Sapta 3: Leson 2—Plen bilong Salvesen bilong Papa long Heven
“Sapta 3: Leson 2—Plen bilong Salvesen bilong Papa long Heven,” Tokaut long Gospel bilong Mi: Wanpela Gaid bilong Serim Gospel bilong Jisas Krais (2023)
“Sapta 3: Leson 2,” Tokaut long Preach My Gospel
Sapta 3: Leson 2
Plen bilong Salvesen bilong Papa long Heven
Piksa
Statsu bilong Kristus
Ol Pipol Bai Tingting
Wanem as bilong laip?
Mi Kam long We?
I gat God husat i kea long mi? Hau bai mi pilim klostu long God?
Hau bai mi bilip long God taim planti samting nogut i save kamap?
Wai na laip i hat tumas sampela taim? Hau bai mi painim strong long dispela taim?
Hau bai mi kamap gutpela man o meri?
Wanem bai kamap bihain mi dai?
Dispela gospel bilong Jisas Krais kambek helpim yumi painim ansa long ol impoten askim bilong sol. Thru long gospel, yumi lainim olsem yumi ken kamap olsem God bikos yumi ol pikinini bilong Em. Gospel i givim yumi hop na helpim yumi painim bel isi, amamas, na mining. Stap long gospel helpim yumi gro na painim strong taim yumi pesim ol salens bilong laip.
God i laikim ol gutpela samting bilong ol pikinini bilong Em na i laik givim yumi ol bikpela blesing bilong Em, dispela em i no inap dai na laip oltaim.(lukim Moses 1:39; Doktrin na ol Kavanen 14:7). Bikos Em i lavim yumi, Em i givim plen bilong yumi long kisim ol dispela blesing. Insait long ol skripsa, dispela plen yumi kolim plen bilong salvesen, dispela bikpela plen bilong amamas, na plen bilong kisim bek yumi (lukim Alma 42:5, 8, 11, 13, 15, 16, 31).
Insait long plen bilong God, yumi wanwan i wokabaut thru long laip pastaim long ples graun, yumi bon, yumi stap long ples graun, dai, na laip bihain long dai. God i givim wanem yumi nidim long dispela wokabaut so bihain long yumi dai, yumi ken go bek long stap wantaim Em na kisim olgeta amamas.
Jisas Krais i stap namel long dispela plen bilong God. Long Atonmen bilong Em, Jisas Krais i mekim isi long yumi wanwan long kisim blesing bai yumi no inap dai na laip oltaim.
Long laip bilong yumi long ples graun, yumi no tingim laip bilong yumi pastaim long yumi kam daun long ples graun. Na tu yumi i no klia gut tumas long laip bihain long dai. Tasol, God i autim planti toktru long ol dispela hap wokabaut bilong yumi long laip oltaim. Ol dispela toktru i givim gutpela save long yumi klia gut long as bilong laip, long ekspiriensim amamas, na long gat hop bilong ol gutpela samting bai kam. Dispela save em i sekred tresa long gaidim yumi taim yumi stap long graun.
Ol Tingting bilong Tis
Dispela seksen i givim wanpela autlain long helpim yu redi long tis. Em i gat tu ol eksampel bilong ol askim na ol invitesen yu ken yusim.
Taim yu redi long tis, pre na tingting long sindaun bilong wanwan man na ol spiritual nid bilong ol. Mekim disisen long wanem bai helpim yu moa long tis. Redi long givim mining long ol hap tok ol lain bai no klia long ol. Plenim gut long taim yu bai gat, tingting long mekim ol leson i sot.
Selektim ol skripsa long yusim taim yu tis. Dispela “Doctrinal Foundation” seksen bilong ol leson i gat planti ol skripsa bei ken helpim.
Tingting long ol askim yu bai givim taim yu tis. Plenim ol invitesen long givim bai enkarisim wanwan man o meri long mekim samting.
Tok strong long ol promis God i mekim, na serim testimoni bilong yu long wanem yu tisim.
Piksa
ol misinari i tisim famili
Wanem Yu Bai Tisim ol Pipol long 15–25 Minits
Selektim wanpela o moa long ol dispela prinsipel long tisim. Dispela as bilong doktrin bilong wanwan prinsipel i stap bihain long dispela autlain.
Laip pastaim long dispela Laip: Wok na Plen bilong God bilong Yumi.
“Yumi ol pikinini bilong God.” Em i mekim yumi long piksa bilong Em.
Yumi stap wantaim God pastaim long yumi bon long ples graun. Yumi ol memba bilong famili bilong Em. Em i save long na lavim yumi wanwan.”
God i givim plen bilong amama na gohet long dispela laip na laip oltaim.
Long laip bilong yumi pastaim long dispela graun, yumi sus long bihainim plen bilong God. Dispela i min long kam long graun bai yumi kisim narapela step long go het long laip oltaim.
Jisas Krais i namel long plen bilong God. Em i bin givim yumi dispela presen bilong laip i no save pinis na laip i stap oltaim oltaim.
Kamap Bilong Olgeta Samting
Aninit long daireksen bilong God, Jisas Krais i kamapim ples graun.
Pundaun bilong Adam na Iv
Adam na Iv i bin nambawan pikinini bilong God long kam long graun. God i mekim kamap bodi bilong ol na putim tupela long Gaden Iden.
Adam na Iv i mekim rong, i raus long gaden, na i no moa stap wantaim God. Dispela yumi kolim Pundaun.
Bihain long Pundaun, Adam na Iv i gat bodi bai i dai. Olsem ol man wantaim bodi bai dai, ol i lainim, gohet na i gat ol pikinini. Ol i ekspiriensim sore, sin na dai.
Pundaun i bin wanpela step go fowod bilong man. Pundaun i mekim wei bilong yumi long bon long graun na gohet wantaim plen bilong Papa long Heven.
Laip bilong yumi long Ples Graun
Long plen bilong God, yumi nid long kam long ples graun long kisim bodi, lainim na gro.
Long ples graun, yumi lainim long wokabaut long feit. Tasol, Papa long Heven i no lusim yumi. Em i givim planti presen na gaid long helpim yumi go bek long stap bilong Em.
Atonmen bilong Jisas Krais
Yumi wanwan i save sin, na yumi wanwan bai dai. Bikos God i lavim yumi, Em i salim Pikinini man bilong Em, Jisas Krais, long ples graun long kisim yumi bek long sin na dai.
Bikos long sakripais bilong Jisas, yumi ken kisim pogivnes na kamap klin long ol sin bilong yumi. Ol bel bilong yumi bai senis gut taim yumi tanim bel. Dispela i mekim isi long yumi go bek long stap wantaim God na kisim bikpela amamas.
Bikos long Kirap bek bilong Jisas, yumi olgeta bai kirap bek bihain long yumi dai. Dispela i min olsem spirit na bodi bilong wanwan man o meri bai kam bek wantaim, na yumi wanwan bai stap oltaim oltaim long stretpela, bodi i kirap bek.
Jisas Krais i ofarim gutpela sindaun, hop na hiling. Atoning sakripais bilong Em i soim tru olsem Em i lavim yumi. Olgeta samting long laip we i no stret ken kamap orait long Atonmen bilong Jisas Krais tasol.
Dispela Spirit Wol
Taim bodi bilong graun i dai, spirit bai go stap insait long spirit wol. Dispela em i hap bilong lainim na redi long Kirap bek.
Dispela gospel bilong Jisas Krais ol i tisim long spirit wol, na yumi ken go het long gro.
Dispela Kirap Bek, Salvesen, na Eksaltesen
Bihain long taim bilong yumi long spirit wol, Kirap bek em i narapela step long wokabaut bilong oltaim.
Kirap bek em i taim spirit na bodi bilong yumi i kam yunait wantaim. Yumi wanwan bai kirap bek na gat stretpela bodi. Yumi bai stap oltaim oltaim. Dispela bai kamap bikos long Atonmen na Kirap bek bilong Seivia.
Jasmen na ol Kingdom bilong Glori
Taim yumi kirap bek, Jisas Krais bai jas bilong yumi. Wantaim sampela eksepsen, olgeta pikinini bilong God bai kisim ples long kingdom bilong glori.
Maski yumi olgeta bai kirap bek, yumi olgeta bai no inap long kisim wankain glori bilong oltaim. Jisas bai jasim yumi long feit, ol wok na pasin bilong tanim bel long laip long graun na long spirit wol. Yumi bai go bek stap wantaim God sapos yumi feitful.
Ol Kwesten Yu Bai Askim ol Pipol
Ol dispela kwesten em ol eksampel long wanem yu bai askim ol pipol. Ol dispela kwesten ken helpim yu i gat ol toktok i gat mining na klia gut long ol nid na lukluk bilong ol man o meri.
Wanem yu pilim em i as bilong laip?
Wanem i bringim yu amamas?
Wanem ol salens yu nidim God long helpim yu wantaim?
Wanem samting yu lainim long ol salens yu pesim?
Yu save long wanem long Jisas Krais? Hau na laip na tising bilong Em i senisim yu?
Ol Invitesen Yu Ken Givim
Bai yu askim God long prea long save olsem wanem samting mipela i tisim em i tru? (Lukim “Ol Tising Insait : Prea” long laspela seksen bilong leson 1.)
Bai yu kam long sios dispela Sande long lainim moa long wanem mipela i tisim?
Bai yu ritim dispela Buk Momon na askim God long pre long save em i tok bilong God? (Yu ken givim sampela sapta o ol veses.)
Bai yumi ken makim taim bilong narapela bung bilong yumi?
Piksa
plen bilong salvesen i stap long pepa
As bilong Doktrin
Dispela seksen i givim doktrin na ol skripsa long yupela long stadi na strongim ol save na testimoni bilong gospel na helpim yupela tis.
Piksa
ol galeksi
Laip pastaim long dispela Laip: Wok na Plen bilong God bilong Yumi.
Yumi Ol Pikinini Bilong God, na Yumi Stap Wantaim Em pastaim long Yumi Bon.
God em i Papa bilong ol spirit bilong yumi. Yumi ol pikinini bilong em, kamap long piksa bilong Em. Yumi wanwan i gat dispela pasin long pikinini bilong God. Dispela save i ken helpim yumi thru long ol hat taim na ken givim gutpela tingting long kamap moa gut.
Yumi stap wantaim God olsem ol pikinini bilong Em pastaim yumi bon long ples graun. Yumi ol memba bilong famili bilong Em.
Piksa
Presiden M Russel Ballard
“I gat wanpela impoten lukluk yumi olgeta i serim nau na oltaim, wanpela we yumi mas noken tru lusim, na wanpela we yumi mas tenkyu long en. Dispela em olsem yu em pikinini man o meri bilong God olgeta taim i gat spiritual ruts i go bek long laip oltaim.
“… Klia gut long dispela toktru—klia gut long en na holim pasim—bai senisim laip bilong yu. Em bai givim yu narapela kain luksave nogat wanpela man bai rausim long yu. Tasol moa long dispela, em bai givim yu bikpela piling olsem yu no samting nating tasol yu gat namba. Las tru, em i givim yu dispela as bilong laip i olsem God, antap tru na i gat namba.” (M. Russell Ballard, “Children of Heavenly Father” [Brigham Young University devotional, Mar. 3, 2020], 2, speeches.byu.edu).
Yumi Sus long Kam long Ples Graun.
Papa long Heven bilong yumi i lavim yumi na i laikim tumas olsem yumi bai kamap olsem Em. Em i man i gat bodi i pulap long glori na i stap antap tru.
Long laip bilong yumi pastaim long ples graun, yumi lainim olsem God i gat plen bilong yumi bai kamap olsem Em. Wanpela hap bilong dispela plen bilong Em olsem yumi bai lusim ples bilong yumi long heven na kam daun long ples graun na kisim ol bodi. Yumi nidim tu long kisim ekspiriens na kamapim feit long dispela taim yumi no stap wantaim God. Yumi no inap tingim laip wantaim God. Tasol, Em bai givim wanem yumi nidim bai yumi go bek stap wantaim Em.
Laik bilong wanwan, o fridom na save long sus, em i wanpela impoten hap bilong dispela plen bilong yumi God i mekim. Long laip pastaim long dispela graun, yumi wanwan i sus long bihainim plen bilong God na kam long ples graun so yumi ken kisim narapela step long laip oltaim bilong yumi. Yumi save olsem taim yumi i stap long hia, yumi bai gat planti nupela opotuniti long gro na long pilim amamas. Yumi i save olsem yumi ken pesim oposisen. Yumi bai ekspiriensim temtesen, ol traim na sore na dai.
Long sus long kam long ples graun, yumi trast long lav na helpim bilong God. Yumi trast long plen bilong Em long salvesen bilong yumi.
Papa long Heven i susim Jisas Krais long Ridimim Yumi.
Jisas Krais i stap namel long dispela plen bilong God. Pastaim long yumi kam long ples graun, yumi bin save yumi bai no inap long go bek long stap wantaim God yumi yet. Papa long Heven i susim Jisas Krais , Nambawan Pikinini man bilong em, long mekim isis long yumi go bek long Em na gat laip oltaim.
Jisas i wanbel tasol Em i wanbel long kam long ples graun na ridimim yumi thru long atoning sakripais bilong Em. Atonmen na Kirap Bek bilong Em i mekim na inapim olgeta wok bilong God.
Ol Gospel Topiks: “Laip Pstaim long Dispela Laip,” “Plen bilong Salvesen”
Piksa
san i go daun antap long bik solwara
Kamap Bilong Olgeta Samting
Plen bilong Papa long Heven i givim wei long kamapim dispela ples graun, we ol spirit pikinini bilong Em bai kisim bodi na kisim ekspiriens. Laip bilong yumi long ples graun em i impoten bai yumi gohet na kamap olsem God.
Aninit long daireksen bilong Papa, Jisas Krais i mekim kamap dispela ples graun na olgeta samting i stap laip. Bihain Papa long Heven i mekim kamap man na meri long piksa bilong Em yet. Dispela Mekim Kamap em i soim lav bilong God na laik bilong Em long gat dispela opotuniti long gro.
Adam na Iv i bin nambawan spirit pikinini bilong God long kam long graun. God i mekim kamap bodi bilong ol na putim tupela long Gaden Iden. Ol i stap wantaim tingting i nogat rong, na God i lukautim ol wantaim olgeta samting ol i laikim.
Taim Adam na Iv i stap long gaden, God i givim ol komanmen long noken kaikai prut bilong diwai bilong save long gutpela na nogut. Sapos ol i bihainim dispela komanmen, ol bai stap bek long gaden. Tasol, ol bai no inap long gohet long laip long lainim long birua na ol salens bilong dispela laip. Ol bai no inap save long amamas bikos ol i nogat ekspiriens long pilim sore na karim pen.
Satan i tok gris long Adam na Iv long kaikai dispela prut, na ol i susim long mekim. Bikos long dispela sois, ol i raus long gaden na go aut long stap wantaim God. Dispela yumi kolim Pundaun.
Bihain long Pundaun
Bihain long Pundaun, Adam na Iv i gat bodi bai i dai. Ol i no moa stap olsem ol i nogat rong, ol i save gut na pilim gutpela na nogut. Ol i ken yusim laik bilong ol long susim gutpela na nogut. Bikos Adam na Iv i pesim birua na ol salens, ol i nap long lainim na go het. Bikos ol i pilim sore, ol i ken pilim tu amamas. (Lukim 2 Nifai 2:22–25.)
Maski long ol hat taim bilong ol, Adam na Iv i pilim olsem long stap long dispela laip em i blesing. Wanpela blesing em ol i ken gat pikinini. Dispela i mekim wei bilong ol narapela spirit pikinini bilong God long kam daun long ples graun na kisim ol bodi.
Long ol dispela blesing bilong Pundaun, Adam na Iv wantaim i bin amamas. Iv i tok, “Sapos i no bin dispela rong bilong mitupela bai mipela i no inap long gat ol pikinini, na bai mipela i no save long gutpela na nogut, na amamas bilong God i kisim bek yumi, na laip oltaim we God i givim long olgeta husat i bihainim tok” (Moses 5:11; lukim tu ves 10).
Ol Gospel Topik: “Pundaun bilong Adam na Iv,” “Laik bilong Wanwan na Akauntabiliti
Laip bilong yumi long Ples Graun
Planti pipol i save tingting, “Wai na mi stap long ples graun? Laip bilong yumi long ples graun em i impoten hap long plen bilong God bilong go het wantaim laip oltaim bilong yumi. Nambawan wok bilong yumi em long redi long go bek long stap wantaim God na kisim olgeta amamas. Daunbilo em ol sampela wei laip long ples graun i redim yumi bilong dispela.
Piksa
mangi i smail
Kisim wanpela Bodi
Wanpela nambawan as bilong kam long ples graun em long kisim bodi we spirit bilong yumi bai stap. Ol bodi bilong yumi i holi, God i kamapim wantaim mirakel. Wantaim ol bodi, yumi ken mekim, lainim na pilim planti samting ol spirit bilong yumi i no inap long mekim. Yumi ken go het long planti wei spirit bilong yumi bai no inap.
Bikos ol bodi bilong yumi bai dai, yumi pilim pen, sik na ol narapela traim. Ol dispela samting yumi pilim ken helpim yumi lainim isi pasin, pasin bilong sore, na ol narapela pasin bilong God. Ol bai kamap olsem ol samting i stap long wokabaut bilong yumi i go long amamas. Long susim rait taim em i hat long mekim em hau feit, hop, na siariti i save kamap ol pasin bilong yumi.
Lainim long Yusim Laik bilong Wanwan long Gutpela Wei
Narapela wok bilong dispela laip em long yusim laik bilong yumi gut—long susim wanem i rait. Lainim long yusim laik bilong yumi em i impoten long kamap olsem God.
Papa long Heven na Jisas Krais i tisim yumi wanem i rait na givim ol komanmen long gaidim yumi i go long amamas. Satan i pulim yumi long mekim rong, laikim yumi long stap tarangu olsem em. Yumi pesim birua namel long gutpela na nogut, we i impoten long lainim long yusim laik bilong yumi wanwan (lukim 2 Nifai 2:11).
Taim yumi bihainim God, yumi gro na kisim ol blesing Em i promisim. Taim yumi i no bihainim, yumi go long we long Em na kisim ol hevi bilong sin. Maski sampela taim i no luk olsem, sin olgeta taim bai kisim yu go long sore pasin. Planti taim ol blesing bilong bihainim tok—na ol hevi bilong sin—bai no inap kamap ples klia. Tasol ol i stap tru, long wanem God i stretpela.
Moa yet taim yumi mekim gut, yumi olgeta i save sin na “i no nap long kisim glori bilong God” (Romans 3:23). Taim yumi save long dispela, Papa long Heven i givim wanpela wei bai yumi tanim bel bai yumi ken go bek long Em.
Tanim bel bai bringim displa pawa bilong Ridima, Jisas Krais, insait long laip bilong yumi (lukim Hilaman 5:11). Taim yumi tanim bel, yumi kamap klin long sin thru long atoning sakripais bilong Jisas Krais na presen bilong Holi Gos (lukim 3 Nifai 27:16–20). Long pasin bilong tanim bel, yumi pilim amamas. Rot i go bek long Papa long Heven i op long yumi, long wanem Em i gat marimari. (Lukim “Tanim Bel” long leson 3.)
Lainim long Wokabaut long Feit.
Narapela wok bilong dispela laip em long kisim ekspiriens i ken kam taim yumi lusim Papa long Heven. Bikos yumi no lukim Em, yumi nid long lainim long wokabaut long feit (lukim 2 Corinthians 5:6–7).
God i no lusim yumi yet long dispela wokabaut. Em bai salim Holi Gos long soim yumi long rot, kamfotim yumi, na strongim bel bilong yumi. Em i givim ol skripsa, profet, prea, na gospel bilong Jisas Krais.
Olgeta hap long dispela laip bilong yumi —ol amamas na sori, ol gutpela na nogut—ken helpim yumi gro taim yumi redi long go bek long God.
Bikos long Pundaun bilong Adam na Iv, yumi olgeta bai pesim sin na dai. Yumi no inap long winim ol nogut bilong sin na dai yumi yet. Long plen bilong salvesen bilong Papa long Heven, Em i givim wanpela wei long winim ol nogut bilong Pundaun so yumi ken go bek long Em. Pastaim long dispela wol i kamap, Em i susim Jisas Krais long kamap Seivia na Ridima bilong yumi.
Jisas Krais tasol bai kisim yumi bek long sin na dai. Em i trutru Pikinini Man bilong God. Em i stap long laip i nogat sin, bihainim tru olgeta tok bilong Papa bilong Em. Em i redi na laik long wokim laik bilong Papa bilong Em long Heven.
Atonmen bilong Seivia i go wantaim hevi Em i karim insait long Gaden Getsemane, wantaim hevi na dai bilong Em long diwai kros, na Kirap Bek bilong Em. Em i karim hevi yumi no inap long skelim—bikpela tru na blut i kamap aut long olgeta hul bilong skin bilong Em (lukim Doktrin na ol Kavanen 19:18).
Atonmen bilong Jisas Krais em i wanpela bikpela samting tru i pulap long glori we i kamap long histri bilong man long ples graun. Long Atoning Sakripais bilong em, Jjisas i mekim plen bilong Papa i wok. Yumi bai nogat wei sapos i nogat Atonmen bilong Jisas Krais bikos yumi no inap long seivim yumi yet long sin na dai (lukim Alma 22:12–15).
Sakripais bilong Seivia bilong yumi em i wanpela bikpela samting i soim klia lav bilong Papa bilong Em na bilong yumi. “Dispela bikpela, na longpela, na dip na hait ” bilong lav bilong Krais i winim save bilong yumi (Ephesians 3:18; lukim tu ves 19).
Piksa
Dai long Diwai Kros, Harry Anderson i mekim
Jisas Krais i Winim Dai Bilong Olgeta
Taim Jisas Krais i dai long diwai kros, spirit bilong Em i lusim bodi bilong Em. Long namba tri de, spirit bilong Em na bodi bilong Em i kam bek wantaim, bai no inap gen long seperet. Em i kamap long planti lain pipol, soim ol olsem Em i gat bodi wantaim bun na mit i no inap dai. Dispela bung bilong bodi na spirit ol i kolim Kirap Bek.
Olsem ol man bilong dispela laip, yumi wanwan bai dai. Tasol, bikos Jisas i winim dai, olgeta man i bin bon long dispela graun bai i kirap bek. Kirap bek em i presen bilong God bilong olgeta, Seivia i givim thru long marimari bilong Em. Spirit na bodi bilong wanwan man o meri bai kam bek wantaim, na yumi wanwan bai stap oltaim oltaim long stretpela, bodi i kirap bek. Sapos Seivia Jisas Krais i no stap, dai bai pinisim olgeta hop yumi gat long go stap wantaim Papa long Heven.(lukim 2 Nifai 9:8–12).
Jesus i Mekim Isi long Yumi i Kamap Klin long ol Sin bilong Yumi.
Long klia gut long hop yumi ken kisim thru long Krais, yumi nid long klia gut long lo bilong jastis. Dispela em i lo i no save senis i bringim kam ol samting i kamap long samting yumi mekim. Bihainim tok bilong God i bringim ol gutpela samting, na i no bihainim tok i bringim ol nogut samting. (Lukim Alma 42:14–18.) Taim yumi sin, spirit bilong yumi i kamap doti, na nogat wanpela samting i no klin bai stap wantaim God (lukim 3 Nifai 27:19).
Piksa
Jisas i Pre long Gaden Getsemane, Harry Anderson i mekim
Long taim bilong atoning sakripais bilong Jisas Krais, Em i sanap long ples bilong yumi, i karim pen, na peim dispela hevi bilong sin bilong yumi (lukim 3 Nifai 27:16–20). Plen bilong God i givim pawa long Jisas Krais long mekim intasesin bilong yumi—long sanap namel long yumi na kot (lukim Mosaia 15:9). Bikos long atoning sakripais bilong bilong Jisas, Em i kisim rait bilong marimari bilong Em long makim yumi taim yumi eksasaisim feit igo long tanim bel.(lukim Moronai 7:27; Doktrin na ol Kavanen 45:3–5). “Olsem na marimari i ken stretim ol askim bilong stretpela pasin, na raunim [yumi] insait long han bilong seifti” (Alma 34:16).
Long presen bilong Atonmen bilong Seivia tasol yumi ken go bek na stap wantaim God. Taim yumi tanim bel, yumi kisim pogivnes na kamap klin long spirit. Yumi bai pilim gut taim hevi bilong sin i lusim yumi. Ol sol bilong yumi i pilim pen bai kamap orait. Yumi bai pulap long amamas (lukim Alma 36:24).
Maski yumi no stret na bai pundaun gen, i gat moa gutpela pasin, lav, na marimari long Jisas Krais moa long nogut samting, giaman o sin long yumi. God i redi olgeta taim long holim pasim yumi taim yumi tanim long Em na tanim bel.(lukim Luke 15:11–32). Nogat samting na nogat man “bai nap long seperetim yumi long lav bilong God, we i stap insait long Krais Jisas Bikpela bilong yumi” (Romans 8:39).
Jisas i Kisim Long Em Yet Ol Pen, Hevi na Wiknes bilong Yumi
Long atoning sakripais bilong Em, Jisas Krais i kisim long Em yet ol pen, hevi na wiknes bilong yumi. Bikos long dispela , Em i save “long bihainim bodi hau long helpim ol pipol bilong em bihainim wiknes bilong ol.” (Alma 7:12; lukim tu ves 11). Em i invaitim, “Kam long mi,” na taim yumi i mekim olsem, Em i givim yumi malolo, hop, strong, lukluk, na hiling (Matthew 11:28; lukim tu veses 29–30).
Taim yumi rilai long Jisas Krais na Atonmen bilong Em, Em ken helpim yumi stap strong long ol traim, sik, na pen bilong yumi. Yumi ken pulap wantaim amamas, bel isi, na kamfot. Olgeta samting long laip we i no stret ken kamap orait long Atonmen bilong Jisas Krais.
Planti pipol i tingting, “Wanem bai kamap bihain mi dai?” Dispela plen bilong salvesen i givim yumi ol ansa long ol dispela askim.
Dai em i hap bilong “plen bilong marimari ” bilong yumi God i mekim (2 Nifai 9:6). Dai em i narapela hap bilong kamap bilong go het bilong laip oltaim bilong yumi, na i no pinis bilong stap bilong yumi. Long kamap olsem God, yumi mas ekspiriensim dai na bihain kisim dispela stretpela tru, bodi i kirap bek.
Taim bodi bilong yumi i dai, spirit bilong yumi bai go het yet long stap long spirit wol. Dispela em i hap bilong wet na lainim na redi long Kirap Bek na Laspela Jasmen. Save yumi kisim long dispela laip bai stap wantaim yumi.
Insait long spirit wol, ol pipol husat i wanbel na stap bihainim gospel bilong Jisas Krais “bai stap long ples amamas, ol i kolim paradais” (Alma 40:12). Ol liklik pikinini tu ol i kisim ol go insait long paradais taim ol i dai.
Ol spirit long ples paradais bai stap long bel isi long ol hevi na sore bilong ol. Ol bai go het long long long spirit, mekim wok bilong God na minista long ol narapela. Ol bai tisim gospel long ol lain husat i no kisim long dispela laip (lukim Doktrin na ol Kavanen 138:32–37, 57–59).
Insait long spirit wol, ol pipol husat i no bin nap long kisim gospel long ples graun, o husat i sus long noken bihainim ol komanmen, bai ekspiriensim sampela banis (lukim Doktrin na ol Kavanen 138:6–37; Alma 40:6–14). Tasol, bikos God em i stretpela na i gat marimari, ol bai gat sans long lainim gospel bilong Jisas Krais. Sapos ol i wanbel long en na tanim bel, ol sin bilong ol bai raus (lukim Doktrin na ol Kavanen 138:58; lukim tu 138:31–35; 128:22). Ol bai kisim welkam insait long bel isi bilong paradais. Ol bai kisim wanpela ples long kingdom bilong glori beis long ol sois ol i bin mekim long laip long graun na long spirit wol.
Yumi bai stap long spirit wol inap long taim yumi bai kirap bek.
Plen bilong God i mekim isi long yumi gro na kisim laip oltaim. Bihain long taim bilong yumi long spirit wol, Kirap bek em i narapela step long dispela gro bilong yumi.
Kirap bek em i taim spirit na bodi bilong yumi i kam yunait wantaim. Yumi wanwan bai kirap bek. Dispela bai kamap bikos long Atonmen na Kirap bek bilong Seivia. (Lukim Alma 11:42–44.)
Taim yumi kirap bek, yumi bai wanwan i gat stretpela bodi, i nogat pen ma sik. Yumi bai stap oltaim, na i no inap dai.
Salvesen
Bikos yumi bai olgeta kirap bek, yumi bai olgeta seif—o kisim salvesen—long dai bilong bodi. Dispela presen em yumi kisim thru long grasia bilong Jisas Krais.
Yumi tu ken seif—o kisim salvesen—long ol samting i kamap we lo bilong stretpela pasin i mas mekim long ol sin bilong yumi. Dispela presen bai isi thru long gutpela wok na marimari bilong Jisas Krais taim yumi tanim bel. (Lukim Alma 42:13–15, 21–25.)
Eksaltesen
Eksaltesen, o laip oltaim, em i dispela hap bilong amamas na glori i stap antap tru insait long selesel kingdom. Eksaltesen em i presen bai yu kisim bikos yu mekim gutpela samting. Presiden Nelson i tisim, “Ol dispela mak yu mas kisim em olsem feit long Bikpela, tanim bel pasin, baptisim, kisim Holi Gos, na stap strong na feitful long ol odinens na kavanen bilong yu insait long temple” (“Salvesen na Eksaltesen,” Liahona, May 2008, 9).
Eksaltesen em i min yu bai stap wantaim God oltaim oltaim long ol oltaim oltaim famili. Em long save long God na Jisas Krais, long kamap olsem Ol, na ekspiriensim dispela laip Ol i save amamas long em.
Nout: Long Nambawan taim yu tis long ol kingdom bilong glori, tisim long level bilong man bai save na klia gut.
Taim yumi kirap bek, Jisas Krais bai stretpela jas bilong yumi i gat marimari. Wantaim sampela eksepsen, olgeta pikinini bilong God bai kisim ples long kingdom bilong glori. Maski yumi olgeta bai kirap bek, yumi olgeta bai no inap long kisim wankain glori bilong oltaim.(lukim Dokrine na ol Kavanen 88:22–24, 29–34; 130:20–21; 132:5).
Ol wanwan man o meri husat i nogat sans long klia gut long na bihainim ol lo bilong God long dispela laip bai gat sans long spirit wol. Jisas bai jasim wanwan man o meri bihainim feit, ol wok, ol laik, na pasin bilong tanim bel long laip long graun na long spirit wol.(lukim Doktrin na ol Kavanen 138:32–34, 57–59).
Ol skripsa i tisim long selesel, terestriel, na telesel kingdom bilong glori. Wanwan bilong ol Em i soim lav bilong God, stretpela pasin na marimari.
Ol lain husat i eksasaisim feit insait long Krais, tanim bel long ol sin, kisim ol odinens bilong gospel, kipim ol kavanen, kisim Holi Gos na stap strong i go long pinis bai seif insait long selesel kingdom. Dispela kingdom bai gat ol lain pipol husat i no bin gat sans long kisim gospel taim ol i stap long dispela laip tasol “bin ken kisim wantaim olgeta bel bilong ol” na i mekim olsem long spirit wol (Doktrin na ol Kavanen 137:8; lukim tu ves 7). Ol pikinini husat i dai pastaim long krismas bilong save long gutpela na nogut (eitpela krismas) bai tu ken seif insait long selesel kingdom (lukim Doktrin na ol Kavanen 137:10).
Ol lain pipol husat i stap ol gutpela laip “husat i no kisim testimoni bilong Jisas long skin, tasol bihain i kisim” bai kisim ples long terestriel kingdom (Doktrin na ol Kavanen 76:74). Dispela em i tru long ol lain husat i bin bin gat strongpela testimoni long Jisas. Dispela kingdom i olsem glori bilong mun. Lukim Ol Doktrin na Kavanen 76:71–80.)
Ol dispela lain husat i stap yet long sin na i no tanim bel long dispela laip o i no wanbel wantaim gospel bilong Jisas Krais long spirit wol bai kisim pe bilong ol long telesel kingdom. Dispela kingdom i olsem glori bilong ol sta. Lukim Ol Doktrin na Kavanen 76:81–86.)
Dispela am autlain i gat sempel bilong wanem yu bai tisim wanpela sapos yu gat liklik taim stret. Taim yu yusim dispela autlain, selektim wanpela o moa prinsipel long tisim. Dispela as bilong doktrin bilong wanwan prinsipel i stap pinis long leson i bin kam pas.
Taim yu tis, askim ol kwesten na harim gut. Givim ol invitesen bai helpim ol pipol i lainim hau long gro klostu long God. Wanpela impoten invitesen em bilong dispela man o meri long bung wantaim yu gen. Longpela bilong leson bai dipen long ol kwesten yu askim na harim yu bai mekim.
Wanem Yu Bai Tisim ol Pipol long 3–10 Minits
“Yumi olgeta ol spirit pikinini bilong God. Yumi ol memba bilong famili bilong Em. Em i save na lavim yumi wanwan.”
God em i givim wanpela plen bilong yumi bai amamas na gohet long dispela laip na long laip oltaim.
Long plen bilong God, yumi nid long kam long ples graun long kisim bodi, lainim na gro.
Jisas Krais i stap namel long dispela plen bilong God. Em i mekim isi long yumi gat laip oltaim.
Aninit long daireksen bilong God, Jisas Krais i kamapim ples graun.
Ol ekspiriens bilong yumi long dispela laip em long redi long go bek stap wantaim God.
Yumi wanwan i save sin, na yumi wanwan bai dai. Bikos God i lavim yumi, Em i salim Pikinini man bilong Em, Jisas Krais, long ples graun long kisim yumi bek long sin na dai.
Olgeta samting long laip we i no stret ken kamap orait long Atonmen bilong Jisas Krais.
Taim bodi bilong graun i dai, spirit stap yet. Yumi olgeta bai kirap bek. Dispela i min olsem spirit na bodi bilong wanwan man o meri bai kam bek wantaim, na yumi wanwan bai stap oltaim oltaim long stretpela, bodi i kirap bek.
Taim yumi kirap bek, Jisas Krais bai jas bilong yumi. Wantaim sampela eksepsen, olgeta pikinini bilong God bai kisim ples long kingdom bilong glori. Yumi ken go bek stap wantaim God sapos yumi feitful.