“Sapta 3: Lutlutkihn ac Luti ke Wosasuc luhn Jisus Kraist,” Luti Wosasuc Luhk: Sie Mwe Kol nuh ke Akacsruhi ke Wosasuc luhn Jisus Kraist (2023)
“Lutlutkihn ac Luti ke Wosasuc luhn Jisus Kraist,” Luti Wosasuc Luhk
Sapta 3
Lutlutkihn ac Luti ke Wosasuc luhn Jisus Kraist
Lesin ke sapta se inge nein mwe luti, ip yohk, ac masap yohk srihpac ke wosasuc luhn Jisus Kraist. Lesin inge pa ma suc mwet pahluh ac mwet sap moul elos luti kom in lotwelah ac luti. Ma inge fihliyucki inse tuh kom in kuh in kahsruh mwet sahyac in kahlwem na pwacye ke mwe luti luhn Kraist.
Ip se emet ke sapta se inge pa Solsol in Pacptais. Sapta sahyac an nwacnwack lesin ahkosr inge:
Lutlutkihn ma suhmuhslah ac karuhnguhnwacng na mwe luti ke kais sie lesin an. Ke kom oruh ohinge, Nguhn ac fah ahklohoh ke pwacye luhn ma kom lutlutkihn an. El fah kahsre kom in etuh lah meac kom in fahk ac oruh in kahsruh mwet sahyac in eis lohoh ke ma pwacye. (Liye Doctrine and Covenants 84:85.)
Ac fah yohkwaclihk etwacack luhn mwet uh kacn Mwet Lahngo ke elos oruh ma suc El solwaclos in oruh. Oruh solsol an ke kais sie lesin an, ac kahsruh mwet uh in liyacacng na olweacng lalos an. Ke mwet uh liyacacng na olweacng an, elos muhtwacwacack in moulkihn wosasuc luhn Jisus Kraist ac ahkolah in oruh wuhlweacng yurun God.
Luti lesin an kwewa met liki ac tukun pacptais. Full-time misineri an in kol luti ke lesin an ke kwewana pacl an. Misineri ke ward an kuh mempucr sahyac an kuh in wi fin kuh. Liye sapta 10 ac 13 nuh ke mwe sihm ahkkahlwemye ke lwelah mempucr an in luti.
Ahkolah in Luti
Ke kom ahkolah in luti, riti mwe sihm ahkkahlwemye kacn kais sie mwet ke app se ke Luti Wosasuc Luhk. Oraclah plwacn ke lesin an in fal nuh ke enenuh luhn mwet sacn. Motko ke ma el enenuh in etuh ac puhlakihn ke muhtwacta luti lom an. Nguhn ac fah ahkkweye insacnweacng lom ke kom sislah pacl in ahkolah ac plwacnelah an.
Pa inge kuhtuh kihsensiyuck nuh sum ac mwet se wi kom forfor luti an in pruhe motko ke kom ahkolah in luti an.
-
Solsol fuhkah kuht ac kohllah in kahsruh mwet sacn in muhsaheack luhlahlfongi ke Kraist ac in kapkapwack? Solsol pa ohiyac se ma kom kuh in kahsruh mwet uh in auliyak ac puhlakihn “kuh luhn Mwet in Molwelah,” (Helaman 5:11). Motko kapkapwack, ohiyacn moul, ac enenuh luhn mwet sacn. Na sang solsol se kuh puhs nuh ke lesin plwacn lom an.
-
Mwe luti ac ip yohk fuhkah ac kahsruh mwet sacn in liyacacng olweacng ma kuht solwel in oruh? Pruhe sulaclah lah mwe luti ac ip yohk fuhkah ac kahsruh mwet uh in kahlwem kac lah efuh liyacacng olweacng lalos yohk srihpac nuh selos ac nuh sin Leum.
-
Kuht ac kahsruh mwet sacn fuhkah in lotwelah mwe luti uh? In ahkolah in luti mwe luti, tahkuhnlah ac esamyac ma kom ac fah luti orekmakihn lesin 1–4. Srihsrngiyac kihsensiyuck, ma suhmuhslah, mwe srihkasrak, ac media fal wo ma ac fah kahsruh mwet sacn in kahlwem ke ma kom luti an. Liye sapta 10 nuh ke kahs in ahkkahlwemye lah kom ac ahkwoyelah fuhkah luti lom an.
-
Mwe insewowo fuhkah God El olwelah ke kom insese ac liyacacng olweacng an? Ke kom lutlutkihn mwe luti, srihsrngiyac mwe insewowo uliyuck sin God. Ke kom luti, olwelah ke insewowo ac ahklohye ke ma inge kwewa.
-
Suc kac mempucr ma kuh in wi an? Ke miting in plwacnlac ke kais sie wik an, sulaclah lah suc kac mempucr ma kuh in kahsre kom luti ac kahsruh mwet sacn. Met liki lesin an, sramsramkihn kunohkohn lalos an. Liye sapta 10.
-
Meac kuht kuh in oruh in kahsruh mwet uh in liyacacng na olweacng lalos an tukun kuht som? Sifil soklah ke kom sramsram kihtin pacl nuh selos in kahsrelos liyacacng olweacng lalos. Suk inkacnek in oruh mempucr an in wi kahsrelos suc kom luti in liyacacng olweacng lalos an. El kuh in riti sie sapta ke Puk luhn Mormon kuh ma suhmuhslah sahyac. Fin oasr mwet tiacna liyacacng olweacng el tuh oraclah an, sahp ac wo in kahsruh ke ma se ingacn met liki kom solwacl in oraclah siepac. Liye sapta 11.
-
Kuht ac kahsrelos in wo liki met ah fuhkah? Tukun pacl in lutlut nuh kwewa, nuhnkuh ke ma puhlakihnyuck lalos suc kom luti. Kuh luhlahlfongi lalos ke Kraist yohkwaclihk? Kuh elos puhlakihn Nguhn? Kuh elos auliyak ac oruh ac liyacacng olweacng? Kuh elos pruhe, lutlutkihn Puk luhn Mormon, ac wi alu? Orek plwacn in kahsrelos.
Luti ke Insiom Oacna ke Kolyuck sin Nguhn
Sramsram nuh sin elder ac sister an kwewa, Prestuhnsi Se Met ac U luhn Mwet Sap Singucul Luo elos fahk:
“Srihpac lasr uh pa in luti pweng ke wosasuc fohlohkihnyuckyak ke sie ohiyac ma lwelah Nguhn in kol kwewana misinacri ac elos suc lutiyuck an. Yohk srihpac in lotwelah ip yohk ke [lesin an], tuhsruhk ma inge tiac enenuh in luti kalweniyuck na. Misinacri an enenuh in sukohsohk in orekmakihn kahs lal sifacna oacna ke kolyuck sin Nguhn. El tiac enenuh in esamyac kalweni na, tuhsruhk sramsram ke insiacl ke kahs lal sifacna. El kuh in som liki tahk ke lesin an, wiwi na ma el mokleyuck in oruh an, in oacna nuh ke kena ac enenuh luhn [mwet sacn]. Sramsram ke nuhnak lal sifacna ac kahs lal sifacna, el enenuh in fahkwack luhlahlfongi ke ma pwacye ke luti lal.”
Luti ac Suli oacna nuh ke Enenuh luhn Kais Sie Mwet
Kom sukohsohk in luti lesin an ke oacna sie ohiyac ma kahsruh mwet uh in ahkolah in pacptaislac ac ahkkweyeyucklac. Piyac kac lesin kom luti, ngac kom in luti, ac luhpahkah pacl kom sang nuh kac an wotlac wo emet ke enenuh luhn mwet ma kom luti an ac ke kolyuck luhn Nguhn. In mwe srihkasrak, ke kom luti mwet tiac Christian, sahp kom kuh in muhtwacwacack in kahsrelos in oraclah inmahsrlo wowo yurun Pahpah Lucng ac etatwen ke plwacn Lal (liye “Luti Mwet Ma Tiac Christian” ke sapta 10).
Lwelah Nguhn in kol kom lah meac solsol kom ac sang, ac in sang ngac nuh selos. Solsol wo ke pacl fal wo kuh in mokle mwet uh in oruh ma ma ac fah muhsaheack luhlahlfongi lalos. Mukwikwi inge kuh in kol nuh ke sie eklac yohk ke insiac (liye Mosiah 5:2; Alma 5:12–14).
Luti lesin ma fihsrwacsr, kahlwem, ac fototo. Inkaiyac uh, sie forfor luti uh enenuh in tiac loes liki minit 30, ac kom kuh in luti mwet se ke minit 5.
Kom kwacna enenuh in ohsun pacl puhs in luti ip yohk ke sie lesin. Mwet uh kwacna kahlwem yohk ke pweng lom an kom fin luti lesin fototo, luti pacl puhkantwen, ac luti ip srihsrihk kac an.
Lutlutkihn Ma Suhmuhslah
Meac kom kolyuck in luti?
Efuh yohk srihpac in lutlutkihn mwe luti ke lesin an?