“Jun eetalil re chaab’ilo’k,” Li chaab’ilob’resink-ib’: Tenq’anel hu choq’ reheb’ li saaj (2019)

“Jun eetalil re chaab’ilo’k,” Li chaab’ilob’resink-ib’: Tenq’anel hu choq’ reheb’ li saaj

Jun eetalil re chaab’ilo’k

Li chaab’ilo’k a’an jun aajel ruhil xcha’al lix k’uub’anb’il na’leb’ li qaChoxahil Yuwa’. Re aatenq’ankil, li qaChoxahil Yuwa’ naxk’e aab’eresinkil rik’in li Santil Musiq’ej, eb’ li loq’laj hu, ut eb’ li yo’yookil profeet. Tattzoloq rik’in li k’a’ru taanumsi, a’ tz’aqal naq taakanab’ aawib’ sa’ ruq’ li Jesukristo ut lix tojb’al rix li maak kixb’aanu. A’in jun eetalil re aatenq’ankil chixyu’aminkil li evangelio sa’ chixjunil xcha’alil laa yu’am.

Taw k’a’ru tatk’anjelaq wi’.

K’uub’ chan ru naq taabʼaanu.

B’aanu jo’ chanru naxye laa k’uub’anb’il na’leb’ rik’in paab’aal.

saaj neke’k’anjelak chiruheb’ ras riitz’in

K’oxla rix li xatzol.

Xtawb’al

Li ajb’il ru aab’aan, laa maatan, ut eb’ laa seeb’al

Li qaChoxahil Yuwa’ xk’ehom chaq aamaatan, aaseeb’al, ut aachaab’ilal. A’an naraj naq taataweb’ a’an ut taachaab’ilob’resiheb’ re aachaab’ilob’resinkil aawib’, eb’ li kristiaan, jo’ ajwi’ li ruchich’och’. Chan ru naru nakatchaab’ilo’ ut nakatk’i?

Yal roksinkileb’ li patz’om jo’eb’ a’in:

K’a’ru naweek’a naq tento raj tintzol malaj tinjal sa’ lin yu’am?
K’a’ru li seeb’al malaj chaab’ilal nawaj xtawb’al?
K’a’ruheb’ li musiq’ejil b’aanuhom tento tinb’aanu malaj tinchaab’ilob’resi xb’aanunkil?
Chan ru naru tinwoxloq’i li sumwank xinb’aanu naq xkub’e chaq inha’?
Ani naru tink’anjelaq wi’?

Li qaChoxahil Yuwa’ tixsumeheb’ li patz’om a’in naq taakanab’ aawib’ sa’ ruq’ a’an. Tijon. Tzoleb’ li loq’laj hu ut li raatineb’ li profeet sa’ roso’jikeb’ li kutan. Il ru li rosob’tesihom li yuwa’b’ejil aj k’anjel, wi wan laa we. Tzol xk’eeb’al reetal li eek’ahom ut li k’a’ru naxk’e sa’ laa k’a’uxl li Santil Musiq’ej. A’an tatxtenq’a chixnawb’al k’a’ru li mas aajel ru choq’ aawe anajwan. Wi ink’a’ mas ch’olch’o chawu k’a’ru tento taab’aanu, il sa’eb’ li perel 58–63.

Xk’uub’ankil

Re chaab’ilo’k

Naq ak xanaw k’a’ru tatk’anjelaq wi’, k’uub’ chan ru naru taab’aanu. Laa k’uub’anb’il na’leb’ naru naxk’am li b’e malaj k’a’ru taab’aanu tz’aqal, malaj chan ru taak’aytesi aawib’ malaj tatchaab’ilo’q.

Oksiheb’ patz’om jo’eb’ a’in:

K’a’ut naq aajel ru a’in choq’ we?
Chan ru tinixtenq’a a’in chi wulak jo’ li Jesukristo?
K’a’ru naru tinb’aanu re xtz’aqob’resinkil ru a’in?
Ma naru tinjachi ru a’in sa’ jalan jalanq kok’ k’anjel?
K’a’ru naru nink’uub’ re xq’axb’al ru li ch’a’ajkilal naru nintaw?

Tijon chirix laa k’uub’anb’il na’leb’, ut k’e reetal li eek’ahom ut li na’leb’ taak’ul. Naru nakatz’aama xtenq’ li Santil Musiq’ej, laa junkab’al, ut eb’ laj jolominel.

Xb’aanunkil

Re chaab’ilo’k sa’ li paab’aal

Taaqe laa k’uub’anb’il na’leb’! K’uub’ chan ru taajultiko’q aawe li tento taab’aanu. Naru nakatz’iib’a junaq ch’ina hu, nakawoksi jun alarma, malaj nakapatz’ re anihaq naq tatxtenq’a. Wan naq taach’a’ajko’q k’anjelak sa’ laa k’uub’anb’il na’leb’. Maare taak’ul li sachk. Maak’a’ naxye! Xk’eeb’al reetal k’a’ru nak’anjelak ut k’a’ru ink’a’ nak’anjelak nakatxtenq’a chi chaab’ilo’k.

Wi nakatkana chi t’ilt’o, oksiheb’ patz’om jo’eb’ a’in:

K’a’ru yoo chi k’anjelak? K’a’ut?
K’a’ru ink’a’ yoo chi k’anjelak? K’a’ut naq ink’a’?
K’a’ru chik naru tinyal?
B’ar raj tintaw xkomon inna’leb’?
Ma naru tinjachi ru lin jayalihom sa’ jalan jalanq kok’ k’anjel malaj b’aanuhom?
K’a’ru naru tintzol rik’in li ch’a’ajkilal?

Xb’aanunkil k’a’ruhaq chi chaab’il naraj xyalb’al ut li kuyuk. Patz’ aatenq’ re laa junkab’al, laa wamiiw, malaj eb’ laa jolominel. Li Kolonel naxnaw aawu ut naxnaw li ch’a’ajkilal nakanumsi. A’an naru nakatxtenq’a chixb’aanunkil li k’a’ru ch’a’aj. Tijon re xpatz’b’al aatenq’ ut aab’eresinkil.

Xk’oxlankil rix

Li xatzol

K’oxlan chirixeb’ laa jayalihom ut laa k’uub’anb’il na’leb’ naq yooqat chixk’anjelankileb’ ut naq tatraqe’q. K’a’ru nakaweek’a? K’a’ru li xatzol? Xtz’iib’ankileb’ laa k’a’uxl ut laa week’ahom naru nakatxtenq’a moqon.

Oksiheb’ patz’om jo’eb’ a’in:

Chan ru xinchaab’ilo’?
Chan ru naru nawoksi li xintzol re k’anjelak chiruheb’ li was wiitz’in?
Chan ru naq li ninb’aanu nikinixtenq’a chi wank chi nach’ chi us rik’in li Kolonel?
Chan ru naru naq toj yooqin chi chaab’ilo’k sa’ li na’leb’ a’in?

Naq tatraqe’q chi k’anjelak sa’ junaq laa jayalihom malaj k’uub’anb’il na’leb’, b’antioxi re laa Choxahil Yuwa’ ut reheb’ ajwi’ li xe’tenq’ank aawe. K’oxlan chirix lix k’anjel li Kolonel sa’ laa yu’am naq nakattz’aqon sa’ li loq’laj wa’ak. K’oxlan ut tijon chirix k’a’ru tatk’anjelaq wi’ moqon.