրիստոսին, այնքան ավելի շատ ենք գնահատում Նրա անմեղ տառապանքները, այնքան ավելի շատ ենք երախտապարտ լինում շնորհի ու ներման համար և ավելի շատ ենք ցանկանում ապաշխարել ու դառնալ Նրա նման։ Երկնային Հորը և Հիսուս Քրիստոսին շատ մոտ գտնվելը կարևոր է, սակայն ուղղությունը, որով մենք շարժվում ենք, ավելի կարևոր է։ Աստված ավելի գոհ է զղջացող մեղավորներից, ովքեր փորձում են ավելի մոտենալ Նրան, քան՝ իրենց արդար համարող և մեղքեր փնտրող մարդկանց, ովքեր հին ժամանակների փարիսեցիների ու դպիրների նման չեն գիտակցում, թե որքան ուժգին պետք է ապաշխարեն։

(Դեյլ Գ. Ռենլանդ, «Որպեսզի ես կարողանայի բոլոր մարդկանց ձգել դեպի ինձ», Ensign կամ Liahona, մայիս 2016, 40)։

• Այս հայտարարության ո՞ր բառերն ու արտահայտություններն են օգնում ձեզ ավելի լավ հասկանալ Ղուկաս 7 գլխից ձեր սովորածը:

• Ինչ փորձառություններ են ձեզ օգնել ավելի մեծ սեր ու երախտագիտություն զգալ Փրկիչի և Նրա առաջարկած ողորմածության հանդեպ:

Որպեսզի կարողանաք ուսանողներին ցուցադրել Ղուկաս 7 գլխում ներկայացված կնոջ նման Փրկիչի հետ փորձառություններ ունեցած մեր ժամանակակցի նկարը, կարող եք դիտել «Նրա շնորհը. Արդյո՞ք ես կփրկվեմ» տեսանյութը (6:25)՝ ChurchofJesusChrist.org կայքում: Անպայման նախօրոք դիտեք տեսանյութը, որպեսզի կարողանաք որոշել՝ արդյոք այնտեղ քննարկվող բովանդակությունը և թեմաները համապատասխանում են ուսանողների կարիքներին:

Ծրագիր կազմեք

Ուսանողներին ժամանակ տվեք իրենց ուսումնասիրության օրագրերում պատասխանել հետևյալ հարցերին.

Հիշեք, որ ապաշխարությունը իրադարձություն չէ, կամ պարզապես լուրջ մեղքերի համար չէ: Ապաշխարությունը գործընթաց է, և մենք ապաշխարում ենք ամեն անգամ, երբ փորձում ենք ավելի շատ մոտենալ Տիրոջը և հեռանալ չարից:

Նորից նայեք Փրկիչի նկարին ու մարդուկներով սխեմային և մտածեք Հիսուս Քրիստոսի հետ ձեր հարաբերությունների և ձեր ընթացքի ուղղության մասին: Ծրագիր կազմեք, թե ինչպես կարող եք խորացնել ձեր սերը Փրկիչի հանդեպ՝ ամեն օր ապաշխարելով: Կատարեք հետևյալ վարժությունը առանձին թերթիկի վրա, այնպես որ կարողանաք այն պահել ձեզ մոտ: Կարող եք շարունակել այս փորձառությունը հաջորդ դասին:

«Գնահատեք ձեր գիտելիքները» դասը, որը հաջորդում է Մատթեոս 8-13, Մարկոս 2-5 և Ղուկաս 7, 9, 11 գլուխներին նվիրված դասերին, անդրադառնում է այս ծրագրին և առաջարկում է ուսանողներին խորհել իրենց առաջընթացի մասին:

• Ի՞նչ պետք է դադարեք անել՝ Փրկչին ավելի շատ մոտենալու համար: Ինչպե՞ս կանեք դա:

• Ի՞նչ պետք է սկսեք անել՝ Փրկչին ավելի շատ մոտենալու համար: Ինչպե՞ս կանեք դա:

Բացատրական և պատմական տեղեկություններ

Ո՞ւմ եմ նման այս պատմության հերոսներից՝ Սիմոնի՞ն, թե՞ կնոջը:

Այն ժամանակ Առաջին Նախագահության նախագահ Դիտեր Ֆ․ Ուխդորֆն ասել է․

Այս երկու մարդկանցից ո՞ր մեկին ենք մենք ավելի շատ նման:

Արդյո՞ք նման ենք Սիմոնին: Արդյո՞ք վստահ և բավարարված ենք մեր բարի գործերով, ապավինո՞ւմ ենք մեր արդարությանը: Թե՞, թերևս, մի փոքր անհամբեր ենք նրանց հանդեպ, ովքեր չեն ապրում մեր չափանիշներով: Արդյո՞ք մենք ինքնագնաց անցնում ենք անցուդարձի միջով, հաճախում մեր ժողովներին, հորանջում ավետարանի վարդապետության դասերին և հաղորդության ժողովի ընթացքում, ուշադրությունը կենտրոնացնում մեր բջջային հեռախոսի վրա:

Թե՞ նման ենք այս կնոջը, ով կարծում էր, որ ամբողջությամբ և անհույս կորած է մեղքի պատճառով:

Արդյո՞ք շատ ենք սիրում:

Արդյո՞ք հասկանում ենք, որ պարտական ենք Երկնային Հորը և մեր ամբողջ հոգով խնդրում ենք Աստծո շնորհի համար:

Երբ մենք ծնկի ենք իջնում աղոթելու, արդյո՞ք դա անում ենք՝ հնչեցնելով մեր արդար գործերի լավագույն օրինակները, թե՞ դա անում ենք` խոստովանելով մեր սխալները, խնդրելով Աստծո ողորմությունը և հեղելով երախտագիտության արցունքները՝ փրկագնման զարմանահրաշ ծրագրի համար:

Փրկությունը հնարավոր չէ գնել հնազանդության տարադրամով. այն գնվել է Աստծո Որդու արյամբ [տես Գործք 20.28]:

(Դիտեր Ֆ. Ուխդորֆ, «Շնորհի պարգևը», Ensign կամ Լիահոնա, մայիս 2015, 109)

Ինչո՞ւ է կարևոր ամեն օր ապաշխարել

Նախագահ Ռասսել Մ. Նելսոնը բացատրել է․

Ոչինչ ավելի ազատագրական, ավելի ազնվացնող կամ ավելի կարևոր չէ մեր անհատական առաջընթացի համար, քան կանոնավոր, ամենօրյա կենտրոնացումն ապաշխարության վրա: Ապաշխարությունը մեկ իրադարձություն չէ, այն գործընթաց է։ Այն երջանկության և խաղաղ մտքի բանալին է։ Զուգորդվելով հավատքի հետ՝ ապաշխարությունը հնարավորություն է տալիս օգտվել Հիսուս Քրիստոսի Քավության զորությունից։

(Ռասսել Մ․ Նելսոն, «Մենք կարող ենք ավելի լավ գործել և ավելի լավը լինել», Ensign կամ Լիահոնա, մայիս 2019, 67)

Օժանդակ ուսումնական վարժություններ

Հերթով ուսանողների նախապատրաստում և դասի սկիզբ

Դասը ուսուցանելուց առաջ առաջարկեք ուսանողներին մտածել ամենաբարի գործի մասին, որը ինչ-որ մեկը երբևէ արել է նրանց համար: Առաջարկեք նրանց մտածել, թե ինչ զգացին այդ մարդու նկատմամբ և ինչ արեցին՝ իրենց երախտագիտությունը ցուցադրելու համար: Նրանք կարող են խնդրել նաև ընտանիքի անդամներին կամ ընկերներին կիսվել իրենց փորձառություններով: Ուսանողները կարող են կիսվել այս փորձառություններով դասի սկզբում, որպեսզի կարողանան զգալ հետևյալ ճշմարտության կարևորությունը. Երբ մեզ ներվում են մեր մեղքերը, մեր սերը Փրկիչի հանդեպ խորանում է:

Սուրբ գրություններ, որոնք խորացնում են ուսանողների հասկացողությունը

Որպեսզի օգնեք ուսանողներին ավելի լավ հասկանալ ճշմարտությունը, որ երբ մեզ ներվում են մեր մեղքերը, մեր սերը Փրկիչի հանդեպ խորանում է, կարող եք խնդրել նրանց ուսումնասիրել հետևյալ սուրբ գրությունները. Հռովմայեցիս 2.4, Հռովմայեցիս 5.8, Ա Հովհաննես 4․19, Ենովս 1.1-11 և Մոսիա 27.23-37: