“అధ్యాయము 3: పాఠము 4— యేసు క్రీస్తు యొక్క జీవితకాలపు శిష్యులగుట,” నా సువార్తను ప్రకటించండి: యేసు క్రీస్తు యొక్క సువార్తను పంచుకొనుటకు మార్గదర్శి (2023)
“అధ్యాయము 3: పాఠము 4,” నా సువార్తను ప్రకటించండి
అధ్యాయము 3: పాఠము 4
యేసు క్రీస్తు యొక్క జీవితకాలపు శిష్యులగుట
ఈ పాఠమును బోధించుట
బాప్తిస్మము అనేది నిరీక్షణ యొక్క ఆనందకరమైన విధి. మనం బాప్తిస్మం పొందినప్పుడు, దేవుణ్ణి అనుసరించి, నిత్యజీవానికి దారితీసే మార్గంలోకి ప్రవేశించాలనే మన కోరికను మనం చూపిస్తాము. మనము యేసు క్రీస్తు యొక్క జీవితకాలపు శిష్యులు కావడానికి మన నిబద్ధతను కూడా చూపిస్తాము.
బాప్తిస్మమప్పుడు మనం చేసే నిబంధనల ప్రకారం ఈ పాఠం ఏర్పాటు చేయబడింది. ఇది క్రింది ప్రధాన విభాగాలను కలిగి ఉంటుంది, వీటిలో ప్రతి ఒక్కటి ఉపవిభాగాలను కలిగి ఉంటాయి:
మీరు బోధించే సూత్రాలు మరియు ఆజ్ఞలు బాప్తిస్మం సమయంలో వారు చేసే నిబంధనలో భాగమని జనులు అర్థం చేసుకోవడానికి సహాయపడండి. ఈ పాఠములోని ప్రతీ భాగము “క్రీస్తు నొద్దకు వచ్చుటకు … మరియు ఆయన రక్షణయందు పాలుపొందుటకు” (ఓంనై 1:26; 1 నీఫై 15:14 కూడా చూడండి) వారికెలా సహాయపడుతుందో వారికి చూపండి.
మీరు అనేక సందర్శనలలో ఈ పాఠాన్ని బోధించాలనుకుంటున్నారు. బోధించే సందర్శన అరుదుగా 30 నిమిషాల కంటే ఎక్కువగా ఉండాలి. పాఠ్యాంశంలోని చిన్న భాగాలను పూర్తి చేసే చిన్న, తరచు సందర్శనలను కలిగియుండడం సాధారణంగా మంచిది.
మీరు ఏమి బోధిస్తారో, ఎప్పుడు బోధిస్తారో మరియు మీరు ఎంత సమయం తీసుకుంటారో ప్రణాళిక చేసుకోండి. మీరు బోధిస్తున్న వ్యక్తుల అవసరాలను పరిగణించండి మరియు ఆత్మ యొక్క మార్గదర్శకత్వం కోసం వెదకండి. జనులు బాప్తిస్మము మరియు నిర్ధారణ కోసం సిద్ధం కావడానికి ఏది ఉత్తమంగా సహాయపడుతుందో దాని ప్రకారం బోధించే సౌలభ్యం మీకు ఉంది.
ఈ పాఠంలోని కొన్ని విభాగాలలో నిర్దిష్ట ఆహ్వానాలు ఉన్నాయి. ఆహ్వానాలను ఎలా మరియు ఎప్పుడు అందించాలో నిర్ణయించడంలో ప్రేరణ పొందండి. ప్రతి వ్యక్తి యొక్క అవగాహన స్థాయిని గుర్తుంచుకోండి. అతనికి లేదా ఆమెకు ఒక సమయంలో ఒక దశ చొప్పున సువార్తను జీవించడానికి సహాయం చేయండి.
యేసు క్రీస్తు నామమును మనపై తీసుకోవడానికి సమ్మతించుటకు మన నిబంధన
మనం బాప్తిస్మం పొందినప్పుడు, మనం “హృదయము యొక్క పూర్ణ ఉద్దేశ్యముతో” యేసు క్రీస్తును అనుసరిస్తామని నిబంధన చేస్తాము. మనం “యేసు క్రీస్తు నామమును [మన]పై తీసుకోవడానికి సమ్మతిస్తున్నామని” (2 నీఫై 31:13; సిద్ధాంతము మరియు నిబంధనలు 20:37 కూడా చూడండి) కూడా మనం సాక్ష్యమిస్తాము.
యేసు క్రీస్తు నామమును మనపై తీసుకోవడం అంటే మనం ఆయనను గుర్తుంచుకోవడం మరియు ఆయన జీవితకాలపు శిష్యులుగా జీవించడానికి కృషి చేయడం అని అర్థం. ఆయన వెలుగును మన ద్వారా ఇతరులకు మనం ప్రకాశింపజేస్తాము. మనల్ని మనం ఆయనకు చెందినవారిగా చూస్తాము మరియు మన జీవితాలలో ఆయనకు మొదటి స్థానం ఇస్తాము.
క్రింది విభాగాలు మనం యేసు క్రీస్తును గుర్తుంచుకునే మరియు అనుసరించే రెండు మార్గాలను వివరిస్తాయి.
తరచు ప్రార్థించండి
ప్రార్థన అనేది పరలోక తండ్రితో సరళమైన సంభాషణ కాగలదు, అది హృదయం నుండి వస్తుంది. ప్రార్థనలో, మనము ఆయనతో బహిరంగంగా మరియు నిజాయితీగా మాట్లాడతాము. మనము ఆయన పట్ల ప్రేమను మరియు మన దీవెనల కొరకు కృతజ్ఞతను వ్యక్తపరుస్తాము. మనము సహాయం, రక్షణ మరియు దిశానిర్దేశం కోసం కూడా అడుగుతాము. మన ప్రార్థనలను మనం ముగించినప్పుడు, ఆగి, వినడానికి మనం సమయాన్ని వెచ్చించాలి.
“మీరు ఎల్లప్పుడు తండ్రికి నా నామమున ప్రార్థన చేయవలెను” (3 నీఫై 18:19, వివరణ చేర్చబడింది; మోషే 5:8 కూడా చూడండి) అని యేసు బోధించారు. మనం యేసు క్రీస్తు నామంలో ప్రార్థిస్తున్నప్పుడు, మనం ఆయనను మరియు పరలోక తండ్రిని గుర్తుంచుకుంటాము.
మనం ప్రార్థిస్తున్నప్పుడు అనుసరించడానికి యేసు మనకు మాదిరిని ఉంచారు. లేఖనాల్లో రక్షకుని ప్రార్థనలను అధ్యయనం చేయడం ద్వారా మనం ప్రార్థన గురించి చాలా నేర్చుకోవచ్చు (మత్తయి 6:9–13; యోహాను 17 చూడండి).
మన ప్రార్థనలు క్రింది భాగాలను కలిగి ఉండవచ్చు:
-
పరలోక తండ్రిని సంబోధించడం ద్వారా ప్రారంభించండి.
-
మనం పొందిన దీవెనలకు కృతజ్ఞత వంటి మన హృదయ భావాలను వ్యక్తపరచండి.
-
ప్రశ్నలు అడగండి, నడిపింపు కోరండి మరియు దీవెలన కొరకు అడగండి.
-
“యేసు క్రీస్తు నామములో, ఆమేన్” అని చెప్తూ ముగించండి.
ఉదయం మరియు సాయంత్రం ప్రార్థన చేయమని లేఖనాలు మనకు ఉపదేశిస్తున్నాయి. అయితే, మనం ఎప్పుడైనా మరియు ఏ పరిస్థితిలోనైనా ప్రార్థించవచ్చు. మన వ్యక్తిగత మరియు కుటుంబ ప్రార్థనల కోసం, మనం ప్రార్థించేటప్పుడు మోకరించడం అర్థవంతంగా ఉండగలదు. మన హృదయాల్లో ఎప్పుడూ ప్రార్థన ఉండాలి. (ఆల్మా 34:27; 37:36–37; 3 నీఫై 17:13; 19:16 చూడండి.)
మన ప్రార్థనలు ఆలోచనాత్మకంగా మరియు హృదయం నుండి ఉండాలి. మనం ప్రార్థించేటప్పుడు, ఒకే విషయాలను ఒకే విధంగా చెప్పకుండా ఉండాలి.
విశ్వాసం, నిష్కపటత మరియు నిజమైన ఉద్దేశ్యంతో మనం పొందే సమాధానాలపై చర్య తీసుకోవాలని మనము ప్రార్థిస్తాము. మనం ఇలా చేస్తున్నప్పుడు, దేవుడు మనకు మార్గనిర్దేశం చేస్తారు మరియు మంచి నిర్ణయాలు తీసుకునేలా మనకు సహాయం చేస్తారు. మనం ఆయనకు దగ్గరగా భావిస్తాము. ఆయన మనకు అవగాహనను, సత్యాన్ని ఇస్తారు. ఆయన మనల్ని ఓదార్పు, శాంతి మరియు బలముతో దీవిస్తారు.
లేఖన అధ్యయనము
ఈ సూత్రం గురించి మరింత తెలుసుకోండి
-
Guide to the Scriptures, “Prayer”
-
Gospel Topics: “Prayer [ప్రార్థన]”
లేఖనాలను అధ్యయనం చేయండి
“క్రీస్తు యొక్క మాటలను విందారగించండి; ఏలయనగా [అవి] మీరు చేయవలసిన కార్యములన్నిటినీ మీకు తెలుపును” (2 నీఫై 32:3; 31:20 కూడా చూడండి) అని నీఫై బోధించాడు.
యేసు క్రీస్తును గుర్తుంచుకోవడానికి మరియు అనుసరించడానికి లేఖనాలను అధ్యయనం చేయడం ఒక ఆవశ్యకమైన మార్గం. లేఖనాల్లో మనం ఆయన జీవితం, పరిచర్య మరియు బోధనల గురించి నేర్చుకుంటాము. ఆయన వాగ్దానాల గురించి కూడా మనం నేర్చుకుంటాం. మనం లేఖనాలను చదివినప్పుడు, మనం ఆయన ప్రేమను అనుభవిస్తాము. మన ఆత్మలు విస్తరిస్తాయి, ఆయనపై మన విశ్వాసం పెరుగుతుంది మరియు మన మనస్సులు ప్రకాశవంతమవుతాయి. ఆయన దైవిక నియమితకార్యము గురించి మన సాక్ష్యాలు బలంగా మారతాయి.
ఆయన మాటలను మన జీవితాల్లో అన్వయించుకున్నప్పుడు మనం యేసును గుర్తుంచుకుంటాము మరియు అనుసరిస్తాము. మనం ప్రతిరోజూ లేఖనాలను, ప్రత్యేకించి మోర్మన్ గ్రంథాన్ని అధ్యయనం చేయాలి.
బైబిలు, మోర్మన్ గ్రంథము, సిద్ధాంతము మరియు నిబంధనలు, మరియు అమూల్యమైన ముత్యము అనేవి యేసు క్రీస్తు యొక్క కడవరి దిన పరిశుద్ధుల సంఘము యొక్క లేఖనాలు. వీటిని “ప్రామాణిక గ్రంథాలు” అని కూడా పిలుస్తారు.
లేఖన అధ్యయనము
ఈ సూత్రం గురించి మరింత తెలుసుకోండి
-
Guide to the Scriptures, “Scriptures.”
-
Gospel Topics: “Scriptures [లేఖనాలు]”
దేవుని ఆజ్ఞలు పాటించుటకు మన నిబంధన
గమనిక: ఈ విభాగంలో ఆజ్ఞలను బోధించడానికి అనేక మార్గాలు ఉన్నాయి. ఉదాహరణకు, మీరు కొన్ని సందర్శనలలో వారికి బోధించవచ్చు. లేదా వాటిలో కొన్నింటిని మొదటి మూడు పాఠాల్లో భాగంగా బోధించవచ్చు. ఆజ్ఞల గురించి బోధిస్తున్నప్పుడు, వాటిని బాప్తిస్మపు నిబంధనకు మరియు రక్షణ ప్రణాళికకు సంబంధింపజేయాలని నిర్ధారించుకోండి.
మనం బాప్తిస్మం తీసుకున్నప్పుడు, మనం “ఆయన ఆజ్ఞలను పాటిస్తాము” అని దేవునితో నిబంధన చేస్తాము (మోషైయ 18:10; ఆల్మా 7:15).
దేవుడు మనల్ని ప్రేమిస్తున్నారు, కాబట్టి మనకు ఆజ్ఞలు ఇచ్చారు. ఆయన ఇప్పుడు మరియు నిత్యత్వం రెండింటిలోనూ మన మంచిని కోరుకుంటున్నారు. మన పరలోక తండ్రిగా, మన ఆధ్యాత్మిక మరియు భౌతిక శ్రేయస్సు కోసం మనకు ఏమి అవసరమో ఆయనకు తెలుసు. మనకు ఏది గొప్ప ఆనందాన్ని ఇస్తుందో కూడా ఆయనకు తెలుసు. ప్రతి ఆజ్ఞ ఒక దైవిక బహుమతి, మన నిర్ణయాలకు మార్గనిర్దేశం చేయడానికి, మనల్ని రక్షించడానికి మరియు ఎదగడానికి మనకు సహాయపడడానికి ఇవ్వబడింది.
మనము భూమిపైకి రావడానికి ఒక కారణం ఏమిటంటే, మన కర్తృత్వాన్ని తెలివిగా ఉపయోగించడం ద్వారా నేర్చుకోవడం మరియు ఎదగడం (అబ్రాహాము 3:25 చూడండి). దేవుని ఆజ్ఞలకు విధేయత చూపడానికి మరియు మనం తప్పు చేసినప్పుడు పశ్చాత్తాపం చెందడానికి ఎంచుకోవడం—తరచుగా సవాలుగా ఉండే ఈ మర్త్య ప్రయాణాన్ని దాటడంలో మనకు సహాయపడుతుంది.
దేవుని ఆజ్ఞలు బలము మరియు దీవెనలకు మూలం (సిద్ధాంతము మరియు నిబంధనలు 82:8–9 చూడండి). ఆజ్ఞలను పాటించడం ద్వారా, అవి మన స్వేచ్ఛను నిరోధించే భారమైన నియమాలు కాదని మనం తెలుసుకుంటాము. ఆజ్ఞలను పాటించడం ద్వారా నిజమైన స్వేచ్ఛ లభిస్తుంది. విధేయత అనేది పరిశుద్ధాత్మ ద్వారా మనకు వెలుగు మరియు జ్ఞానాన్ని తెచ్చే శక్తికి మూలం. ఇది మనకు గొప్ప సంతోషాన్ని తెస్తుంది మరియు దేవుని పిల్లలుగా మన దైవిక సామర్థ్యాన్ని చేరుకోవడానికి మనకు సహాయపడుతుంది.
మనం ఆయన ఆజ్ఞలను పాటించినప్పుడు దేవుడు మనల్ని దీవిస్తానని వాగ్దానం చేస్తారు. కొన్ని ఆశీర్వాదాలు కొన్ని ఆజ్ఞలకు ప్రత్యేకమైనవి. ఈ జీవితంలో శాంతి మరియు రాబోయే లోకంలో నిత్యజీవము ఆయన అంతిమ దీవెనలు. (మోషైయ 2:41; ఆల్మా 7:16; సిద్ధాంతము మరియు నిబంధనలు 14:7; 59:23; 93:28; 130:20–21 చూడండి.)
దేవుని దీవెనలు ఆధ్యాత్మికమైనవి మరియు తాత్కాలికమైనవి. కొన్ని సమయాల్లో, అవి ఆయన చిత్తము మరియు సమయానికి అనుగుణంగా వస్తాయని విశ్వసిస్తూ, వాటి కోసం వేచియుండడంలో మనం ఓపికగా ఉండాలి (మోషైయ 7:33; సిద్ధాంతము మరియు నిబంధనలు 88:68 చూడండి). కొన్ని దీవెనలను గుర్తించడానికి, మనం ఆధ్యాత్మికంగా జాగ్రత్తగా, శ్రద్ధగా గమనించాలి. సరళమైన మరియు సాధారణమైన మార్గాల్లో వచ్చే దీవెనల విషయంలో ఇది ప్రత్యేకంగా వర్తిస్తుంది.
కొన్ని దీవెనలు గతావలోకనంలో మాత్రమే కనిపించవచ్చు. మరికొన్ని ఈ జీవితం తర్వాత కానీ రాకపోవచ్చు. దేవుని దీవెనల సమయం లేదా స్వభావంతో సంబంధం లేకుండా, మనం యేసు క్రీస్తు సువార్తను జీవించడానికి ప్రయత్నిస్తున్నప్పుడు అవి వస్తాయనే హామీని మనం పొందవచ్చు (సిద్ధాంతము మరియు నిబంధనలు 82:10 చూడండి).
దేవుడు తన పిల్లలందరినీ పరిపూర్ణంగా ప్రేమిస్తారు. ఆయన మన బలహీనత పట్ల సహనంతో ఉంటారు మరియు మనం పశ్చాత్తాపపడినప్పుడు ఆయన క్షమిస్తారు.
రెండు గొప్ప ఆజ్ఞలు
“ధర్మశాస్త్రములో ముఖ్యమైన ఆజ్ఞ ఏది?” అని యేసు అడుగబడినప్పుడు, “నీ పూర్ణహృదయముతోను నీ పూర్ణాత్మతోను నీ పూర్ణమనస్సుతోను నీ దేవుడైన ప్రభువును ప్రేమింపవలెను” అని ఆయన జవాబిచ్చారు.
తరువాత, “నిన్నువలె నీ పొరుగువాని ప్రేమింపవలెను” (మత్తయి 22:36–39) అను రెండవ ఆజ్ఞయు మొదటి దానివంటిదే అని యేసు చెప్పారు. “వీటికంటే ముఖ్యమైన ఆజ్ఞ మరేదియు లేదు” (మార్కు 12:31).
దేవుని ఆత్మీయ పిల్లలుగా మనం ప్రేమ పట్ల అపారమైన సామర్థ్యాన్ని కలిగియున్నాము. ఇది మన ఆధ్యాత్మిక వారసత్వంలో భాగం. ముందుగా దేవుణ్ణి ప్రేమించడం మరియు మన పొరుగువారిని ప్రేమించడం అనే రెండు గొప్ప ఆజ్ఞలను జీవించడం యేసు క్రీస్తు శిష్యులను నిర్వచించే లక్షణం.
దేవుని ప్రేమ
దేవుని కొరకు మన ప్రేమను చూపగల విధానాలు అనేకమున్నాయి. మనం ఆయన ఆజ్ఞలను పాటించగలము (యోహాను 14:15, 21 చూడండి). మన చిత్తాన్ని ఆయనకి సమర్పించి, మన జీవితంలో ఆయనకు మనం మొదటి స్థానం ఇవ్వగలము. మన కోరికలు, ఆలోచనలు మరియు హృదయాలను ఆయనపై మనం కేంద్రీకరించగలము (ఆల్మా 37:36 చూడండి). ఆయన మనకు అందించిన దీవెనలకు మనం కృతజ్ఞతతో జీవించగలము మరియు ఆ దీవెనలను పంచుకోవడంలో ఉదారంగా ఉండగలము (మోషైయ 2:21–24; 4:16–21 చూడండి). ప్రార్థన మరియు ఇతరులకు సేవ చేయడం ద్వారా, మనం ఆయన పట్ల మన ప్రేమను వ్యక్తపరచగలము మరియు ఎక్కువ చేసుకోగలము.
ఇతర ఆజ్ఞల వలే, దేవుణ్ణి ప్రేమించాలనే ఆజ్ఞ కూడా మన ప్రయోజనం కొరకైనది. మనం ప్రేమించేది మనం కోరుకునేదాన్ని నిర్ణయిస్తుంది. మనం కోరుకునేది మనం ఏమి ఆలోచిస్తామో మరియు ఏమి చేస్తామో నిర్ణయిస్తుంది. మనం ఏమి ఆలోచిస్తామో మరియు ఏమి చేస్తామో అనేది మనం ఎవరమో మరియు మనం ఏమి కాగలమో నిర్ణయిస్తుంది.
ఇతరుల ప్రేమ
ఇతరులను ప్రేమించడం అనేది దేవుని పట్ల మనకున్న ప్రేమకు పొడిగింపు. ఇతరులను ప్రేమించే అనేక మార్గాలను రక్షకుడు మనకు నేర్పించారు (ఉదాహరణకు, లూకా 10:25–37 మరియు మత్తయి 25:31–46 చూడండి). మనము వారిని సమీపిస్తాము మరియు మన హృదయాలలోకి, జీవితాలలోకి వారిని స్వాగతిస్తాము. మనం సేవ చేయడం ద్వారా—చిన్న మార్గాల్లో కూడా మనల్ని మనం ఇవ్వడం ద్వారా ప్రేమిస్తాం. మనం ఇతరులను దీవించడానికి దేవుడు మనకు ఇచ్చిన బహుమానాలను ఉపయోగించడం ద్వారా వారిని ప్రేమిస్తాము.
ఇతరులను ప్రేమించడం అంటే సహనంతో, దయగా మరియు నిజాయితీగా ఉండడం. ఇందులో స్వేచ్ఛగా క్షమించడం కూడా ఉంటుంది. జనులందరినీ గౌరవంగా చూడాలని దీని అర్థం.
మనం ఎవరినైనా ప్రేమించినప్పుడు, మనం మరియు ఆ వ్యక్తి ఇద్దరం దీవించబడతాము. మన హృదయాలు ఎదుగుతాయి, మన జీవితాలు మరింత అర్థవంతంగా మారతాయి మరియు మన ఆనందం పెరుగుతుంది.
దీవెనలు
రెండు గొప్ప ఆజ్ఞలు—దేవుడిని ప్రేమించడం మరియు మన పొరుగువారిని ప్రేమించడం—దేవుని ఆజ్ఞలన్నింటికీ పునాది (మత్తయి 22:40 చూడండి). మనం మొదట దేవుణ్ణి ప్రేమించినప్పుడు మరియు ఇతరులను కూడా ప్రేమించినప్పుడు, మన జీవితంలో ప్రతిదీ దాని సరైన స్థానానికి వెళుతుంది. ఈ ప్రేమ మన దృక్పథాన్ని, మన సమయాన్ని ఉపయోగించడాన్ని, మనం అనుసరించే ఆసక్తులను మరియు మన ప్రాధాన్యతల క్రమాన్ని ప్రభావితం చేస్తుంది.
లేఖన అధ్యయనము
ఈ సూత్రం గురించి మరింత తెలుసుకోండి
ప్రవక్తను అనుసరించండి
భూమిపై ఆయన ప్రతినిధులుగా ఉండేందుకు దేవుడు ప్రవక్తలను పిలుస్తారు. తన ప్రవక్తల ద్వారా, ఆయన సత్యాన్ని బయల్పరుస్తారు మరియు మార్గదర్శకత్వాన్ని, హెచ్చరికలను అందిస్తారు.
దేవుడు జోసెఫ్ స్మిత్‌ను కడవరి దినాలలో మొదటి ప్రవక్తగా పిలిచారు (1వ పాఠం చూడండి). నేడు సంఘాన్ని నడిపించే ప్రవక్తతో సహా, జోసెఫ్ స్మిత్ తరువాత వచ్చినవారు కూడా ఆయన సంఘాన్ని నడిపించడానికి దేవునిచేత పిలువబడ్డారు. మనం జీవించియున్న ప్రవక్త యొక్క దైవిక పిలుపుపై నిశ్చయతను పొందాలి మరియు అతని బోధనలను అనుసరించాలి.
జీవించియున్న ప్రవక్తలు మరియు అపొస్తలుల బోధనలు మారుతున్న విలువలు గల ప్రపంచంలో నిత్య సత్యానికి లంగరును అందిస్తాయి. మనం దేవుని ప్రవక్తలను అనుసరిస్తున్నప్పుడు, ప్రపంచంలోని గందరగోళం మరియు కలహాలు మనల్ని ముంచెత్తవు. మనం ఈ జీవితంలో గొప్ప సంతోషాన్ని పొందుతాము మరియు మన నిత్య ప్రయాణంలో ఈ భాగానికి నడిపింపును పొందుతాము.
లేఖన అధ్యయనము
ఈ సూత్రం గురించి మరింత తెలుసుకోండి
-
Guide to the Scriptures: “Prophet,” “Prophetess,” “Prophecy, Prophesy”
-
Gospel Topics: “Prophets [ప్రవక్తలు],” “Prophecy [ప్రవచనము]”
పది ఆజ్ఞలను పాటించండి
దేవుడు తన జనులకు మార్గనిర్దేశం చేయడానికి మోషే అనే ప్రాచీన ప్రవక్తకు పది ఆజ్ఞలను బయల్పరిచారు. ఈ ఆజ్ఞలు మన కాలంలో కూడా అంతే వర్తిస్తాయి. దేవుడిని ఆరాధించడాన్ని మరియు భక్తి చూపించడాన్ని అవి మనకు బోధిస్తాయి. ఒకరితో ఒకరు ఎలా ప్రవర్తించాలో కూడా అవి మనకు బోధిస్తాయి.
-
“నేను తప్ప వేరొక దేవుడు నీకు ఉండకూడదు” (నిర్గమకాండము 20:3). ఇతర “దేవుళ్ళ”లో ఆస్తులు, అధికారం లేదా ప్రాముఖ్యత వంటి అనేక విషయాలు ఉండవచ్చు.
-
“దేని విగ్రహమునైనను నీవు చేసికొనకూడదు” (నిర్గమకాండము 20:4).
-
“నీ దేవుడైన యెహోవా నామమును వ్యర్థముగా నుచ్చరింపకూడదు” (నిర్గమకాండము 20:7).
-
“విశ్రాంతిదినమును పరిశుద్ధముగా ఆచరించుటకు జ్ఞాపకముంచుకొనుము” (నిర్గమకాండము 20:8).
-
“నీ తండ్రిని నీ తల్లిని సన్మానించుము” (నిర్గమకాండము 20:12).
-
“నరహత్య చేయకూడదు” (నిర్గమకాండము 20:13).
-
“వ్యభిచరింపకూడదు” (నిర్గమకాండము 20:14).
-
“దొంగిలకూడదు” (నిర్గమకాండము 20:15).
-
“నీ పొరుగువాని మీద అబద్ధ సాక్ష్యము పలుకకూడదు” (నిర్గమకాండము 20:16).
-
“నీ పొరుగువానిదగు దేనినైనను ఆశింపకూడదు” (నిర్గమకాండము 20:17).
లేఖన అధ్యయనము
ఈ సూత్రం గురించి మరింత తెలుసుకోండి
-
Guide to the Scriptures: “Commandments, the Ten”
-
Gospel Topics: “Ten Commandments [పది ఆజ్ఞలు]”
పవిత్రత యొక్క చట్టమును జీవించండి
పవిత్రత యొక్క చట్టం మన రక్షణ మరియు ఉన్నతస్థితి కోసం దేవుని ప్రణాళికలో ఒక ముఖ్యమైన భాగం. భార్యాభర్తల మధ్య లైంగిక సాన్నిహిత్యం పిల్లల సృష్టి కోసం మరియు వివాహంలో ప్రేమను వ్యక్తపరచడం కోసం దేవునిచే నియమించబడింది. ఈ సాన్నిహిత్యం మరియు మానవ జీవితాన్ని సృష్టించే శక్తి అందంగా మరియు పవిత్రంగా ఉండడానికి ఉద్దేశించబడ్డాయి.
ఒక పురుషుడు మరియు ఒక స్త్రీ మధ్య చట్టబద్ధమైన వివాహానికి వెలుపల లైంగిక సంబంధాలకు దూరంగా ఉండడమే దేవుని పవిత్రత యొక్క చట్టం. ఈ చట్టానికి అర్థం వివాహం తర్వాత వ్యక్తి యొక్క జీవిత భాగస్వామిపట్ల పూర్తి విశ్వసనీయత మరియు విధేయత కలిగి ఉండడం కూడా.
పవిత్రత యొక్క చట్టాన్ని పాటించడంలో మనకు సహాయపడడానికి, మన ఆలోచనలు మరియు మాటలలో స్వచ్ఛంగా ఉండమని ప్రవక్తలు మనకు ఉపదేశించారు. మనం ఏ రూపంలోనైనా అశ్లీలతకు దూరంగా ఉండాలి. పవిత్రత యొక్క చట్టానికి అనుగుణంగా, మన ప్రవర్తన మరియు రూపంలో మనం నిరాడంబరంగా ఉండాలి.
బాప్తిస్మపు అభ్యర్థులు పవిత్రత యొక్క చట్టాన్ని జీవించాలి.
పశ్చాత్తాపం మరియు క్షమాపణ
దేవుని దృష్టిలో, పవిత్రత యొక్క చట్టాన్ని ఉల్లంఘించడం చాలా తీవ్రమైనది (నిర్గమకాండము 20:14; ఎఫెసీయులకు 5:3 చూడండి). జీవితాన్ని సృష్టించడానికి ఆయన ఇచ్చిన పవిత్ర శక్తిని ఇది దుర్వినియోగం చేస్తుంది. అయితే మనం ఈ చట్టాన్ని ఉల్లంఘించినా ఆయన మనల్ని ప్రేమిస్తూనే ఉంటారు. యేసు క్రీస్తు యొక్క ప్రాయశ్చిత్త త్యాగం ద్వారా పశ్చాత్తాపపడి, పవిత్రంగా ఉండమని ఆయన మనల్ని ఆహ్వానిస్తున్నారు. పాపం యొక్క నిరాశ దేవుని క్షమాపణ యొక్క మధురమైన శాంతితో భర్తీ చేయబడగలదు (సిద్ధాంతము మరియు నిబంధనలు 58:42–43 చూడండి).
దీవెనలు
దేవుడు మనల్ని మరియు ఆయన భూమికి పంపే ఆత్మీయ పిల్లలను దీవించడానికి పవిత్రత యొక్క చట్టాన్ని ఇచ్చారు. ఈ చట్టాన్ని పాటించడం వ్యక్తిగత శాంతికి మరియు మన కుటుంబ సంబంధాలలో ప్రేమ, నమ్మకం మరియు ఐక్యతను కలిగియుండడానికి చాలా అవసరం.
మనం పవిత్రత యొక్క చట్టాన్ని జీవిస్తున్నప్పుడు, వివాహం వెలుపల లైంగిక సాన్నిహిత్యం నుండి వచ్చే ఆధ్యాత్మిక హాని నుండి మనం రక్షించబడతాము. అలాంటి సంబంధాలతో పాటు తరచుగా వచ్చే మానసిక మరియు శారీరక సమస్యలను కూడా మనము నివారిస్తాము. దేవుని ముందు మన విశ్వాసంలో మనం ఎదుగుతాము (సిద్ధాంతము మరియు నిబంధనలు 121:45 చూడండి). మనం పరిశుద్ధాత్మ ప్రభావానికి మరింత బహిరంగంగా ఉంటాము. మన కుటుంబాలను నిత్యత్వం కొరకు ఏకం చేసే పవిత్రమైన నిబంధనలను దేవాలయంలో చేయడానికి మనము బాగా సిద్ధమవుతాము.
లేఖన అధ్యయనము
ఈ సూత్రం గురించి మరింత తెలుసుకోండి
-
Guide to the Scriptures: “Chastity”
-
Gospel Topics: “Chastity [పవిత్రత]”
దశమభాగ చట్టమును పాటించండి
సంఘములో సభ్యత్వం యొక్క గొప్ప ప్రత్యేకత దశమభాగాన్ని చెల్లించే అవకాశం. మనం దశమభాగాన్ని ఇస్తున్నప్పుడు, మనం దేవుని పనికి మరింత సహాయం చేస్తాము మరియు ఆయన పిల్లలను దీవిస్తాము.
దశమభాగము యొక్క చట్టము పాత నిబంధన కాలములో మూలాలను కలిగి ఉంది. ఉదాహరణకు, ప్రవక్తయైన అబ్రాహాము తన వద్ద ఉన్న అన్నిటిలో దశమభాగాలు చెల్లించాడు (ఆల్మా 13:15; ఆదికాండము 14:18–20 చూడండి).
దశమభాగం అనే పదానికి పదవ వంతు అని అర్థం. మనం దశమభాగాన్ని ఇస్తున్నప్పుడు, మనము మన ఆదాయంలో పదవ వంతు సంఘానికి విరాళంగా ఇస్తాము (సిద్ధాంతము మరియు నిబంధనలు 119:3–4 చూడండి; వడ్డీ అంటే ఆదాయం అని అర్థం). మనకున్నదంతా దేవుడిచ్చిన బహుమానమే. మనం దశమభాగాన్ని చెల్లించినప్పుడు, ఆయన మనకు ఇచ్చిన దానిలో కొంత భాగాన్ని తిరిగి ఇవ్వడం ద్వారా మనం ఆయనకు కృతజ్ఞతాభావం చూపుతాము.
దశమభాగం చెల్లించడం అనేది విశ్వాసం యొక్క వ్యక్తీకరణ. ఇది దేవుడిని గౌరవించే మార్గం కూడా. మనము “దేవుని రాజ్యమును మొదట వెదకాలని” (మత్తయి 6:33) యేసు బోధించారు మరియు దశమభాగము దానిని చేయడానికి ఒక మార్గం.
దశమభాగ నిధుల వినియోగం
దశమభాగ నిధులు పవిత్రమైనవి. మనము బిషప్రిక్కు సభ్యునికి మన దశమభాగాన్ని ఇస్తాము లేదా అనేక ప్రాంతాలలో మనము ఆన్‌లైన్‌లో చెల్లించవచ్చు. బిషప్రిక్కు దశమభాగాన్ని స్వీకరించినప్పుడు, వారు దానిని సంఘ ప్రధాన కార్యాలయానికి పంపుతారు.
ప్రథమ అధ్యక్షత్వము, పన్నెండుమంది అపొస్తలుల సమూహము మరియు అధ్యక్షత్వము వహించు బిషప్రిక్కుతో కూడిన సలహాసభ దేవుని పనిలో దశమభాగపు నిధులను ఎలా ఉపయోగించాలో నిర్ణయిస్తుంది (సిద్ధాంతము మరియు నిబంధనలు 120:1 చూడండి). ఈ ఉపయోగాలలో ఇవి కలవు:
-
దేవాలయాలు మరియు సమావేశ గృహాలను నిర్మించడం మరియు నిర్వహించడం.
-
లేఖనాలను అనువదించడం మరియు ప్రచురించడం.
-
స్థానిక సంఘ సమూహాల కార్యకలాపాలు మరియు వ్యవహారాలకు మద్దతు ఇవ్వడం.
-
ప్రపంచవ్యాప్తంగా సువార్త పరిచర్యకు మద్దతు ఇవ్వడం.
-
కుటుంబ చరిత్ర కార్యానికి మద్దతు ఇవ్వడం.
-
పాఠశాలలు మరియు విద్య కొరకు నిధులివ్వడం.
దశమభాగం స్థానిక సంఘ నాయకులకు చెల్లించడానికి ఉపయోగించబడదు. వారు ఎలాంటి చెల్లింపులు లేకుండా స్వచ్ఛందంగా సేవలు అందిస్తారు.
దీవెనలు
మనం దశమభాగాన్ని చెల్లించినప్పుడు, మనం ఇచ్చే దానికంటే చాలా గొప్ప దీవెనలను దేవుడు వాగ్దానం చేస్తారు. ఆయన “ఆకాశపువాకిండ్లను విప్పి, పట్టజాలనంత విస్తారముగా దీవెనలు కుమ్మరిస్తారు” (మలాకీ 3:10; 7–12 వచనాలు చూడండి). ఈ దీవెనలు ఆధ్యాత్మికమైనవి మరియు తాత్కాలికమైనవి కావచ్చు.
లేఖన అధ్యయనము
ఈ సూత్రం గురించి మరింత తెలుసుకోండి
-
Guide to the Scriptures: “Tithes, Tithing”
-
Gospel Topics: “Tithing [దశమభాగము]”
జ్ఞానవాక్యమునకు లోబడియుండండి
ప్రభువు యొక్క ఆరోగ్య చట్టము
మన శరీరాలు దేవుడిచ్చిన పవిత్ర బహుమానాలు. ఆయనలాగా మారడానికి మనలో ప్రతీ ఒక్కరికి భౌతిక శరీరం అవసరం. మన శరీరాలు చాలా ముఖ్యమైనవి, లేఖనాలు వాటిని దేవాలయాలతో పోల్చాయి (1 కొరింథీయులకు 6:19–20 చూడండి).
మన శరీరాలను గౌరవంగా చూసుకోవాలని ప్రభువు కోరుతున్నారు. దీన్ని చేయడంలో మనకు సహాయం చేయడానికి, ఆయన జ్ఞానవాక్యము అనే ఆరోగ్య చట్టాన్ని బయల్పరిచారు. ఈ బయల్పాటు మనకు ఆరోగ్యకరమైన ఆహారాన్ని తినడం గురించి మరియు మన శరీరానికి హాని కలిగించే పదార్థాలను—ప్రత్యేకించి మద్యం, పొగాకు మరియు వేడి పానీయాలు (టీ మరియు కాఫీ అని అర్థం) ఉపయోగించకుండా ఉండడం గురించి బోధిస్తుంది.
జ్ఞానవాక్యము యొక్క స్ఫూర్తితో, ఆధునిక ప్రవక్తలు హానికరమైన, చట్టవిరుద్ధమైన లేదా వ్యసనం కాగల ఇతర పదార్ధాలను ఉపయోగించరాదని హెచ్చరిస్తున్నారు. మందుల చీటీలోని మందుల దుర్వినియోగానికి వ్యతిరేకంగా కూడా ప్రవక్తలు హెచ్చరించారు. (మీ భౌగోళిక ప్రాంతంలోని ఇతర పదార్ధాలను ఉపయోగించవచ్చా లేదా అనే ప్రశ్నలకు మీ మిషను అధ్యక్షుడు సమాధానం ఇస్తారు.)
దీవెనలు
మన భౌతిక మరియు ఆధ్యాత్మిక శ్రేయస్సు కోసం ప్రభువు జ్ఞానవాక్యాన్ని అందించారు. మనం ఈ ఆజ్ఞను పాటించినప్పుడు ఆయన గొప్ప దీవెనలు వాగ్దానం చేస్తారు. ఈ దీవెనలలో ఆరోగ్యం, జ్ఞానం, జ్ఞాన సంపద మరియు రక్షణ ఉన్నాయి (సిద్ధాంతము మరియు నిబంధనలు 89:18–21 చూడండి).
జ్ఞానవాక్యానికి లోబడడం అనేది పరిశుద్ధాత్మ యొక్క ప్రేరేపణలను మరింతగా స్వీకరించడానికి మనకు సహాయం చేస్తుంది. మనమందరం ఆరోగ్య సవాళ్ళను అనుభవిస్తున్నప్పటికీ, ఈ చట్టానికి లోబడడం శరీరం, మనస్సు మరియు ఆత్మలో ఆరోగ్యంగా ఉండడానికి మనకు సహాయం చేస్తుంది.
బాప్తిస్మపు అభ్యర్థులు జ్ఞానవాక్యానికి లోబడి ఉండాలి.
వ్యసనాలతో పోరాడుతున్న వ్యక్తులకు సహాయం చేయడం గురించి మార్గదర్శకత్వం కోసం, 10వ అధ్యాయం చూడండి.
లేఖన అధ్యయనము
ఈ సూత్రం గురించి మరింత తెలుసుకోండి
-
Guide to the Scriptures: “Word of Wisdom”
-
Gospel Topics: “Health [ఆరోగ్యము],” “Word of Wisdom [జ్ఞానవాక్యము]”
-
Life Help: “Addiction [వ్యసనము]”
విశ్రాంతిదినమును పరిశుద్ధంగా ఆచరించండి
విశ్రాంతి మరియు ఆరాధన కోసం ఒక రోజు
విశ్రాంతిదినము అనేది మన రోజువారీ శ్రమల నుండి విశ్రాంతి తీసుకోవడానికి మరియు ఆయనను ఆరాధించడానికి ప్రతి వారం దేవుడు మనకు కేటాయించిన పరిశుద్ధ దినము. మోషేకు ఇవ్వబడిన పది ఆజ్ఞలలో ఒకటి, “విశ్రాంతిదినమును పరిశుద్ధంగా ఆచరించుటకు జ్ఞాపకముంచుకొనుము” (నిర్గమకాండము 20:8; 9–11 వచనాలు కూడా చూడండి).
ఆధునిక బయల్పాటులో, విశ్రాంతిదినము గురించి మాట్లాడుతూ ప్రభువు, “నీ పనుల నుండి విశ్రాంతి పొంది, మహోన్నతునికి నీ భక్తిని చూపుటకు నిశ్చయముగా ఈ దినము నీ కొరకు నియమించబడినదని” చెప్పారు (సిద్ధాంతము మరియు నిబంధనలు 59:10). విశ్రాంతిదినము ఆనందము, ప్రార్థన మరియు కృతజ్ఞతలు తెలిపే రోజుగా ఉండాలని కూడా ఆయన చెప్పారు (14–15 వచనాలు చూడండి).
మన విశ్రాంతిదిన ఆరాధనలో భాగంగా, మనము ప్రతీవారం సంస్కార సమావేశానికి హాజరవుతాము. ఈ సమావేశంలో, మనము దేవుణ్ణి ఆరాధిస్తాము మరియు యేసు క్రీస్తును, ఆయన ప్రాయశ్చిత్తాన్ని జ్ఞాపకం చేసుకోవడానికి సంస్కారమందు పాలుపంచుకుంటాము. మనం సంస్కారంలో పాలుపంచుకున్నప్పుడు, మనం దేవునితో మన నిబంధనలను నూతనపరుస్తాము మరియు మన పాపాల గురించి పశ్చాత్తాపపడడానికి సిద్ధంగా ఉన్నామని చూపిస్తాము. సంస్కారము యొక్క విధి మన విశ్రాంతిదిన ఆచరణకు కేంద్రమైయున్నది.
సంఘములో మనము యేసు క్రీస్తు సువార్త గురించి మరింతగా తెలుసుకునే తరగతులలో కూడా పాల్గొంటాము. మనం కలిసి లేఖనాలను అధ్యయనం చేయడం వల్ల మన విశ్వాసం పెరుగుతుంది. మనం ఒకరికొకరు సేవ చేసుకుంటూ, ఒకరినొకరు బలపరచుకోవడం వల్ల మన ప్రేమ పెరుగుతుంది.
విశ్రాంతిదినమున మన శ్రమల నుండి విశ్రాంతి తీసుకోవడంతో పాటు, సాధారణమైన రోజు అనిపించేలా చేసే కొనుగోళ్ళు మరియు ఇతర కార్యకలాపాలకు దూరంగా ఉండాలి. మనము ప్రపంచ కార్యకలాపాలను పక్కన పెట్టి, ఆధ్యాత్మిక విషయాలపై మన ఆలోచనలు మరియు చర్యలను కేంద్రీకరిస్తాము.
మంచి చేయడం కోసం ఒక రోజు
విశ్రాంతిదినమున మంచి చేయడం ఎంత ముఖ్యమో, దానిని పరిశుద్ధంగా ఉంచడానికి మనం ఏమి మానివేస్తామో కూడా అంతే ముఖ్యము. మనము సువార్తను నేర్చుకుంటాము, విశ్వాసాన్ని బలపరుస్తాము, సంబంధాలను ఏర్పరచుకుంటాము, సేవను అందిస్తాము, కుటుంబం మరియు స్నేహితులతో ఇతర ఉత్తేజకరమైన కార్యక్రమాలలో పాల్గొంటాము.
దీవెనలు
విశ్రాంతిదినమును పరిశుద్ధంగా ఆచరించడం అనేది పరలోక తండ్రి మరియు యేసు క్రీస్తు పట్ల మనకున్న భక్తి యొక్క వ్యక్తీకరణ. మన విశ్రాంతిదిన కార్యకలాపాలను ఆ రోజు కోసం దేవుని ఉద్దేశానికి అనుగుణంగా చేస్తున్నప్పుడు, మనం ఆనందం మరియు శాంతిని అనుభవిస్తాము. మనం ఆధ్యాత్మికంగా పోషించబడతాము మరియు శారీరకంగా సేదతీరుతాము. మనం దేవునికి దగ్గరగా కూడా భావిస్తాము మరియు మన రక్షకునితో మన సంబంధాన్ని మరింతగా పెంచుకుంటాము. “ఇహలోక మాలిన్యము అంటకుండా” మనల్ని మనం బహుమిక్కిలిగా కాపాడుకుంటాము (సిద్ధాంతము మరియు నిబంధనలు 59:9). విశ్రాంతిదినము “మనోహరమైనది” అవుతుంది యెషయా 58:13; 14వ వచనము కూడా చూడండి).
లేఖన అధ్యయనము
ఈ సూత్రం గురించి మరింత తెలుసుకోండి
-
Gospel Topics: “Sabbath Day [విశ్రాంతిదినము]”
-
Guide to the Scriptures: “Sabbath Day”
చట్టానికి లోబడండి మరియు గౌరవించండి
కడవరి దిన పరిశుద్ధులు చట్టాన్ని పాటించాలని మరియు మంచి పౌరులుగా ఉండాలని నమ్ముతారు (సిద్ధాంతము మరియు నిబంధనలు 134; విశ్వాస ప్రమాణాలు 1:12 చూడండి). సంఘ సభ్యులు తమ సమాజాలు మరియు దేశాలను మెరుగుపరచడానికి సేవను అందించాలని ప్రోత్సహించబడ్డారు. వారు సమాజంలో మరియు ప్రభుత్వంలో మంచి నైతిక విలువలను ప్రేరేపించేలా కూడా ఉండాలని ప్రోత్సహించబడ్డారు.
సంఘ సభ్యులు చట్టానికి అనుగుణంగా ప్రభుత్వం మరియు రాజకీయ ప్రక్రియలో పాల్గొనాలని ఆహ్వానించబడ్డారు. ప్రభుత్వంలో పదవులను కలిగి ఉన్న సభ్యులు సంఘ ప్రతినిధులుగా కాకుండా సంబంధిత పౌరులుగా ఇటువంటి సామర్థ్యాలలో వ్యవహరిస్తారు.
లేఖన అధ్యయనము
ఈ సూత్రం గురించి మరింత తెలుసుకోండి
-
ప్రధాన చేతిపుస్తకము యొక్క విభాగము 38.8లో “రాజకీయ మరియు పౌర కార్యకలాపాలు”
-
Gospel Topics: “Citizenship [పౌరసత్వం]”
దేవునికి మరియు ఇతరులకు సేవ చేయుటకు మన నిబంధన
సేవ
మనం బాప్తిస్మం తీసుకున్నప్పుడు, దేవునికి సేవ చేస్తామని మరియు ఇతరులకు సేవ చేస్తామని మనం నిబంధన చేస్తాము. ఇతరులకు సేవ చేయడం అనేది మనం దేవునికి సేవ చేసే ప్రధాన మార్గాలలో ఒకటి (మోషైయ 2:17 చూడండి). బాప్తిస్మము పొందాలనుకొనేవారు “ఒకరి భారములు ఒకరు భరించుటకు, … దుఃఖించు వారితో దుఃఖపడుటకు, ఆదరణ యొక్క అవసరములో ఉన్నవారిని ఆదరించుటకు సమ్మతించాలని” ప్రవక్తయైన ఆల్మా బోధించాడు (మోషైయ 18:8–9).
బాప్తిస్మము తర్వాత, క్రొత్త సభ్యులు సాధారణంగా సంఘములో సేవ చేయడానికి పిలుపును పొందుతారు. ఈ పిలుపులు స్వచ్ఛందమైనవి మరియు చెల్లించనివి. మనం వాటిని అంగీకరించి, శ్రద్ధగా సేవ చేస్తున్నప్పుడు, మనం విశ్వాసంలో వృద్ధి చెందుతాము, నైపుణ్యాలను అభివృద్ధి చేస్తాము మరియు ఇతరులను దీవిస్తాము.
సంఘములో మన సేవలో మరొక భాగం “పరిచర్య చేయు సహోదరుడు” లేదా “పరిచర్య చేయు సహోదరి”గా ఉండడం. ఈ బాధ్యతలో, మనకు కేటాయించిన వ్యక్తులు మరియు కుటుంబాలకు మనం సేవ చేస్తాము.
యేసు క్రీస్తు శిష్యులుగా, మనం ప్రతిరోజూ సేవ చేయడానికి అవకాశాల కోసం వెదుకుతాము. ఆయన వలె మనం “మంచి చేయుచు” సంచరిస్తాము (అపొస్తలుల కార్యములు 10:38). మనము మన పొరుగువారికి మరియు మన సమాజంలోని ఇతరులకు సేవ చేస్తాము. JustServe [జస్ట్‌సర్వ్] అందుబాటులో ఉన్న చోట మనము సేవా అవకాశాలలో పాల్గొనవచ్చు. మనము సంఘము యొక్క మానవతా ప్రయత్నాలకు మద్దతు ఇవ్వగలము మరియు విపత్తు ప్రతిస్పందనలో పాల్గొనగలము.
లేఖన అధ్యయనము
ఈ సూత్రం గురించి మరింత తెలుసుకోండి
-
Guide to the Scriptures: “Service”
-
Gospel Topics: “Service [సేవ]”
సువార్తను పంచుకొనుట
మన బాప్తిస్మపు నిబంధనలో భాగంగా, మనము “దేవునికి సాక్షులుగా నిలబడతామని” వాగ్దానం చేస్తాము (మోషైయ 18:9). మనం సాక్షులుగా నిలబడడానికి ఒక మార్గం యేసు క్రీస్తు సువార్తను పంచుకోవడం. సువార్తను స్వీకరించడానికి ఇతరులకు సహాయం చేయడం మనం చేయగలిగే అత్యంత ఆనందకరమైన సేవ (సిద్ధాంతము మరియు నిబంధనలు 18:15–16 చూడండి). ఇది మన ప్రేమ యొక్క శక్తివంతమైన వ్యక్తీకరణ.
సువార్తను జీవించడం వల్ల కలిగే దీవెనలను మనం అనుభవించినప్పుడు, మనం సహజంగానే ఆ దీవెనలను పంచుకోవాలనుకుంటాము. కుటుంబ సభ్యులు, స్నేహితులు మరియు పరిచయస్తులు మనం నమ్మకమైన మాదిరిని ఉంచినప్పుడు తరచుగా ఆసక్తి చూపుతారు మరియు సువార్త మన జీవితాలను ఎలా దీవిస్తుందో వారు చూస్తారు. మనం సాధారణ మరియు సహజమైన మార్గాల్లో సువార్తను పంచుకోవచ్చు (ప్రధాన చేతిపుస్తకము, 23వ అధ్యాయం చూడండి).
సేవ, సమాజము, వినోదం మరియు సంఘ కార్యకలాపాలలో మనతో పాటు పాల్గొనడానికి ఇతరులను మనము ఆహ్వానిస్తాము. మనము వారిని సంఘ సమావేశానికి లేదా బాప్తిస్మపు సేవకు ఆహ్వానించవచ్చు. యేసు క్రీస్తు సువార్తను వివరించే ఆన్‌లైన్ వీడియోను చూడడానికి, మోర్మన్ గ్రంథాన్ని చదవడానికి లేదా దేవాలయ బహిరంగ సందర్శనకు మనము వారిని ఆహ్వానించవచ్చు. మనం ఇతరులకు వందలాది ఆహ్వానాలను అందించవచ్చు. తరచుగా, ఆహ్వానించడం అంటే మనం ఇప్పటికే చేస్తున్న పనిలో మన కుటుంబం, స్నేహితులు మరియు పొరుగువారిని చేర్చడం.
మనం అడిగితే, సువార్తను పంచుకునే అవకాశాలను గుర్తించి, అది మన జీవితాలను ఎలా దీవిస్తుందో ఇతరులకు చెప్పడానికి దేవుడు మనకు సహాయం చేస్తారు.
ప్రేమించడం, పంచుకోవడం మరియు ఆహ్వానించడం వంటి సూత్రాలను వర్తింపజేయడం గురించి మరింత సమాచారం కోసం, 9వ అధ్యాయంలోని “సభ్యులతో ఏకమవ్వడం” చూడండి.
లేఖన అధ్యయనము
ఈ సూత్రం గురించి మరింత తెలుసుకోండి
-
Guide to the Scriptures: “Missionary Work”
-
Gospel Topics: “Missionary Work [సువార్త పరిచర్య]”
ఉపవాసము మరియు ఉపవాస కానుకలు
ఆధ్యాత్మిక బలాన్ని పెంపొందించుకోవడానికి మరియు అవసరమైన వారికి సహాయం చేయడానికి మన కొరకు ఒక మార్గంగా దేవుడు ఉపవాస చట్టాన్ని ఏర్పాటు చేసారు.
ఉపవాసం అంటే కొంతకాలం ఆహారం మరియు పానీయాలు లేకుండా ఉండడం. సంఘము సాధారణంగా ప్రతి నెల మొదటి ఆదివారాన్ని ఉపవాస దినంగా పాటిస్తుంది. ఉపవాస దినం సాధారణంగా మనం శారీరకంగా చేయగలిగితే 24 గంటల పాటు ఆహారం మరియు పానీయాలు లేకుండా ఉండడాన్ని కలిగి ఉంటుంది. ఉపవాస ఆదివారం యొక్క ఇతర ముఖ్యమైన భాగాలలో ప్రార్థన మరియు సాక్ష్యము పంచుకోవడం ఉంటాయి. మనకు అవసరమైనప్పుడు ఇతర సమయాల్లో కూడా ఉపవాసం చేయాలని మనం ప్రోత్సహించబడ్డాము.
ఆధ్యాత్మిక బలాన్ని పెంపొందించడం
ఉపవాసం మనం వినయంగా మారడానికి, దేవునికి దగ్గరవ్వడానికి మరియు ఆధ్యాత్మికంగా నూతనంగా భావించడానికి సహాయపడుతుంది. తన పరిచర్యను ప్రారంభించే ముందు, యేసు క్రీస్తు ఉపవాసం చేసారు (మత్తయి 4:1–2 చూడండి). ఉపవాసం చేసిన ప్రవక్తలు మరియు ఇతరుల గురించిన అనేక వృత్తాంతాలను లేఖనాలు నమోదు చేసాయి, తద్వారా వారు తమ ఆధ్యాత్మిక బలాన్ని పెంచుకుంటారు మరియు తమ కోసం లేదా ఇతరుల కోసం ప్రత్యేక దీవెనలను కోరుకుంటారు.
ఉపవాసం మరియు ప్రార్థన కలిసి ఉంటాయి. మనం ఉపవాసం ఉండి విశ్వాసంతో ప్రార్థించినప్పుడు, వ్యక్తిగత బయల్పాటును పొందేందుకు మనం మరింతగా అలవాటుపడతాము. మనం సత్యాన్ని గుర్తించడానికి మరియు దేవుని చిత్తాన్ని అర్థం చేసుకోవడానికి కూడా ఎక్కువ సిద్ధంగా ఉంటాము.
అవసరంలో ఉన్న వారికి సహాయం చేయడం
మనము ఉపవాసం ఉన్నప్పుడు, అవసరంలోనున్న వ్యక్తులకు సహాయం చేయడానికి సంఘానికి డబ్బును విరాళంగా అందిస్తాము. దీనిని ఉపవాస కానుక అంటారు. కనీసం తినని భోజనం విలువకు సమానమైన కానుక ఇవ్వాలని మనము ఆహ్వానించబడ్డాము. ఉదారంగా ఉండాలని మరియు మనకు వీలైతే ఈ భోజనాల విలువ కంటే ఎక్కువ ఇవ్వాలని మనము ప్రోత్సహించబడ్డాము. ఉపవాస కానుకను ఇవ్వడం మనం ఇతరులకు సేవ చేయడానికి ఒక మార్గం.
స్థానికంగా మరియు ప్రపంచవ్యాప్తంగా అవసరమైన వ్యక్తులకు ఆహారం మరియు ఇతర అవసరాలను అందించడానికి ఉపవాస కానుకలు ఉపయోగించబడతాయి. ఉపవాస కానుకలను ఎలా అందించాలనే దాని గురించిన సమాచారం కోసం, ఈ పాఠంలో “దశమభాగాలు మరియు ఇతర అర్పణలను విరాళంగా ఇవ్వడం” చూడండి.
లేఖన అధ్యయనము
ఉపవాసము
అవసరతలో ఉన్నవారి పట్ల శ్రద్ధచూపుట
ఈ సూత్రం గురించి మరింత తెలుసుకోండి
-
Guide to the Scriptures: “Fast, Fasting”
-
ప్రధాన చేతిపుస్తకము: 22.2.2
-
Gospel Topics: “Fasting and Fast Offerings [ఉపవాసము మరియు ఉపవాస కానుకలు]”
అంతము వరకు సహించుటకు మన నిబంధన
మనం బాప్తిస్మం తీసుకున్నప్పుడు, యేసు క్రీస్తు సువార్తను జీవించడంలో “అంతము వరకు సహిస్తామని” దేవునితో మనం నిబంధన చేస్తాము (2 నీఫై 31:20; మోషైయ 18:13 కూడా చూడండి). మనము యేసు క్రీస్తు యొక్క జీవితకాలపు శిష్యులుగా ఉండేందుకు కృషి చేస్తాము.
మోర్మన్ గ్రంథ ప్రవక్తయైన నీఫై బాప్తిస్మమును మనం సువార్త మార్గంలోకి ప్రవేశించే ద్వారం అని వివరించాడు (2 నీఫై 31:17 చూడండి). బాప్తిస్మము తర్వాత, “క్రీస్తునందు నిలకడతో శ్రద్ధగా ముందుకు సాగడానికి” (2 నీఫై 31:20) మనము కొనసాగుతాము.
మనము శిష్యత్వపు మార్గంలో “ముందుకు సాగినప్పుడు”, మనము దేవాలయానికి వెళ్ళడానికి సిద్ధపడతాము. అక్కడ మనం దేవాలయ విధులను పొందినప్పుడు దేవునితో నిబంధనలు చేస్తాము. దేవాలయంలో, మనకు శక్తి వరమివ్వబడుతుంది మరియు నిత్యత్వము కొరకు కుటుంబాలుగా ముద్రించబడవచ్చు. దేవాలయంలో మనం చేసే నిబంధనలను పాటించడం దేవుడు మన కొరకు కలిగి ఉన్న ప్రతి ఆధ్యాత్మిక విశేషాధికారానికి, దీవెనకు తలుపు తెరుస్తుంది.
మనం సువార్త మార్గంలో విశ్వాసంగా కొనసాగినప్పుడు, చివరికి మనం దేవుని గొప్ప బహుమానమును—నిత్యజీవపు బహుమానమును పొందుతాము (2 నీఫై 31:20; సిద్ధాంతము మరియు నిబంధనలు 14:7 చూడండి).
ఈ క్రింది విభాగాలు మన మర్త్య ప్రయాణం యొక్క అంతము వరకు సహించడానికి మరియు దానిలో ఆనందాన్ని పొందేందుకు సహాయం చేయడానికి దేవుడు అందించిన కొన్ని అంశాలను వివరిస్తాయి.
యాజకత్వము మరియు సంఘ నిర్మాణములు
యాజకత్వము అనేది దేవుని శక్తి మరియు అధికారం. ఆయన పిల్లలకు “అమర్త్యత్వమును, నిత్యజీవమును ఇచ్చే” (మోషే 1:39) ఆయన కార్యమును పరలోక తండ్రి యాజకత్వము ద్వారా సాధిస్తారు. ఈ పనిని నిర్వహించడంలో సహాయం చేయడానికి భూమిపై ఉన్న తన కుమారులు మరియు కుమార్తెలకు దేవుడు అధికారం మరియు శక్తిని ఇస్తారు.
యాజకత్వం మనందరినీ దీవిస్తుంది. యాజకత్వ స్థానాలు కలిగియుండే వారి ద్వారా బాప్తిస్మము మరియు సంస్కారము వంటి విధులు పొందబడతాయి. మనము స్వస్థత, ఓదార్పు మరియు సలహాల దీవెనలను కూడా పొందుతాము.
యాజకత్వము, సంఘ నాయకత్వము మరియు పిలుపులు
సంఘము యేసు క్రీస్తు చేత ప్రవక్తలు మరియు అపొస్తలుల ద్వారా నడిపించబడుతుంది. ఈ నాయకులు దేవునిచేత పిలువబడ్డారు, నియమించబడ్డారు మరియు రక్షకుని నామంలో పనిచేయడానికి యాజకత్వ అధికారం ఇవ్వబడ్డారు.
ప్రాచీన కాలంలో, క్రీస్తు తన అపొస్తలులకు ఇదే యాజకత్వ అధికారాన్ని ఇచ్చారు, ఆయన పరలోకానికి ఆరోహణమైన తర్వాత ఆయన సంఘాన్ని నడిపించడానికి అది వారిని అనుమతించింది. చివరికి జనులు సువార్తను తిరస్కరించినప్పుడు మరియు అపొస్తలులు మరణించినప్పుడు ఆ అధికారం కోల్పోబడింది.
పరలోక దూతలు 1829లో ప్రవక్త జోసెఫ్ స్మిత్ ద్వారా యాజకత్వాన్ని పునఃస్థాపించారు మరియు ప్రభువు మళ్ళీ అపొస్తలులు, ప్రవక్తలతో తన సంఘాన్ని స్థాపించారు. (1వ పాఠము చూడండి.)
స్థానిక స్థాయిలో, సంఘ సమూహాలకు నాయకత్వం వహించడానికి బిషప్పు‌లు మరియు స్టేకు అధ్యక్షులకు యాజకత్వ అధికారం ఉంటుంది.
పురుషులు మరియు స్త్రీలు సంఘములో సేవ చేయడానికి పిలువబడినప్పుడు మరియు ప్రత్యేకపరచబడినప్పుడు, ఆ పిలుపులో పనిచేయడానికి వారికి దేవుని నుండి అధికారం ఇవ్వబడుతుంది. ఈ అధికారం సువార్తికులు, నాయకులు, బోధకులు మరియు ఇతరులకు వారి పిలుపుల నుండి విడుదలయ్యే వరకు ఇవ్వబడుతుంది. ఇది యాజకత్వ తాళపుచెవులను కలిగియున్న వారి ఆధ్వర్యంలో అప్పగించబడుతుంది.
యాజకత్వ అధికారం నీతియందు మాత్రమే ఉపయోగించబడగలదు (సిద్ధాంతము మరియు నిబంధనలు 121:34–46 చూడండి). ఈ అధికారం రక్షకునికి ప్రాతినిధ్యం వహించడానికి మరియు ఆయన నామములో పనిచేయడానికి ఇవ్వబడిన పవిత్రమైన నమ్మకం. ఇది ఎల్లప్పుడు ఇతరులను దీవించడానికి, సేవ చేయడానికి ఉద్దేశించబడింది.
అహరోను యాజకత్వము మరియు మెల్కీసెదెకు యాజకత్వము
సంఘములో, యాజకత్వములో అహరోను యాజకత్వము మరియు మెల్కీసెదెకు యాజకత్వము ఉన్నాయి. యాజకత్వ తాళపుచెవులను కలిగియున్న వారి నిర్దేశకత్వంలో, అహరోను మరియు మెల్కీసెదెకు యాజకత్వం సంఘమందు యోగ్యులైన పురుష సభ్యులకు ఇవ్వబడుతుంది. తగిన యాజకత్వం అనుగ్రహించబడిన తర్వాత, వ్యక్తి ఆ యాజకత్వంలో పరిచారకుడు లేదా ఎల్డరు వంటి ఒక స్థానానికి నియమించబడతాడు. అవసరమైన అధికారం ఉన్న వ్యక్తి ద్వారా అతను తప్పనిసరిగా నియమించబడాలి.
ఒక పురుషుడు లేదా యువకుడు యాజకత్వాన్ని పొందినప్పుడు, పవిత్రమైన బాధ్యతలను నెరవేర్చడానికి, ఇతరులకు సేవ చేయడానికి మరియు సంఘమును నిర్మించడంలో సహాయం చేయడానికి అతడు దేవునితో నిబంధన చేస్తాడు.
యువకులు అహరోను యాజకత్వాన్ని పొందవచ్చు మరియు వారికి 12 ఏళ్ళు వచ్చే ఏడాది జనవరి నుండి పరిచారకు‌లుగా నియమించబడవచ్చు. వారికి 14 ఏళ్ళు వచ్చిన సంవత్సరంలో బోధకులుగా మరియు 16 ఏళ్ళు వచ్చిన సంవత్సరంలో యాజకులుగా నియమించబడవచ్చు. పరివర్తన చెందిన పురుషులు తగిన వయస్సు కలిగియుంటే బాప్తిస్మము మరియు నిర్ధారణ తర్వాత వెంటనే అహరోను యాజకత్వాన్ని పొందవచ్చు. అహరోను యాజకత్వాన్ని కలిగియున్నవారు సంస్కారము మరియు బాప్తిస్మము వంటి విధులను నిర్వహిస్తారు.
అహరోను యాజకత్వంలో యాజకునిగా కొంతకాలం సేవ చేసిన తర్వాత, కనీసం 18 ఏళ్ళ వయస్సు ఉన్న యోగ్యుడైన పురుషుడు మెల్కీసెదెకు యాజకత్వాన్ని పొంది, ఎల్డరుగా నియమించబడవచ్చు. మెల్కీసెదెకు యాజకత్వాన్ని పొందిన పురుషులు కుటుంబ సభ్యులకు మరియు ఇతరులకు స్వస్థత మరియు ఓదార్పు యొక్క దీవెనలు ఇవ్వడం వంటి యాజకత్వ విధులను నిర్వహించవచ్చు.
యాజకత్వం పొందుతున్న క్రొత్త సభ్యుల గురించి సమాచారం కోసం, ప్రధాన చేతిపుస్తకము, 38.2.9.1 చూడండి.
సమూహములు మరియు సంఘ నిర్మాణములు
యాజకత్వ సమూహములు. సమూహము అనేది యాజకత్వము కలిగియున్న వారి యొక్క వ్యవస్థీకృత సముదాయము. ప్రతి వార్డులో వయోజన పురుషుల కోసం పెద్దల సమూహము ఉంది. పరిచారకులు, బోధకులు మరియు యాజకుల సమూహములు యువకుల కొరకైనవి.
ఉపశమన సమాజము. ఉపశమన సమాజములో 18 ఏళ్ళు మరియు అంతకంటే ఎక్కువ వయస్సు ఉన్న స్త్రీలు ఉంటారు. ఉపశమన సమాజ సభ్యులు కుటుంబాలను, వ్యక్తులను మరియు సమాజాన్ని బలోపేతం చేస్తారు.
యువతులు. యువతులు వారికి 12 ఏళ్ళు వచ్చిన సంవత్సరం జనవరి నుండి యువతుల నిర్మాణములో చేరతారు.
ప్రాథమిక. 3 నుండి 11 ఏళ్ళ వయస్సు ఉన్న పిల్లలు ప్రాథమిక నిర్మాణములో భాగము.
ఆదివారపు బడి. పెద్దలందరు మరియు యువజనులు ఆదివారపు బడికి హాజరవుతారు, అక్కడ వారు కలిసి లేఖనాలను అధ్యయనం చేయడానికి కలుసుకుంటారు.
యాజకత్వం గురించి మరింత సమాచారము కొరకు, ప్రధాన చేతిపుస్తకము, 3వ అధ్యాయం చూడండి.
యాజకత్వ సమూహములు మరియు సంఘ నిర్మాణముల గురించి మరింత సమాచారము కొరకు, ప్రధాన చేతిపుస్తకము, 8–13 అధ్యాయాలు చూడండి.
లేఖన అధ్యయనము
ఈ సూత్రం గురించి మరింత తెలుసుకోండి
-
ప్రధాన చేతిపుస్తకము, 3వ అధ్యాయము: “యాజకత్వ సూత్రాలు”
-
Gospel Topics: “Aaronic Priesthood [అహరోను యాజకత్వము],” “Melchizedek Priesthood [మెల్కీసెదెకు యాజకత్వము],” “Priesthood [యాజకత్వము]”
వివాహము మరియు కుటుంబాలు
వివాహము
స్త్రీ పురుషుల మధ్య వివాహం దేవునిచేత నియమించబడింది. ఆయన పిల్లల నిత్య పురోగతి కోసం ఆయన ప్రణాళికలో ఇది ప్రధానమైనది.
వివాహంలో భార్యాభర్తల కలయిక వారి అత్యంత ప్రియమైన భూసంబంధమైన బంధంగా ఉండాలి. ఒకరికొకరు విధేయులుగా మరియు వారి వివాహ నిబంధనకు విశ్వాసపాత్రంగా ఉండవలసిన పవిత్రమైన బాధ్యత వారికి ఉంది.
దేవుని దృష్టిలో భార్యాభర్తలు సమానం. ఒకరిపై ఒకరు ఆధిపత్యం చెలాయించకూడదు. వారి నిర్ణయాలు ఐకమత్యంతో మరియు ప్రేమతో, ఇద్దరి పూర్తి భాగస్వామ్యంతో చేయబడాలి.
భార్యాభర్తలు ఒకరినొకరు ప్రేమిస్తూ, కలిసి పని చేస్తున్నప్పుడు, వారి వివాహం వారి అతిగొప్ప ఆనందానికి మూలంగా ఉంటుంది. నిత్యజీవము వైపు పురోగమించడానికి వారు ఒకరికొకరు మరియు వారి పిల్లలకు సహాయపడగలరు.
కుటుంబము
వివాహం వలె, కుటుంబం దేవునిచేత నియమించబడింది మరియు మన నిత్య సంతోషం కోసం ఆయన ప్రణాళికకు ప్రధానమైనది. మనం యేసు క్రీస్తు బోధనల ప్రకారం జీవించినప్పుడు మన కుటుంబాలు చాలా సంతోషంగా ఉంటాయి. తల్లిదండ్రులు తమ పిల్లలకు యేసు క్రీస్తు సువార్తను బోధిస్తారు మరియు దానిని జీవించడంలో ఆదర్శంగా ఉంటారు. కుటుంబాలు మనం ఒకరినొకరు ప్రేమించుకోవడానికి మరియు సేవ చేసుకోవడానికి అవకాశాలను అందిస్తాయి.
తల్లిదండ్రులు తమ కుటుంబానికి అత్యంత ప్రాధాన్యతనివ్వాలి. వారు కనిన లేదా దత్తత తీసుకున్న పిల్లలపట్ల శ్రద్ధ వహించడం తల్లిదండ్రుల పవిత్రమైన హక్కు మరియు బాధ్యత.
అన్ని కుటుంబాలు సవాళ్ళను కలిగియున్నాయి. మనం దేవుని మద్దతును కోరుతూ, ఆయన ఆజ్ఞలను పాటించినప్పుడు, కుటుంబ సవాళ్ళు మనం నేర్చుకోవడానికి మరియు ఎదగడానికి సహాయపడగలవు. కొన్నిసార్లు ఈ సవాళ్ళు పశ్చాత్తాపపడడాన్ని మరియు క్షమించడాన్ని నేర్చుకోవడంలో మనకు సహాయపడగలవు.
సంఘ నాయకులు సభ్యులను వారానికోసారి గృహ సాయంకాలము నిర్వహించమని ప్రోత్సహించారు. తల్లిదండ్రులు తమ పిల్లలకు సువార్త బోధించడానికి, కుటుంబ సంబంధాలను బలోపేతం చేయడానికి మరియు కలిసి ఆనందించడానికి ఈ సమయాన్ని ఉపయోగించుకుంటారు. సంఘ నాయకులు కుటుంబము గురించి ముఖ్యమైన సత్యాలను బోధించే ప్రకటనను కూడా జారీ చేశారు (“కుటుంబము: ప్రపంచమునకు ఒక ప్రకటన,” ChurchofJesusChrist.org చూడండి).
కుటుంబాన్ని బలోపేతం చేసే ఇతర మార్గాలలో కుటుంబ ప్రార్థన, లేఖన అధ్యయనం మరియు సంఘములో కలిసి ఆరాధించడం వంటివి ఉన్నాయి. మనము కుటుంబ చరిత్రను కూడా పరిశోధించవచ్చు, కుటుంబ కథలను సేకరించవచ్చు మరియు ఇతరులకు సేవ చేయవచ్చు.
చాలామంది వివాహానికి లేదా ప్రియమైన కుటుంబ సంబంధాలకు పరిమిత అవకాశాలు కలిగియున్నారు. చాలామంది విడాకులు మరియు ఇతర క్లిష్టమైన కుటుంబ పరిస్థితులను అనుభవించారు. అయితే, సువార్త మన కుటుంబ పరిస్థితులతో సంబంధం లేకుండా వ్యక్తిగతంగా మనల్ని దీవిస్తుంది. మరియు మనం విశ్వాసంగా ఉన్నప్పుడు, ఈ జీవితంలో లేదా రాబోయే జీవితంలో ప్రేమగల కుటుంబాల దీవెనలను కలిగియుండడానికి దేవుడు మనకు ఒక మార్గాన్ని అందిస్తారు.
లేఖన అధ్యయనము
వివాహము
కుటుంబము
-
“కుటుంబము: ప్రపంచమునకు ఒక ప్రకటన”
ఈ సూత్రం గురించి మరింత తెలుసుకోండి
-
Guide to the Scriptures: “Family,” “Marriage, Marry”
-
ప్రధాన చేతిపుస్తకము, 2వ అధ్యాయము: “రక్షణ మరియు ఉన్నతస్థితి కార్యములో వ్యక్తులు మరియు కుటుంబాలకు సహకరించుట”
-
Gospel Topics: “Marriage [వివాహము],” “Family [కుటుంబము],” “Parenting [పిల్లల పెంపకం]”
మరణించిన పూర్వీకుల కోసం దేవాలయము మరియు కుటుంబ చరిత్ర కార్యము
పరలోక తండ్రి తన పిల్లలందరినీ ప్రేమిస్తారు మరియు వారి రక్షణను, ఉన్నతస్థితిని కోరుకుంటారు. ఇంకా కోట్లాది మంది ప్రజలు యేసు క్రీస్తు సువార్తను వినకుండా లేదా సువార్త యొక్క రక్షణ విధులను పొందకుండానే మరణించారు. ఈ విధులలో బాప్తిస్మము, నిర్ధారణ, పురుషులకు యాజకత్వ నియామకము, దేవాలయ వరము మరియు నిత్య వివాహం ఉన్నాయి.
ఆయన కృప మరియు కనికరము ద్వారా, ఈ జనులు సువార్తను మరియు దాని విధులను పొందడానికి ప్రభువు మరొక మార్గాన్ని అందించారు. సువార్తను అందుకోకుండా మరణించిన వారికి ఆత్మ లోకంలో అది బోధించబడుతుంది (సిద్ధాంతము మరియు నిబంధనలు 138 చూడండి). దేవాలయాలలో, మరణించిన మన పూర్వీకులు మరియు ఇతరుల తరపున మనం విధులను నిర్వహించవచ్చు. ఆత్మ లోకంలో ఉన్న మరణించిన ఈ వ్యక్తులు సువార్తను మరియు వారి కోసం చేసిన విధులను అంగీకరించవచ్చు లేదా తిరస్కరించవచ్చు.
ఈ విధులను మనం నిర్వహించడానికి ముందు, వాటిని పొందని మన పూర్వీకులను మనం గుర్తించాలి. మన కుటుంబ సభ్యులు విధులను పొందగలిగేలా వారిని గుర్తించడం మన కుటుంబ చరిత్ర కార్యము యొక్క ప్రధాన ఉద్దేశ్యం. మనము వారి గురించి సమాచారాన్ని కనుగొన్నప్పుడు, మనము దానిని FamilySearch.org వద్ద సంఘము యొక్క సమాచారానికి జోడిస్తాము. అప్పుడు మనము (లేదా ఇతరులు) దేవాలయంలో వారికి ప్రాతినిధ్య విధులు నిర్వహించవచ్చు.
మనం మన పూర్వీకులను గుర్తించి, వారి కోసం విధులు నిర్వహించినప్పుడు, మన కుటుంబాలు నిత్యత్వము కొరకు ఏకం కాగలవు.
లేఖన అధ్యయనము
ఈ సూత్రం గురించి మరింత తెలుసుకోండి
-
ప్రధాన చేతిపుస్తకము, 28వ అధ్యాయము: “మరణించిన వారి కొరకు దేవాలయ విధులు”
-
Gospel Topics: “Baptisms for the Dead [మరణించిన వారి కొరకు బాప్తిస్మములు],” “Family History [కుటుంబ చరిత్ర]”
దేవాలయాలు, వరము, నిత్య వివాహము మరియు నిత్య కుటుంబాలు
దేవాలయాలు
దేవాలయము ప్రభువు యొక్క మందిరము. ఇది దేవుని పవిత్రమైన విధులను మనం పొందినప్పుడు, మనం ఆయనతో నిబంధనలను చేసుకునే పరిశుద్ధ స్థలము. మనము ఈ నిబంధనలను పాటించినప్పుడు, మన జీవితాలలో దైవత్వపు శక్తి ప్రత్యక్షపరచబడుతుంది (సిద్ధాంతము మరియు నిబంధనలు 84:19–22; 109:22–23 చూడండి).
వరము
దేవాలయములో మనము పొందే విధులలో ఒకదానిని వరము అంటారు. వరము అనే మాటకు “బహుమానము” అని అర్థము. ఈ జ్ఞానం మరియు శక్తి యొక్క బహుమానము దేవుని నుండి వస్తుంది. వరము సమయంలో మనము దేవునితో నిబంధనలు చేస్తాము, అవి మనల్ని ఆయనతో మరియు ఆయన కుమారుడైన యేసు క్రీస్తుతో బంధిస్తాయి (1వ అధ్యాయము చూడండి).
పెద్దలు కనీసం ఒక సంవత్సరం సంఘ సభ్యత్వం తర్వాత వారి స్వంత దేవాలయ వరమును పొందేందుకు అర్హులు. వరము గురించి మరింత సమాచారము కొరకు, ప్రధాన చేతిపుస్తకము, 27.2 చూడండి.
నిత్య వివాహం మరియు నిత్య కుటుంబాలు
దేవుని యొక్క సంతోష ప్రణాళిక కుటుంబ సంబంధాలను సమాధిని దాటి జీవించేలా చేస్తుంది. దేవాలయంలో మనం కాలము మరియు నిత్యత్వము కొరకు వివాహం చేసుకోగలము. కుటుంబాలు శాశ్వతంగా కలిసి ఉండడాన్ని ఇది సాధ్యం చేస్తుంది.
వివాహిత జంటలు వారి దేవాలయ వరము పొందిన తర్వాత, వారు నిత్యత్వము కొరకు ముద్రవేయబడవచ్చు లేదా వివాహం చేసుకోవచ్చు. వారి పిల్లలు వారితో ముద్రవేయబడవచ్చు.
దేవాలయంలో ముద్రవేయబడిన భార్యాభర్తలు నిత్య వివాహం యొక్క దీవెనలను పొందేందుకు వారు చేసిన నిబంధనలను తప్పనిసరిగా పాటించాలి.
లేఖన అధ్యయనము
ఈ సూత్రం గురించి మరింత తెలుసుకోండి
-
ప్రధాన చేతిపుస్తకము, 27వ అధ్యాయము: “జీవించియున్న వారి కొరకు దేవాలయ విధులు”
-
Gospel Topics: “Temples [దేవాలయాలు],” “Endowment [వరము],” “Marriage [వివాహము]”