“Maysa a Pagtuladan para iti Panagdur-as,” Bukod a Panagdur-as: Pangiwanwan a Pagbasaan dagiti Agtutubo (2019)
“Maysa a Pagtuladan para iti Panagdur-as,” Bukod a Panagdur-as: Pangiwanwan a Pagbasaan dagiti Agtutubo
Maysa a Pagtuladan para iti Panagdur-as
Ti panagdur-as ket maysa a napateg a paset ti plano ti Nailangitan nga Ama. Tapno matulongannaka, mangted kenka ti Nailangitan nga Ama iti pannarabay manipud iti Espiritu Santo, dagiti nasantuan a kasuratan, ken dagiti sibibiag a propeta. Makasursurokanto manipud kadagiti padasmo, nangnangruna no agpannurayka ken ni Jesucristo ken iti Pannubbotna. Daytoy ti maysa a pagtuladan a mangtulong kenka nga agbiag iti ebanghelio iti amin a tay-ak ti biagmo.
Agtakuat no ania ti kasapulam nga itrabaho.
Agplano no kasano nga aramidemto daytoy.
Agtignay iti planom a sipapammati.
Agpanunot a Nasayaat maipapan iti no ania ti nasursurom.
Agtakuat
Dagiti Kasapulam, Sagutmo, ken Talentom
Nangted kenka ti Nailangitan nga Ama kadagiti sagut, talento, ken kabaelan. Kayatnaka a mangtakuat ken mangpadur-as kadagitoy tapno aramidem a nasaysayaat ti bagim, ti dadduma pay a tao, ken uray pay ti lubong. Kasano a mabalinmo ti sumayaat ken dumur-as?
Padasem ti panagdamag kadagiti saludsod kas iti:
-
Ania ti mariknak a nasken a sursuruek wenno balbaliwan iti biagko?
-
Ania dagiti talento wenno paglaingan a kayatko a gun-oden?
-
Ania dagiti naespirituan a galad a kasapulak a padur-asen ken pasayaaten?
-
Kasano a matungpalko dagiti katulagan nga inaramidko idi nabuniaganak?
-
Asino ti mabalin a pagserbiak?
Sungbatanto ti Nailangitan nga Ama dagitoy a saludsod no agpannurayka Kenkuana. Agkararag. Sukisokem dagiti nasantuan a kasuratan ken balikas dagiti sibibiag a propeta. Basaem ti patriarchal blessingmo, no addaanka iti daytoy. Sursuruem ti mangilasin kadagiti rikna ken kapanunotan manipud iti Espiritu Santo. Tulongannakanto a mangammo no ania ti kapatgan para kenka ita met laeng. No saanka a sigurado iti no ania ti aramidem, kitaen kadagiti panid 58–63.
Agplano
A Sumayaat
Apaman a naikeddengmo no anianto ti itrabahom, agaramidka iti plano no kasano a maaramidmo daytoy. Mabalin nga iraman iti planom dagiti naitudo nga addang wenno tignay, wenno mabalin nga iraman dagiti wagas tapno mapadur-as ti maysa nga ugali wenno bukod a kababalin.
Padasem ti panagdamag kadagiti saludsod kas iti:
-
Apay a napateg daytoy kaniak?
-
Kasano a makatulongto daytoy kaniak nga agbalin nga ad-adda pay a kas ken ni Jesucristo?
-
Ania dagiti tignay a mabalinko nga alaen a mangaramid iti daytoy?
-
Mabalinko kadi a pagsisisinaen dagitoy a tignay iti babbabassit nga addang?
-
Ania dagiti plano a mabalinko nga aramiden itan tapno maparmek dagiti karit a mabalin a pakaipasanguak?
Ikararagam ti planom, ket ikasom dagiti rikna ken kapanunotan a magun-odmo. Mabalinmo ti agpatulong iti Espiritu Santo, iti pamiliam, ken dagiti lidermo.
Agtignay
A Dumur-as a Sipapammati
Surotem ti planom! Agaramidka kadagiti palagip a mangtulong kenka nga agtalinaed a nakapokus. Mabalinmo ti agaramid iti maysa a note, mangi-set iti alarm, wenno idawat iti maysa a tao a tulongannaka. Sagpaminsan a marigatankanto iti panangitrabahom iti planom. Sagpaminsan a mapaaykanto. Okey laeng dayta! Ti panangsursurom no ania ti mayat ken madi a maitrabaho ket makatulong kenka a dumur-as.
No adda lappedmo, padasem ti panagdamag kadagiti saludsod kas iti:
-
Ania ti mayat a naitrabaho? Apay?
-
Ania ti madi a naitrabaho? Apay a saan?
-
Ania pay ti mabalinko a padasen?
-
Sadino ti pakaalaak iti ad-adu pay a kapanunotan?
-
Mabalinko kadi a pagsisisinaen ti panggepko a tun-oyen iti babbabassit nga addang wenno tignay?
-
Ania ti masursurok manipud kadagiti tubeng?
Adu a panagsanay ken panaganus ti panagaramid iti banag a nasayaat. Agpatulongka iti pamiliam, iti gagayyem, wenno dagiti lidermo. Am-ammonaka ti Mangisalakan ken dagiti karit a sangsanguem. Matulongannaka nga agaramid kadagiti narigat a banag. Agkararagka para iti tulong ken panangiturong.
Agpanunot a nasayaat
Iti No Ania ti Nasursurom
Utobem maipapan kadagiti panggepmo a tun-oyen ken planom kabayatan ti panangitrabahom kadagitoy ken no malpasmo. Kumusta ti panagriknam? Ania ti nasursurom? Ti panangisuratmo kadagiti kapanunotan ken impresion ket makatulong kenka iti kamaudiananna.
Padasem ti panagdamag kadagiti saludsod kas iti:
-
Kasano a dimmur-asak?
-
Kasano a mausarko no ania ti nasursurok tapno agserbi kadagiti dadduma?
-
Kasano a nakatulong kaniak dagiti tignayko nga agbalin a naas-asidegak iti Mangisalakan?
-
Kasano a maitultuloyko ti panagdur-as iti daytoy a tay-ak?
No nalpasmon ti panangitrabaho iti maysa a panggep a tun-oyen wenno plano, agyamanka iti Nailangitan nga Ama ken dagiti tao a timmulong kenka. Panunotem a nasayaat ti akem ti Mangisalakan iti biagmo no makiranudka iti sakramento. Panunotem ken ikararagam maipapan iti mabalinmo nga aramiden iti sumaruno.