“Sapta 3: Solsol in Pacptaislac ac Ahkkweyeyucklac,” Luti Wosasuc Luhk: Sie Mwe Kol nuh ke Akacsruhi ke Wosasuc luhn Jisus Kraist (2023)
“Solsol in Pacptaislac ac Ahkkweyeyucklac,” Luti Wosasuc Luhk
Sapta 3
Solsol in Pacptaislac ac Ahkkweyeyucklac
Pwelucng luhn Mwe Luti
Kuht nuh kwewa tuhlihk nuhtin Pahpah Lucng. Kuht tuhkuh nuh facluh in eis pacl wo in lutlut, kapwack, ac eklac oacna El tuh kuht in kuh in fohlohk nuh ye Muhtahl (liye Moses 1:39). Kuht tiac kuh in eklac oacna El kuh fohlohk nuh Yohrohl fin wacngihn kahsruh muhtahllacna. Pahpah tuhmasr Inkuhsrao El suhpwacma Wen Nahtuhl, Jisus Kraist, in iwekuhtlac ac kuhnaoslah mwe kapihr luhn misac (liye 3 Nephi 27:13–22).
Kuht eis inkacnek nuh ke kuh ke molwelah luhn Kraist ke luhlahlfongi in El ke auliyak, pacptaislac, eis mwe sang luhn Nguhn Muhtahl ke ahkkweyeyucklac, ac muhtweng ne ke sahflah. Liyacacng wuhlweacng ke pacptais pa step se emet in pihnkuhtlac sifacna nuh sin God tuh Nguhn Muhtahl in kuh in ahknwacsnwacsye, ahkfokokoye, ac ekuhllah ohiyacsr in wolac liki met ah. Puhlakihn mokleyuck ahkmuhtahlyeyuck se inge uh pahngpahng sifilpac isuslac in nguhn. (Liye 2 Nephi 31:7, 13–14, 20–21; Mosiah 5:1–7; 18; 27:24; 3 Nephi 27:20; John 3:5.)
Sifilpac isuslac in nguhn uh muhtwacwacack ke kuht pacptaislac ke kof ac ke Nguhn. Pacptais el sie akwuck ma use engan ac finsrak. Ke kuht pacptaislac ke inse muhsahl ac toasr in nguhn, kuht muhtwacwacack moul sasuc se ke kuh ahkkweyeyuck luhn God. Tukun kuht pacptaislac ac ahkkweyeyucklac, kuht kuh in tahfwelah na in ahkkweyeyuck ke kuht wo fal in ipeis kuhfa luhn Leum. (Liye 2 Nephi 31:13; Mosiah 18:7–16; Moroni 6:2; Doctrine and Covenants 20:37.)
Oruh Solsol an
Ke kom puhlakihn kolyuck luhn Nguhn, suli mwet an in pacptaislac ac ahkkweyeyucklac. Ma se inge kuh in sikyak ke oacna sie lesin.
Luti mwe luti ke pacptais ac kahsruh mwet an in kahlwem ke mwe luti luhn Kraist (liye lesin 3). Luti ke yohk srihpaciyac ac engan ke wuhlweacng luhn pacptais, ke eis iyucklac luhn ma koluk, ac ke eis mwe sang luhn Nguhn Muhtahl ke ahkkweyeyucklac an.
Ahkoo mwet an nuh ke solsol in pacptais ke kom ahkpwacyeiye lah elos kahlwem ke ma kom luti an ac ke wuhlweacng ma elos fah oraclah. Wuhlweacng luhn pacptais an pa inge:
-
Insese in eis nuh facsr inen Jisus Kraist.
-
Karihngihn masap luhn God.
-
Kuhlwacnsuhpuh God ac mwet sahyac.
-
Muhtweng ne ke sahflah. (Liye lesson 4.)
Kom kuh in akacsruhi ke ma inge:
“Ke kuht pacptaislac, kuht ‘mwet loh ye muhtuhn [God] tuh [kuht] ilyak nuh ke sie olwelah yohrohl, tuh [kuht] fah kuhlwacnsuhpwacl ac karihngihn masap Lal.’ Ke kuht oraclah wuhlweacng se inge, El olwelah lah El fah ‘okwaclah Nguhnal in yohk nuh [facsr]’ (Mosiah 18:10).”
Solsol lom in pacptaislac an enenuh in srihsrngiyac na ac suwohswohsacng. Kom kuh in fahk:
“Kuh kom kuh in fasr tukun mwe srihkasrak luhn Jisus Kraist ke [kom] pacptaislac sin sie mwet suc akmuhsralah tari in oruh mukwikwi ke akwuck se inge? Kuht kuh in kahsre kom in ahkolah in pacptaislac. Kuht luhlahlfongi muh kom kuh in ahkolah ke [lwen]. Kuh kom kuh in ahkolah in pacptaislac ke lwen sacn?”
Oacna ke solsol nuh kwewa kom oruh an, olwelah ke mwe insewowo yohk ma mwet an fah eis ke elos insese nuh ke solsol in pacptaislac an ac liyacacng wuhlweacng ma kuhpahsr nuh kac an. Akacsruhi ke luhlahlfongi kuh lom ke mwe insewowo inge.
Luti lah pacptais ac ahkkweyeyucklac uh tiac pa acn sahflah uh. Tuhsruhk, elos pa kais sie acn ke inkacnek in eklac uh ma use finsrak, engan, ac kuh luhn God in yohk nuh ke moul luhn sie mwet (liye Mosiah 27:25–26). Tukun mwet uh pacptaislac ac ahkkweyeyucklac, elos kuh in ngwet nuh met nuh ke ahkmuhtahlyeyucklac ke Nguhn ke elos ahkwot nuh met ke inkacnek luhn wuhlweacng.
Fin kuh, solwaclos suc kom luti in som wi toeni in pacptais ac kuhfa luhn Leum ke pacl ma oasr mwet ac ahkkweyeyucklac an.
Nuhnak nuh ke Solsol in Pacptaislac an
Motko in riti sramsram fototo ke ma suhmuhslah ke Jisus El pacptaislac ah (liye Matthew 3:13–17). Kom kuh pac in oruh elos in liye video ke Bible ahkuhtweyac pacptais luhn Mwet Lahngo kuh video ke Puk luhn Mormon ke mwet tuhma lutlut luhn Mwet Lahngo elos pacptaisi mwet.
Kom kuh pac in riti sramsram fototo lal Nephi ke pacptais lal Jisus (liye 2 Nephi 31:4–12). Riti sramsram fototo ke pacptais lal Jisus Kraist uh kuh in ahkfokokoye elos suc lutiyuck an.
Lutlutkihn Ma Suhmuhslah
Lutlutkihn ma suhmuhslah an:
Suhmuhslah sie sihm fototo ke ma kom lotwelah an.