Mga Ideya alang sa Pag-uswag sa Tanang Aspeto sa Kinabuhi

Ang mosunod nga mga pahina adunay mga ideya kon unsaon nga makasunod ka sa Manluluwas ug mouswag sa tanang bahin sa imong kinabuhi. Dili kinahanglan nga gamiton nimo kini—ang pinakamaayo nga mga ideya posibli nga ang imo mismo! Pag-ampo kon unsa ang posibli nimo nga matrabaho karon dayon.

Makakita ka og dugang mga ideya sa ChildrenandYouth.ChurchofJesusChrist.org.

Mga Ideya Alang sa Espiritwal nga Pag-uswag

Unsay Imong mga Ideya?

Basaha ang Basahon ni Mormon Matag Adlaw

Himoa nga kinaiya ang pagbasa kada adlaw, bisan kon pipila lang ka bersikulo.

Pangandam sa Pag-adto sa Templo

Kat-oni ug sunda ang “Akong mga Sumbanan sa Ebanghelyo” (pahina 63), ug dapita ang uban sa pagbuhat sa ingon.

Kat-oni ang Mga Artikulo sa Hugot nga Pagtuo

Sag-oha ang Mga Artikulo sa Hugot nga Pagtuo (pahina 62), ug kat-oni unsa ang gipasabut niini.

Palamboa ang Imong mga Pag-ampo

Sa dili ka pa mag-ampo, hunahunaa kon unsa ang imong pasalamatan ug kon unsa nga tabang ang imong gikinahanglan.

Pasalamati ang Langitnong Amahan sa Imong mga Panalangin

Pagsulat og tulo ka butang nga mapasalamaton ka. Sulayi pagsulat og tulo ka bag-o nga butang matag adlaw.

Himoa nga Balaan ang Adlaw nga Igpapahulay

Desisyoni unsa ang puwede nimong sugdan o hunongon aron himoong espesyal nga adlaw ang Igpapahulay.

Pangalagad og Usa ka tawo

Pangita og mga paagi sa pagtabang og usa ka tawo sa imong pamilya, sa eskwelahan, o sa simbahan.

Trabahoa ang Family History

Sulati ang usa ka apohan, iyaan, o uyoan. Hangyoa sila sa pag-istorya nimo mahitungod niadtong panahon nga parehas pa sila nimo og edad.

Ipaambit ang Ebanghelyo

Pakig-istorya sa usa ka higala bahin sa ebanghelyo. Dapita ang imong higala ngadto sa simbahan o sa usa ka kalihokan sa Simbahan.

Itudlo ang Ebanghelyo

Itudlo ang imong paborito nga sugilanon sa kasulatan ngadto sa imong pamilya. I-drama kini o pagdrowing og mga hulagway nga makatabang nimo sa pagtudlo.

Kantaha ang usa ka Awit sa Primary

Kanta uban sa usa ka sakop sa pamilya. Bantayi kon sa unsang paagi ang pagpaminaw sa maayo nga musika makaapekto sa imong pagbati.

Mga Ideya Alang sa Sosyal nga Pag-uswag

Unsay Imong mga Ideya?

Pagkat-on mahitungod sa Pamilya

Basaha ang “Ang Pamilya: Usa ka Pamahayag ngadto sa Kalibutan” ug sultihi ang imong mga ginikanan mahitungod sa unsay imong nakat-unan.

Pagpakita og gugma ngadto sa Imong Pamilya

Paghimo og usa ka butang nga maayo alang sa mga tawo sa imong pamilya.

Ilakip ang Uban

Pangitag mga paagi sa paggahin og panahon o pagserbisyo og usa ka tawo kinsa tingali mibati nga napasagdan o kinsa nanginahanglan sa imong pakighigala.

Pagkat-on mahitungod sa Ubang mga Kultura

Pagbasa mahitungod sa ubang mga kultura, pakigsulti sa mga tawo gikan sa laing mga nasud, o tambong sa usa ka selebrasyon sa kultura duol sa inyo.

Serbisyohi ang Imong mga Silingan

Kauban sa imong mga ginikanan o mga lider, pagbuhat og usa ka butang sa imong komunidad aron sa pagtabang sa mga tawo nga nanginahanglan.

Pagkat-on sa Pagpangayo og Pasaylo ug sa Pagpasaylo

Pagdrama og sitwasyon diin ang usa ka tawo kinahanglan nga mangayo og pasaylo o mopasaylo. Bansaya unsaon pagpaambit sa imong mga pagbati ug pagtubag.

Pagkat-on Bahin sa Imong Komunidad

Pagbisita og usa ka police station, fire station, o laing serbisyo komunidad. Hibaloi unsay ilang gibuhat, ug pasalamati sila sa ilang serbisyo.

Pagbaton og Bag-ong Higala

Ipaila ang imong kaugalingon sa usa ka bag-ong tawo, ug dapita kana nga tawo sa pagpakigdula nimo.

Sulti og Mabination nga mga Pulong

Bansaya ang paggamit lamang og mga pulong nga makapalipay sa usa ka tawo, dili makaguol. Paghisgut unsay imong ikasulti kon ang usa ka tawo mosulti og dili mabination nga pulong diha nimo.

Kontrolaha ang Imong Kainit sa Ulo

Bansaya ang pagkalma kon maglagot ka. Sama pananglit, ginhawa og lawom, pag-ihap og hangtud sa 10, o hunahunaa nga naa ka sa imong paborito nga lugar.

Abi-abiha ang Uban

Ipaila ang imong kaugalingon sa bag-ong kahimamat sa imong eskwelahan, kasilinganan, o ward o branch. Tabangi kining tawhana nga makahimamat og ubang mga tawo.

Mga Ideya Alang sa Pisikal nga Pag-uswag

Unsay Imong mga Ideya?

Kat-uni ang Pagluto

Tabang sa pag-andam og usa ka makapahimsog nga pagkaon o snack. Ipakigbahin kini sa imong pamilya o mga higala.

Himoang Kusgan ang Imong Lawas

Pagbuhat kanunay og mga butang nga makapalihok sa imong lawas, sama sa sports, sayaw, ehersisyo, o dula-dula sa gawas.

Respetohi ang Imong Lawas

Limpyohi ang imong lawas kada adlaw. Kaligo pirmi. Pag-toothbrush ug atimana ang imong buhok matag adlaw.

Atimana ang Inyong Balay

Pagbuhat og butang nga makahimo sa inyong panimalay nga usa ka maanindot nga dapit nga kapuy-an, sama sa paglimpyo, pag-decorate, o buluhaton sa nataran.

Atimana ang mga Butang nga Imong Gipanag-iya

Hangyoa ang imong mga ginikanan nga motudlo nimo unsaon pag-ayo o pag-atiman sa imong mga gamit.

Pagkat-on og Bag-o nga Kahanas sa Arte

Pagdrowing, pagpintura, o pag-sketch og usa ka litrato, ug ihatag kini sa usa ka tawo nga imong gihigugma.

Pagkat-on og Bag-o nga Kahanas sa Musika

Pagkat-on sa pagkanta og usa ka kanta, paggamit og instrumento, o pagkumpas og musika. Itanyag ang pagpaambit sa imong kahanas diha sa home evening o laing kalihokan.

Sunda ang Pulong sa Kaalam

Basaha ang Doktrina ug mga Pakigsaad 89 aron makita kon unsa ang gisaad sa Langitnong Amahan kon imong sundon ang Pulong sa Kaalam. Desisyoni unsay mas maayong paagi sa pagsunod niini.

Pahimusli ang Oras sa Gawas

Paglakaw-lakaw o pag-hike uban sa pamilya o mga higala aron masuhid ang kalibutan nga naglibut nimo.

Ipakigbahin ang ImongTalento

Ipaambit ang usa sa imong mga talento sa usa ka tawo nga magul-anon.

Pangandam alang sa mga Emerhensiya

Pagbuhat og plano uban sa imong mga ginikanan o mga lider alang sa unsay buhaton atol sa emerhensiya.

Mga Ideya Alang sa Intelektwal nga Pag-uswag

Unsay Imong mga Ideya?

Pagkat-on mahitungod sa Ikapulo

Pagkat-on nganong importante ang pagbayad og ikapulo. Hatag og ikanapulo nga porsento sa imong kita ngadto sa Ginoo.

Palamboa ang Imong mga Kahanas sa Pagbasa

Pagbasa og libro mahitungod sa usa ka bag-o nga hilisgutan, o pagbasa og libro nga mas taas kay sa kasagaran nimo nga gibasa.

Pagkat-on Unsaon nga Mahimong Luwas kon Mag-online

Paghimo og lista sa mga lagda sa inyong pamilya sa paggamit og internet o mga apps.

Pagkat-on og Butang nga Bag-o

Pagpili og usa ka butang nga interesado ka, ug kat-uni ang tanan kutob sa imong mahimo mahitungod niini.

Tambong o Tan-aw og mga Kalihukan nga Pang-kultura [Cultural Event]

Pamisita og usa ka museum o kalihokan nga pang-kultura sa inyong dapit. Pakigsulti sa imong mga higala o pamilya mahitungod sa usa ka bag-ong butang nga imong nakat-unan.

Pagkat-on Bahin sa Lain-laing mga Trabaho

Pamisita og kaila nimo didto sa ilang trabahoan aron makat-on unsa ang ilang gibuhat ug unsay mga pamaagi.

Pagkat-on mahitungod sa mga Tawo nga Imong Gidayeg

Puwede ni siya nga imong kaila o usa ka tawo gikan sa kasaysayan o sa kasulatan. Pagdesisyon kon unsaon nimo nga mahimong mas sama nila.

Pagkat-on kon Unsaon Paghimo og Maayo nga mga Pagpili

Tanang mga pagpili adunay mga sangputanan, nga mao ang mga butang nga mahitabo isip resulta sa unsay imong gibuhat. Paghimo og lista sa ubang mga pagpili ug ang ilang mga sangputanan.

Palamboa ang Imong Panumduman

Pagmemorya og paborito nga kasulatan, balak, o kanta.

Pagkat-on og Bag-o nga Pinulongan

Pagkat-on unsaon pagsulti og hello ug ubang simple nga mga pulong sa laing pinulongan. Pagbansay uban sa usa ka tawo nga naggamit niana nga pinulongan, kon posible.

Pagsulat og Istorya

Pagsulat og istorya mahitungod sa imong kinabuhi o mahitungod sa usa ka sakop sa pamilya.