Mateu 25:14–46

Përgatitja për Kthimin e Shpëtimtarit

Shpëtimtari dha mësim për shëmbëlltyrën e talentave dhe shëmbëlltyrën e deleve dhe cjepve për t’i ndihmuar dishepujt e Tij të mësojnë të jenë gati për Ardhjen e Tij të Dytë. Ky mësim mund të të ndihmojë të përcaktosh të vërteta nga këto shëmbëlltyra dhe mund të të ndihmojë të përgatitesh për Ardhjen e Dytë të Shpëtimtarit.

Përgatitja e nxënësve: Ftojini nxënësit të lexojnë ose shëmbëlltyrën e talentave (shih te Mateu 25:14–30) ose shëmbëlltyrën e deleve dhe të cjepve (shih te Mateu 25:31–46) dhe të përgatiten të tregojnë mësimet që kanë mësuar nga studimi i tyre.

Veprimtari të Mundshme të të Mësuarit

Për t’i ndihmuar nxënësit të kujtojnë përvojat e tyre të kaluara nga studimi i shëmbëlltyrave, shfaqni figura të një fare, një monedhe dhe një perle, ose, nëse është e mundur, sillni disa nga këto objekte në klasë. Ftojini nxënësit të kujtojnë një shëmbëlltyrë që e kanë mësuar më parë nga Dhiata e Re, dhe të shpjegojnë shkurtimisht kuptimin e saj. Mund të jetë e dobishme të ndaloni për t’u dhënë nxënësve kohë të mjaftueshme për të kujtuar shembujt. Nëse është e nevojshme, jepni disa kujtues të shëmbëlltyrave (një shëmbëlltyrë që lidhet me farat mund të gjendet te Mateu 13:3–8, 18–23; një monedhë te Lluka 15:8–10 ; dhe një perlë te Mateu 13:45–46).

Kujtoji disa nga shëmbëlltyrat e Shpëtimtarit. Figurat vijuese mund të të ndihmojnë të kujtosh disa që ke studiuar më parë këtë vit.

• Çfarë mësimesh mund të kujtosh nga këto shëmbëlltyra?

• Si të kanë ndihmuar mësimet që ke mësuar këtë vit nga shëmbëlltyrat?

Nëse nxënësit nuk mund të mendojnë për mënyra specifike se si mësimet i kanë ndihmuar, merreni parasysh të tregoni një shembull personal.

• Sa vetëbesim ndien në aftësinë tënde për të mësuar më shumë për Shpëtimtarin nëpërmjet shëmbëlltyrave të Tij?

Dëgjojini përgjigjet e nxënësve për pyetjet e mëparshme dhe përshtateni materialin vijues sipas nevojave të tyre.

Rishiko mënyrën se si t’i kuptosh shëmbëlltyrat

Mund të jetë e dobishme të rishikosh sugjerime rreth mënyrës se si t’i kuptosh shëmbëlltyrat. Më herët këtë vit ti mësove katër hapa për të kuptuar shëmbëlltyrat. Nëse nuk i studiove ato ose ke nevojë për ndihmë për të kujtuar cilat janë ato, merre parasysh t’i referohesh mësimit “Mateu 13”.

Shkruaji krerët vijues të kapitujve në ditarin tënd të studimit. Lër hapësirë ndërmjet çdo kreu për të regjistruar gjetjet dhe përshtypjet.

1. Gjej detaje të rëndësishme.

2. Bëj krahasime shpirtërore.

3. Zbulo mësime të vyera.

4. Përcakto zbatimin në planin personal.

Ndërsa e vazhdon këtë mësim, ti do t’i zbatosh këto katër parime te shëmbëlltyrat që gjenden te Mateu 25:14–46 .

Gjej hollësi të rëndësishme

Ndërsa Shpëtimtari dha mësim për Ardhjen e Dytë dhe Gjykimin, Ai tregoi shëmbëlltyra për të theksuar atë që mund të bëjmë për të qenë të përgatitur për kthimin e Tij. Përzgjidh dhe studio një nga shëmbëlltyrat vijuese që Shpëtimtari dha, duke kërkuar hollësi të rëndësishme.

Sigurohuni të paraqitni ose të jepni fletëpalosjet vijuese që nxënësit t’i përdorin gjatë studimit. Fletëpalosjet sugjerojnë që nxënësit të vizatojnë një figurë të shëmbëlltyrave. Nxënësit mund ta bëjnë këtë në pjesën e pasme të fletëpalosjes. Në varësi të asaj që është më e mira për klasën, merreni parasysh ta ndani klasën në dy grupe dhe ta ftoni çdo grup të përgatitet për të luajtur rolin në shëmbëlltyrën që studioi. Nëse e bëni këtë, merreni parasysh t’u caktoni nxënësve role (për shembull: regjisor, lexues dhe aktor) për t’i ndihmuar të përfshihen në grupin e tyre.

Shëmbëlltyra e talentave

Lexo te Mateu 25:14–30 , ose shih “The Parable of the Talents” [“Shëmbëlltyra e Talentave”] (3:03), që gjendet te ChurchofJesusChrist.org.

Informacioni vijues mund të jetë i dobishëm ndërsa e studion këtë shëmbëlltyrë:

• “Talenta” tregon një sasi shumë të madhe parash në kohët e lashta. Në këtë shëmbëlltyrë, ajo mund të simbolizojë “diçka me vlerë të madhe”, siç janë ungjilli ose bekimet, dhuntitë, aftësitë dhe mundësitë që Zoti na jep (shih te Udhëzuesi për Shkrimet e Shenjta, “ Talenta ”, scriptures.ChurchofJesusChrist.org).

• Termi “interes” mund t’i referohet thjesht marrjes së interesit për një hua ose mund të nënkuptojë një normë interesi tepër të lartë (shih tek Bible Dictionary, “ Usury ”).

• Zoti simbolizon Jezu Krishtin.

• Shërbëtorët përfaqësojnë secilin prej nesh.

Vizato një figurë që e ilustron këtë shëmbëlltyrë.

Shëmbëlltyra e deleve dhe e cjepve

Lexo te Mateu 25:31–46, ose shih “Ye Have Done It unto Me” [“Ma Keni Bërë Mua”] (3:14), që gjendet në ChurchofJesusChrist.org.

Informacioni vijues mund të jetë i dobishëm për ta ditur ndërsa e studion këtë shëmbëlltyrë:

• “Ana e djathtë”: Në kohët e lashta, ulja në anën e djathtë të mbretit, ose pranë mbretit në anën e tij të djathtë ishte pozicioni më nderues në një gosti.

Vizato një figurë që e ilustron këtë shëmbëlltyrë.

Bëj krahasime shpirtërore dhe zbulo mësime të vyera

Përdor pyetjet vijuese që të të ndihmojnë të identifikosh mësimet që Shpëtimtari i dha mësim nëpërmjet shëmbëlltyrave të Tij. Ji sa më i hollësishëm që mundesh.

Sigurohuni që të lejoni kohë të mjaftueshme ndërmjet secilës nga pyetjet vijuese që nxënësit të zhvillojnë përgjigje të mirëmenduara.

• Çfarë të vërtetash ose mësimesh mësove teksa studiove këtë shëmbëlltyrë?

Këto janë disa të vërteta që nxënësit mund t’i përcaktojnë: Nëse ne i përdorim me besnikëri dhuntitë dhe aftësitë që Zoti na ka dhënë, Ai do të kënaqet me përpjekjet tona dhe do të na bekojë me gëzim dhe jetë të përjetshme. Ne mund ta tregojmë dashurinë tonë për Zotin në mënyrën se si i trajtojmë të tjerët.

• Si do të na ndihmojë njohja dhe të jetuarit e këtyre të vërtetave që të përgatitemi për Ardhjen e Dytë të Shpëtimtarit? Si mendon, përse na i mësoi Shpëtimtari këto të vërteta?

• Në çfarë mënyrash është Zoti i mëshirshëm si dhe i drejtë?

• Si mund ta ndiesh dashurinë e Shpëtimtarit në të vërtetat që Ai na mësoi nëpërmjet kësaj shëmbëlltyre?

• Si ndikon njohja e këtyre të vërtetave në dëshirën tënde për t’u përgatitur për të takuar Shpëtimtarin në Ardhjen e Tij të Dytë?

Përcakto zbatimin në planin personal

Ndihmojini nxënësit të zbatojnë atë që mësuan nga ky mësim, në mënyra kuptimplota personale. Veprimtaritë vijuese janë sugjerime. Përdorini ose përshtatini këto veprimtari sipas nevojave dhe aftësive të nxënësve.

1. Nëse e ke studiuar shëmbëlltyrën e talentave, bëj një listë të aftësive dhe bekimeve që Zoti të ka dhënë. Nëse është e mundur, përcaktoji disa nga ato bekime duke u afruar me njerëz që njeh ose duke lexuar bekimin patriarkal, nëse ke një të tillë. Mendo se si Zoti mund të dojë t’i përdorë këto aftësi dhe bekime.

2. Nëse e ke studiuar shëmbëlltyrën e deleve dhe të cjepve, mendo për kuptimin që mund të ketë ajo në rrethanat e tua për t’i ofruar për të ngrënë, për të pirë, veshje dhe shoqëri dikujt. Mendo për njerëzit që shikon zakonisht, dhe identifiko dikë që ti e ndien se Zoti dëshiron që ta ndihmosh. Shkruaj se si mund ta ndihmosh atë person të afrohet më shumë me Të.

3. Trego një të vërtetë që mësove nga shëmbëlltyrat e Shpëtimtarit në këtë mësim, dhe shpjego se si mund ta zbatosh atë parim në veprimet e tua të përditshme.

Merreni parasysh t’i ftoni nxënësit të japin mendimet e tyre për veprimtarinë që plotësuan.

Mund të jetë e dobishme të këndoni himnin “Numëro Bekimet” (Himne, nr. 152).

Ftojini nxënësit të dëshmojnë për parimet që përcaktuan. Nxitini ata t’i përdorin dhuntitë dhe aftësitë e tyre për t’u shërbyer të tjerëve dhe për t’u përgatitur për të takuar Shpëtimtarin.

Komente dhe Informacion për Rrethanat

Po sikur dikush të marrë më shumë ose më pak sesa unë?

Plaku Kuentin L. Kuk, i Kuorumit të Dymbëdhjetë Apostujve, pohoi:

“Rritja në talentet tona vetjake është njësia më e mirë matëse e përparimit personal. … Të krahasuarit e bekimeve është pothuaj e sigurt që do ta largojë gëzimin. Ne nuk mund të jemi në të njëjtën kohë mirënjohës dhe ziliqarë. Nëse dëshirojmë vërtet ta kemi Shpirtin e Zotit dhe të përjetojmë gëzim e lumturi, ne duhet të gëzohemi në bekimet tona dhe të jemi mirënjohës.”

(Quentin L. Cook, “Rejoice!”, Ensign, nëntor 1996, f. 29–30)

Në bazë të çfarë veprimesh do të na gjykojë Shpëtimtari?

Plaku Xhozef B. Uirthlin (1917–2008), i Kuorumit të Dymbëdhjetë Apostujve, pohoi:

“Në ditën e fundit Shpëtimtari nuk do të pyesë për natyrën e thirrjeve tona. Ai nuk do të hetojë për pasuritë tona materiale apo për famën. Ai do të pyesë nëse u kemi shërbyer të sëmurëve, nëse u kemi dhënë bukë dhe ujë të uriturve, nëse i kemi vizituar të burgosurit, apo u kemi dhënë ndihmë të dobëtëve [shih Mateu 25:31–40 ]. Kur ne kërkojmë të ndihmojmë më të vegjlit e fëmijëve të Atit Qiellor, këtë ne ia bëjmë Atij [shih Mateu 25:40 ]. Ky është thelbi i ungjillit të Jezu Krishtit.”

(Xhozef B. Uirthlin, “Urdhërimi i Madh”, Ensign ose Liahona, nëntor 2007, f. 30)

Çfarë pret Zoti që të bëjmë me atë që Ai na jep?

Plaku Stenli G. Elis, i Kuorumit të Të Shtatëdhjetëve, dha ide lidhur me shëmbëlltyrën e talentave:

“Shërbëtori që mori pesë talente dhe ktheu dhjetë, sikurse [edhe] ai që mori dy dhe ktheu katër, u shpallën si shërbëtorë të mirë dhe besnikë. Por ajo që më tërhoqi vëmendjen, ishte shërbëtori që mori një, u kujdes për të dhe ia ktheu të ruajtur zotit të tij. Unë u habita nga përgjigjja e të zotit: ‘Shërbëtor i mbrapshtë dhe përtac, … prandaj ia hiqni këtij talentin, … dhe flakeni në errësirën e jashtme këtë shërbëtor të pavlefshëm’! (Shih Mateu 25:14–30.)

Ky u duk si një reagim i [ashpër] ndaj dikujt që po përpiqej të kujdesej për atë që i ishte dhënë. Por Shpirti më mësoi këtë të vërtetë – Zoti pret një ndryshim!”

(Stanley G. Ellis, “Ai Ka Besim te Ne!”, Ensign ose [Konferenca e Përgjithshme], tetor 2006, f. 72)

Plaku Elis sugjeroi se ne mund ta bëjmë këtë “ndryshim” në jetët tona duke qëndruar në Zotin (shih Gjoni 15:5), duke kryer detyrat tona shpirtërore dhe duke ndjekur Shpirtin dhe udhëheqësit e Kishës.

Veprimtari Plotësuese të të Mësuarit

Një ide mësimore alternative: monedhat e të vesë

Nëse nxënësit do të përfitonin duke mësuar se si Zoti ndihet për atë që i ofrojmë Atij, merreni parasysh t’i ftoni ata të mësojnë nga historia e monedhave të të vesë.

Sillni dy monedha, një me shumë pak vlerë dhe një me vlerë më të konsiderueshme. Kërkojuni nxënësve të mendojnë për atë që mund të blejnë me secilën. Nëse dy njerëz do t’ua jepnin atyre këto monedha, cilën dhuratë do të vlerësonin nxënësit më shumë? Përse?

Nxënësit mund të lexojnë te Marku 12:41–44 ose Lluka 21:1–4 duke kërkuar mënyra se si Zoti e përcakton vlerën e ofertave tona. Nxënësit mund të renditin shembuj të ofertave që ata i bëjnë Zotit (për shembull, japin një të dhjetë të vogël por të plotë, bëjnë veprime të heshtura shërbimi, ose japin një mësim ose bëjnë një bisedë edhe nëse janë nervozë) dhe diskutoni se përse Zoti i vlerëson ofertat tona.

Shërbimi ndaj të tjerëve

Për ta ilustruar konceptin e përdorimit të “talentave” që na janë dhënë për të ndihmuar të tjerët (shihni te Mateu 25:35–40), merreni parasysh të shfaqni materialin filmik “The Coat” [“Palltoja]” (2:07), që paraqet një ngjarje nga fëmijëria e Presidentit Hibër J. Grant. Materiali filmik është në dispozicion në ChurchofJesusChrist.org.

Ftojini nxënësit ta shohin materialin filmik, duke kërkuar se kujt ishte duke i shërbyer djali.