Usa ka Sundanan sa Pag-uswag

Ang pag-uswag importante nga bahin sa plano sa Langitnong Amahan. Aron matabangan ka, ang Langitnong Amahan mohatag kanimo og giya gikan sa Espiritu Santo, mga kasulatan, ug buhi nga mga propeta. Makakat-on ka gikan sa imong mga kasinatian, ilabi na kon mosalig ka ni Jesukristo ug sa Iyang Pag-ula. Aniay sundanan nga makatabang kanimo sa pagsunod sa ebanghelyo sa tanang aspeto sa imong kinabuhi.

Diskubreha unsay kinahanglan nimong trabahoon.

Planuha unsaon nimo pagbuhat niini.

Buhata ang imong plano uban sa hugot nga pagtuo.

Pamalandungi ang imong nakat-unan.

Pag-ampo ngadto sa Langitnong Amahan alang sa direksyon. Hatagi og pagtagad ang imong mga hunahuna ug mga pagbati.

“Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo.”

Doktrina ug mga Pakigsaad 8:2

Diskubreha

Imong mga Panginahanglan, mga Gasa, ug mga Talento

Diskubreha: Susiha, Tun-i, Hunahunaa, Pangitaa

Ang Langitnong Amahan mihatag kanimo og mga gasa, mga talento, ug mga abilidad. Gusto Niya nga imo kining madiskubre ug mapalambo aron mahimong mas maayo ang imong kaugalingon, ang ubang mga tawo, ug gani ang kalibutan. Unsaon nimo sa pag-usbaw ug pag-uswag?

Sulayi ang pagpangutana og sama sa:

• Unsay gibati nako nga kinahanglan nakong makat-unan o mausab sa akong kinabuhi?

• Unsa nga mga talento o mga kahanas ang gusto nakong maangkon?

• Unsa nga espirituhanong pamatasan ang kinahanglan nakong mapalambo o mapausbaw?

• Unsaon nako pagtuman ang mga pakigsaad nga akong gihimo sa dihang gibunyagan ko?

• Kinsay pwede nakong serbisyohan?

Ang Langitnong Amahan motubag niini nga mga pangutana kon mosalig ka Kaniya. Pag-ampo. Siksika ang mga kasulatan ug ang mga pulong sa buhi nga mga propeta. Basaha ang imong patriyarkal nga panalangin, kon aduna ka. Kat-uni ang pag-ila sa mga pagbati ug mga hunahuna nga gikan sa Espiritu Santo. Motabang Siya kanimo nga masayud unsa ang labing importante alang kanimo karon. Kon dili ka sigurado unsay buhaton, tan-awa ang mga pahina 58–63.

“Kinahanglan gayud nga magtuon niini diha sa imong hunahuna; unya … mangutana kanako kon kini husto.”

Doktrina ug mga Pakigsaad 9:8

Planuha

Sa Pag-usbaw

Planuha: I-organisar, Ilatid, Iandam

Sa higayon nga nakahukom na ka unsay kinahanglan nimong trabahoon, paghimo og plano unsaon nimo sa pagbuhat niini. Ang imong plano mahimong maglakip og piho nga mga lakang o mga buhat, o mahimong maglakip kini og mga paagi sa pagpalambo og pamatasan o personal nga hiyas.

Sulayi ang pagpangutana og sama sa:

• Nganong importante man kini kanako?

• Sa unsang paagi kini makatabang kanako nga mahimong mas sama kang Jesukristo?

• Unsa nga mga buhat ang akong himoon aron makab-ut kini?

• Mabahin-bahin ba nako kini nga mga buhat ngadto sa gagmay nga mga lakang?

• Unsa nga mga plano ang mahimo nako karon aron sa pagbuntog sa mga hagit nga akong giatubangan?

Pag-ampo mahitungod sa imong plano, ug hatagig pagtagad ang mga pagbati ug mga ideya nga imong makuha. Makapangayo ka sa tabang sa Espiritu Santo, sa imong pamilya, ug sa imong mga lider.

“Ang mga pulong ni Kristo magtug-an kaninyo sa tanan nga mga butang nga inyong buhaton.”

2 Nephi 32:3

Buhata

Aron Mouswag sa Pagtuo

Buhata: Sulayi, Praktisi, Himoa ang Imong Labing Maayo

Sunda ang imong plano! Paghimo og mga pahinumdom nga makatabang kanimong magpabiling nakatutok. Makahimo ka og mubong sulat, mo-set og alarm, o mohangyo og tawo nga motrabaho uban nimo. Usahay ang pagbuhat sa imong plano lisud. Usahay mapakyas ka. Okey ra na! Ang pagkat-on unsay mosalir ug dili mosalir makatabang nimo nga mouswag.

Kon maglisud ka sa pag-uswag, sulayi ang pagpangutana og sama sa:

• Unsay misalir? Ngano man?

• Unsay wala mosalir? Nganong wala man?

• Unsa pa ang akong masulayan?

• Asa ko makakuha og dugang nga mga ideya?

• Mabahin-bahin ba nako ang akong tumong ngadto sa gagmay nga mga lakang o mga buhat?

• Unsaon nako sa pagkat-on gikan sa wala damhang mga babag?

Ang maayong pagbuhat sa usa ka butang nagkinahanglan og praktis ug pailub. Pangayo og tabang sa imong pamilya, mga higala, o mga lider. Ang Manluluwas nakaila kanimo ug sa mga hagit nga imong giatubang. Makatabang Siya kanimo sa pagbuhat sa lisud nga mga butang. Pag-ampo alang sa tabang ug direksyon.

“Sa pagkatinuod Ako moingon, [ikaw] kinahanglan nga matinguhaon nga moapil diha sa usa ka maayo nga katuyoan, ug mobuhat og daghan nga mga butang diha sa [imong] kaugalingon nga gawasnon nga kabubut-on.”

Doktrina ug mga Pakigsaad 58:27

Pamalandungi

Ang Imong Nakat-unan

Pamalandungi: Hunahunaa, Kat-uni, Ribyuha, Hinuktuki

Pamalandong mahitungod sa imong mga tumong ug mga plano samtang nagtrabaho ka niini ug kon mahuman na ka. Unsay imong gibati? Unsay inyong nakat-unan? Ang pagsulat sa mga hunahuna ug mga impresyon mahimong makatabang kanimo sa umaabut.

Sulayi ang pagpangutana og sama sa:

• Sa unsang paagi ako miuswag?

• Unsaon nako sa paggamit ang akong nakat-unan aron sa pagserbisyo sa uban?

• Sa unsang paagi ang akong mga gibuhat nakatabang kanako nga mas mapaduol sa Manluluwas?

• Unsaon nako nga padayong mouswag niini nga aspeto?

Kon mahuman na ka og trabaho sa imong tumong o plano, pasalamati ang Langitnong Amahan ug kadtong mitabang kanimo. Pamalandungi ang tahas sa Manluluwas diha sa imong kinabuhi kon moambit ka sa sakramento. Paghunahuna ug pag-ampo mahitungod sa unsay mabuhat nimo sunod.

“Pamalandungi ang alagianan sa imong mga tiil.”

Mga Proverbio 4:26

Sauloga ang imong pag-uswag! Paglipay mahitungod sa imong pag-uswag ug mga kalampusan.