Taekan te Onimaki

1 Ti kakoauaa te Atua, te Tama ae Akea Tokina, ao Natina, ae Iesu Kristo, ao te Tamnei ae Raoiroi.

2 Ti kakoauaa ae a na katuuaeaki aomata nako ibukin oin aia bure, ao tiaki ibukin riaoan te tua iroun Atam.

3 Ti kakoauaa bwa man Ana Mwakuri ni Kamaiu Kristo, a kona iai aomata nako ni kamaiuaki, n te ongeaba nakon tuua ao otenanti n te Euangkerio.

4 Ti kakoauaa bwa moan tuua ao otenanti n te Euangkerio bon: te moan, te Onimaki iroun te Uea ae Iesu Kristo; te kauoua, te Rairannano; te kateniua, te Bwabetito ni kateboaki i an te ran ibukin kamaunaan buure; te kaaua, te Katokabai ibukin te bwaintituaraoi ae te Tamnei ae Raoiroi.

5 Ti kakoauaa bwa e riai ni weteaki te aomata iroun te Atua n te taeka ni burabeti, ao man te katokabai irouia naake a kariaiakaki, bwa e na tataekina te Euangkerio ao ni karaoi taian otenanti ake iai.

6 Ti kakoauaa te bootaki naba ae ti te arona ma are iai ngkoa inanon te Ekaretia ni Kawai, aika abotoro, burabeti, minita, taan reirei, taan tataekina te euangkerio,ao tabeman riki.

7 Ti kakoauaa te bwaintituaraoi n neewe, taeka ni burabeti, kaotioti, mii ni burabeti, katoki aoraki, rairan neewe, ao tabeua riki.

8 Ti kakoauaa te Baibara ae ana taeka te Atua ngkana e eti rairana; ti kakoauaa naba Ana Boki Moomon bwa ana taeka te Atua.

9 Ti kakoauai bwaai nako ake e a tia ni kaoti te Atua, bwaai ni kabane ake E kaoti ngkai, ao ti kakoauaa bwa E na manga kaoti bwaai aika mwaiti aika korakora ma ni kakaawaki aika a kaineti ma Uean te Atua.

10 Ti kakoauaa manga ikotakin Iteraera ao kaokakin baronga ake tebwina; bwa Tion (te Ierutarem ae boou) e na kateaki iaon te kontenanti ae Amerika; bwa Kristo bon ngaia ae e na tautaeka i aon te aonaaba; ao, bwa te aonaaba e na manga kaboouaki ma ni karekea mimitongina ni bwaretaiti.

11 Ti tangira te inaomata n taromauriia te Atua ae moan te mwaaka ni kaineti ma ara iango, ao ni kariaia aomata nako te inaomata naba anne, bwa a na taromauri ni kangaa, n te tabo raa, ke are a rineia.

12 Ti kakoauaa ae ti kabaeaki nakoia uea, beretitenti, taan tautaeka, ao taan moti, n ongotaeka ni karinea, ao ni boutokaa te tua.

13 Ti kakoauaa ae ti riai ni kokoaua, n etieti, n itiaki, n akoi n raoiroi, ao ni kakaraoa ae raoiroi nakoia aomata ni kabaneia; e koaua, ti kona n atongnga bwa ti ira ana kauring Bwauro—Ti kakoauai bwaai ni kabane, ti kantaningai bwaai ni kabane, ti a tia n teimatoa rinanon bwaai aika mwaiti,ao ni kantaningaia bwa ti na kona n teimatoa rinanon bwaai ni kabane. Ngkana iai te bwai ae raoiroi, ae kakateke ke ae tamaroa rongorongona, ke e kamoamoaaki, ti ukoukori bwaai aikai.

Iotebwa Timiti.